گۈزەل ھايات 9-بۆلۈم 34-قىسىم _ پىتنە - پاسات

34-قىسىم

پىتنە - پاسات

توردىكى بۇنداق پىتنە - پاساتلار بەزىدە راستتىنلا ۋەھشىي كېلىدىكەن.

- بولدى، ئۇلارنىڭ گەپلىرىگە پىسەنت قىلماڭ،  ئىككى شاكىچىكنىمۇ خاپا قىلىپ قويماڭ يەنە، - دېدى ئىليار. 

ھەرقانداق ئىشتا، بالا مەڭگۈ ئىليارنىڭ ئۈنۈملۈك چارىسى بولالايدۇ.

بۇنى ئاڭلىغان دىلارە دەرۋەقە ئىليارنىڭ قۇچىقىدا تۇرۇپ چوڭقۇر  نەپەس ئالدى.

ئەكرەم قايتىش ئىشىنى ناھايىتى تېزلا پۈتتۈرۈپ بولدى، مەركىزى شەھەردىكى ئىشلارنىمۇ ئادەم ئورۇنلاشتۇرۇپ بىر تەرەپ قىلدى.

ئۇ قايتىپ كەلگەندە، دىلارە مېھمانخانىدا ئولتۇرغان بولۇپ، چىرايى بىر ئاز تۇتۇلۇپ قالغانىدى.

خوجايىنى بولغان ئىلىيارمۇ ئېھتىياتچانلىق بىلەن ئۇنىڭ يېنىدا ھەمراھ بولۇپ، پۈتۈنلەي ئۇنىڭ چىرايىغا قاراپ ئىش قىلىۋاتاتتى.

ئەكرەم كۆڭلىدە خوجايىن ئىشنى يوشۇرۇپ قالالماي، ئاشكارىلاپ قويدىمۇ قانداق دەپ ئويلىدى.

قارىغاندا توردىكى ئىشلارنى بىر تەرەپ قىلىش-قىلماسلىق مۇھىم ئەمەس ئىكەن.

ئون نەچچە سائەت ئۇچقاندىن كېيىن، بىر نەچچەيلەن ئاخىرى مەركىزى شەھەر ئايرودۇرۇمىغا قوندى.

كەچ سائەت سەككىزدىن ئاشقاندا، موماي، گۈلباھار ۋە پەرھات ئەزىز مېھمانلار يولىدا دىلارەنى ئوڭۇشلۇق كۈتۈۋالدى.

 موماي بىلەن گۈلباھار  دىلارەنى ئورىۋېلىپ، ئىليارنى بىر چەتكە قىستاپ چىقىرىۋەتتى.

ئىلىيار ئاپىسى بىلەن مومىسىغا بىر نېمە دېيەلمەي،  ئۇلارنىڭ دىلارەنى قوغداپ ئالدىدا مېڭىشىغا يول قويدى.

پەرھاتمۇ تەبىئىي ھالدا ئايالى تەرىپىدىن بىر چەتكە قايرىپ قويۇلدى، ئەمما ئۇ ھېچقانداق ئىپادە بىلدۈرمەي، تەبىئىي ھالدا ئىليار بىلەن بىللە ماڭغاچ:

- بۇ ئىشنى قانداق قىلماقچى؟  - دەپ سورىدى.

- شامال ئۆتۈپ كەتسە، ھېچ ئىش بولمايدۇ.  - دېدى ئىليار.

پەرھات چىرايىنى پۈرۈشتۈرۈپ:

- ھېچ ئىش بولمايدۇ؟  ئۆزۈڭنىڭ نام-ئابرۇيىغا پەرۋا قىلمامسەن، دىلارە قانداق ئويلايدۇ؟ بىر ئەر كىشى ئۆزىنىڭ يۈزىنىمۇ تۇتۇپ قالالمىسا، ئۇنىڭ ئايالىنى قوغدايدىغان قانداق ئىقتىدارى بولىدۇ؟ سەن باشقىلار تەرىپىدىن مەسخىرە قىلىنىش ۋە مەنسىتمەسلىك بىلەن بىر ۋاقىتتا، باشقىلارنىڭ دىلارەگە قانداق قارايدىغانلىقىنى ئويلاپ باقتىڭمۇ؟  - دېدى.

ئىليار لەۋلىرىنى چىڭ پۈرۈشتۈرۈپ قويۇپ:

-  ئۇ ماڭا ئىشەنسىلا بولدى، مېنىڭ ئىززەت-ھۆرمىتىمنى باشقىلار بىر نەچچە ئېغىز گەپ قىلىپ يوقىتىپ قويالمايدۇ. ئۇمۇ ئاشۇ كىشىلەر تەرىپىدىن بۇرنىدىن يېتىلەپ مېڭىپ كەتمەيدۇ. - دېدى.

پەرھات سوغۇق كۈلۈپ قويۇپ، تۇيۇقسىز قەدىمىنى توختىتىپ، ئالدىدىكى تۇيۇقسىز يۈز بەرگەن قالايمىقانچىلىققا قاراپ:

- ئۇنداقتا ھازىرچۇ؟ - دېدى.

ئىليار بېشىنى كۆتۈرۈپ ئالدىغا قارىدى.

ئالدى تەرەپتىكى ئۈچ ئايالنى نەدىن پەيدا بولغانلىقىنى بىلگىلى بولمايدىغان كىشىلەر ئورىۋالغانىدى.

گەرچە ئەتراپتا ئۇلارنى قوغداش ئۈچۈن ئالدىن ئورۇنلاشتۇرۇلغان ياردەمچىلەر بولسىمۇ، لېكىن يەنىلا ئۇلارنىڭ قىزغىنلىقىنى ئاجىزلاشتۇرالمىدى.

- دىلارە خانقىز،  قارشى ئېلىش مۇراسىمىنىڭ مۇۋەپپەقىيەتلىك بولغانلىقىنى تەبرىكلەيمەن، ئۇنداقتا مەن شۇنى سوراپ باقاي، ئىليار ئەپەندى راستتىنلا  ئىچ كۈيئوغۇل بولۇپ قالدىمۇ؟ 

- ئۇ ئىلگىرى ئۆزىنىڭ ئاقپىشماق ئىكەنلىكىنى ئېتىراپ قىلغان، ئۇنداقتا سىلەرنىڭ ئاراڭلاردا زادى قانداق مۇناسىۋەت بار؟ سىز باشتىلا ئۇنىڭ مۇشۇ تەرىپىنى ياقتۇرۇپ قالغانمۇ؟ 

- ئۇ بوشى مالىيە گۇرۇھىنىڭ غايەت زور مال-مۈلكىدىن ۋاز كېچىپ، سىز بىلەن بىللە بولۇشنى خالىدى، دىلارە خانقىز،  ئويلاپ باقتىڭىزمۇ، ئەمەلىيەتتە ئۇ سىزنىڭ كېلىپ چىقىشىڭىزنى بۇرۇنلا بىلىپ قېلىپ، شۇڭا  سىزگە چاپلىشىۋالغان بولۇشى مۇمكىنمۇ؟  

دىلارەنىڭ چىرايى تۇتۇلۇپ كەتكەن بولۇپ، نەزەر دائىرىسى ئالدىدىكى قالايمىقانچىلىققا چۈشۈپ، سوغۇق ئاۋازدا :

- سىلەر ئەسلى سېنارىست بولۇشۇڭلار كېرەك ئىكەن. - دېدى. 

كىشىلەر  گەپ قىلالماي قالدى،  بەس-بەستە مۇنازىرە قىلىنغان بىر قانچە سوئال ئۈچۈن،  مۇشۇنداق جاۋابقا ئېرىشىپ پەقەتلا رازى بولمىدى.

-    ئۇنىڭ بالىسىغا ھامىلىدار بولۇپ قالغانلىقىڭىز ئۈچۈن   تەن بەرمەكتىن باشقا ئامالىم يوق دەپ ئويلاپ قالدىڭىزمۇ؟   - دەپ سورىدى  بىرى.

دىلارەنىڭ مۇزدەك كۆزلىرى ئاستا-ئاستا تارىيىپ:

- سىزنىڭ يەنە نېمە دېگۈڭىز بار؟ - دېدى. 

- سىز ھازىر كاتتا ئائىلىنىڭ ئەزىز خانقىزىغا ئايلاندىڭىز، ھازىرقى ئىليار ئەپەندى بولسا ئائىلىسىدىن تەرىپىدىن قوغلاپ چىقىرىلغان، ھېچنېمىسى يوق بىكار تەلەپ...    . 

پاق! 

ئۇ كىشىنىڭ گېپى تېخى تۈگىمەستىنلا، دىلارە ياردەمچىلەرنىڭ ئارىسىدىن ئۆتۈپ، ئۇ كىشىنىڭ قولىنى سوزۇپ  ئاغزىغا بىرنى ئۇردى.

نەق مەيدان بىر مەھەل جىمىپ قالدى،  

كۆپچىلىك دىلارەنىڭ نۇرغۇن ئادەمنىڭ ئالدىدا باشقىلارنى ئوچۇقتىن-ئوچۇق ئۇرۇشىنى خىيالىغىمۇ كەلتۈرمىگەنىدى.

 كۆپچىلىك ئەربابى، كاتتا ئائىلىنىڭ ئەتىۋارلىق خانقىزى، مەركىزى شەھەردىكى داڭلىق كۆڭۈل ئېچىش شىركىتىنىڭ باش دىرېكتورى، ئويلىمىغان يەردىن ئادەم ئۇردى .

بۇ ھەرىكەت ئېنىقكى نۇرغۇن كىشىلەرنىڭ بولۇپمۇ تەشۋىقات ساھەسىنىڭ نارازىلىقىنى ۋە قارشىلىقىنى قوزغايدۇ ھەمدە ئۇنى ئاسانلىقچە بوش قويۇۋەتمەيدۇ.

ئەگەر بىر كۆڭۈل ئېچىش شىركىتى تەشۋىقات ساھەسىنىڭ قوللىشىغا ئېرىشەلمىسە،  ۋەيران  بولغان بىلەن ھېچقانداق پەرقى يوق.

لېكىن  دىلارەنىڭ يۈرىكى ھەقىقەتەن چوڭ  .

كۆپچىلىك ئىنكاس قايتۇرۇپ، دىلارەنى سۈرەتكە تارتىپ، سىنغا ئېلىۋالدى.

ئەمما دىلارە سوغۇق چىرايى بىلەن ھاڭۋىقىپ قالغان كىشىنىڭ قولىدىن مىكروفوننى تارتىۋېلىپ،  بوينىدىكى خىزمەت كارتىسىنى تارتىپ ئېلىپ:

- مەن  تاراتقۇلارنى خېلى چۈشىنىمەن دەپ ئويلايمەن، ئەمما بۇنداق ژۇرنال تەھرىراتىنىڭ بارلىقىنى ئاڭلاپ باقماپتىمەن. ئەگەر ئاخىرغىچە سۈرۈشتۈرمەكچى بولسىڭىز، مەنمۇ چوقۇم ئاخىرغىچە ھەمراھ بولىمەن، پەقەت  ئارقىڭىزدىن كۈشكۈرتكەن ئادەمنى تارتىپ چىقىشىمدىن قورقمىسىڭىزلا بولدى.

ئۇنىڭ سىزنى تاپقانلىقىنىڭ ئۆزى بىر نادانلىق، بىر ئادەمنى دەسسىمەكچى بولغاندىكى مەقسىتى شۇنچە روشەن تۇرسا، سىز مېنى قانچىلىك ھاماقەت  كۆرۈپ قالدىڭىز، مېنى ھېچنېمىنى ھېس قىلالمايدۇ دەپ قالدىڭىزمۇ؟ - دېدى.

باشقىلار شۇ چاغدىلا نېمىلەرنىدۇر ھېس قىلىپ، بېشىنى بۇراپ، بايىلا  شاپىلاق يېگەن كىشىگە گۇمان بىلەن قارىدى.

دەرۋەقە، خۇددى ئۇلار بايا ئېيتقاندەك، دىلارە كۆپچىلىك ئەربابى بولۇش سۈپىتى بىلەن، تېخىمۇ مۇھىمى ئەقىللىك ئادەم بولۇش سۈپىتى بىلەن، ھەر قانچە غەزەپلەنسىمۇ، ئاممىۋى سورۇندا ئادەم   ئۇرمايدۇ.

لېكىن دىلارە ھەقىقەتەن قوبۇل قىلالمىدى، چۈنكى ئۇ ئادەم ئىليارغا تۆھمەت قىلدى.

گەرچە ئۇ ئادەمنىڭ گېپى تولۇق چىقمىغان بولسىمۇ، لېكىن ئەخمەقمۇ  ئۇنىڭ كېيىنكى گېپىدە نېمە دېمەكچى بولغانلىقىنى ئاڭلاپ چۈشىنەلەيدۇ.

