شينحۋا اگەنتتىگىنىڭ 11 - ايدىڭ 20 - كۇنى برازيليادان بەرگەن حابارى (تىلشىلەر ياڭ يجۇن، جوۋ يۇڭسۇي). جەرگىلىكتى ۋاقىت 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليا زۇڭتۇڭى لۋلامەن برازيليا زۇڭتۇڭ سارايى − الۆورادا سارايىندا كەڭەس وتكىزگەننەن كەيىن بىرگە تىلشىلەرمەن كەزدەستى.
شي جينپيڭ بىلاي دەپ اتاپ كورسەتتى: بۇل مەنىڭ اراعا 5 جىل سالىپ وسى ”سۇيىسپەنشىلىككە جانە ۇمىتكە تولى بايتاق جەرگە“ تاعى دا قادام تاستاۋىم. ساپارعا اتتانۋ قارساڭىندا برازيليانىڭ ءار سالاسىنداعى دوس قايراتكەرلەردەن كەلگەن كوپتەگەن حاتتى تاپسىرىپ الدىم، حاتتاردا برازيليا حالقىنىڭ جۇڭگو − برازيليا دوستىعىن قاستەرلەيتىندىگى جانە ەكى ەل دوستىعىن تەرەڭدەتۋ تىلەگى ايگىلەنگەن، مەنى ايرىقشا اسەرلەندىردى. الگىندە لۋلا زۇڭتۇڭمەن شىنايى، دوستىق بەينەدە ايرىقشا ناتيجەلى كەڭەس وتكىزدىم. ءبىز جۇڭگو − برازيليا قارىم - قاتىناسىنىڭ 50 جىلدىق دامۋ بارىسىنا بىرگە قايىرىلا قاراپ، ءبىر اۋىزدان ەكى ەل قارىم - قاتىناسى تاريحتاعى ەڭ تاماشا مەزگىلدە تۇر، الەمدىك سيپاتتى، ستراتەگيالىق سيپاتتى، ۇزاق بولاشاقتىق سيپاتتى ىقپالى كۇن سايىن ايگىلەنىپ، وركەندەپ كەلە جاتقان ءىرى ەلدەردىڭ قول ۇستاسا بىرگە ىلگەرىلەپ، ىنتىماقتاسا سەلبەسۋىنىڭ ۇلگىسىنە اينالدى دەپ قارادىق.
ءبىز جۇڭگو − برازيليا قارىم - قاتىناسىنىڭ بولاشاق دامۋى جونىندە جاڭا ستراتەگيالىق ورتاق تانىمعا كەلدىك، مۇنىڭ ىشىندە، ەڭ ماڭىزدىسى، ءبىز ەكى جاقتى قارىم - قاتىناستى قول ۇستاسا اناعۇرلىم ادىلەتتى دۇنيە جانە اناعۇرلىم باياندى پلانەتا قۇراتىن جۇڭگو − برازيليا تاعدىرلاس ورتاق تۇلعاسى دەڭگەيىنە كوتەرۋدى، سونىمەن بىرگە ”ءبىر بەلدەۋ، ءبىر جولدى“ بىرگە قۇرۋ باستاماسىن برازيليانىڭ دامۋ ستراتەگياسىمەن ءتۇيىلىستىرۋدى بىرگە ۇيعاردىق. دۇنيە ءجۇزىنىڭ اۋقىمى جەدەل وزگەرگەن جاعدايدا، بۇل جۇڭگو مەن برازيليا سىندى وركەندەپ كەلە جاتقان ەكى ءىرى ەلدىڭ وزگەرىستى تانۋ، وزگەرىسكە توتەپ بەرۋ، وزگەرىسكە ۇمتىلۋ بەكىمىن ايگىلەدى، مۇنىڭ ەكى ەل قارىم - قاتىناسىنىڭ الدىڭعىلاردىڭ ءىزىن باسىپ بولاشاققا جول اشۋىن، تاعى ءبىر ”التىن 50 جىلدى“ باستاۋىن جەبەيتىندىگى، سونىمەن بىرگە جەر شارىنىڭ وڭتۇستىگىندەگى ەلدەردىڭ ىنتىماقتاسىپ، ءوزىن الۋەتتەندىرۋىنە ۇلگى بولىپ، وركەندەپ كەلە جاتقان ەلدەردىڭ الەمدىك باسقارۋداعى ۋاكىلدىك سيپاتى مەن سويلەۋ ۇقىعىن جوعارىلاتۋعا جاڭا ۇلەس قوساتىندىعى داۋسىز.
