ەندى 2 ايعا جەتپەيتىن ۋاقىتتا 2024-جىل دا اياقتاعالى تۇر. كوپشىلىك جىلدىق دەمالىستارىڭىزدى الا الدىڭىزدار ما؟ جىلدىق دەمالىسىڭىزدى تولىق الا الماعان بولساڭىز قايتۋ كەرەك؟ قىزمەت ورنىڭىز اۋىسسا، سول جىلعى جىلدىق دەمالىستان يگىلىكتەنۋگە بولا ما؟ قىزمەت قاتتى قاربالاس بولسا، بيىلعى جىلدىق دەمالىستى كەلەر جىلعا اتتاتىپ دەمالۋعا بولا ما؟ بۇل ماسەلەلەردى بىرگە جىلىكتەپ كورەيىك!
جىلدىق دەمالىستى الۋدىڭ قانداي شارتتارى بار؟
جۇمىسشى-قىزمەتكەردىڭ ءۇرتىس قىزمەت ىستەگەن ۋاقىتى ءبىر جىلعا تولسا، زاڭ بويىنشا ەڭبەكاقىلى جىلدىق دەمالىستان يگىلىكتەنۋىنە بولادى.
«جۇمىسشى-قىزمەتكەرلەردىڭ ەڭبەكاقىلى جىلدىق دەمالىس ەرەجەسىندە»: شارتقا ۇيلەسەتىن قىزمەتكەرلەر قىزمەت ىستەگەن جىل شەگى جيىنتىعىنا ساي زاڭ بويىنشا 5 كۇندىك (قىزمەت ىستەگەن ۋاقىتى ءبىر جىلعا تولعان، 10 جىلعا تولماعان)، 10 كۇندىك (قىزمەت ىستەگەن ۋاقىتى 10 جىلعا تولعان، 20 جىلعا تولماعان)، 15 كۇندىك (قىزمەت ىستەگەن ۋاقىتى 20 جىلعا تولعان) ەڭبەكاقىلى جىلدىق دەمالىستان يگىلىكتەنۋىنە بولادى دەپ بەلگىلەنگەن.
قىزمەت اۋىستىرعاننان كەيىن، جاڭا قىزمەت ورنىندا سول جىلعى جىلدىق دەمالىستان يگىلىكتەنۋگە بولا ما؟
«جۇمىسشى-قىزمەتكەرلەردىڭ ەڭبەكاقىلى جىلدىق دەمالىس ەرەجەسىنىڭ» 2-تارماعىندا بىلاي دەپ بەلگىلەنگەن:
ورگان، ۇيىم، كاسىپورىن، ءىسورىن، حالىق باسقارۋىنداعى كاسىپورىنعا جاتپايتىن ورىندار، قىزمەتكەر جالدايتىن جەكە ساۋدا-ونەركاسىپشىلەر سياقتى ورىنداردىڭ قىزمەتكەرلەرى ءۇرتىس ءبىر جىلدان استام قىزمەت ىستەگەن بولسا، ەڭبەكاقىلى جىلدىق دەمالىستان يگىلىكتەنەدى.
«مەملەكەتتىك كەڭەس زاڭ-ءتۇزىم كەڭسەسىنىڭ ‹جۇمىسشى-قىزمەتكەرلەردىڭ ەڭبەكاقىلى جىلدىق دەمالىس ەرەجەسى› جونىندەگى ماسەلەلەرگە نۇسقاۋ سۇراۋعا بەرگەن جاۋاپ حاتىندا» (مەملەكەتتىك كەڭەس زاڭ-ءتۇزىم كەڭسەسىنىڭ حاتى [2009] 5-ءنومىرلى) دەمالىس ەرەجەسىنە اناعۇرلىم اشىق جاۋاپ بەرىلگەن:
«جۇمىسشى-قىزمەتكەرلەردىڭ ەڭبەكاقىلى جىلدىق دەمالىس ەرەجەسىنىڭ» 2-تارماعىندا بەلگىلەنگەن ”ءۇرتىس قىزمەت ىستەگەن ۋاقىتى ءبىر جىلدان اسسا“ دەگەن ءسوز ءبىر ورىندا قىزمەت ىستەۋمەن شەكتەلمەيدى، سوندىقتان بۇل جۇمىسشى-قىزمەتكەردىڭ ءبىر ورىندا ءۇرتىس قىزمەت ىستەگەن ۋاقىتى ءبىر جىلدان اسۋ جاعدايىن دا، جۇمىسشى-قىزمەتكەردىڭ باسقا ورىنعا اۋىسىپ بارىپ ءۇرتىس قىزمەت ىستەگەن ۋاقىتى ءبىر جىلدان اسۋ جاعدايىن دا قامتيدى.
جىلدىق دەمالىستى جىل اتتاتىپ دەمالۋعا بولا ما؟
«جۇمىسشى-قىزمەتكەرلەردىڭ ەڭبەكاقىلى جىلدىق دەمالىس ەرەجەسىنىڭ» 5-تارماعىندا بىلاي دەپ بەلگىلەنگەن:
ورىندار ءوندىرىستىڭ، قىزمەتتىڭ ناقتى جاعدايىنا نەگىزدەلىپ ءارى جۇمىسشى-قىزمەتكەرلەردىڭ تىلەگىن ويلاستىرا وتىرىپ، جۇمىسشى-قىزمەتكەرلەردىڭ جىلدىق دەمالىسىن ءبىر تۇتاس ورنالاستىرادى.
جىلدىق دەمالىستى ءبىر جىل ىشىندە شوعىرلى ورنالاستىرۋعا دا، مەرزىمگە ءبولىپ ورنالاستىرۋعا دا بولادى، جايشىلىقتا جىل اتتاتىپ دەمالۋعا بولمايدى. ورىندار ءوندىرىستىڭ، قىزمەتتىڭ ەرەكشەلىگىنە بايلانىستى جىلدىق دەمالىستى جىل اتتاتىپ دەمالدىرۋ كەرەك دەپ تاپسا، ءبىر جىل اتتاتىپ ورنالاستىرۋىنا بولادى.
ورىندار قىزمەتتىڭ قاجەتىنە بولا جۇمىسشى-قىزمەتكەرلەردىڭ جىلدىق دەمالىسىن ورنالاستىرا المايتىن بولسا، جۇمىسشى-قىزمەتكەرلەردىڭ ماقۇلداۋىنان وتكەن سوڭ، جىلدىق دەمالىس ورنالاستىرماۋىنا بولادى. جۇمىسشى-قىزمەتكەرلەردىڭ دەمالۋعا ءتيىستى، ءبىراق دەمالا الماعان جىلدىق دەمالىس كۇن سانىنا قاراي، ورىندار سول جۇمىسشى-قىزمەتكەردىڭ كۇندىك ەڭبەكاقى كىرىسىنىڭ %300ى بويىنشا جىلدىق دەمالىس ەڭبەكاقىسىن بەرۋى قاجەت.
