ནང་བསྟན་འདི་བདེན་དོན་ལ་མཐའ་སྐྱེལ་བའི་འཕྱུག་མེད་ཀྱི་རྣམ་དཔྱོད་ལམ་ལུགས་ཤིག་རེད།
གསུང་མཁན། རིག་འཛིན་ཧཱུྃ་ཀར་རྡོ་རྗེ།
ཟིན་འགོད་པ། གངས་ཚ་འཇོམས།
འཛམ་གླིང་འདིར་མཚོན་ན་མིའི་རིགས་འགའ་རེ་ནི་དོན་མེད་གསོད་གཏུབ་ལ་སྤྱོད་པའི་འཇིགས་སྐུལ་བར་ཆགས་ཡོད་པ་རེད། མི་གཞན་པའི་ཚེ་སྲོག་དང་རྒྱུ་ནོར་དག་རྩེད་སྤྱད་བྱས་ནས་ཕངས་མེད་དང་གཏོར་བརླག་བྱེད་པའི་མིའི་རིགས་ཤིག་ཡོད་པ་དང་། འགའ་རེ་ནི་ནམ་ཡང་དངུལ་ནོར་ཙམ་ལ་མགོ་འཁོར་ནས་གཡོ་སྒྱུས་རང་གཞན་བསླུ་བའི་རིགས་སུ་གནས་པ་དང་། འགའ་ཞིག་གིས་རྒྱུ་ཙམ་ཡོད་སོང་ན་ཆོག་པར་བསམ་ནས་བཅའ་ལག་རྫུན་མ་སོགས་མདོར་ན་ཡོད་ཚད་རྫུན་མ་བཟོས་ནས་མིའི་མགོ་གཡོག་གིན་འདུག དྲང་བདེན་གྱི་རང་བཞིན་ཆ་ཚང་བོར་སོང་བའི་མིའི་རིགས་ཀྱང་ཡོད་པ་རེད། ཡིན་ནའང་། འུ་ཅག་བོད་འདི་ལ་མཚོན་ན་དེ་འདྲའི་ཆག་སྒོ་ཆེན་པོ་ཐེབས་ནའང་། ད་དུང་ཕྱིར་ལ་འཁོར་ནས་དྲང་བདེན་དང་རྒྱུ་འབྲས་དགོས་ཞེས་གླེང་བ་འདི་མི་རིགས་ཀྱི་ཁྱད་ཆོས་རེད། ཆག་སྒོ་ཆེན་པོ་དེ་འདྲ་བྱུང་ཚར་རྗེས་བལྟས་ན་ཡང་བསལ་སྙིགས་སམ་ཀྲབ་ཀྲབ་བྱས་ནས་ད་ལྟ་བོད་ཀྱི་མི་རིགས་འདིས་ད་རུང་དྲང་བདེན་དང་རྒྱུ་འབྲས་བཤད་བཞིན་པ་འདི་བསམ་ན་རིག་གཞུང་གི་བཀའ་དྲིན་ཡིན་པར་མ་ཟད་མི་རིགས་ཀྱི་ཁྱད་ཆོས་ཀྱང་རེད།
གང་ལྟར་ཡང་དག་པའི་ལྟ་བ་དང་སློབ་གསོ་མེད་ཅིང་སེམས་ཀྱི་དམུ་རྒོད་དང་མུན་པ་ལ་འཁྱམ་ནས་ཡོད་པ་མང་པོ་འདུག འུ་ཅག་གིས་ཤེས་ས་དང་མི་ཤེས་ས་ན་མང་པོ་རེད། ཡང་དག་པའི་ལྟ་བ་མེད། སློབ་གསོ་མེད། སེམས་ནས་གང་འདོད་ཅི་འདོད་བྱས། སེམས་ལ་ཅི་དྲན་ན་དེ་ལས། དེ་ནི་རང་དབང་དང་བདེ་སྐྱིད་ཅིག་ཏུ་བསམ་རྒྱུ་མ་གཏོགས་གཞུང་ལུགས་དང་བསམ་བློའི་ཀུན་སྤྱོད་ཀྱི་ཚད་ཅུང་ཟད་ཀྱང་མེད་པའི་མི་མང་པོ་རེད། རང་ཅག་ལ་མཚོན་ན་རིག་གསར་གྱི་ཤི་བརླག་དང་བོར་སྟོར་མཐའ་མེད་པ་ཞིག་ཐེབས་ནའང་ད་རུང་དྲང་བདེན་དང་ཤེས་རབ་སོགས་བརླགས་མི་འདུག་ལ། དཔལ་འབྱོར་ཙམ་ལ་མགོ་འཁོར་ནས་འདུག་མཁན་ཚོའི་གྲས་སུ་ཡང་མ་ལྷུང་བར་སླར་ཡང་འཛམ་གླིང་ཐོག་བསམ་བློའི་མཛུབ་སྟོན་པ་དང་སྣེ་འདོན་པའི་གྲས་སུ་ལེགས་པར་བསྐྱོད་པ་ནི་རིག་གཞུང་འདིའི་གཟི་བརྗིད་དང་ནུས་པ་རེད། འུ་ཅག་གིས་དྲང་མོ་བཤད་དགོས་པ་རེད། དྲང་མོར་བཤད་ན་འུ་ཅག་གི་མི་རིགས་དང་རིག་གཞུང་འདིའི་ནང་ནས་འཛམ་བུ་གླིང་ལ་སྣེ་འདོན་བྱེད་མཁན་མ་མང་ན་མི་ཉུང་བ་ཡོད་པ་འདི་མི་རིགས་ཀྱི་ཁྱད་ཆོས་དང་རིག་གཞུང་འདིའི་གཟི་བརྗིད་རེད། ཡང་ན་འདི་དག་ཚང་མ་ཆག་སྒོ་ཆེན་པོ་དེའི་འོག་ནས་ཐོན་ཡོང་བ་རེད། ཡིན་ཡང་བསམ་བློའི་གཟི་འོད་མ་ཉམས་པར་འཛམ་གླིང་ལ་སྣེ་འདོན་ཐུབ་པ་རིག་གཞུང་འདིའི་ཁྱད་ཆོས་ཡིན་པ་རེད།
སངས་རྒྱས་བཅོམ་ལྡན་འདས་ཀྱི་ཁྱད་ཆོས་གཙོ་བོ་དེ་སྙིང་རྗེ་དང་ཤེས་རབ་གཉིས་ཟུང་འབྲེལ་བྱས་པ་དེ་རེད། རྒྱུ་འབྲས་རྟེན་འབྱུང་མ་གཏོགས་འཇིག་རྟེན་ན་གང་ཡང་འབྱུང་ཐབས་མེད་པའི་གནས་ཚུལ་ལེགས་པར་ཤེས་པའི་ཤེས་རབ་དང་། སེམས་ཅན་ཐམས་ཅད་ལ་རང་གི་མ་དང་བུ་ཡི་འདུ་ཤེས་ཀྱིས་གཅེས་པར་སྐྱོང་བའི་སྙིང་རྗེ་གཉིས་པོ་ཟུང་འབྲེལ་བྱེད་རྒྱུ་དེ་རེད། ནང་པའི་ཆོས་ཀྱི་ཁྱད་ཆོས་གཙོ་བོ་ཡང་མིའི་སེམས་ནང་ལ་གོ་བ་ཡག་པོ་སྟེར་ནས་རང་སེམས་ཞི་འཇམ་དུ་གཏོང་བ་དང་། བྱ་བ་ཚང་མ་འགྱུར་ལྡོག་ཅན་གྱི་རང་བཞིན་ཡིན་པར་ཤེས་སུ་འཇུག་པ། བཟང་ངན་གྱི་འགྱུར་བ་སྣ་ཚོགས་ཀྱི་ཁྲོད་དུ་རང་གི་སེམས་ལ་བརྡབ་སྐྱོན་ཁུར་དུ་མི་འཇུག་པ། གནས་ལུགས་དང་དྲང་བདེན་མི་འདོར་བར་རང་གཞན་གཉིས་ཀ་ལ་བསམ་བློ་གཏོང་ཐུབ་པར་བྱེད་པ་དེ་ནང་བའི་ཁྱད་ཆོས་གཙོ་བོ་རེད། ཅི་འདྲའི་དཀའ་ལས་ཆེན་པོ་དང་། ཆག་སྒོ་ཆེན་པོ་ཡོང་རུང་། རང་གི་སེམས་ཀྱི་ཁྱད་ཆོས་དེ་འབོར་དུ་མ་བཅུག སེམས་ལ་བརྡབ་སྐྱོན་ཁུར་དུ་མ་བཅུག གནས་ལུགས་དང་དྲང་བདེན་མི་འདོར་བ་རིག་གཞུང་གི་ཁྱད་ཆོས་གཙོ་བོ་རེད། ད་དུང་འུ་ཅག་མི་རིགས་ཀྱི་ཁྱད་ཆོས་གཙོ་བོ་ཡང་རེད།
