گۈزەل ھايات 9-بۆلۈم 53-قىسىم _ ياخشى يۈزلىنىش

53-قىسىم

ياخشى يۈزلىنىش

تەبىئىيلا دىلارەنىڭ ھەرىكىتىنى قوللىمايدىغانلارمۇ، قارشى پىكىردە بولغانلارمۇ كۆرۈلدى.

ئەكرەم قول ئاستىدىكىلەرگە ھېلىقى بىر نەچچەيلەننى بىر-بىرلەپ ئېلىپ كېتىشنى تاپىلاپ، دىلارە بىلەن ئىليارنى ئېلىپ ئايرودۇرۇمنىڭ سىرتىغا قاراپ ماڭدى.

تاراتقۇلار   تېخىمۇ كۆپ ئۇچۇرلارغا ئېرىشىش ئۈچۈن ئۇلارنىڭ كەينىدىن قوغلاپ:

- ئىليار ئەپەندى، سىز ۋە بوشى مالىيە گۇرۇھىنىڭ كەلگۈسى پىلانىڭلار نېمە؟ 

- ئەگەر بوۋاي يۇمشاق قوللۇق قىلسا، سىز ئۇنى كەچۈرەمسىز؟ 

- دىلارە باش دىرېكتور،  ئۆزىڭىزنىڭ ئىليار ئائىلىسى بىلەن بولغان مۇناسىۋىتىڭىزگە قانداق قارايسىز؟   - دەپ سورىدى.

ئىليار بىلەن  بوۋاينىڭ مۇناسىۋىتى ھازىر كۆپچىلىك ئەڭ كۆڭۈل بۆلىدىغان مەسىلە بولۇپ قالدى، نېمىلا دېگەن بىلەن تاراتقۇلارغا نىسبەتەن ئېيتقاندا، بۇ ئىشنىڭ جەلپ قىلىش كۈچى يەنىلا ناھايىتى چوڭ.

لېكىن ئۇلارنىڭ سوئالى جاۋابقا ئېرىشەلمىدى.

ئايرودۇرۇمدىن چىقىپ ماشىنىغا چىققاندىن كېيىن، دىلارە ئۇدۇل دوختۇرخانىغا بېرىشنى تەلەپ قىلدى.

- بولمايدۇ!  - دېدى ئىليار قەتئىيلىك بىلەن.

ئەكرەم ماشىنىنى قوزغىتىپ:

- خانىم خاتىرجەم بولۇڭ، ھېلىقى ئادەم خەتەردىن قۇتۇلدى،  ھازىر بارسىڭىزمۇ  بىلمەيدۇ ، تېخى ھوشىغا كەلمىدى. بۈگۈن بەك كەچ بولۇپ كەتتى، ھازىرقى سالامەتلىك ئەھۋالىڭىزنى كۆزدە تۇتۇپ، سىز يەنىلا ياخشى ئارام ئېلىڭ،  دوختۇرخانىغا ئەتە بارسىڭىزمۇ كېچىكمەيسىز. - دېدى. 

ئەكرەمنىڭ ھېلىقى ئادەمنى خەتەردىن قۇتۇلدى دېگىنىنى ئاڭلاپ، دىلارەنىڭ چىرايى بارا-بارا ياخشىلىنىپ، سەل تارتىشىپ قالغان بەدىنى ئاستا-ئاستا يۇمشاپ:

- ئۇنچىلىك بولغان بولسا ياخشى.  - دېدى.

ھېچ ئىشنى خاتا قىلمىغان بىر ئادەمنىڭ بۇ ھالغا چۈشۈپ قېلىشى، يەنە كېلىپ ئۇلارنى ئاقلايمەن دېگەنلىكىنى دېمەيلا قويايلى، ئەگەر ئۇ  راستتىنلا مۇشۇنداق يات ئادەم ئۈچۈن جېنىنى پىدا قىلسا، ئۇنداقتا  دىلارە ھەرگىز ئۆزىنى كەچۈرەلمەيدۇ.

ئۇ گەرچە ئۆزىنى ياخشى ئادەم ئەمەس دەپ قارىسىمۇ، لېكىن ئەزەلدىن خاتالىق ئۆتكۈزمىگەن كىشىلەرگە زىيانكەشلىك قىلمايدۇ، ھەم قارىغۇلارچە يامان ئىشلارغا چېتىۋالمايدۇ.