ءبىز ءبىر اۋىزدان بىلاي دەپ قارادىق: ستراتەگيالىق ءوزارا سەنىمدىلىكتى ءۇرتىس تەرەڭدەتىپ، يەلىك ۇقىق، حاۋىپسىزدىك، دامۋ مۇددەسى سياقتىلارعا ساياتىن وزەكتى ماسەلەلەردە ءوزارا باتىل قولداۋ كورسەتىپ، ءوز - ءوزىمىزدىڭ جوعارى ساپالى دامۋىمىزدى جەبەۋىمىز كەرەك. شىعىس، باتىس جارتى شارداعى وركەندەپ كەلە جاتقان ەكى ءىرى ەل رەتىندە، ءبىز جەر شارىنىڭ وڭتۇستىگىندەگى ەلدەردىڭ ورتاق مۇددەسىن قورعاۋعا جەتەكشىلىك ەتۋ، حالىقارالىق ءتارتىپتىڭ اناعۇرلىم ءادىل دە ۇيلەسىمدى بەتالىسقا قاراي دامۋىن ىلگەرىلەتۋ سىندى تاريحي اۋىر مىندەتتى دە ىرىقتىلىقپەن ارقالاۋىمىز كەرەك.
ءبىز ءبىر اۋىزدان بىلاي دەپ قارادىق: ەكى ەلدىڭ دامۋ ستراتەگياسىن ءتۇيىلىستىرۋ سىندى وسى كەلەلى ءىستى ويداعىداي ىستەۋىمىز كەرەك. ەكونوميكا - ساۋدا، فينانس، عىلىم - تەحنيكا، نەگىزدىك قۇرىلعىلار قۇرىلىسى، قورشاعان ورتانى قورعاۋ سياقتى ءتۇيىندى سالالارداعى سەلبەستىكتى تەرەڭدەتىپ، ەنەرگيا تيبىن جاڭالاۋ، سيفرلى ەكونوميكا، جاساندى زەردە، جاسىل كەن سياقتى جاڭادان گۇلدەنگەن سالالارداعى سەلبەستىكتى كۇشەيتىپ، ۋاقىتتى ۇتا بىلەتىن جىگەر - قايراتپەن ەكى ەلدىڭ ناقتى ىستەر سەلبەستىگىن تەرەڭدەتىپ، ناقتىلاندىرىپ، جۇڭگو مەن برازيليا ەكى ەلدىڭ وزدەرىنىڭ وسىزامانداندىرۋ قۇرىلىسىنىڭ تەزدەۋىنە دەم بەرۋىمىز كەرەك.
ءبىز ءبىر اۋىزدان بىلاي دەپ قارادىق: جۇڭگو مەن برازيليا ەكى ەل بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى كوپ جاقتى مەحانيزم اياسىندا سەلبەستىكتى ۇزدىكسىز جيىلەتىپ، اشارشىلىق پەن كەدەيلىك، وڭىرلىك قاقتىعىس، كليمات وزگەرىسى، ينتەرنەت حاۋىپسىزدىگى سياقتى ءداستۇرلى جانە ءداستۇرلى ەمەس سالالارداعى حاۋىپسىزدىك سىن - سايىستارىنا بىرگە توتەپ بەرىپ، دۇنيە ءجۇزىنىڭ بەيبىتشىلىك جانە دامۋ ىستەرىنە جۇڭگو مەن برازيليانىڭ جاڭا ۇلەسىن قوسۋى كەرەك. كەلەر جىلى جۇڭگو − لاتىن امەريكاسى تالقى مىنبەرى رەسمي جۇمىس جۇرگىزگەندىگىنىڭ 10 جىلدىعى، جۇڭگو برازيليامەن جانە لاتىن امەريكاسىنداعى باسقا ەلدەرمەن بىرگە جۇڭگو − لاتىن امەريكاسى سەلبەستىگىنىڭ جاڭا ساتىعا كوتەرىلۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: قازىر دۇنيە ءجۇزى تىنىش ەمەس، ءبىرتالاي وڭىرلەردە سوعىس ءورتى لاۋلاپ، الاساپىران بولىپ جاتىر. ادامزات − بولىنبەس حاۋىپسىزدىك ورتاق تۇلعاسى، ورتاق، جالپىلىق، سەلبەسەتىن، باياندى حاۋىپسىزدىك كوزقاراسىن امالياتتا ايگىلەگەندە عانا، جاپپاي حاۋىپسىز جولمەن جۇرۋگە بولادى. جۇڭگو مەن برازيليا ۋكراينا داعدارىسىن ساياسي جولمەن شەشۋ جونىندەگى ”6 ورتاق تانىمدى“ بىرلەسىپ جاريالاپ، جەر شارىنىڭ وڭتۇستىگىندەگى قاتىستى ەلدەرمەن بىرگە ۋكراينا داعدارىسى جونىنەن ”بەيبىتشىلىك دوسى“ گرۋپپاسىن قۇردى. ءبىز بەيبىتىشىلىككە كۇش سالاتىن اناعۇرلىم كوپ ءۇندى توپتاپ، ۋكراينا داعدارىسىن ساياسي جولمەن شەشۋدى جۇزەگە اسىرۋعا داڭعىل جول سالۋىمىز كەرەك. ءبىز گازا قاقتىعىسىنىڭ ءۇرتىس ورشۋىنەن توتەنشە الاڭدايمىز، تەز ارادا ۇرىستى دوعارىپ، سوعىستى توقتاتىپ، ”ەكى ەل جوباسىن“ تياناقتاندىرىپ، پالەستينا ماسەلەسىن جاپپاي، ءادىل، باياندى شەشۋ جولىندا تالىقپاي قۇلشىنىس جاساۋعا ۇندەيمىز. جۇڭگو مەن برازيليا ەكى ەل ادىلەتتىلىكتى اسقاقتاتىپ، ادامگەرشىلىكتى ايگىلەيتىن داستۇرگە جانە جاۋاپكەرشىلىككە يە، جۇڭگو برازيليامەن بىرگە جۇڭگو − برازيليا تاعدىرلاس ورتاق تۇلعاسىنىڭ داۋىرلىك ءمانىن ۇزدىكسىز بايىتىپ، ناعىز كوپ جاقتىلىقتى تاباندىلىقپەن قورعاپ، دامۋ، كەدەيلەسپەۋ، سەلبەسۋ، قارسىلاسپاۋ، ادىلدىكتى جاقتاۋ، زورەكەر بولماۋ سىندى جاڭا ءداۋىردىڭ كۇشتى ءۇنىن بىرگە تاراتىپ، اناعۇرلىم تاماشا دۇنيەنى قول ۇستاسا قۇرۋدى قالايدى.