རྟེན་འབྱུང་གི་ལྟ་བ་འདིས་མ་ཁྱབ་པ་ཡོད་པ་མ་རེད། འདི་སངས་རྒྱས་བཅོམ་ལྡན་འདས་ཁོ་ནས་གཙོ་བོ་གསུང་ཐུབ་ཀྱིན་པ་ཞིག་རེད། མཁས་དབང་དགེ་འདུན་ཆོས་འཕེལ་དང་། ད་ལྟ་བཞུགས་པ་ཁོང་སོགས་ནང་པའི་མཁས་དབང་རྣམས་དང་ནུབ་ཕྱོགས་ཚན་རིག་པའི་བར་གྱི་བགྲོ་གླེང་གཙོ་བོ་དང་། ཕན་ཚུན་གྱིས་ངོ་མཚར་བའི་ཤེས་བྱའི་མཁོ་འདོན་དག་ནི་རྟེན་འབྱུང་གི་ལྟ་བའི་སྟེང་ན་ཡོད་ལ། ནང་བའི་ཤེས་བྱ་ངོས་འཛིན་བྱེད་ཚུལ་ནི་ད་ལྟ་ཚན་རིག་པ་རྣམས་ཀྱིས་ཀྱང་རིན་ཐང་ཅན་གྱི་ཤེས་བྱའི་གནས་སུ་བརྩི་ཞིང་། ནང་བའི་གཞི་ལྟ་བའི་ངོས་འཛིན་ནི་འཛམ་གླིང་གི་ཤེས་བྱའི་སྡེ་ཁག་ཏུ་གོ་ས་ངེས་ཅན་ཞིག་ཟིན་ཡོད་པ་རེད། འདི་དག་ནི་རྫུན་མ་རེད། དཔལ་ཡོན་གཉིས་ལྡན་ནི་དུས་རབས་དང་མི་ཚེར་མེད་ཐབས་མེད་པ་ཡིན། དཔལ་ཡོན་གཉིས་ལྡན་དེ་དུས་རབས་ལ་མཚོན་ན་དགོས་ལ་མི་ཚེ་ལ་བཤད་ན་ཡང་ངེས་པར་དགོས་པ་ཞིག་རེད། བསམ་པའི་དཔལ་ཡོན་ནི་དངུལ་ནོར་སྒྲུབ་ཤེས་པ་ཙམ་ལ་མི་བྱེད་པར་རང་གཞན་གཉིས་ཀའི་ལུས་སེམས་གཉིས་ཆ་ལ་ཕན་བྱེད་ཀྱི་ཤེས་ཡོན་དག་ལ་གོ་དགོས་པ་རེད། བསམ་པའི་དཔལ་ཡོན་ཟེར་བ་དེ་དཔལ་འབྱོར་རིག་པ་ཙམ་ལ་མི་གོ་བར་རང་གཞན་གཉིས་ཀ་ལ་ཕན་ཐོགས་བྱེད་ཀྱི་རིག་གཞུང་དག་ལ་གོ་དགོས་ཟེར་བ་རེད། ནང་པས་བཤད་པའི་བྱམས་སྙིང་རྗེ་སོགས་བློ་སྦྱོང་གི་རིགས་དང་། སྟོང་ཉིད་སྒོམ་པ་རྣམས་ལ་ཚན་རིག་གིས་བརྟག་དུས་ཀླད་པའི་འགྱུར་བ་མི་འདྲ་བར་འགྲོ་བ་དང་། བྱམས་སྙིང་རྗེ་དང་བློ་སྦྱོང་། ཁྱད་པར་དུ་སྟོང་ཉིད་རྒྱུན་དུ་སྒོམ་བཞིན་པའི་མི་དག་གིས་ངོ་མ་ལུས་སེམས་ཟུང་འབྲེལ་བྱས་ཏེ་ལྷོད་ཅིག་གེར་སྒོམ་རྒྱག་དུས་ཚན་རིག་གིས་གློག་སོགས་ཀྱིས་བལྟས་འོང་པ་ན་དེའི་ཀླད་པའི་འགྱུར་བ་མི་འདྲ་བ་དེང་སང་བདེན་དཔང་བྱས་ཡོད་པ་རེད། ནམ་རྒྱུན་ཁོང་ཁྲོ་ལངས་པ་དང་ཡང་ན་རྟག་པར་སེམས་འཁྲུགས་འདུག་པའི་ཀླད་པའི་འགྱུར་བ་དང་སེམས་བག་ཕེབས་པའམ་ཁོད་སྙོམས་པོར་བསྡད་ཡོད་པའི་ཀླད་པའི་འགྱུར་བ་གཉིས་ཀ་མི་འདྲ་བར་ངོས་འཛིན་གྱིན་ཡོད་པ་རེད། དེ་ཅིའི་ཕྱིར་ཡིན་པ་དང་གང་ལེགས་པ་རེད་ཅེ་ན། ཀླད་པའི་འགྱུར་བ་དེ་ལ་བརྟེན་ནས་ལུས་པོ་བདེ་ཐང་ཡོང་གི་ཡོད་པ་རེད། སྟོང་ཉིད་དང་བྱམས་སྙིང་རྗེ་རྒྱུན་དུ་སྒོམ་བསྡད་པ་ཡིན་ན་ཀླད་པ་ཡང་བདེ་ཐང་དང་ལྡན་པ་རེད།