ئىليار ئۈن-تىنسىز ھالدا ئۇنى باغرىغا بېسىپ، مۈرىسىگە يېنىك ئۇرۇپ تۇرۇپ:

- بۇ ئىشنى مەن ھەل قىلىمەن،  يىغىنىغىمۇ قاتنىشىپ بولدۇق. سىز ئەمدى ئۆيدە ھامىلىنى ياخشى بېقىشىڭىز كېرەك. - دېدى.

دىلارە بېشىنى ئۇنىڭ مەيدىسىگە قويۇپ، ئېغىر  نەپەس ئېلىپ:

- ھىم...  پەقەت ئۇ بالىغا ھېچ ئىش بولمىسىلا، مەنمۇ خاتىرجەم بولىمەن، - دېدى.

ئۇلارنى يېقىن ئەتراپتىكى ئولتۇراق رايون بىناسىغا ئاپىرىپ قويغاندىن كىيىن ئەكرەمنىڭ بۈگۈنكى خىزمىتى ۋاقتىنچە ئاخىرلاشتى.

تورنىڭ ھەممە يېرىنى ئىليار بىلەن دىلارەنىڭ خەۋىرى قاپلىدى.

ئىككى ئادەمنىڭ سالاھىيىتى بىرىنىڭ كەينىدىن بىرى ئاشكارىلىنىپ ئىلگىرىكى پەيدا بولغان دىلارە ئىليارغا ماس كەلمەيدۇ، كېيىنكى پەيدا بولغان ئىليار دىلارەنىڭ قولىغا سۇ قۇيۇپ بېرەلمەيدۇ دېگەندەك ئىنكاس - مەزمۇنلار ھازىر پۈتكۈل توردىن يوقالدى.

ئىشلارنىڭ ھەممىسى ئۈمىدكە تولغان تەرەققىيات يۆنىلىشىگە قاراپ مېڭىۋاتىدۇ، ئۇلارنىڭ ھەقىقەتەن ئاشۇ ئورۇنسىز ئاۋارىچىلىكلەر ئۈچۈن ۋاقىت ئىسراپ قىلىشىنىڭ ھاجىتى يوق.

ياتاق بىناسىغا قايتىپ كەلگەندە، ئاتىكەم ئىشىك ئالدىدا بىر نەچچە ئادەم بىلەن ساقلاپ تۇراتتى.

ئۇلارنىڭ قايتىپ كەلگەنلىكىنى كۆرۈپ،  چوڭقۇر نەپەس ئېلىپ، دىلارەگە قاراپ چىرايى تۇتۇلۇپ كەتتى.

ئۆيگە كىرگەندىن كېيىن، ئاتىكەم بىر نەچچە ئادەمنى باشلاپ دىلارەنى ھەر تەرەپلىمە ھامىلىدارلىق تەكشۈرۈشى ئېلىپ باردى.

ئەڭ ئاخىرىدا دىلارەنىڭ ئالدىدا سۈرلۈك قىياپەتتە:

- ئىككى ھامىلىنىڭ يۈرەك رىتىمى ئوخشاش بولمىغان دەرىجىدە تېزلىشىپ كېتىپتۇ... - دېدى.

بۇنى ئاڭلىغان دىلارە تۇيۇقسىز بېشىنى كۆتۈرۈپ:

- بۇ نېمە ئىش بولغىنى؟ - دەپ سورىدى. 

ئاتىكەمنىڭ  چىرايى سوۋۇپ،   ئاۋازىنى سەل يۇقىرى كۆتۈرۈپ:

-  كەيپىياتىڭىزنىڭ تۇراقسىزلىقىدىن كېلىپ چىققان. - دېدى. 

دىلارە قوشۇمىسىنى تۈرۈپ، قولىنى سەل-پەل تومپىيىپ چىققان قورسىقىغا قويدى، چىرايى تاتىرىپ كەتتى.

ئاتىكەم بۇنى سەزمىگەندەك، سۆزىنى داۋاملاشتۇرۇپ :

