阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：上海老年报
作者：钱红春
沪语改写：丁一军
讲述：徐慧丽
审核、指导：丁迪蒙
编辑：王乙其
小辰光,我住勒一条弯弯曲曲、轧满仔低棚矮屋个弄堂里。我每日天放学回到屋里向个第一桩事体，就是到给水站去拎水，拿屋里向个水缸装满，等到爷娘落班回来淘米汏菜烧夜饭。
老早仔弄堂里向所有人家用个侪是井水。虽然讲井水勿大卫生，也勿大方便，听讲还有人落勒井里向，差一点搞出人性命来，但是也呒没办法解决。直到解放之后，勒人民政府个关怀搭仔支持下头再造起了给水站，居民从搿个辰光开始用自来水了。
埃个辰光，每家人家侪需要用自来水，侪会得到给水站去拎水。给水站有一根从地浪向伸出来个、像手臂介粗、搭胸口一样高个管子。勒搿根管子上头又接了一根搭地浪向平行个、长大概一米多个水管，水管两头各装一只出水口比现在屋里向大得多个水龙头。地浪向有一只三米见方、四面大概高两寸个水斗，用水泥铺个。水斗两端个下水道，侪用带有五只小洞洞眼个水泥盖头盖勒海。
居民屋里向差勿多侪有水缸盛水个，还有一、两只铅桶，用来拎水个。铅桶比起现在拎水个塑料桶要稍微大一点，是用镀锌铁皮手工敲出来个，桶口有活络个铁条拎攀，底浪向有寸把高、用来防止磨坏脱个铁圈焊勒海。埃个辰光常庄有挑仔担子个白铁匠勒穿弄堂，最多个生意就是修漏水或者拎攀脱落个铅桶。
给水站从早到夜侪老忙个。天刚刚亮，就有人拿仔木盆搭搓板勒水斗边浪汏衣裳了。到要烧中饭个辰光，家家人家侪要忙勒海淘米汏菜，搿辰光，水龙头边浪侪是个人。
中饭吃好以后也勿冷清个，有些人日里要上班，屋里向只有老人搭小小人，呒没人去拎水，只好出钞票请人家帮忙。搿辰光是弄堂里向专门为人家送水个挑水工最忙个辰光。请人挑水，有个是当场付钞票，也有每个号头结算一趟个。到了夜快头，给水站又是轧满人了，大多数是准备烧夜饭个。直到吃好夜饭以后，给水站再慢慢叫静下来。
每个号头个水费侪有居委会安排专门个人负责，一般是按每家人家个常人数平均计算。因为每个号头个用水量是勿一样个，所以每个月个收费标准也稍微有点勿一样。每个号头个水费收支账目搭仔自来水公司个收据侪会的按时贴勒弄堂口个墙壁浪向。
到给水站用水个人，等到拿要做个事体侪做光，再会得腾出一只手来顺带便拎桶水回去。因为弄堂里到处侪是七高八低、凸进凸出个弹硌路，一勿当心，桶里向个水就要晃到外头去个。尤其是像我搿种当时刚刚读书个小人，拎桶水一路走一路晃，满满一桶水拎到屋里向只剩半桶了。再讲挑水工来来回回帮人家挑水，滴滴漏漏也免勿了个。所以就算是好天气，弄堂里向个路面也侪是湿嗒嗒个。冷天介地浪向假使结冰了，居委会干部会得组织居民勒路浪撒一些煤渣防滑。到了天热，跟我差勿多个小人欢喜着仔木拖板奔来奔去，滑到受伤也是经常个事体。记得我埃个辰光受伤最多个地方是脚馒头，常庄是旧伤还呒没好又加新伤了。
后首来，阿拉屋里搬场了，新个屋里有自来水个，从此，就告别了给水站。
上个世纪六十年代初，我参军之后，有一年回上海探亲，我特地回到老弄堂望望邻居搭小辰光个小朋友，埃个给水站还勒海。
十多年前头，我路过伊面，弄堂老早就呒没了，侪是一幢幢高层公寓，给水站也永远个留勒我个记忆当中了。
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“启迪心田沪语”公众号
我知道你在看哟~