ནམ་རྒྱུན། ཙག་ཙིག་ནག་ནོག་ཆུང་ཆུང་ཞིག་གི་ཆེད་དུ་ཁོང་ཁྲོ་ལངས་པ་དང་སེམས་ཁུར་སྣ་ཚོགས་བྱེད་མཁན་དེ་རིགས་ཀྱི་མིའི་ཀླད་པའི་བདེ་ཐང་དང་གཏན་ནས་མི་འདྲ། རྒྱུན་དུ་བྱང་ཆུབ་ཀྱི་སེམས་དང་གཞན་ཕན་བྱང་ཆུབ་ཀྱི་སེམས་སྒོམ་པའི་མི་དང་རང་དོན་ཏག་ཏག་བསམ་འདུག་མཁན་གྱི་མི་གཉིས་ཀྱི་ཀླད་པའི་བདེ་ཐང་གི་ཁྱད་པར་མི་འདྲ་བ་ཚན་རིག་གི་ལག་རྩལ་སྟེང་ནས་ཚུར་རྩིས་འཕྲུལ་གྱི་ནང་ལ་དངོས་སུ་མངོན་འདུག་ཡོད་པ་རེད། ཨ་རིར་སུ་ཌན་ཧྥུར་སྒྲི (Stanford University)ཞེས་པའི་གཙུག་ལག་སློབ་གཉེར་ཁང་ཆེན་པོ་ཞིག་ཡོད། ཨ་མེ་རི་ཀའི་གཙུག་ལག་སློབ་གཉེར་ཁང་ཆེན་པོ་གསུམ་གྱི་ནང་གི་གཅིག་རེད། ནམ་རྒྱུན་དམིགས་བསལ་གྱིས་སྙིང་ནད་ཞིབ་འཇུག་བྱེད་མཁན་དང་སྙིང་ནད་སྐོར་གྱི་ཚན་རིག་པ་འགས་ང་ལ་ཅིག་ཅིག་དང་། ང་ལ་མུག་མུག་ཟེར་རྐྱང་བྱེད་མཁན་ནམ། ནམ་རྒྱུན་ང་ང་ཟེར་མཁན་ཚོར་སྙིང་ནད་གློ་བུར་བ་ལྡང་སླ་བོ་རེད་ཅེས་པའི་སྡོམ་ཚིག་ཅིག་ཀྱང་བཞག་ཡོད་པ་རེད། དེས་ན་གཞན་ཕན་དང་ལྷག་བསམ་བསྒོམས་ན་སྙིང་ནད་མི་འབྱུང་བར་ཕན་པ་འབྱུང་ངེས་པ་ཁོང་ཅག་གི་བཤད་སྟངས་ཤིག་རེད། གཞན་ཡང་ལྟོས་གྲུབ་ཀྱིས་བཞག་པའི་ཡོད་པ་དང་མེད་པར་ཁས་ལེན་སྟངས་རྣམས་ཀྱང་ཚན་རིག་གི་སྡེ་ཚན་ཡག་པོ་ཞིག་ཏུ་གྲུབ་ཡོད་པ་ཡིན། འདི་འུ་ཅག་གིས་རང་སྨོན་ཙམ་མ་ཡིན་པར། དེང་སང་མཁས་པ་མང་པོས་བཤད་ཀྱིན་པ་ཏག་ཏག་རེད། དེ་ཡང་བོད་མི་རིགས་ཀྱིས་བཤད་པ་མ་རེད་མི་རིགས་གཞན་གྱིས་བཤད་བཞིན་ཡོད་པ་དེ་འདྲ་རེད། མཁས་དབང་ཞིག་གིས་ནང་ཆོས་ནས་བཤད་པའི་ཚན་རིག་དང་རིག་གསར་གྱི་ཚན་རིག་ཞེས་ཚན་རིག་གི་རིགས་གཉིས་སུ་ནམ་རྒྱུན་གསུངས་པ་དེ་བཞིན་དང་། གཞན་ཡང་། ཨ་རིའི་ཁོ་ལམ་བྷི་ཡའི་སློབ་ཆེན་གྱི་ཆེད་མཁས་པ་ཞིག་གིས། ཚན་རིག་ཟེར་རྒྱུ་དེ་བདེན་དོན་ལ་མཐའ་སྐྱེལ་བའི་འཕྱུག་མེད་ཀྱི་རྣམ་དཔྱོད་ལམ་ལུགས་ཤིག་ཡིན་ན་ནང་བསྟན་དང་གཅིག་པ་རེད་ཅེས་བཤད་མྱོང་། ཁོང་གིས་ནང་བསྟན་འདི་བདེན་དོན་ལ་མཐའ་སྐྱེལ་བའི་འཕྱུག་མེད་ཀྱི་རྣམ་དཔྱོད་ལམ་ལུགས་ཤིག་རེད་ཟེར། དེ་ལྟར་ཚན་རིག་དེ་འདྲ་ཡིན་སོང་ན་གཉིས་ཀ་གཅིག་རེད་ཟེར་བ་རེད།
ནང་བའི་ཆོས་ལུགས་འདི་ལ་འཇིག་རྟེན་ལས་འདས་པའི་ཁྱད་ཆོས་ཀྱང་ཡོད་མོད། འུ་ཅག་གིས་སྟོང་ཉིད་དང་འཕགས་པའི་ལམ་སྒོམ་ཚུལ་སོགས་མང་པོ་བཤད་ཀྱིན་ཡོད་པ་རེད། ལྟ་བ་རྟེན་འབྱུང་དང་། སྤྱོད་པ་མི་འཚེ་བ་ཟུང་འབྲེལ་བྱེད་པའི་ཆོས་ལུགས་འདི་ནི་འཇིག་རྟེན་མི་ཆོས་དང་ཡང་དག་པར་སྒོ་བསྟུན་ཏེ། མི་ཆོས་ཡང་དག་པ་ཞིག་ཀྱང་ཡིན། འཇིག་རྟེན་ལས་མ་འདས་པའི་ཆོས་ལུགས་ཡང་དག་པ་ཞིག་ཀྱང་ཡིན་ཟེར་བ་དེ་རེད། མིའི་རིགས་ཀྱི་ཉིན་རེའི་མི་ཚེའི་ནང་གི་རེ་བ་སྐོང་བའི་ནུས་པ་ཡང་ཟབ་མོ་ཡོད་པས་ན་འཇིག་རྟེན་གྱི་ཆོས་ཟབ་མོ་ཞིག་ཀྱང་ཡིན། གལ་ཏེ་འཇིག་རྟེན་པའི་རེ་བ་སྐོང་བ་དང་། དེ་དག་གི་དགོས་མཁོ་བསྒྲུབ་པ། དེ་དག་གི་སེམས་ལ་འབབ་པ། དེ་དག་གི་ཁོང་དུ་ཚུད་པའི་ཁྱད་ཆོས་དག་མེད་ཅིང་། འཇིག་རྟེན་ལས་ཡན་གར་དུ་སོང་བའི་ཆོས་ལུགས་དེས་མིའི་རིགས་དང་སྲོག་ཆགས་རྣམས་ལ་ཞབས་ཕྱི་སྒྲུབ་ཚུལ་མེད་པས་ན་དགོས་པ་དེ་ཙམ་མེད་པ་རེད། གལ་ཏེ། ཆོས་ལུགས་དེ་འཇིག་རྟེན་པའི་ཆོས་ལུགས་རྐྱང་བ་ཞིག་ལ་བཞག་ནས་འཇིག་རྟེན་པ་དང་འབྲེལ་བ་མེད་པ་ཞིག་ཡིན་ན་དགོས་པ་དེ་ཙམ་ཞིག་མེད་སོང་བ་རེད། དེའི་ཕྱིར་སྐྱེས་བུ་རང་རང་གི་བློ་ཡི་རིམ་པ་དང་ནང་བའི་ཆོས་ཀྱི་ལྟ་བའི་རིམ་པའང་རེ་རེ་བཞིན་ཁ་སྐོང་མ་འཛོལ་བ་རེ་ཡོད། འདིས་ནང་ཆོས་འདི་འཇིག་རྟེན་གྱི་མ་འོངས་པའི་ཆོས་ལུགས་གལ་ཆེན་དུ་ཆགས་ཐུབ་པ་རེད། ཅིའི་ཕྱིར་རེད་ཅེ་ན། ཁམ་ཁམ་ཅན་ལ་ཁམ་ནི། ར་ར་ཅན་ལ་རན་ནི་ཟེར་བའི་དཔེ་ལྟར་ནང་པའི་ཆོས་དེ་འདྲ་ཞིག་ཡིན་པ་རེད། ཁྱོད་ཀྱི་ཁམས་དང་བསྟུན་ནས་སྐད་ཆ་བཤད་པ་དང་ཁྱོད་ཀྱི་ཁམས་དང་བསྟུན་ནས་འདོད་པ་ཞིག་བསྒྲུབ་ཐུབ་པས་ཆོས་ལུགས་ཤིག་རེད། དེ་བས་འཇིག་རྟེན་གྱི་མ་འོངས་པའི་ཆོས་ལུགས་གལ་ཆེན་དེ་ལ་ཆགས་ཐུབ་པ་རེད། དུས་རབས་བཅུ་དགུ་པ་དང་ཉི་ཤུ་བའི་མཚམས་ཀྱི་ཡོ་རོབ་དང་ནུབ་ཕྱོགས་ཀྱི་ཚན་རིག་དང་མཚན་ཉིད་རིག་པ་སོགས་ལ་ཆེས་ཕུལ་བྱུང་གི་མཁས་དབང་སྐུ་ཞབས་ཨ་བྷིར་ཊི་ཨེན་སི་ཁྲེན་Albert Einstein