ཏང་གི་ཚོགས་ཆེན་ཉི་ཤུ་པ་དང་། སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་ཆེད། སྟེང་ཆེན་རྫོང་གིས་ལས་ཞུགས་ལས་གཏོད་ཀྱི་བྱ་ཐབས་གསར་པ་ཧུར་ཐག་བཏོན་ནས་ནུས་ཤུགས་ཡོད་རྒུས་སྟེང་ཆེན་གྱི་ཞིང་འབྲོག་མང་ཚོགས་ལ་བདེ་སྐྱིད་ལྡན་པའི་འཚོ་བའི་ལམ་བུ་བཏོད་བཞིན་ཡོད།
ཐོག་མཐའ་བར་གསུམ་དུ། སྟེང་ཆེན་རྫོང་གིས་ལས་ཞུགས་གནད་དོན་ལ་ཚད་མཐོའི་མཐོང་ཆེན་བྱས་ཏེ། དམངས་འཚོ་འགན་ལེན་དང་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་ལས་འགན་གལ་ཆེན་ཞིག་ཏུ་བརྩིས་ཡོད། ངལ་རྩོལ་པའི་ལས་ཞུགས་རྩལ་ནུས་ཆེ་རུ་གཏོང་ཆེད་སྟེང་ཆེན་རྫོང་གིས་ལས་ཞུགས་གསོ་སྦྱོང་བྱེད་ཤུགས་ཆེ་རུ་བཏང་ནས། འདི་ལོ་ནས་བཟུང་གློག་ལས་པ་དང་ཚ་ལ་རྒྱག་མཁན། གཡོས་སྦྱོར་སོགས་ལས་རིགས་རྩལ་ནུས་གསོ་སྦྱོང་འཛིན་གྲྭ་སྣ་ཚོགས་ཐེངས་ ༩ ཉེར་བ་དང་གསོ་སྦྱོང་སློབ་མ་ ༡༡༡༠ ཟིན་ཡོད། ཆེད་ལས་ཀྱི་རིགས་པའི་གཞུང་ལུགས་སློབ་ཁྲིད་དང་ལག་ལེན་བཀོལ་སྤྱོད་བྱས་པ་བརྒྱུད་སློབ་མ་ཚོས་ལག་རྩལ་སྣ་གཅིག་ཁོང་དུ་ཆུད་ནས་བདེ་བླག་ངང་ལས་ཞུགས་ཐུབ་རྒྱུར་རྨང་གཞི་བརྟན་པོ་ཞིག་བཏིང་ཡོད།
ལས་གཏོད་རོགས་སྐྱོར་ཐད། སྟེང་ཆེན་རྫོང་གིས་གཟིགས་སྐྱོང་སྲིད་ཇུས་རབ་དང་རིམ་པ་བཏོན་པ་དང་། བྱ་གཞག་གཏོད་རྒྱུར་རོགས་སྐྱོར་བྱེད་པའི་མ་དངུལ་བཙུགས་ནས་བྱ་གཞག་གཏོད་མཁན་ལ་འགོ་འཛུགས་མ་དངུལ་གྱི་རྒྱབ་སྐྱོར་དང་། སྲིད་འཛིན་གྱི་ཞིབ་མཆན་འགོད་པའི་བརྒྱུད་རིམ་སྟབས་བདེ་རུ་བཏང་ནས་བྱ་གཞག་གཏོད་མཁན་ལ་སྟབས་བདེ་ལ་ཕན་འབྲས་ཆེ་བའི་ཞབས་ཞུ་མཁོ་འདོན་བྱས་པ་མ་ཟད། བྱ་གཞག་གཏོད་པའི་རྟེན་གཞི་བཙུགས་ནས་བྱ་གཞག་གཏོད་མཁན་ལ་ལས་ཡུལ་དང་སྒྲིག་ཆས་སོགས་མཁྲེགས་ཆས་སྒྲིག་བཀོད་མཁོ་འདོན་བྱས་ཡོད། སྲིད་ཇུས་དེ་དག་གི་སྐུལ་ལྕག་འོག་མི་དེ་བས་མང་བ་ཞིག་ལས་གཏོད་ཀྱི་ཚ་རླབས་ཁྲོད་ཞུགས་ཤིང་། མིག་སྔར་སྟེང་ཆེན་རྫོང་གིས་ལས་གཏོད་རྣམ་གྲངས་ ༣༢༩ ལ་གྲུབ་འབྲས་ཐོབ་པའི་ངང་རོགས་སྐྱོར་བྱས་པ་དང་མི་གྲངས་ ༣༥༠ ལས་ཞུགས་ཐུབ་རྒྱུར་སྐུལ་ཁྲིད་བྱས་ཡོད།
སྟེང་ཆེན་རྫོང་གིས་བྱ་སྤྱོད་ངོ་མའི་ཐོག་ནས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་བྱས་ཏེ། ལས་ཞུགས་ལས་གཏོད་ཀྱི་བྱ་ཐབས་རྒྱུན་ཆད་མེད་པར་འཚོལ་ཞིབ་དང་གསར་གཏོད་བྱས་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་དང་མི་དམངས་ཀྱི་བདེ་སྐྱིད་འཚོ་བ་མངོན་འགྱུར་ཡོང་ཆེད་འབད་འཐབ་ཧུར་ཐག་བྱས་ཡོད།
