11 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن سلوۆاكيا زۇڭليى فيزومەن كەزدەستى. سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
شينحۋا اگەنتتىگىنىڭ 11 - ايدىڭ 1 - كۇنى بەيجيڭنەن بەرگەن حابارى (ءتىلشى دۇڭ شۋە). 11 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن سلوۆاكيا زۇڭليى فيزومەن كەزدەستى.
شي جينپيڭ بىلاي دەپ اتاپ كورسەتتى: بيىل − جۇڭگو مەن سلوۆاكيانىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى. 75 جىلدىق دامۋ ارقىلى جۇڭگو مەن سلوۆاكيانىڭ ءداستۇرلى دوستىعى ومىرشەڭدىككە تولىپ، ءار سالاداعى سەلبەستىگى سۇبەلى تابىستارعا قول جەتكىزىپ، ەكى ەل حالقىن شىنايى تيىمدىلىككە كەنەلتتى. ءبىز جۇڭگو − سلوۆاكيا قارىم - قاتىناسىن ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى ۇيعاردىق، بۇل ەكى ەلدىڭ بولاشاقتاعى دامۋ قاجەتىنە ۇيلەسەدى، ەكى جاقتى سەلبەستىككە تىڭ دا قۋاتتى قوزعاۋشى كۇش ۇستەيدى. جۇڭگو جاق سلوۆاكيا جاقپەن بىرگە قۇلشىنىپ، جۇڭگو − سلوۆاكيا قارىم - قاتىناسىنىڭ تىڭ پاراعىن اشىپ، اناعۇرلىم جوعارى دەڭگەيگە كوتەرىلۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: ەكى جاقتىڭ جۇڭگو − سلوۆاكيا قارىم - قاتىناسىنىڭ ساپاسىن جوعارىلاتىپ، دارەجەسىن كوتەرۋدى مىناداي 4 جاقتان ۇزدىكسىز ىلگەرىلەتۋىنە بولادى. ءبىرىنشى، ساياسي ءوزارا سەنىمدىلىكتى تەرەڭدەتۋ. جوعارى جىكتەگىلەردىڭ بارىس - كەلىسىن ساقتاپ، ستراتەگيالىق بايلانىستى كۇشەيتىپ، ءوزارا قۇرمەت ەتۋگە، ءوزارا سەنىم ارتۋعا، تەڭ تۇرعىدا مامىلە جاساۋعا، ءوزارا پايدا جەتكىزىپ تەڭ يگىلىككە كەنەلۋگە تاباندى بولىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە ءمان بەرۋ كەرەك. ەكىنشى، ناقتى ىستەر سەلبەستىگىن كەڭەيتۋ. جاڭادان قۇرىلعان ەكى ەل ۇكىمەتى اراسىنداعى سەلبەستىك كوميتەتىنەن ويداعىداي پايدالانىپ، جاڭا ەنەرگيا، قاتىناس، زات اينالىمى، نەگىزدىك قۇرىلعى قۇرىلىسى، سۋ بايلىعىن باسقارۋ سياقتى سالالاردا ءتۇيىلىسۋدى كۇشەيتۋ كەرەك. جۇڭگو جاق ناقتى قۋاتى بار جۇڭگو كاسىپورىندارىن سلوۆاكياعا بارىپ قارجى قوسۋعا شابىتتاندىرادى، سلوۆاكيا كاسىپورىندارىنىڭ دا جۇڭگوعا كەلىپ بازار اشۋىن قارسى الادى. ءۇشىنشى، گۋمانيتارلىق اۋىس - كۇيىستى جەبەۋ. ساياسي پارتيا، جەرگىلىكتى ورىن، جاستار، اقىل - پاراسات قويماسى، مەديالار اۋىس - كۇيىسىن، تىلدەسۋىن ورىستەتىپ، كۇڭزى شۋەيۋانى سياقتى تۇعىرلاردان ويداعىداي پايدالانىپ، جۇڭگو مەن سلوۆاكيانىڭ ۇرپاقتان - ۇرپاققا جالعاسقان دوستىعىنىڭ حالىق رايى نەگىزىن بەكەمدەۋ كەرەك. جۇڭگو جاق سلوۆاكيا ازاماتتارىنا 15 كۇن ۆيزاسىز جۇڭگو شەكاراسىنا كىرۋ مامىلەسىن بەرۋدى ۇيعاردى. ءتورتىنشى، حالىقارالىق سەلبەستىكتى كۇشەيتۋ. اۋمالى - توكپەلى دۇنيە ءجۇزى الدىندا، ەكى جاق ناعىز كوپ جاقتىلىققا تاباندى بولىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، دۇنيە ءجۇزىنىڭ تەپە - تەڭ، ءتارتىپتى كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن دارىپتەپ، بىرگە اقىلداسۋ، بىرگە قۇرۋ، بىرگە يگىلىكتەنۋ سىندى الەمدىك باسقارۋ كوزقاراسىن امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك.
