انار بۇلت \ شينجياڭ گازەتىنىڭ حابارى (ءتىلشى شيە حۇيبيان). 11-ايدىڭ 4-كۇنى ءتىلشىنىڭ شينجياڭ اۋا رايى ستانسياسىنان ۇعىسۋىنشا، وسى اپتادا (11-ايدىڭ 4-كۇنىنەن 10-كۇنىنە دەيىن) ءبىرشاما قاتتى سۋىق اعىس كىرىپ، تەمپەراتۋرا كورنەكتى تومەندەيدى ەكەن.
مەجەمەن 11-ايدىڭ 6-كۇنى تۇننەن 8-كۇنى تۇنگە دەيىن سولتۇستىك شينجياڭنىڭ باسىم كوپ بولىگى، شىعىس شينجياڭ سياقتى وڭىرلەردە ەڭ تومەنگى تەمپەراتۋرا ℃8-5 تومەندەيدى، سولتۇستىك شينجياڭنىڭ باتىسى مەن سولتۇستىگىندە تەمپەراتۋرا ℃10-8 تومەندەيدى ەكەن. اۋا رايى ماماندارى: وسى اپتاداعى تەمپەراتۋرانىڭ تومەندەۋ مولشەرى ءبىرشاما ۇلكەن، ىزعار اسەرى ءبىرشاما ايقىن، جۇرتشىلىقتىڭ سىرتقا شىققاندا دەر كەزىندە قالىڭ كيىنىپ جىلى ءجۇرۋىن، تۇماۋراتىپ قالۋدان ساقتانۋىن ەسكەرتەمىز،-دەدى.
الدىن الا مالىمەتتە كورسەتىلۋىنشە، 11-ايدىڭ 6-كۇنى تۇننەن 8-كۇنى تۇنگە دەيىن سولتۇستىك شينجياڭنىڭ باسىم كوپ بولىگىندە جانە وڭتۇستىك شينجياڭنىڭ باتىسىنداعى تاۋلى وڭىرلەر، اقسۋ ايماعىنىڭ باتىسى، سولتۇستىگى، بايىنعولين موڭعۇل اۆتونوميالى وبلىسىنىڭ سولتۇستىگى، شىعىس شينجياڭ سياقتى جەرلەردىڭ ءبىر ءبولىم وڭىرىندە جاڭبىر جاۋىپ، ارتى قار ارالاس جاڭبىرعا نەمەسە قارعا اينالادى (تاۋلى وڭىرلەردە قار جاۋادى)، مۇندا سولتۇستىك شينجياڭنىڭ باتىسى، سولتۇستىگى، شىحىزى قالاسىنىڭ وڭتۇستىگى، ءۇرىمجى قالاسى، سانجى حۇيزۋ اۆتونوميالى وبلىسى، بايىنعولين وبلىسىنىڭ سولتۇستىگىندەگى تاۋلى وڭىرلەر، قۇمىل قالاسىنىڭ سولتۇستىگى سياقتى جەرلەردىڭ ءبىر ءبولىم وڭىرلەرىندە ورتاشا جانە قالىڭ قار جاۋادى، تاۋلى وڭىرلەردىڭ ءىشىنارا جەرلەرىندە سۇراپىل قار جاۋادى. جوعارىدا ايتىلعان باسىم كوپ بولىكتەگى وڭىرلەردە باتىس تەرىستىكتەن 5 بال مولشەرىندە بوران سوعادى، جەل وتتەرىندەگى جەل كۇشى 10-11 بالعا جەتەدى، ۇيىتقىما بوران 12 بال اينالاسىندا بولادى.
بۇدان سىرت، مەجەمەن 11-ايدىڭ 4-كۇنى كۇندىزدەن 5-كۇنى كۇندىزگە دەيىن تارباعاتاي ايماعىنىڭ سولتۇستىگى، التاي ايماعىنىڭ باتىسى، ءۇرىمجى قالاسى، سانجى وبلىسى، قۇمىل قالاسىنىڭ سولتۇستىگى سياقتى جەرلەردىڭ ءىشىنارا وڭىرلەرىندە قيىس شىعىستان 5-6 بال بوران سوعادى، مۇندا تارباعاتاي ايماعىنىڭ سارعۋسىن جانە مايتاس جەلدى وڭىرىندە، التاي ايماعىنىڭ نوقاي جەلدى وڭىرىندە، ءۇرىمجى قالاسىنىڭ ۇلانباي جانە حۇڭيانچى سياقتى جەل وتتەرىندە جەل كۇشى 10 بال اينالاسىندا بولادى؛ تيانشاننىڭ تەرىسكەيىندەگى ءبىر ءبولىم وڭىرلەردە ءۇرتىس تۇماندى اۋا رايى جالعاسادى.
شينجياڭ اۋا رايى ستانسياسى مىنالاردى ەسكەرتتى: 11-ايدىڭ 4-كۇنى تۇننەن 5-كۇنى كۇندىزگە دەيىن سولتۇستىك شينجياڭنىڭ ءىشىنارا وڭىرلەرىندە قيىس شىعىستان سوققان جەل قاتىناسقا، ءجۇرىس-تۇرىسقا، قۇرىلعىلى اۋىل شارۋاشىلىعىنا بەلگىلى دارەجەدە ىقپال كورسەتەدى، قاتىستى تاراۋلاردىڭ وتتان پايدالانۋ حاۋىپسىزدىگىنە كوڭىل ءبولۋىن، جۇرتشىلىقتىڭ سىرتقا شىققاندا توبەدەن نارسە قۇلاپ جاراقاتتاۋىنان ساقتانۋىن ەسكەرتەمىز. 11-ايدىڭ 6-كۇنى تۇننەن 8-كۇنى تۇنگە دەيىن سولتۇستىك شينجياڭنىڭ باسىم كوپ بولىگىندەگى وڭىرلەردە جاڭبىرلى، قارلى اۋا رايى جارىققا شىعادى، قاتىستى تاراۋلار ءىشىنارا جەرلەردە قالىڭ قار جاۋۋىنان، بوراندى جانە تومەن تەمپەراتۋرالى اۋا رايىنىڭ ەگىن، مال شارۋاشىلىعى ءوندىرىسى، جول-قاتىناس، قالالارداعى ءجۇرىس-تۇرىس سياقتىلارعا ءتيىمسىز ىقپال كورسەتۋىنەن ساقتانۋى كەرەك.
بۇدان سىرت، شينجياڭ اۋىل شارۋاشىلىعى اۋا رايى ستانسياسى جەر-جەردىڭ اشىق اۋا رايىنان پايدالانىپ، كۇزگى جيىن-تەرىن جانە جەمىستەردى ساتىپ الىپ ساقتاۋ قىزمەتىن ويداعىداي ىستەