阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：范大山的文艺委员
沪语修改、朗读：牛美华
文字修正、推荐：丁迪蒙
编辑：王乙其
从前个日脚慢，所传达个感情倒是交关个真诚，美好个。
八零年代是啥个样子个？前一腔，有勿少同学勒问我，我当时辰光就邪气吃惊，我再意识到伊拉侪是00后唻。八零年代对我伲老多老师来讲是童年，但对㑚来讲，是历史了，就像秦，汉，唐，宋一样，侪是一段陌生个未经之旅。
让我伲一道来打开看看一封旧个信，信纸个当中间侪拨虫蛀了，搿是一封80年已经过去，迎81年春节个家书，上头写勒海：祝侬勒新个一年里向身体健康！新年快乐！
1990年辰光，中国个固定电话普及率是1.1%，11亿中国人一共只有1.8万只手机，所以，80年代是一个书信年代，中国人几千年以来，鱼传尺素，雁寄鸿书，80年代是中国人最后一个还勒认认真真写信个年代，80年代个中国人还清清爽爽记得几化远个距离，要买几分洋钿个邮票，还老清爽个记得自家家乡个邮编，收信人填写好之后，后头还要写一个亲启，字典浪明明写个是亲启，但大部分中国人仍旧习惯性个，邪气顽强个拿伊写作亲啓，也记得假使信封里向摆了照片，要勒信封浪写：内有照片，请勿折叠。
80年代个中国人，还清清爽爽个记得信个开头应该是见字如面，展信舒颜。还记得信里向假使拜托对方做个事体后头要加一个“为盼”！八零年代的中国人还清清爽爽个记得，信个收尾要写某某草，要写“书未尽情，余待面述”；要写：“暂书至此，敬盼回复”；要写“就此搁笔，恕不一一”；
80年代个中国人还清清爽爽个记得，信末脚个祝福，要随四季而流转，顺送春祺，顺祝夏安、即送秋绥，敬送冬宁。还清爽个记得，要是是谈恋爱朋友写信说话，写完之后要拿信叠成功只好看个形状。可以是一个矩形，也可以叠成衣裳样子，蛮复杂，我拆了好几遍，也没弄明白迭个到底是哪能叠个，但是老好看个。
以前个日脚慢，伊个辰光个电视节目已经有互动环节了，有奖问答，哪能回答呢？还是写信，有封信寄拨四川电视台综艺大世界栏目组收个，一道来看看里向写眼啥？主持人同志，侬好！银白色圆形个物体是摄影辰光个一种反光器材。搿能个事体勒我伲2024年个今朝，是老难想象从前个日脚哪能介慢啊！现在情侣分只手，发只信息只需要一秒钟，下一秒就已经互相拉黑了。以前写一封信，再收到回信已经是半个号头以后了。搿半个号头辰光里，好让人想清爽老多老多个事体。再看封信，因为自家要随牢当地文化局去流动演出，搿就要搭好友写清爽后头自家每日天所勒个具体个位置，防止伊份思念寄错了地方。
我伲现在勒网浪看到个一些有意思个文章或视频，一揿就可以转发拨侬个朋友了。葛末80年代伊个辰光哪能转发呢？也可以个，剪报纸，就是伊个辰光个转发方式。80年代没有一揿转发，但是有得一剪转发个。再讲伊个辰光，大家仍旧坚守农业社会个德行，也就是可以动手做个物事就勿会出钞票去买。比如“叶脉书签”，搿就是80年代小囡个必备技能。去剪一片好看个树叶子，然后拿烧碱慢慢叫个熬，直到叶肉分离，再用牙刷小心清理，拿剩下来个叶脉再放到双氧水里向充分个浸泡，然后用清水冲清爽吹干，再夹到自家最欢喜个书里向，等到要搭最好个朋友写信个辰光寄拨伊看，几化个漂亮。要是好朋友个生日，搿一定要加一张精美个贺卡。
还有，80年代已经有得明星了，但还没高价明星周边来收割粉丝。因为80年代个粉丝，勒自家生产粉丝周边。搿就是先勒杂志浪拿自家欢喜个明星头像剪下来，然后去寻一只硬纸壳剪成带锯齿状个圆形，再用粉红色个绒线挨好缠到上头。迭个制作者，必定是一个老老可爱个一个小姑娘，搿是脱伊个好闺蜜写个信，讲：好了，勿写了，我要看电视剧《男人勿进》，拜拜，勿晓得阿里个对，祝侬考试科科侪帅！
40年快过去了，勿晓得迭个小姑娘现在晓得了伊个”拜“是啥意思了伐？
从前个日脚慢，现在离家勒外头个年轻人搭屋里个距离，因为即时通讯软件个出现而更加亲近了伐？看看几十年前头，人家写个信：爸爸，侬好！最近身体好伐？最近几天屋里老虫是勿是已经没了？侬要注意吃个物事摆摆好，去买眼老虫药摆勒屋里就可以灭老虫了。
八零年代还是一个诗歌时代，中国流量当时最高个明星是海子，从文科生到理科生所有个人侪勒写诗，大学里向追求小姑娘，哪能可以勿写诗呢？一道来看看搿一首来自一九八五年个拨自家心爱个姑娘写个诗，诗个名字叫《后湖，有一条船》
假使我有桨，
我会划到远方，
假使我有帆，
我会掌握航向.
假使风拨我勇气，
假使酒拨我豪放,
我会航向不可知个地方，
勿回顾也勿彷徨，
望仔湛蓝个湖面，
挥起意志个长矛，
带仔哈姆雷特个深沉，
像堂吉诃德一样。
我觉着木心先生写个《从前慢》，摆勒搿搭再合适勿过了。
记得早先少年辰光，大家诚诚恳恳讲一句，是一句。清早到火车站去，马路浪黑黜黜没行人，卖豆浆个小店勒冒热气，从前个日色变得慢，车、马、邮件侪慢，一生只够爱一个人。从前个锁也好看，钥匙精美有样子，侬锁了，人家就懂了。
八零年代并勿是一个黄金盛世，物质比现在远远叫匮乏，但是，人类诞生几十万年至今，八零后是出生辰光没互联网个最后一代人。
八零年代是人类进入互联网世界前个最后一夜，因为迭能，八零年代自有八零年代个时代风气，更何况少年子弟江湖老，红粉佳人两鬓斑。所以我还是想讲，80年代虽然过去了，我还是有眼想念伊个。
讲述：牛美华
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
