阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
作者：应知
沪语改写，讲述：朱枫
十里南京路，最忆大光明。
上世纪70年代中期，我屋里住勒黄浦区牯岭路人安里，每日天到新风中学，板定要沿牢仔牯岭路朝西走到黄河路，再往南走到南京西路口。路口个东面是当时上海个最高建筑24层楼个国际饭店，西面当时是上海工艺美术商店，隔壁头就是名气乓乓响个大光明电影院。
大光明是我伲小辰光个天堂，埃个年代娱乐活动少，看电影基本浪是最好个享受了。
黄浦区是当时上海影剧院个集中区域，光是南京西路西藏中路口附近，就有红旗新闻科教电影院、西藏书场、五星剧场、大上海电影院等好几家。大光明是电影院个头块牌子，票价也便宜，看一场电影，从1角5分到3角5分侪有。每日天到学堂里去经过大光明，我总归要进去看一眼，常怕错过新片，平常辰光筹起来个零用铜钿，差勿多侪交拨电影院了。
我伲勿单单欢喜看电影，还收集票根，小朋友道里互相猜票价，啥人猜中票根就归啥人。埃歇横里电影并勿多，每一部我几乎侪看过。有一趟我听到消息，大光明马上要放朝鲜故事片《金姬和银姬的命运》，就通宵去排队买票。大清老早4点钟，大光明为了照顾勒初冬时节排仔一夜天队个观众，提前开门拿观众请进电影院，勒座位浪等到8点钟开始卖票，迭个举动更赢得了观众个夸奖。
记得读中学辰光，学堂里行谈“敲定”（女朋友），十七岁个我搭女同学第一趟约会，就是到大光明看印度电影《流浪者》。埃个一日细雨绵绵，下半日，我第一趟撑仔阳伞搭女生挨勒一道荡马路，常怕拨熟人看见，就拿阳伞压得老低个，走到大光明门口头，一人拿一张电影票分开来进场。我先进去，大约摸五分钟后，灯光稍为暗了眼，电影要开场个辰光，伊再急吼吼进来，但手忙脚乱走错脱一排，我也勿敢大声招呼。伊转到我搿一排寻着位置辰光，已经老吭了。我拉伊坐下来，一记头觉着伊肩胛搭袖子管湿了一大片，而我自家个两只肩胛倒是干卜卜个，我老难为情个，豪燥别过头道歉。伊呒没响，勒我手臂把浪狠狠叫拧了一下。我当时光顾着看电影呒没觉着痛，但第二天就变成乌青块了，几天过后才退脱。虽然女朋友最后呒没谈成，但初恋第一趟约会却让我留下了难忘个回忆。
改革开放初期，男女朋友谈恋爱个第一步就是约了看电影，假使能买到大光明个票，恋爱个成功率就高了交关。记得母亲当时帮人家介绍对象。见面个地点就约勒大光明电影院门口头。母亲讲搿地方好记，是上海个地标，大家侪认得个，也方便看电影。有趟我也陪母亲一道去，看到约会双方进入电影院，母亲叹仔一口气讲，任务完成，大功告成。
上世纪90年代中期，我离开上海到广东工作，每年回来探亲，侪勿会忘记到大光明电影院转一圈，看看阿有啥好看个电影。勒大光明看电影，我勿欢喜坐小厅，板要要坐进最大个影厅，再会有种小辰光个感觉。记得最近一次看电影留下深刻印象个是《爱情神话》，坐勒老牌超一流个五星级电影院观众席，看一部讲一口沪侬软语上海腔个电影，体会市井烟火气浓个人生百态，邪气亲切。大光明，我伲搿代人忘记勿脱个记忆。
来源：上海言话讲起来
我知道你在看哟~
