انار بۇلت \ شينجياڭ گازەتىنىڭ تىلشىلەرى ۋاڭ شيڭرۇي، جاڭ يانفاڭ 11 - ايدىڭ 23 - كۇنى ۇرىمجىدەن حابارلايدى. ”جۇڭگو شينجياڭىنىڭ تاريحى جانە دامۋى: جۇڭگونىڭ ءار داۋىردەگى ورتالىق اكىمياتتارىنىڭ شينجياڭ ءوڭىرىن باسقارۋى“ جونىندەگى عىلمي زەرتتەۋ - تالقى ءماجىلىسى 11 - ايدىڭ 23 - كۇنى ۇرىمجىدە وتكىزىلدى. ماجىلىستەن ىلگەرى اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ءتوراعاسى ەركىن تۇنياز جۇڭگو قوعامدىق عىلىمدار اكادەمياسىنىڭ ورىنباسار باستىعى جاۋ رۇيمەن جانە جۇڭگولىق − شەتەلدىك مامان - وقىمىستىلاردىڭ ۋاكىلدەرىمەن كەزدەستى.
اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى حى جۇڭيوۋ كەزدەسۋگە قاتىناستى.
ما شيڭرۇي جۇڭگو كوممۋنيستىك پارتياسى شينجياڭ ۇيعۇر اۆتونوميالى رايوندىق كوميتەتى، اۆتونوميالى رايوندىق حالىق ۇكىمەتى اتىنان مامان - وقىمىستىلاردىڭ كەلگەندىگىن قارسى الدى. ول بىلاي دەدى: بۇل جولعى ءماجىلىس نازاردى جۇڭگونىڭ ءار داۋىردەگى ورتالىق اكىمياتتارىنىڭ شينجياڭ ءوڭىرىن باسقارۋىنا اۋداردى، بۇل تەرەڭ تاريحي جانە رەال مانگە يە. شينجياڭ ءوڭىرى حان داۋىرىندە جۇڭگو كارتاسىنا رەسمي ەنگىزىلگەن، ءار داۋىردەگى ورتالىق اكىمياتتار تۇگەلدەي شينجياڭ ءوڭىرىن باسقارۋعا الۋ ۇقىعىن جۇرگىزىپ كەلدى. قولداعى قىرۋار تاريحي دەرەكتەر شينجياڭنىڭ ەجەلدەن جۇڭگو تەرريتورياسىنىڭ ايرىلماس ءبىر بولىگى ەكەندىگىن دالەلدەپ وتىر. شينجياڭنىڭ كوپ نەگىزدى مادەنيەت شوعىرلانعان، كوپ ۇلت توعىسقان، كوپ ءدىن جاراسىمدى قاتار ءومىر سۇرگەن تاريحي جۇلگەسى جانە رەال تابىستارى دا مۇنى مول ماتەريالدارمەن جانە ناقتى دالەلدىك قولداۋمەن قامدادى. جۇڭگو كوممۋنيستىك پارتياسى 18 - قۇرىلتايىنان بەرى شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتى شينجياڭدى باسقارۋ زاڭدىلىعىن تانۋدى جانە يگەرۋدى تەرەڭدەتىپ، جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تۇراقتاندىرىپ، شينجياڭدى باسقارۋدىڭ جاڭا ءورىسىن اشتى. شينجياڭ جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە - ءدال، جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى ەتىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن تىڭعىلىقتى ىلگەرىلەتۋدە. جۇڭگولىق - شەتەلدىك مامان - وقىمىستىلاردىڭ تاريحي تاجىريبەلەرمەن جانە قازىرگى امالياتپەن ۇشتاستىرىپ شينجياڭدى تەرەڭدەي زەرتتەۋىن، شينجياڭدى تانۋىن، شينجياڭدى بايانداۋىن ءۇمىت ەتەمىن. شينجياڭ اشىق، سەنىمدى پوزيتسيا ۇستانىپ، عىلمي سالادا اشىق بولۋدى، سەلبەستىك جاساۋدى تەرەڭدەتىپ، جۇڭگو شينجياڭىنىڭ تاريحىن، قازىرگى جانە بولاشاق حيكاياسىن بىرگە ويداعىداي باياندايدى.