لۋلا ءتوراعا شي جينپيڭنىڭ ساپارلاي كەلگەندىگىن قىزۋ قارسى الىپ مىنالاردى ءبىلدىردى: برازيليا مەن جۇڭگو ەكى ەلدىڭ اراسى شالعاي بولسا دا، قۇن ۇستانىمى قارايلاس، كەڭ كولەمدە ورتاق مۇددەگە يە، دوستىعى تەرەڭ دە بەرىك، برازيليا − جۇڭگو سەلبەستىگى ستراتەگيالىق مانگە جانە دۇنيە جۇزىلىك ىقپالعا يە. جۇڭگو برازيليانىڭ ەڭ ماڭىزدى ساۋدا جانە قارجى قوسۋ سەرىگى، جۇڭگو كاسىپورىندارى برازيليادا برازيليانىڭ ەكونوميكالىق، قوعامدىق دامۋىن پارمەندى جەبەدى. ءتوراعا شي جينپيڭ ەكەۋىمىز ەكى ەل قارىم - قاتىناسىن قول ۇستاسا اناعۇرلىم ادىلەتتى دۇنيە جانە اناعۇرلىم باياندى پلانەتا قۇراتىن برازيليا − جۇڭگو تاعدىرلاس ورتاق تۇلعاسى دەڭگەيىنە كوتەرۋدى ۇيعاردىق ءارى برازيليانىڭ دامۋ ستراتەگياسىن جۇڭگو جاقتىڭ ”ءبىر بەلدەۋ، ءبىر جول“ باستاماسىمەن ءتۇيىلىستىرىپ، باياندى دامۋ، نەگىزدىك قۇرىلعى، فينانس، ەنەرگيا تيبىن جاڭالاۋ، عارىش سياقتى سالالاردا ءتۇيىندى تۇردە سەلبەستىكتى كەڭەيتىپ، تەرەڭدەتىپ، ەكى ەل قارىم - قاتىناسىن جاڭا دەڭگەيگە كوتەرۋدى ۇيعاردىق. برازيليا مەن جۇڭگونىڭ حالىقارالىق دامۋ جانە حاۋىپسىزدىك سياقتى كەلەلى ماسەلەلەردە تۇرعىسى ايرىقشا بىردەي. جۇڭگو جاقتىڭ برازيليانىڭ 20 ەل توبى ءتوراعا ەلى مىندەتىن اتقارۋ قىزمەتىن بار كۇشپەن قولداعاندىعىنا ءارى ”اشارشىلىققا جانە كەدەيلىككە قارسى اتتانۋ الەمدىك وداعىنا“ باستاماشىلىقپەن كىرگەندىگىنە العىس ايتادى. ءبىز بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى كوپ جاقتى مەحانيزمدەر اياسىندا بايلانىستى، سايكەستىكتى جيىلەتىپ، الەمدىك باسقارۋ جۇيەسى رەفورماسىن بىرگە دارىپتەپ، اناعۇرلىم ءادىل، دەموكراتيالى، تەرەزەسى تەڭ جانە باياندى حالىقارالىق جۇيە ورناتىپ، قولامتالى ماسەلەلەردى بەيبىت جولمەن شەشۋدى ىلگەرىلەتەمىز. ءتوراعا شي جينپيڭنىڭ بۇل جولعى ساپارى برازيليا − جۇڭگو قارىم - قاتىناسىنىڭ جاڭا تاريحي پاراعىن اشتى.
ساي چي، ۋاڭ ي قاتارلىلار قاتىناستى.
