为什么婴儿也会得白内障
نارەستەلەر نەلىكتەن شەلگە شالدىعادى
جاڭا تۋعان نارەستەنىڭ كوزىن تەكسەرۋ بارىسىندا قالىپسىزدىق بايقالعانى ءۇشىن، ءبىر جۇپ ەرلى-زايىپتى 2 ايلىق بالانى قۇشاعىنا الىپ، كوز اۋرۋلارى بولىمىنە كورىنۋگە كەلەدى. سوڭىندا بالانىڭ تۋما شەل ەكەنى انىقتالادى. شەلگە شالدىعۋشىلار كوبىندە 50 جاستان جوعارى ورتا جاستاعىلار مەن قارتتار بولاتىن-دى، كىشكەنتاي نارەستەنىڭ دە شەلگە شالدىققانى قالاي؟
ءتۇرلى سەبەپتەردەن كريستال دەنەدەگى بەلوكتىڭ قاسيەتى وزگەرەدى دە كۇڭگىرتتەنۋ پايدا بولادى، سونىمەن ناۋقاستىڭ كورۋ قۋاتى ۇقساماعان دارەجەدە تومەندەپ، شەلگە اينالادى. مەيلى ەلىمىزدە، الدە دۇنيە جۇزىندە بولسىن، شەل سۋ قاراڭعىلىق پەن كورۋ تۇيسىگىنە زاقىم كەلۋدىڭ ەڭ باستى سەبەبى. اۋرۋعا شالدىققانداعى جاس شاماسىنا قاراي شەل تۋما شەل جانە جەتىلمەلى شەل دەپ بولىنەدى. تۋما شەل دەگەنىمىز تۋعاندا بار نەمەسە تۋعان سوڭ ءبىر جىل ىشىندە بىرتە-بىرتە قالىپتاسقان تۋما تۇقىم قۋالاعان نەمەسە جەتىلۋ بارىسىنداعى ماسەلەلەردەن پايدا بولعان شەل. ول بالالاردا ۇنەمى كەزدەسەتىن كوز اۋرۋى، سونداي-اق بالالاردىڭ كورمەي قالۋىنىڭ جانە انىق كورە الماۋىنىڭ ماڭىزدى سەبەپتەرىنىڭ ءبىرى.
زەرتتەۋلەرگە قاراعاندا، تۋما شەلگە شالدىققانداردىڭ 1/3ى اۋلەتتىك تۇقىم قۋالاۋ تاريحىمەن جانە گەننىڭ شۇعىل وزگەرۋىمەن بايلانىستى بولادى ەكەن. بۇنداعى تۇقىم قۋالاۋ ءتاسىلى ايقىن تۇقىم قۋالاۋ، جاسىرىن تۇقىم قۋالاۋ جانە جىنىستىق حروموسوما ارقىلى تۇقىم قۋالاۋدى قامتيدى؛ بۇدان سىرت، جۇكتى كەزدە جۇعىمدالۋ، جۇكتى كەزدە قورەكتىك جەتىسپەۋ، جۇكتى كەزدە بەلگىلى دارىلەردى تۇتىنۋ، شالا تۋىلۋ، تۋعاندا سالماعى تومەن بولۋ قاتارلى ادامنىڭ وزىنەن بولاتىن، تۇزەتۋگە كەلەتىن فاكتورلارمەن دە بايلانىستى. ول جالعىز پايدا بولۋى مۇمكىن، سىڭار كوز نەمەسە قوس كوزگە شالىعىن تيگىزەدى؛ كوز ماڭى مەن بۇكىل دەنە جۇيەسىندەگى اۋرۋلارمەن ءبىر ۋاقىتتا پايدا بولۋى دا مۇمكىن. مىسالى، كوز الماسىنىڭ تۋما كىشى بولۋى، تۋما جۇرەك اۋرۋى، اقىل كەمىستىگى قاتارلىلار.
اتا-انا — بالا سالاماتتىعىنىڭ ءبىرىنشى جاۋاپتىسسى. كورۋ تۇيسىگىنە زاقىم كەلۋدەن بارىنشا اۋلاق بولۋ ءۇشىن، بالالاردىڭ تىزگىندەۋگە بولاتىن كوز اۋرۋلارىن جانە كورۋ قۋاتىنىڭ ناشارلاي ءتۇسۋىن تەجەۋىمىز نەمەسە ازايتۋىمىز كەرەك. اتا-انالار مەملەكەتتىڭ 0 دەن 6 جاسقا دەيىنگى بالالارعا ارنالعان 13 رەتكى كوز سالاماتتىعىن قورعاۋ جانە كورۋ قۋاتىن تەكسەرۋىنە بەلسەنە سەلبەسىپ، سالاماتتىق تاربيەسىن قابىلداۋى، ساقتانۋ مەن تىزگىندەۋ تانىمىن جوعارىلاتۋى، ەرتە بايقاپ، ەرتە دياگنوز قويىپ، ەرتە ەمدەتۋى كەرەك. كىسىنى قۋانتاتىنى، شەل وپەراتسياسى ميكروسكوپيا تەحنيكاسىنىڭ ۇزدىكسىز دامۋىنا ىلەسە، تۋما شەل وپەراتسياسىنىڭ ساتتىلىك سالىستىرماسى كورنەكتى جوعارىلادى، وپەراتسيادان كەيىنگى ءونىمى دە ايتارلىقتاي جاقساردى.
تۋما شەلدى دەر كەزىندە ەمدەتپەسە نەمەسە وپەراتسيادان كەيىن، انىق كورە الماۋ جايتى قاباتتاسا تۋىلۋى مۇمكىن. انىق كورە الماۋ دەگەنىمىز كورۋ تۇيسىگىنىڭ جەتىلۋ كەزىندە سىڭار كوزدىڭ قىلي بولۋى، ديوپتريانىڭ پارىقتى بولۋى، ديوپتريانىڭ تىم تەرىس بولۋى، سونداي-اق كوزدىڭ نۇر تىتىركەندىرۋىن سەزىنە الماۋى قاتارلى كورۋ تۇيسىگىندەگى قالىپسىز جايتتەردەن پايدا بولعان سىڭار كوزدىڭ نەمەسە ەكى كوزدىڭ تۇزەتۋگە بولاتىن ەڭ تاماشا كورۋ قۋاتىنىڭ سايكەس جاستاعى قالىپتى بالالاردىكىنەن تومەن بولۋى ءارى كوز اينالاسىندا ورگان سيپاتىندىق اۋرۋ وزگەرىسىنىڭ بايقالماۋى. جاپپاي تەكسەرۋدىڭ ناتيجەسىنە نەگىزدەلسەك، 3 تە 5 جاس ارالىعىنداعى بالالاردىڭ كورۋ قۋاتىنىڭ قالىپتى ءمانىنىڭ تومەنگى شەگى 0.5، 6 جاستاعى جانە ودان جوعارى جاستاعى بالالاردىڭ كورۋ قۋاتىنىڭ قالىپتى ءمانىنىڭ تومەنگى شەگى 0.7 ەكەن. انىق كورە الماۋدى ەمدەۋدىڭ ءساتتى بولۋ سالىستىرماسى ناۋقاس بالالاردىڭ جاسىنىڭ ۇلكەيۋىنە ىلەسە تومەندەيدى، 6 جاستان كەيىن تۇزەتۋ قيىن بولادى. ەرتە كورسەتىپ، ەرتە ەمدەتىپ، بالالاردىڭ سالاماتتى ەسەيۋىنە كەپىلدىك ەتۋ كەرەك.
来源：对疾病说不（书籍）
编辑：热依扎·卡玛力别克
