ཆུ་བུར་མིག་གིས་མཇལ་བའི་བདག་གི་བླ་མ།
ཨེ་མ། དྭངས་གསལ་མཁའ་དབྱིངས་སུ་བྱོན་པའི་ཉ་གང་ཟླ་བ་བཞིན་ཅི་འདྲའི་ཤིན་ཏུ་མཛེས་ཤིང་སུས་ཀྱང་ལྟ་བས་མི་ངོམ་པ་གྱུར་དུས།
གསུང་དབྱངས་ཡན་ལག་ལྔ་དང་ལྡན་པའི་འདྲེན་མཆོག་ཌཱ་ཀི་འབུམ་གྱིས་བཀུར་བའི་ཐུགས་སྲས་མཆོག་གི་སྙན་པའི་བསེར་བུ་འཕྲོག་བྱེད་ཀུན་ལ་ལྡང་།
རྒྱལ་བས་བསྔགས་པའི་བསྟན་པའི་གཏད་རབས་དགྲ་བཅོམ་བཞིན་དུ་གངས་ཁྲོད་འདུལ་འཛིན་བྱེ་བའི་གཙུག་རྒྱན་གྱི་གཟི་འོད་འཕྲོ་སྟེ། འཇིག་རྟེན་ཆོས་བརྒྱད་ཀྱི་དྲི་མ་རྡུལ་ཙམ་མེད་ཅིང་སྐལ་ལྡན་སློབ་བུར་ཚད་མེད་བཞི་ཡི་ཆོས་སྦྱིན་བཞད་པའི་ཡིད་བཞིན་ནོར་བུ་ལས་ལྷག་པའི་སྐུ་དྲིན་ཅན། མདོ་རྒྱུད་མན་ངག་གི་འདབ་ལོ་ཚུལ་བཞིན་བཞད་དེ་ཡི་དམ་དཔའ་བོ་མཁའ་འགྲོ་ལྷ་ཚོགས་དུ་མས་རྒྱན་པའི་རྗེ་བཙུན་རྣལ་འབྱོར་དབང་ཕྱུག་ཆེན་པོའི་རང་མདངས་འཚེར་ཞིང་། གཞན་ཕན་གྱི་ཆེད་དུ་འོ་བརྒྱལ་ཆེ་ཆུང་གང་ལ་ཡང་མི་འཛེམ་པར་ལྷག་བསམ་མཚོ་མོའི་ནང་རབ་མཛེས་བཤད་སྒྲུབ་ཀྱི་མུ་ཏིག་རྒྱ་ཆེར་འཕྱུར་ཏེ། བྱེ་བྲག་བོད་བརྒྱུད་ནང་བསྟན་རིག་གནས་ཉམས་གསོ་བརྒྱུད་འཛིན་ཆེན་མོའི་ཉི་འོད་རབ་ཏུ་གསལ།
ཀུན་ལ་ཁྱབ་པའི་བརྩེ་སེམས་དང་ཐུགས་རྗེ་ཡིས་སྐུ་ཚེ་ཧྲིལ་པོ་ཤ་ཁྲག་མ་འདྲེས་པའི་དྭངས་གཙང་དགེ་བའི་བཟའ་བཏུང་ལ་ལོངས་སུ་སྤྱོད་དེ། ལུས་ཅན་ཐམས་ཅད་མ་ཡིས་བུ་ལ་འདང་ཆེན་བཟོ་བ་ལྟར་བྱམས་སྐྱོང་སེམས་ཁུར་གྱི་ལྟ་བས་ཕྱུགས་པའི་བྱང་སེམས་སྙིང་སྟོབས་ཅན།
ནོར་འཛིན་སྒེག་མོའི་དཀྱིལ་དུ་འཇམ་དབྱངས་སྤྲུལ་པའི་རྒྱལ་ཚབ་ཀྱི་ཅོད་པཎ་དཔྱངས་ཏེ། རིག་འཛིན་གོང་མའི་མན་ངག་ལ་རོལ་བའི་ལྷ་ཡི་ལྷ་སྲས་ཆེན་པོ་ཞིག །
ཤིན་ཏུ་འོད་སྟོང་ལྡན་པའི་སྐུ་ཚེ་ལ་བཀྲ་ཤིས་དཔལ་ཡོན་བཞད་པའི་སྨོན་ལམ་ཟབ་མོ་དཀོན་མཆོག་གསུམ་ལ་བཅོལ་བའི་དགེ་བས།
དྲི་མེད་བརྩེ་ཆེན་བསྟན་པའི་བདག་པོ་གཅིག་ཏུ་གྱུར་པའི་མ་ཡུམ་རྫོང་སར་ཆོས་སྡེ་ཆེན་པོ་ཡུན་ཏུ་གནས་པའི་རྒྱུ་གྱུར་ཅིག །
ཅེས་པ་འདི་ཡང་། རྗེ་བླ་མ་མཁན་ཆེན་ཐམས་ཅད་མཁྱེན་པ་གཞན་ཕན་སྙིང་པོའི་ཞབས་རྡུལ་ཡུན་རིང་དུ་བརྟེན་ཅིང་གསུང་གི་བདུད་རྩིས་སྐལ་བ་བཟང་པོར་གྱུར་པའི་སློབ་འབངས་ཀྱི་ཐ་ཆུང་འཛིང་འོད་གསལ་རྡོ་རྗེས་བྱང་མཐའི་སྒ་ཡུལ་གནས་སུ་ཤིན་ཏུ་དད་གུས་ཀྱིས་ཀློང་ནས་བརྡོལ་བའོ། །