شي جينپيڭ بىلاي دەپ باسا دارىپتەدى: جۇڭگو جاق جۇڭگو − ەۆروپا وداعى قارىم - قاتىناسىنا ايرىقشا ءمان بەرەدى. كەلەر جىلى جۇڭگو مەن ەۆروپا وداعىنىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، جۇڭگو − ەۆروپا وداعى قارىم - قاتىناسى ءتيىستى كەمەلدەنۋ مەن ورنىقتىلىقتى ايگىلەۋى كەرەك. جاڭا كەزەكتى ەۆروپا وداعى قۇرىلىمىنىڭ جۇڭگو − ەۆروپا وداعى سەرىكتەستىك قارىم - قاتىناسىنىڭ ورنىنا تاباندى بولىپ، جۇڭگوعا بەلسەندى، ناقتى ساياسات قولدانىپ، الاۋىزدىقتاردى ۇيلەسىمدى تىزگىندەپ، ەكونوميكا - ساۋدا ماسەلەسىن ساياسيلاندىرۋدان ساقتانۋىن ءۇمىت ەتەمىن.
فيزو جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاپ، مىنالاردى ءبىلدىردى: سلوۆاكيا ءبىر جۇڭگو ساياساتىن باتىل اتقارادى، جۇڭحۋا حالىق رەسپۋبليكاسى ۇكىمەتى بۇكىل جۇڭگوعا ۋاكىلدىك ەتەتىن بىردەن - ءبىر زاڭدى ۇكىمەت دەپ قارايدى. سلوۆاكيا جاق وزگە ەلدەردىڭ ىشكى ىسىنە كيلىگەتىن ءارقانداي ارەكەتكە قارسى تۇرادى، ءار ەلدىڭ دەربەس تاڭداعان دامۋ جولىنا قۇرمەت ەتۋدى دارىپتەيدى. وسى رەت مەن بيلىك كەڭسەسىنىڭ كوپتەگەن ماڭىزدى مۇشەسى مەن كوپتەگەن كاسىپورىنشىنى قامتىعان كولەمدى ۋاكىلدەر ۇيىرمەسىن باستاپ جۇڭگوعا ساپارلاي كەلدىم، مۇنداعى ماقسات سلوۆاكيا جاقتىڭ جۇڭگومەن قارىم - قاتىناستى دامىتۋعا ايرىقشا ءمان بەرەتىندىگىن جانە بەلسەندى تىلەگىن كورسەتۋ. جۇڭگو جاقتىڭ سلوۆاكيا ازاماتتارىنا 15 كۇن شەكارادان ۆيزاسىز كىرۋ ساياساتىن قولدانعاندىعىنا العىس ايتادى، سلوۆاكيا جاق ەكى ەل ادامدارىنىڭ بارىس - كەلىسىنە قولايلىلىق جاساۋدى، ءوزارا ءتۇسىنىسۋدى تەرەڭدەتۋدى قولدايدى، اناعۇرلىم كوپ جۇڭگو كاسىپورىندارىنىڭ سلوۆاكياعا بارىپ قارجى قوسىپ، جاڭا ەنەرگيا، نەگىزدىك قۇرىلعى سياقتى سالالاردا سەلبەستىكتى كۇشەيتۋىن قارسى الادى. سلوۆاكيا جاق ءتوراعا شي جينپيڭ العا قويعان 3 ۇلكەن الەمدىك باستامانى القايدى، سىڭار جاقتىلىق پەن زورەكەرلىككە قارسى تۇرادى، جۇڭگو جاقپەن كوپ جاقتى بايلانىستى، ىستەستىكتى كۇشەيتىپ، الەمدىك باسقارۋدى كەمەلدەندىرۋدى ىلگەرىلەتىپ، كۇللى ادامزاتتىڭ قۇت - ىرىسىن جەبەۋدى قالايدى. سلوۆاكيا جاق جۇڭگو جاقپەن پارتيالار ارا اۋىس - كۇيىستى جانە ەل باسقارۋ تاجىريبەلەرىن اۋىستىرۋدى كۇشەيتىپ، ەۆروپا وداعىنىڭ الاۋىزدىقتاردى تىلدەسۋ، كەڭەسۋ ارقىلى ۇيلەسىمدى ءبىر جاقتى ەتۋگە كۇش سالۋىن بەلسەنە ىلگەرىلەتۋدى قالايدى.
ەكى جاق ۋكراينا داعدارىسى جونىندە دە پىكىر اۋىستىردى. شي جينپيڭ جۇڭگو جاقتىڭ دايەكتى پرينسيپتىك تۇرعىسىن بايانداپ، سلوۆاكيا جاقتىڭ وبيەكتيۆ، پاراساتتى، ءادىل پوزيتسيادا بولعاندىعىن القادى، سلوۆاكيانىڭ جانە اناعۇرلىم كوپ مۇراتتاس ەلدەردىڭ جۇڭگو جاقپەن بىرگە تاتۋلىققا ءناسيحاتتاۋدا، كەلىسسوزدى جەبەۋدە بەلسەندى رول اتقارۋىن قارسى الدى. فيزو مىنالاردى ءبىلدىردى: جۇڭگو جاقتىڭ ۋكراينا داعدارىسى ماسەلەسىندەگى تۇرعىسى ءادىل، وبيەكتيۆ، سىندارلى، سلوۆاكيا جاق ۋكراينا داعدارىسىنىڭ ”بەيبىتشىلىك دوسى“ گرۋپپاسىنا قاتىناسىپ، جۇڭگو جاقپەن بىرگە داعدارىستى ساياسي جولمەن شەشۋدى ىلگەرىلەتۋگە ۇلەس قوسۋدى قالايدى.
كەزدەسۋدەن كەيىن ەكى جاق «جۇڭحۋا حالىق رەسپۋبليكاسى مەن سلوۆاكيا رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
ۋاڭ ي كەزدەسۋگە قاتىناستى.
来源：新疆日报
编辑：阿莱·赫亚克巴依
监制：叶尔兰·努哈