- ھامىلە ئاپىسىنىڭ كەيپىياتنىڭ تۇراقسىزلىقىدىن، بولۇپمۇ ئاچچىقلىنىشتىن ئەڭ قورقىدۇ، ھامىلىدار ئاياللار ئاچچىقلانسا ھامىلىنىڭ يېتىلىشىگە ئېغىر تەسىر يېتىدۇ، ئەگەر  ئاچچىقلانسىڭىز، قورساقتىكى بالا سىزنىڭ كەيپىياتىڭىزنى ھېس قىلىپ، خۇشال بولالمايدۇ، ۋاقتى كەلگەندە ساق-سالامەت تۇغۇلغان تەقدىردىمۇ، بەلكىم  غەمكىن، خىيالچان  بوۋاق بولۇپ قېلىشى مۇمكىن، يەنە كېلىپ ھامىلىدار ئاياللار ئاچچىقلانسا، يۈرەك رىتىمى تېزلىشىپ، بوۋاقنىڭ يۈرەك سوقۇشىمۇ تېزلىشىپ، ئاسانلا ئوكسىگېن يېتىشمەسلىك ئەھۋالى كۆرۈلىدۇ، ئەگەر ئەھۋال ئېغىر بولسا، ھامىلىنىڭ غەيرىيلىكىنى كەلتۈرۈپ چىقىرىدۇ، ھەتتا ئۆزلۈكىدىن بويىدىن ئاجراپ كېتىدۇ.

ھامىلىدار ئايالنىڭ كەيپىياتى زادى قانچىلىك مۇھىم، بۇ پۈتۈن ئائىلىدىكىلەر ئىنتايىن ئەھمىيەت بېرىدىغان مەسىلە، بولمىسا ئاياللارنىڭ ئون ئايلىق خانىشلاردەك كۈتۈنىدىغان ئىمتىيازى بىكارغا كەتمەمدۇ. ئەگەر بالىڭىزنىڭ بۇنىڭدىن كېيىن غەمكىن بولۇپ قېلىشىنى، ھەتتا ئەڭ ناچار ئەھۋالغا چۈشۈپ قېلىشىنى ئويلىسىڭىز، كەيپىياتىڭىزنى داۋاملىق بۇزۇڭ، بۈگۈن سىزگە ئېنىق دەپ قوياي، ھازىر ئىككى بالىنىڭ يۈرەك سوقۇشى ناھايىتى تېز، ئەگەر سىز ئۇلارنىڭ ياخشى بولۇشىنى ئۈمىد قىلسىڭىز، ئۇنداقتا ھەممە ئىشنى بىر ياققا قايرىپ قويۇڭ.  - دېدى.

 سۆزلەۋېتىپ، ئاتىكەم ئىككى قولىنى ئاق خالاتنىڭ ئىچىگە تىقىپ، دىلارەغا سالماقلىق بىلەن تىكىلىپ:

- خانىم، سىز چوقۇم مۇھىم بىلەن مۇھىم ئەمەسنى ئېنىق ئايرىشىڭىز كېرەك، ھامىلىدار بولغاندىن كېيىنكى قىسقىغىنا ئۈچ ئاي ئىچىدە قانچىلىك ئىشلارنى باشتىن كەچۈرگەنلىكىڭىزنى، بالىڭىز ئۈچۈن نېمى قىلىپ بەرگىنىڭىزنى ئويلاپ بېقىشىڭىز كېرەك؟ ئەمدى كاللىڭىزنى پۈتۈنلەي ئۇلارغا قويمىسىڭىز، بۇنىڭدىن كېيىن... پۇشايمان قىلغان ۋاقىتىڭىز كۆپ بولىدۇ.  - دېدى.

دىلارە لېۋىنى چىڭ چىشلىدى، چىرايىدىن ئەندىشە ۋە جىددىيلىك چىقىپ تۇراتتى.

- ھازىرچۇ؟ ئۇلارنىڭ ئەھۋالى قانداقراق؟ بىرەر ئىش بولارمۇ؟ - دەپ سورىدى.

-  ئازراق ھامىلىنى تىنچلاندۇرۇش دورىسى يېزىپ بېرىمەن، لېكىن  سىز  يەنە... - دېدى ئاتىكەم. 

- بىلدىم، مەن چوقۇم ئۆيدە خاتىرجەم كۈتۈنىمەن. باشقا ئىشلار بىلەن ئەمدى كارىم  بولمايدۇ. - دېدى دىلارە. 

ئاتىكەم لېۋىنى پۈرۈشتۈرۈپ، كەينىگە بۇرۇلۇپ ھەممە نەرسىنى يىغىشتۇرۇپ بولغان بىر نەچچە ياردەمچىسىگە قارىغاچ، بىر چەتتىكى چىرايى تۇتۇلۇپ كەتكەن ئىليارنى كۆرۈپ قېلىپ:

- ئىليار ئەپەندىم، مەن ھازىر   ئازراق دورا يېزىپ بېرىمەن، دورا  ماشىنامدا، سىز مەن بىلەن بىللە چۈشۈپ ئېلىۋالامسىز، يولدا ماڭغاچ خانىمىڭىزنىڭ ئەھۋالنى يەنە بىر قېتىم دەپ بېرەي، سىز ئەر ۋە دادا بولغۇچى بولۇش سۈپىتىڭىز بىلەن دىققەت قىلىشقا تېگىشلىك ئىشلار بار... - دېدى.