གྱིས། ནང་པའི་ཆོས་ལ་གང་ཞིག་རེ་སྒུག་བྱས་པའི་འཇིག་རྟེན་གྱི་མ་འོངས་པའི་ཆོས་ལུགས་སུ་འགྱུར་བའི་ཡོན་ཏན་དེ་ཡོད་པ་རེད། ཅེས་དང་། གལ་ཏེ་ཆོས་ལུགས་ཤིག་ལ་དེང་དུས་ཀྱི་ཚན་རིག་གི་དགོས་མཁོར་ཁ་གཏད་གཅོག་པ་ཞིག་ཡོད་ན་དེ་ནི་ནང་པའི་ཆོས་ཡིན་གྱི་རེད་ཅེས་གསུངས་པ་རེད། ཁོ་རང་ཚན་རིག་པ་ཞིག་རེད། ཁོས་ནང་པའི་ཆོས་ལུགས་ལ་གདེང་འཇོག་དང་རྒྱ་མར་འཇལ་བ་དེ་འདྲ་ཞིག་རེད། མ་འོངས་པའི་ཆོས་ལུགས་མང་པོ་ཞིག་གི་ཁྲོད་ནས་ནང་པའི་ཆོས་འདི་མ་འོངས་པའི་ཆོས་ལུགས་ལ་འགྱུར་ཐུབ་པ་དང་། འཇིག་རྟེན་གྱི་ཆོས་ལུགས་ལ་ཡང་འགྱུར་ཐུབ། མིའི་དགོས་མཁོ་སྐོང་ཡང་ཐུབ་པར་བཤད་ཀྱིན་ཡོད་པ་རེད། དེའི་ཕྱིར་ཚན་རིག་པ་རྣམས་ལ་དགོས་མཁོའི་དྲི་བ་ཞིག་བཏོན་ཡོང་ན་ནང་པའི་ཆོས་ལས་ལན་དེ་རྙེད་རྒྱུ་རེད་ཟེར་གྱིན་ཡོད་པ་རེད། ཅིའི་ཕྱིར་རེད་ཅེ་ན། རྟེན་འབྱུང་གི་ལྟ་བ་འདིའི་སྟེང་ནས་ཚན་རིག་པ་ཡང་དེ་ལས་ལྷག་བརྒལ་ཐུབ་ཡོད་པ་མ་རེད། ཁོ་རང་དེའི་ནང་དུ་ཡོད་པ་རེད། དེའི་ཕྱིར་ན། རྟེན་འབྱུང་གི་ལྟ་བ་རྒྱ་ཆེ་ཕྱོགས་ནས་བཤད་ཐུབ་ཡོད་པ་ནང་པ་སངས་རྒྱས་པའི་ཆོས་ལུགས་འདི་ཡིན་པས་དེ་ལྟར་ཟེར་གྱིན་ཡོད་པ་རེད། ཞིབ་འཇུག་གི་ནུས་པ་ཡོད་པ་གཞིར་བཞག་པའི་ཐོག་དེ་ལ་ཡིད་ཆེས་དང་སྤོབས་པ་ཡོད་དགོས་པ་ནི་ནུབ་ཕྱོགས་ཚན་རིག་པས་ཀྱང་མྱོང་བ་དང་འབྲས་བུ་དོན་གཉེར་གྱི་དཀྱིལ་སྙིང་དུ་བཟུང་ཡོད་པ་རེད། ཚན་རིག་པ་ཞིག་ཡིན་ན་ཞིབ་འཇུག་གི་ནུས་པ་ཡོད་པ་གཞིར་བཞག་རེད། དེ་ཡིན་དུས་ཁོ་རང་གིས་ཞིབ་འཇུག་བྱེད་ཀྱིན་པའི་འབྲས་བུ་དང་ཞིབ་འཇུག་གི་བྱ་བ་ལ་ཁོས་ངེས་པར་དུ་ཡིད་ཆེས་ཡོད་དགོས་ཞེས་ཁོ་རང་ཉིད་ལ་ཡང་སྤོབས་པ་ཞིག་ཡོད་པ་རེད། ནུབ་ཕྱོགས་ཚན་རིག་པ་ཚང་མའི་བྱ་བ་བྱེད་སྟངས་དེ་འདྲ་ཞིག་རེད། ནང་བསྟན་གྱིས་ཤེས་བྱ་དཔག་ཚུལ་རྣམས་ཚན་རིག་པས་ཀྱང་དོན་མཐུན་གྱིས་བདེན་དཔང་བྱེད་བཞིན་ཡོད་པ་དེ་ལྟ་ན། མང་པོའི་ནང་ནས་བཤད་པ་ཞིག་ཡིན་ན་དེ་བདེན་འདུག་ཟེར་ནས་ཚན་རིག་པས་ཀྱང་བདེན་དཔང་བྱེད་བཞིན་ཡོད་པ་རེད།