جاۋ رۇي جانە اۆتونوميالى رايوندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى ۋاڭ جيانشين عىلمي زەرتتەۋ - تالقى ماجىلىسىندە ارناۋ ءسوز سويلەدى. ءماجىلىس مىنالاردى اتاپ كورسەتتى: شينجياڭ رەفورمانى ونان ارى جاپپاي تەرەڭدەتىپ، جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە - ءدال، جاپپاي دايەكتىلەندىرۋدىڭ باياندى مەحانيزمىن قالىپتاستىرۋ جونىندە ىزدەنىس جاساۋدا. جۇڭگو ۇلگىسىندەگى وسىزامانداندىرۋ ۇردىسىندە كورىكتى شينجياڭ قۇرۋدا فيلوسوفيا، قوعامدىق عىلىمدار اۋىر مىندەت ارقالاۋعا ءتيىس، شينجياڭدى زەرتتەۋدىڭ بولاشاعى نۇرلى. جۇڭگولىق - شەتەلدىك وقىمىستىلاردىڭ شينجياڭعا ءۇرتىس نازار اۋدارىپ، شينجياڭدى ىشكەرىلەي زەرتتەپ، شينجياڭنىڭ باسقارۋ جۇيەسى مەن باسقارۋ قابىلەتىن وسىزامانداندىرۋىن ىلگەرىلەتۋىنە، دامۋ مەن حاۋىپسىزدىكتى ءبىر تۇتاس جوسپارلاۋىنا اناعۇرلىم كوپ عىلمي تىرەك ازىرلەۋىن جانە اقىل - پاراسات جاعىنان قولداۋ كورسەتۋىن ءۇمىت ەتەمىز.
قاتىستى مامان - وقىمىستىلار ارقاۋ ءسوز سويلەپ، بىلاي دەپ قارادى: شينجياڭ جۇڭگونىڭ ەجەلدەن بەرگى تەرريتورياسى، جۇڭحۋا ۇلتىنىڭ كوپ نەگىزدى ءبىر تۇلعالى جۇلگەسىنىڭ ماڭىزدى قۇرامداس بولىگى، جۇڭگونىڭ ءار داۋىردەگى ورتالىق اكىمياتتارىنىڭ ءبارى شينجياڭ ءوڭىرىن باسقارۋعا جانە جونگە سالۋعا ءمان بەرىپ كەلگەن. وسى سالاداعى زەرتتەۋدى كۇشەيتۋ جۇڭگونىڭ شينجياڭ ءوڭىرىنىڭ تاريحى مەن قازىرگى جاعدايىن جاپپاي يگەرۋ، جۇڭگو مەن باتىستىڭ عىلمي اۋىس - كۇيىسىن جانە وركەنيەتتەردىڭ ءوزارا ۇلگى الۋىن تەرەڭدەتۋ، شينجياڭنىڭ قوعام ورنىقتىلىعى مەن باياندى تىنىشتىعىنا قىزمەت وتەۋ جونىنەن ماڭىزدى ءمان الادى. شينجياڭدى ارالاپ، ىشكەرىلەي تەكسەرۋ - زەرتتەۋ جۇرگىزىپ، جاعداي ۇعىسىپ، عىلمي اۋىس - كۇيىستى جانە سەلبەستىكتى جەبەيمىز.
ءماجىلىس تاعى جارىسپالى تالقى مىنبەرىن وتكىزدى، ماجىلىسكە قاتىناسقان ماماندار، وقىمىستىلار «جۇڭگونىڭ ءار داۋىردەگى ورتالىق اكىمياتتارىنىڭ شينجياڭ ءوڭىرىن باسقارۋى جانە ءبىر تۇتاس كوپ ۇلتتى مەملەكەتتىڭ قۇرىلۋى“ سياقتى تاقىرىپتاردى ارقاۋ ەتە وتىرىپ زەرتتەۋ - تالقى جۇرگىزدى.
اۆتونوميالى رايوندىق ۇكىمەتتەگى قاتىستى باسشىلار، ورتالىق كوميتەت بىرلىكساپ بولىمىندەگى جانە جۇڭگو قوعامدىق عىلىمدار اكادەمياسىنداعى قاتىستى جولداستار، اۆتونوميالى رايوننىڭ قاتىستى تاراۋلارىنداعى، عىلمي زەرتتەۋ قۇرىلىمدارىنداعى جانە جوعارى مەكتەپتەردەگى جاۋاپتى جولداستار قاتىستى قيمىلدارعا قاتىناستى.
بۇل جولعى عىلمي زەرتتەۋ - تالقى ءماجىلىسىن شينجياڭ قوعامدىق عىلىمدار اكادەمياسى، شينجياڭ داشۋەسى مىندەتىنە الىپ ۇيىمداستىردى. جۇڭگودان، انگليادان، رەسەيدەن، يتاليادان، پاكيستاننان، حورۆاتيادان، موڭعۇليادان كەلگەن مامان - وقىمىستىلار قاتىناستى.