ئۇ كىشىمۇ تازىمۇ قاپ يۈرەككەن، ئىليار ھەرقانچە غۇربەتچىلىكتە قالغان تەقدىردىمۇ، ئۇ يەنىلا بوشى مالىيە گۇرۇھىنىڭ ئادىمى، تومۇرىدا ئېقىۋاتقىنى دادىسى پەرھاتنىڭ قېنى.

ئۇغۇ ئائىلىسىدىن قوغلاندى، لېكىن، نەدىمۇ بالىسىدىن ئۆمۈرلۈك ئاغرىنىپ، تەتۈر قارىشىپ ئۆتىدىغان ئىش بولسۇن؟

ۋاقىت ئۇزارغانسېرى، ھامان بىر ئادەم ئاۋۋال يول قويىدۇ.

خەقنى ھېچنېمىسى يوق بىكار تەلەت دېيىشكە پېتىنىغىنى قارا، ھەقىقەتەن ئۆزىنىڭ بەك ئۇزۇن ياشاپ قالغىنىدىن ئاغرىنىپ قالغان ئوخشايدۇ.

 دىلارەنىڭ ھازىرقى سۆزى كۆپچىلىككە ئەگەر بۇ ئادەمنىڭ كەينىدە بېرەر كۈشكۈرتكەن ئادەم بولمىسا، ھەرگىز بۇنداق غالجىرلىشىپ، ئۆزىمۇ ئىشەنمەيدىغان گەپلەرنى قىلمايدىغانلىقىنى تېخىمۇ ئېنىق چۈشەندۈرۈپ قويدى.

ھېلىقى ئەر خۇدۈكسىرەپ:

- مەن پەقەت ھەقىقىي ئەھۋالنى قوغلىشىشقا ئالدىراپ كېتىپتىمەن... - دېدى. 

دىلارە سوغۇق تەلەپپۇزدا:

- سىزنىڭ ھەقىقىي ئەھۋالنى قوغلىشىش ئۇسۇلىڭىز   ئادەمنىڭ ئامراقلىقىنى كەلتۈرىدىكەن!  - دېدى.

ئۇنىڭ سوغۇق نەزىرى مەيداندىكى ھەممە ئادەمنى سىيپاپ ئۆتتى، ئاخىرىدا ئۆتكۈر تەلەپپۇزدا:

- مەن سىلەرنىڭ ھەقىقىي ئەھۋالنى قوغلىشىشىڭلارغا توسقۇنلۇق قىلمىدىم، لېكىن مەن يەنىلا سىلەرنىڭ   ئەھمىيەتكە ئىگە ئىشلارنى قىلىشىڭلارنى ئۈمىد قىلىمەن. مەن خانقىزمۇ - ئەمەسمۇ، ئىليار مەقسەتلىك ھالدا ماڭا يېقىنلاشتىمۇ، ھەتتا ئىچ كۈيۈئوغۇل بولماقچى بولدىمۇ، بۇ ئىشنىڭ سىلەرگە زادى نېمە پايدىسى بار؟ شۇنداق بولسا نېمە بوپتۇ؟ ئۇنداق بولمىسا يەنە نېمە بوپتۇ؟ سىلەرگە، جۈملىدىن بۇ ئىشقا كۆڭۈل بۆلىدىغان بارلىق كىشىلەرگە قانداق تەسىر كۆرسىتىدۇ؟  ئەجەبا بىز سىلەرگە تاماق قىلىپ يېگۈدەك زاكۇسكا تەييارلاپ بەرمىسەك، ھەممىڭلار ئاچلىقتىن يىقىلىپ قالامسىلەر؟  - دېدى .

نەق مەيداندىكى كىشىلەرنىڭ چىرايى ئانچە ياخشى ئەمەس ئىدى، 

- دىلارە باش دىرېكتور، سىزمۇ ئوخشاشلا كۆڭۈل ئېچىش خىزمىتى بىلەن شۇغۇللانغۇچى، بۇنداق دېسىڭىز تازا مۇۋاپىق بولماسمىكىن. - دېدى بىرەيلەن. 