དེའི་ཕྱིར་ན། རང་ཅག་གི་བསྟན་པ་འདི་དང་འདི་སྤེལ་བ་པོ་སངས་རྒྱས་ལ་ཡིད་ཆེས་དང་གུས་པས་བཀུར་བ་ནི་ངེས་པར་བྱེད་འོས་པ་ཞིག་རེད། སངས་རྒྱས་ལ་ཡིད་ཆེས་ཤིག་བྱེད་རྒྱུ་དེ་འོས་ཤིང་འཚམ་པ་རེད་ཚན་རིག་དང་ཡང་མཐུན་པ་རེད། ཅིའི་ཕྱིར་ཞེ་ན་ཚན་རིག་པ་ཁོ་རང་གི་ཞིབ་འཇུག་ལ་ཡིད་ཆེས་དང་སྤོབས་པ་ཡོད་དགོས་ཟེར་བ་རེད། དེ་ཡིན་ན་འུ་ཅག་ནང་པའི་གཙིགས་སུ་འཛིན་པའི་ལམ་འདི་ལ་བསྙེགས་ནས་འབྲས་བུ་ཞིག་འཚོལ་ཐུབ་པར་ཡིད་ཆེས་ཡོད་དགོས་ཀྱིན་འདུག རྒྱུ་མཚན་ཁོ་རང་གིས་བདེན་དོན་མི་བསླུ་བ་ཡིན་ཟེར་བ་ངོ་མ་རེད། དེའི་ཕྱིར་ན་དེ་ལ་ཡིད་ཆེས་དང་སྤོབས་པ་གདེང་འཇོག་གུས་ཞབས་ཡོད་དགོས་ཟེར་བ་རེད། དེ་དུས་དཀོན་མཆོག་ལ་སྐྱབས་སུ་འགྲོ་ཞེས་པའང་དཀོན་མཆོག་ལ་བརྟེན་ན་རང་དོན་དུ་སེམས་ཀྱི་ཞི་བདེ་དང་། གནས་ལུགས་ལེགས་པར་ཧ་གོ་བ། ལུས་སེམས་ཀྱི་བདེ་ཐང་སོགས་རང་དོན་དང་། དེའི་ཐོག་བྱམས་བརྩེ་དང་། ལྷག་བསམ། ཤེས་རབ་སོགས་གཞན་ལའང་ཕན་པ་ཆེ་བའི་བྱ་བ་གཉེར་བར་ནུས་པས་ན་དེ་ལ་ཡིད་ཆེས་ཟབ་མོ་བྱེད་དགོས་ཀྱི་འདུག དཀོན་མཆོག་ལ་བརྟེན་ནས་སེམས་ནང་ལ་ཞི་བདེ་བསྒྲུབ་རྒྱུ་ངོ་མ་རེད། དེ་བཞིན་དུ་དཀོན་མཆོག་ལ་བརྟེན་ནས་དད་པ་དང་ཡང་ན་བྱམས་སྙིང་རྗེ་བསྒོམ་པ་ཡིན་ན་ལུས་སེམས་ལ་བདེ་ཐང་ཡོང་བ་ཚན་རིག་པས་ཀྱང་བཤད་ཀྱིན་ཡོད་པ་རེད། འདི་བདེན་འདུག་བསམ་ནས་ཡིད་ཆེས་དང་གུས་པ་ཡོད་པའི་མིང་ལ་སྐྱབས་འགྲོ་ཟེར་བ་རེད། དེ་ལས་ལྷག་པ་ཞིག་ཀྱང་ཡོད་པ་མ་རེད། དེའི་ཕྱིར་དེ་ལ་བརྟེན་ན་འདི་ཕྱི་གཉིས་ལ་ཕན་པའི་འབྲས་བུ་སྨིན་ངེས་པ་ཡིན་ལ་དེ་ལྟར་སྤོབས་པ་ཡོད་དགོས་ཟེར་བ་ལས་གཞན་མ་རེད། དེས་ན་སྐྱབས་འགྲོ་ནི་དོན་རྟོགས་པའི་རང་བཞིན་ཅན་ཡིན་པས་བླུན་རྟགས་སོགས་ཅི་ཡང་མིན། སྐྱབས་འགྲོ་ཞེས་པ་དེ་མ་ཤེས་པར་ཧོན་ལོག་ནས་བརྒྱུགས་སོང་བ་ཞིག་མ་ཡིན་པར་ཤེས་ཤིང་དོན་རྟོགས་ནས་བསྒྲུབ་བཞག་པ་ཡིན་ན་རང་དོན་འདི་འདྲ་ཞིག་འགྲུབ་པ་དང་གཞན་དོན་ཡང་འདི་འདྲ་བསྒྲུབ་རྒྱུ་དེ་ངེས་པར་ཡིན་པས་ཡིད་ཆེས་ཟབ་མོ་ཞིག་ལ་ཟེར་བ་རེད། དེའི་ཕྱིར་ན་བླུན་རྟགས་གཏན་ནས་ཡིན་པ་མ་རེད། སྐྱབས་སུ་སོང་བ་ཡིན་ན་རང་དབང་ཡོད་པ་མ་རེད་སོགས་ཟེར་གྱིན་འདུག་མོད། ངས་བལྟས་ན་དེ་ཞིབ་འཇུག་ཡང་དག་གི་སྐད་ཆ་ཞིག་མ་རེད་སྙམ།
