شينحۋا اگەنتتىگىنىڭ 11 - ايدىڭ 19 - كۇنى بەيجيڭنەن بەرگەن حابارى. ”جۇڭگو. تاڭ −− كوپ نەگىزدى اشىق پاتشالىق ءداۋىر (7 - عاسىردان 10 - عاسىرعا دەيىن)“ كورمەسى 11 - ايدىڭ 18 - كۇنى فرانسيانىڭ گۇيمەت مەملەكەتتىك ازيا كوركەمونەر مۇراجايىندا اشىلدى، جۇڭگو مەملەكەت ءتوراعاسى شي جينپيڭ مەن فرانسيا زۇڭتۇڭى ماكرون جەكە - جەكە كورمەگە كىرىس ءسوز جازدى.
شي جينپيڭ بىلاي دەپ اتاپ كورسەتتى: بيىل − جۇڭگو مەن فرانسيانىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعى. 5 - ايدا مەن فرانسيادا ساپاردا بولعان كەزىمدە، جۇڭگو مەن فرانسيا ەكى جاق فرانسيانىڭ گۇيمەت مەملەكەتتىك ازيا كوركەمونەر مۇراجايىندا تاڭ ءداۋىرى مادەني ەسكەرتكىشتەر كورمەسىن وتكىزۋ كەلىسىمىن جاساسقان بولاتىن. مەن ەكى ەلدىڭ مادەني ەسكەرتكىش ماماندارىنىڭ بىرگە قۇلشىنۋىندا، ”جۇڭگو · تاڭ −− كوپ نەگىزدى اشىق پاتشالىق ءداۋىر (7 - عاسىردان 10 - عاسىرعا دەيىن)“ كورمەسىنىڭ ۋاعىندا اشىلعاندىعىنا قاباعات قۋاندىم.
شي جينپيڭ بىلاي دەپ اتاپ كورسەتتى: تاڭ ءداۋىرى − جۇڭگو تاريحىنداعى ەڭ داۋرەندەگەن پاتشالىق ءداۋىر، ول كەزدە شارۋاشىلىق شالقىدى، مادەنيەت وركەندەدى، يدەيادا سيىسىمدى بولدى، كوركەمونەر كوركەيدى، ۇلتتار توعىستى. تاڭ ءداۋىرى مادەنيەتىنىڭ ىقپالى ازيانى شارپىدى ءارى جىبەك جولى ارقىلى ەۆروپاعا تارالدى. تاڭ ءداۋىرىنىڭ ولەڭ - ءبايىت، سۋرەت، التىن، كۇمىس جابدىق سياقتى كوركەمونەر جەتىستىكتەرى كۇنى بۇگىنگە دەيىن ادامداردىڭ القاۋىنا بولەنىپ كەلەدى. وسى رەتكى كورمەنىڭ وتكىزىلۋى فرانسيا جانە ەۆروپا كورەرمەندەرىنىڭ جارقىراعان، شۇعىلالى، سەنىمدى، اشىق، گۇلدەنگەن تاڭ ءداۋىرىنىڭ جاعدايىن اناعۇرلىم وبرازدى تۇسىنۋىنە، جۇڭحۋا وركەنيەتىنىڭ وزگەشە تارتىمدىلىعىن سەزىنۋىنە مۇمكىندىك جاسايتىندىعىنا سەنەمىن.
شي جينپيڭ بىلاي دەپ اتاپ كورسەتتى: جۇڭحۋا ۇلتى مەن فرانسۋز ۇلتى ءبارى دە ۇزاق تاريحقا جانە شۇعىلالى مادەنيەتكە يە. ەكى ەل حالقى تاريحتان بەرى ءبىر - ءبىرىنىڭ ارتىقشىلىقتارىن كورە ءبىلىپ، ءبىرىن - ءبىرى باۋراپ كەلەدى، دوستىق بارىس - كەلىسىنىڭ تاريحى ارىدان باستالعان. ءبىز تاريحي مادەنيەتتەن شابىت الىپ، وي قابىلداپ، گۋمانيتارلىق سالاداعى اۋىس - كۇيىستى، ءوزارا ۇلگى الۋدى جانە مادەنيەت مۇرالارىن قورعاۋ سەلبەستىگىن تەرەڭدەتۋىمىز، ءوز كوركەمدىگىمىزدى ايگىلەپ، كوركەمدىكتەن ورتاق يگىلىكتەنىپ، تاريحي سۇيىسپەنشىلىك پەن ءداۋىر رۋحىن جۇڭگو جانە فرانسيا دوستىعىمەن توعىستىرىپ، جۇڭگو مەن فرانسيانىڭ جالپى بەتتىك ستراتەگيالىق سەرىكتەستىك قارىم - قاتىناسىن اناعۇرلىم بەرىك، اناعۇرلىم ومىرشەڭ كۇشكە تولى ەتىپ سومداۋىمىز كەرەك.
ماكرون زۇڭتۇڭ مىنانى ءبىلدىردى: فرانسيا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعى مەن مادەنيەت - ساياحات جىلىن قۇتتىقتاۋ ءۇشىن، گۇيمەت مۇراجايى سالتاناتتى تاڭ ءداۋىرى كوركەمونەر كورمەسىن وتكىزدى. تاڭ ءداۋىرىنىڭ جۇڭگونىڭ وركەنيەت تاريحىنداعى مارتەبەسى ەرەكشە، اسا شۇعىلالى مادەنيەت پەن ادام نانعىسىز جاسامپازدىق قۋاتقا يە، سونداي - اق جىبەك جولى ارقىلى سىرتپەن اۋىس - كۇيىس جاساۋدى بەلسەنە ورىستەتىپ، كوز تۇندىرارلىق كوركەمونەر بايلىعىن جاراتتى. وسى ءبىر تاريحي ءمان الاتىن كورمە فرانسيا مەن جۇڭگو مادەنيەت اۋىس - كۇيىسىنىڭ ومىرشەڭ كۇشكە تولى ەكەندىگىن، ەكى ەل قاتىناسىنىڭ دامۋىندا ۇزدىكسىز ماڭىزدى رول ساۋلەلەندىرەتىندىگىن قايتالاي كورنەكتىلەندىردى.
وسى رەتكى كورمەگە جۇڭگو مەملەكەتتىك مادەني ەسكەرتكىشتەر مەكەمەسى مەن فرانسيا مادەنيەت مينيسترلىگى جەتەكشىلىك ەتتى، جۇڭگوداعى 10 ولكە، اۆتونوميالى رايون، توتە قاراستى قالاداعى 32 مادەنيەت مۇراجاي قۇرىلىمىنىڭ 200دەن استام اسەم مادەني ەسكەرتكىشى كورمەگە قويىلدى.
