阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：新民晚报
作者：吴道富
沪语改写、讲述：仝康民
文字、语音审核：丁迪蒙
编辑：王乙其
搿段辰光，阿里掼倒阿里爬起来个苦头也呒没少吃，最结棍个要算“会得踏”之后了。明明看清爽前头上街沿个树木 ，就是捏勿牢刹车，硬碰硬个撞上去，震得来上下身搭仔四肢是又痛又麻呀。还算好、大多数是勒夜到， 伊个辰光车少人稀，侪呒没大麻烦。
读中学个辰光，高年级同学金耀林，伊是上海篮球个名将，踏细轮跑车，偶然勒操场炫技：龙头转勒搭车身垂直，左脚搁勒踏脚板高头，右脚踏牢前轮，稳坐勒车浪吃阳春面。技惊老师、学生，让人羡慕感叹！交关人去模仿，侪以失败而告终。搿奇妙个一刻越加增进了我对脚踏车个痴迷。会得踏车子以后，我借了邻居个车子勒闹市幽巷里踏，视角独特个观景乐趣，今朝想来还是有“春风得意马蹄疾”伊种甜滋滋个味道个。从此以后，我迷上了脚踏车。
搭车“失恋”是勒四川内江市个伊段辰光。搿座山城脚踏车老少看到个，我曾经想办法借来一部白相，过把瘾，推车上坡、伊个吃力呀，下坡滑行、伊个爽气呀，是饱尝甘苦了。沿牢沱江下坡邪气紧张，捏牢仔刹车个手汗滋滋个，常怕控制勿牢做了氽江浮尸。
调回上海工作，单位勒大柏树，屋里住勒徐汇，我用“永久”代步，虽然要踏一个钟头 ， 但是可以控制辰光， 可以观赏马路景致 ，又有益于健身，何乐而勿为？当然，尴尬个事体终归是有个。伊年仔秋天， 早浪向还是天高云淡，下半日突然之间刮大风，我穿个衣裳绝对难以抵挡凛冽个寒风，哪能办呢？急中生智，我寻着一只大个塑料袋，包勒胸前缚勒裤子里向，外头再穿夹克衫，保暖又勿露丑，到屋里胸口头还热烘烘个唻。
学会踏车就像煞是学会了游泳，终身受用个。前头几年，我搭朋友卢先生一道到台湾去自由行。阿拉两家头勒台东县鹿野乡租脚踏车。启动个辰光，我靠勒伊忒近了，卢先生车把晃了几晃，差眼掼倒，伊马上稳牢车把慢慢叫个踏。我快点道歉，伊一边笑一边讲：呒没事体个，只不过三十年呒没踏了，一上来勿免生疏，踏脱一歇就好了，脚踏车迭个物事勿会忘记个。阿拉两家头穿行勒乡间小道浪，一歇歇下车近观凤梨地，一歇歇靠勒树旁边远眺丘陵景，探幽析微，潇洒自如，充分享受踏车之乐。
“永久”伴我退休，但是退而勿休，仍旧常庄伴我出行，搿就要讲讲开头个事体了。一位车友，勿久之前踏车直行，靠近十字路口，一部车子勿打手势突然之间超车转弯，后轮撞着前轮，车友倒勒地浪，手腕骨折，到今朝石膏还呒没拆脱。搿桩事故，警示大家踏脚踏车遵守交规个必要性搭仔重要性！《非机动车交通规则》第七条：转弯之前必须减速、慢行，勿准突然转弯。现在上海享有魔都个荣誉，脚踏车也是一道闹猛个景致，共享单车多如牛毛，自备脚踏车更加多，但愿踏车者侪严格遵守搿邪气易懂又邪气便当做个法规，让流动搭仔文明同在，让踏车搭仔愉悦共飞，搿也是我个脚踏车情结。
作者：吴道富
讲述：仝康民
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