ئىليار قوشۇمىسىنى سۈزۈپ قويدى، ئەمما گەپ قىلماي، ئۈن-تىنسىز ئورنىدىن تۇرۇپ، ئاتىكەم بىلەن بىللە ئۆيدىن چىقتى.

ئاتىكەم ماشىنانىڭ ئىشىكىنى ئېچىپ، ماشىنادىكى نەرسە ساقلاش ساندۇقىدىن ئىككى قۇتا دورا بوتۇلكىسىنى ئالدى، ئاندىن  بىر دورا بوتۇلكىسىدىكى دورىنى  يەنە بىر قۇرۇق بوتۇلكىگە تۆكتى.

ئاغزىنى تولغاپ چىڭ ئەتكەندىن كېيىن ئىليارغا بەردى.

ئىليار قولىغا ئېلىپ:

- بۇ نېمە؟  - دەپ سورىدى.

-  ھامىلە ئاسراش دورىسى ، - دېدى ئاتىكەم. 

ئىليار ئۇنىڭغا سوغۇققىنە تىكىلىپ قارىدى، ئاتىكەم  ئۇھ تارتىپ:

-  ھامىلىدارلار كۆپ خىل ۋىتامىن تابلىتى، - دېدى.

ئىليار بۇ قېتىم گەپ قىلمىدى.

- بايا دېگەنلىرىمنىڭ ھەممىسى ئەمەلىيەت، لېكىن  مۇبالىغە قىلىپ ئاشۇرۇۋەتتىم. مېنىڭچە ئۇنىڭ بىكار بولالمايدىغان مىجەزى بىلەن ئېغىرراق قورقۇتۇپ قويمىسام،  ئادەمنى ھەرگىز خاتىرجەم قىلمايدۇ. قايتىپ بېرىپ ئۇنى ئوبدان بەزلەڭ،  دىققىتىنى چېچىپ، كۆپرەك ئۆزىنى، بالىنى ئويلىسۇن. بۇ ۋىتامىنلارنى يەپ بولغاندىن كېيىن ماڭا خەۋەر قىلىڭ، يەنە تەييارلاپ بېرەي، - دېدى ئاتىكەم. 

ئاتىكەمنىڭ بۇ گېپىنى ئاڭلاپ، ئىليارنىڭ سۈرلۈك چىرايىمۇ ئاستا-ئاستا ياخشىلاندى، ئۇ قولىدىكى دورا بوتۇلكىسىغا قاراپ، سەل-پەل كۈلۈمسىرەپ:

- بۇ قېتىم ياخشى قىلدىڭىز.  - دېدى.

ئاتىكەممۇ لەۋلىرىنى پۈرۈشتۈرۈپ كۈلۈپ تۇرۇپ:

-  رازى بولغاندىكىن، دوختۇرخانىمىزغا بىر قىسىم داۋالاش ئۈسكۈنىلىرىنى ئىئانە قىلىشنى ئويلىشىپ باقامسىز؟ يېقىندا  بىر تۈركۈم يېڭى داۋالاش ئۈسكۈنىلىرى چىقتى... - دېدى . 

- بالا تۇغۇلغاندا بىر گەپ بولسۇن، - ئاتىكەمگە كۆپ سۆزلەش پۇرسىتى بەرمەي، ئىليار ئۇنىڭ گېپىنى بۆلۈۋەتتى.

ئاتىكەم دەردىنى ئىچىگە يۇتۇپ، لەۋلىرىنى يۇمۇپ،  ئاچچىقى كەلگەن ھالدا:

- كەتتىم! - دەپلا  ماشىنىنىڭ ئىشىكىنى ئاچتى.

رەزىل سودىگەر!

بالىنى تۇغالىغاندا بىر گەپ بولسۇن؟

ئۇ  ئايالىنىڭ ئادەمنى زادى قانچىلىك خاتىرجەم قىلمايدىغانلىقىنى بىلەمدىغاندۇ؟

 ھەم نازۇك ھەم خىيالىغا كەلگەننى قىلىدىغان ھامىلىدار ئايالغا قاراش ئاسانمۇ!

