阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：新民周刊
作者：胡展奋
沪语改写、讲述：李群
文字审核、推荐：丁迪蒙
编辑：王乙其
朋友最近送拨勒我一方鸡血章 嚇了我一跳，四个字：钱塘老人。
讲老实闲话，我个心理浪还来勿及适应迭个称号。不过，“钱塘”两个字我是欢喜个，搿是因为外婆拉一家门侪住勒杭州伊面。最近去了趟杭州，有得学生子勒六和塔下头个“六和茗轩”设宴招待。
席间有道名菜“清蒸钱塘海鲈鱼”，让我不胜伤感，也是同席者始料未及个。
钱塘鲈鱼享誉南北，指个是伊特有个七星海鲈。习惯浪向，江钓称为江鲈，海钓个叫做海鲈，因为七星鲈属于淡水咸水侪好生存个鱼类，搿类鱼往往肉质鲜嫩甘美，譬如鲥鱼、刀鱼搭仔鲻鱼。而我，最早晓得钱塘鲈鱼个辰光，还是一个到杭州去度暑假个13岁少年，外婆个邻居，有个叫“老姜”个正勒勒一块大石板浪杀鱼，伊条鱼啪啪啪个撞击石板，我过去一看，就学外婆个口气连老仔穷叫八叫：“舍勿得个、舍勿得个呀！”
鱼邪气漂亮。月白色个鱼身印了像墨玉一样个斑点，半透明个鳍搭仔尾巴一道闪动，有得玉质个光亮，大嘴巴看上去也是玉质个，勒勒大口大口个张发张发，生活勒上海个小囡从来呒没看见过介漂亮个鱼，就吵了要买一条，想勒废脱个淘米池里养起来。大人侪笑了：“买条来耍子？格伢儿真荒唐！”我老尴尬个。但刚刚认识个小朋友根生拉拉我个衣襟，认真个讲：明朝就去钓鲈鱼，养勒淘米池里，随便侬白相多少辰光。
离屋里3公里远个南星桥，是当时钱塘江有堤岸个一段，钓鱼个人勿少，侪是有好装备个职业钓手，嘲笑阿拉搿根小杆子好钓啥个鲈鱼，连牢几天，侪掗死空。看我失望，根生赛过比我还难过，勿停个勒一个留赖带胡子个人伊只鱼篓子附近走过来走过去。
蛮大个一只鱼篓子一半浸勒水里，阿拉朝里探头望，里向有得各种各样钓上来个鱼，一天下来，有得“翘嘴黄尾巴”，鳊鱼，鲫鱼，也有七星鲈。“看点啥？小鬼头！”看阿拉兜来兜去勿离开么，赖带胡子就凶巴巴个赶阿拉跑，“介欢喜就叫㑚大人来买！”“……呒没钞票。”阿拉小声嘀咕。赖带胡子斜瞄了阿拉一眼：呒没钞票可以用粮票来调呀，还有肉票。勿调就滚远点！
回屋里个路浪，根生一直呒没讲闲话。迭是1968年一个大伏天个夜里，杭州热得来七窍生烟，根生兄弟四人侪是睏地板个，我末，去搬了只大竹榻，邀根生出来一道露天睏。根生翻来翻去一直睏勿着，成更半夜我睏痴矇懂，好像觉着伊爬起来了，勿晓得勒作啥。天亮快，阿拉拨蚊子咬醒了，根生搭我讲，伊有办法了。
我没听懂，迷迷糊糊又睏着了。当天吃了中饭，又跟伊去南星桥了。根生埃辰光只比我大1岁，到了埃面，伊老老成个拿出2张半斤个肉票搭赖带胡子讨价还价，最后成功了，我们兜了一条活个钱塘大鲈回来，根生还用潮湿个薄纸头遮好鲈鱼个两只眼睛，讲迭能介，鱼就勿会勒半路浪死脱了。
淘米池里个水，根生老早就蓄满了。鱼一放进去，周围个人侪来看稀奇唻，搿条鱼也真是卖弄精神，上下腾跃，左右忽闪。我寻了根柳树枝，白相得开心啊，突然听到根生屋里向一片吵闹声，伊个娘勒尖叫，伊个爷哇啦哇啦个训伊，根生穷哭八哭，几个兄弟也侪勒责备伊，就像屋里向出了天大个事体。我刚刚想过去看看，拨娘舅一把拖开，讲，侬闯祸唻！为了侬，伊偷了屋里向个肉票去调鱼，现在伊个爷勒拨伊吃生活了呀。迭个号头，伊拉一家门只好吃素唻！
我吓煞脱了。伊个爷勒用毛竹片拼仔命个抽伊，“呼！呼！”根生想屏牢哭，但是搭咳嗽一样，哭也是憋勿牢个呀。邻居拉侪想去劝阻，但是根生个爷发格起来像只伤风个熊，啥人也劝勿听，最后，还是我德高望重个舅公（杭州人叫‘舅公爹爹’）出面道歉，送还了鲈鱼，还赔了半斤肉票搿桩事体再算了结。
后来，我搭根生长期保持通信联系，但勿幸，伊勒1994年就早早个过世了。
假使伊还活勒海，也要有70岁了伐。
作者：胡展奋
讲述：李群
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：启迪心田沪语
我知道你在看哟~