དངོས་པོ་འཕེལ་རྒྱས་ཙམ་ལས་སེམས་གཏིང་ན་གང་ཡང་མེད་ན་དེ་ནི་མཐར་ཐུག་རང་ཉིད་ཕྱོགས་ཅི་ནས་ཕམ་ཁ་ཁུར་དུ་འཇུག་བྱེད་ཅིག་ཡིན་པ་རེད། དངོས་པོ་གཙོ་བོ་བྱེད་ཀྱིན་བྱེད་ཀྱིན་སེམས་ནང་དུ་རང་འདོད་ཤུགས་ཆེན་ཞིག་ཆགས་ཡོང་བ་ཆོས་ཉིད་རེད། ཚོང་ཞིག་བརྒྱབ་་དུས་སྒོར་མོ་ཁོ་ན་འཚོལ་རྒྱུ་གཙོ་བོ་བྱས་ན་ཚོང་ཤག་ལ་རྫུན་བཤད་པ་དང་མནའ་ཟ་བ་སྐེ་བསྡམས་པ་སོགས་ཀྱི་ལས་བྱེད་པ་རེད། དེ་དངོས་པོ་གཙོ་བོར་བྱས་པའི་རྐྱེན་རེད། དེ་དང་ཆབས་ཅིག་རྫུན་དང་གཡོ་སྒྱུ་ཇེ་མང་དུ་འགྲོ་བ་ཞིག་ཡིན་པ་རེད། རང་འདོད་ཤུགས་ཆེན་བྱེད་པ་དེ་ཚོ་ལ་སྐྱོན་ཆ་དང་ཡོན་ཏན་ཅི་ཡོད་ཅེ་ན་སྐྱོན་ཆ་ཆེ་བ་དང་ཡོན་ཏན་ཆུང་བ་རེད། ད་དུང་། སྙིང་དཀར་བའི་གྲོགས་པོ་ཇེ་ཉུང་ཇེ་ཉུང་དུ་སོང་ནས་མཐར་རང་ཉིད་གཅིག་པུར་ལྷག་པ་དང་གཞན་གྱིས་ངན་བཤད་བྱེད་ས་དང་སྐྱུག་ལོག་སའི་མི་ཞིག་ཏུ་ཆགས་འགྲོ་བ་རེད། དེའི་ཕྱིར་ནང་པས་བཤད་པའི་ཆོག་ཤེས་དང་གཞན་ཕན་གྱི་བསམ་བློ་འདི་དག་ནི་མི་ཚེའི་བདེ་སྐྱིད་བསྒྲུབ་པའི་རྨང་གཞི་ཟབ་མོ་རེ་ཡིན་པས་ནང་པའི་བསྟན་པ་ནི་ཆོས་ལུགས་ཙམ་དུ་མ་ཟད་སློབ་གསོའི་རང་བཞིན་ཆ་ཚང་ཡོད་པ་ཞིག་རེད། འདི་ཚང་མས་བཤད་ཀྱིན་ཡོད་པ་རེད། འཛམ་བུ་གླིང་ཡོངས་སུ་རྫོགས་པས་ནང་བའི་བསྟན་པ་འདི་ཆོས་ལུགས་ཤིག་སྟེ། རྨོངས་དད་ཙམ་དང་ཡིད་ཆེས་རྐྱང་བ་བྱེད་ས་ཙམ་མ་ཡིན་པར་སློབ་གསོ་ཡང་དག་པ་ཞིག་རེད་ཅེས་བཤད་ཀྱིན་ཡོད་པ་རེད། ཀྲུང་གོའི་དབུ་འདྲེན་ལས་ཁུ་ཆང་(李克强)གིས། ནང་བསྟན་ནི་རིམ་པ་མཐོ་བའི་སློབ་གསོ་ཞིག་རེད་ཅེས་གསུངས་མྱོང་པ་དེ་བསྐྱར་དུ་དྲ་ཐོག་ནས་བཙལ་ཡང་ད་ལྟ་རྙེད་མ་སོང་ཡོད་མེད་ཤེས་ཀྱིན་མི་འདུག འདི་ཚང་མས་དོ་སྣང་བྱེད་མི་དགོས། དེ་མ་གཏོགས་ཞི་ཅིན་ཕིང་གི་སྐད་ཆ་ཚང་མ་ངེད་ཅག་གིས་ཡང་བསྐྱར་དྲ་ཐོག་ནས་བཙལ་བ་ཡིན་དྲ་བ་ཆེན་པོ་འགའ་ཤས་ཀྱི་ནང་དུ་བཞག་འདུག ཕྱིར་ལ་ཁ་ཁེར་འཐེན་ཡོད་རུང་ད་དུང་དྲ་བ་ཆེ་ཤོས་འགའ་ཡི་ནང་དུ་འདུག