ئۇنىڭ خوتۇنىنىڭ شەخسىي دوختۇرى بولۇش ئۇدا ئوپېراتسىيە ئۈستىلىدە تۇرۇپ بىر نەچچە ئوپېراتسىيە قىلغاندىنمۇ بەك چارچاپ كېتىدۇ ئادەم.

ئىليار ياتاق بىناسىغا قايتىپ كەلگەندە، دىلارە ئىستاكاننى قولىغا ئېلىپ، ساپادا تۈگۈلۈپ بىر تەرەپتىن چاي ئىچكەچ، بىر تەرەپتىن تەمكىن قىياپەتتە تېلېۋىزور كۆرۈۋاتاتتى.

ئۇنىڭ قايتىپ كەلگەنلىكىنى كۆرۈپ، ئالدىراپ - تېنەپ:

-  دورىنى ئېلىپ كەلدىڭىزمۇ؟ - دەپ سورىدى. 

ئىليار ئۇنىڭ يېنىغا بېرىپ، قولىدىكى دورا بوتۇلكىسىنى ئۇنىڭغا سۇنۇپ:

- بەك جىددىيلىشىپ كەتمەڭ، ئاتىكەم ھېچ ئىش يوق دېگەندىكىن، چوقۇم ھېچ ئىش بولمايدۇ، ئۇ سىزنى بۇنىڭدىن كېيىن دىققەت قىلسۇن دەيدۇ.  - دېدى.

دىلارە بېشىنى تۆۋەن سېلىپ دورا بوتۇلكىسىدىكى چۈشەندۈرۈشكە قاراپ، ئىككى تال دورىنى تۆكۈپ، بېشىنى كۆتۈرۈپ:

- ھازىر ئىچسەم بولامدۇ؟ - دەپ سورىدى.

ئىليار دورىغا بىر قارىۋەتكەندىن كېيىن، بېشىنى لىڭشىتىپ:

- بولىدۇ، بىر كۈندە ئۈچ قېتىم. بۈگۈن بالىنىڭ ئەھۋال مۇقىم ئەمەس، ئاۋۋال ئىككى تال ئىچىپ تۇرۇڭ، - دېدى. 

دىلارە دورىنى ئاغزىغا سېلىپ، سۇ بىلەن يۇتتى.

ئۇ كۆزىنى يۇمدى، باشقا غەلىتە سېزىم يوقتەك ھېس قىلىپ، ئاندىن كۆزىنى ئاستا ئاچتى.

قولىنى قورسىقىغا قويدى، چىرايىدىن يەنىلا خۇشاللىق ئالامىتى كۆرۈنمىدى.

- بۇ قېتىم ياۋاشلىق بىلەن ئۆيدە كۈتۈنەمسىز؟ - دېدى ئىليار. 

دىلارە بېشىنى لىڭشىتىپ:

- چوقۇم ياۋاشلىق بىلەن ئۆيدە ئولتۇرىمەن، - دېدى. 

- بۇنىڭدىن كېيىن خىزمەتتىن باشقا ئۆزىڭىز ياخشى كۆرىدىغان ئىشلارنى كۆپرەك قىلىڭ ياكى ۋاقىتلىق باشقا قىزىقىشلارنى يېتىلدۈرسىڭىزمۇ  ھامىلە تەربىيەسى بېرىش ھېسابلىنىدۇ.  - دېدى ئىليار.

دىلارەنىڭ ھازىرقى كەيپىياتىنىڭ قارىماققا يامان ئەمەس ئىكەنلىكىنى بىلىدۇ، لېكىن بايا ئايرۇدۇمدىكى  غەزەپلەنگەن ھالىتىگە سېلىشتۇرغاندا، كەيپىيات ئۆزگىرىش بەك تېز بولۇپ كەتتىمۇ قانداق.

ئۇ ئېنىقلا ئۆزىنىڭ كەيپىياتىنى كونترول قىلىشقا تىرىشىۋاتىدۇ. 

ئاتىكەمنىڭ گېپىدىن قورقۇپ،  ھازىرچە  ھەرقانداق ئىشتىن ئەنسىرەشكە جۈرئەت قىلالمايۋاتىدۇ.

لېكىن بۇ خىل ئۆزلۈك ئېڭى ئارقىلىق كونترول قىلىنغان كەيپىيات، راستتىنلا ياخشىلانغان ھېسابلىنامدۇ؟

دىلارەنىڭ سەزگۈر ۋاقتىدا،ئىليار بىۋاسىتە ئۇنى ئاشكارىلاپ قويسا بولمايدۇ.