- مەن پەقەت ئۆزۈمنىڭ ئۇسۇلى ئارقىلىق بۇ ئىشقا بولغان پوزىتسىيەمنى ئىپادىلەۋاتىمەن! مەن ئاۋام ئۈچۈن سەنئەتكار ۋە مۇنەۋۋەر ئەسەرلەرنى روياپقا چىقىرىشقا مەسئۇل، بۇ مېنىڭ كۆڭۈل ئېچىش خىزمەتچىسى بولۇشتىكى مەسئۇلىيىتىم ۋە مەجبۇرىيىتىم، بۇ ھەرگىزمۇ مەن ۋە ئائىلەمدىكىلەرنىڭ ئىززەت-ھۆرمىتىنى يەرگە ئۇرۇپ، ئۇلارئارقىلىق ئاتالمىش كۆڭۈل ئېچىش  ئۇچۇرى بىلەن تەمىنلەشكە سەۋەب بولالمايدۇ. 

ئەگەر يەنە چۈشەنمىگەن بولساڭلار،  يەنە بىر قېتىم ئېنىق تەكىتلەپ ئۆتەي! سىلەرنىڭ بايا سورىغا بارلىق سوئالىڭلار پۇت تىرەپ تۇرالمايدۇ. توردىكى بەزى گەپ-سۆزلەرگە قارىتا، مەن پەقەت تۆھمەت ۋە پىتنە-پاسات دەپ قارايمەن، شۇنداقلا مەسئۇلىيىتىنى بىر-بىرلەپ سۈرۈشتۈرۈپ، قانداق ئاقىۋەتكە قېلىشقا تېگىشلىك بولسا، ئاخىرغىچە ھەمراھ بولىمەن. 

دىلارەنىڭ ھەر بىر سۆزى جاراڭلىق ۋە كۈچلۈك بولۇپ، كىشىگە بېسىم ھېس قىلدۇردى.

باشقىلار ئۇنىڭ  ھەيۋىسىدىن  نەپەس ئالالماي قالدى.

بىر مەھەل دىلارەنىڭ چىشىغا تېگىشكە جۈرئەت قىلالماي، دىققىتىنى يېنىدىكى موماي بىلەن گۈلباھارغا قاراتتى.

- ئىككى خانىم،  ئىليار ئەپەندىنىڭ ئۆيدىن قوغلاپ چىقىرىلغانلىقىدا قايتا بۇرىلىش ھاسىل قىلىش ئىمكانىيىتى بارمۇ؟ ئىككىڭلارنىڭ بۇنىڭغا بولغان پوزىتسىيەڭلار قانداق؟  - دەپ سورىدى.

- ئىليار ئەزەلدىن مېنىڭ نەۋرەم. ئۇنى كىم ئۆيدىن قوغلاپ چىقارغان بولسا،  بېرىپ شۇنىڭدىن سوراڭلار، ئۇنىڭدىن ئۆيدىن قوغلاپ چىقىرىلغان نەۋرىسى بار-يوقلۇقىنى سوراپ بېقىڭلار. - دېدى موماي. 

موماينىڭ سۆزى ئۇلارنىڭ قەلبىنى لەرزىگە سالدى.

قوغلاپ چىقىرىش دېگەن سۆزنى بوۋاي باشتىن-ئاخىر ئېغىزىدىن چىقىرىپ باقمىغان.

ھەممە گەپنى ئۇلار ئۆزلىرى ئويلاپ چىققان.

مەنىسى ئوخشاش بولسىمۇ، لېكىن يەنىلا ئازراق پەرقى بار.

- بۇ... ئىليار ئەپەندىنىڭ  كاتتا  ئائىلىگە ئىچ كۈيئوغۇل بولغانلىقى توغرىسىدىكى بۇ ئىشقا  ئىككىڭلارنىڭ نېمە دېگۈڭلار بار؟ - دەپ سورىدى بىرەيلەن. 

- شۇنداق بولسا نېمە بوپتۇ؟ سىلەرنىڭ ئۆينىڭ گۈرۈچىنى يېدىمۇ؟ بىڭسىڭلار بولسا سىلەرمۇ كاتتا ئائىلىگە كۈيۈئوغۇل بولاي دەپ سىناپ بېقىڭلار خەق سىلەرنى يارىتامدىكىن كۆرۈپ باقاي!  - دېدى گۈلباھار   غەزەپلىنىپ، ئۇ بۇ ئادەملەرنىڭ ئەپت-بەشىرىسىنى  كۆرۈپ كۆنمىگەن بولغاچقا گەپنى ئۇچۇقلا قىلدى.

ئىلگىرى ئاممىۋى سورۇنلاردا، ئۇ  پەرھاتنىڭ خانىمنىڭ سالاھىيىتى بىلەن ئۆزىنى چەكلەپ كەلگەنىدى.

بۇ بوشى مالىيە گۇرۇھىنىڭ ئۇنىڭغا زادى نېمە پايدىسى تەگدى؟

ئەگەر پەرھاتنىڭ يۈزىنى دېمىگەن بولسا، بۇ يەردە يارىماسلىق قىلىپ ،  بۇنداق ئۇۋالچىلىققا چىداپ ئولتۇرمايتتى.

ئۇنىڭ گېپىنى ئاڭلاپ، كىشىلەر يەنە بىر قېتىم گەپ قىلالماي قالدى.

- يەنە باشقا مەسىلە بارمۇ؟ ئەگەر يوق بولسا، خاپا بولماي نېرى تۇرۇڭلار. - دېدى گۈلباھار 

ئۇلار سەل خالىماي:

-  دىلارە باش دىرېكتور، سىزنىڭ بايىقى پوزىتسىيەڭىز ئىليار ئەپەندىنىڭ قانداق بولىشىدىن قەتئىينەزەر، ئۇنىڭغا ئىشىنىشنى خالايدىغانلىقىڭىزنى، ئۇنىڭ بىلەن ئىزچىل بىللە بولىدىغانلىقىڭىزنى تولۇق چۈشەندۈرۈپ بېرەلەمدۇ؟

ئەگەر ئىشتا باشقىچە ئۆزگىرىش بولۇپ قالسىمۇ قورقمامسىز، دېمەكچى بولغىنىم، ئىليار ئەپەندى راستتىنلا مەقسەتلىك ھالدا سىزگە يېقىنلاشسا، قانداق قىلىسىز؟   - دەپ سورىدى بىرەيلەن.

دىلارە ئۇ ئادەمگە سۇس قاراپ قويۇپ:

- مەن ئۇنىڭغا ئىشىنىمەن، شۇڭا، سىزنىڭ ئەڭ ئاخىرقى سوئالىڭىز پۇت تىرەپ تۇرالمايدۇ.  - دېدى.

كۆپچىلىكنىڭ يەنە دەيدىغان گېپى قالمىدى.

ئەمما ئۇلارنىڭ كەينىدە تۇرغان ئىليار ئاستا كۈلۈپ قويۇپ، بۇرۇلۇپ بىر چەتتە تۇرغان پەرھاتقا قارىدى، ئۇنىڭ بۇ تۇرقىدىن قىلچە يوشۇرغىلى بولمايدىغان مەغرۇرلۇق چىقىپ تۇراتتى :

- ھازىر؟ سىزنىڭچە مەن قانداق قىلىشىم كېرەك؟  - دېدى.

 پەرھات ئاچچىقىغا ھاي بەردى. 

 سولتەك دادىسىنىڭ ئالدىدىمۇ مۇھەببىتىنى كۆز - كۆز قىلىۋاتقىنى قارا.

بىردەمدىن كېيىن پەرھات سوغۇق كۈلۈپ:

-  بەك بالدۇر مەغرۇرلىنىپ كەتمە، ئۇنتۇپ قالما، سەن مەندىن نەچچە ئون يىل ئاز ياشىدىڭ، ئىشلار تېخى ئاخىرلاشمىدى.

توغرا، كۆرۈۋېلىشقا بولىدۇكى، دىلارە ساڭا كۆڭۈل بۆلىدىكەن، لېكىن قانچە كۆڭۈل بۆلگەنسېرى، قىلدەك نۇقساننى شۇنچە قوبۇل قىلالمايدۇ، سەن پەرۋا قىلمىغانچە، ۋاقتى كەلگەندە  بۇلۇڭغا مۆكۈۋېلىپ ياش تۆكىدىغان ئادەم ئۇ بولىدۇ.  - دېدى.

ئىليارنىڭ چىرايىنىڭ بارغانسېرى سەتلىشىپ كېتىۋاتقانلىقىنى كۆرۈپ، پەرھاتنىڭ كۆڭلى ئارامىغا چۈشتى،  دىلارەگە بىر قاراپ قويۇپ سۆزىنى داۋاملاشتۇردى :

- ئۇنىڭ بايىقى تۇرقىدىن قانچىلىك ئاچچىقى كەلگەنلىكىنى بىلىگىلى بولىدىغاندۇ؟ - دېدى. 

ئىليارنىڭ چىرايى قارىداپ كەتتى.

پەرھات مەقسىتىگە يېتىپ  يەڭگىل قىياپەتتە ئايالىغا قاراپ ماڭدى.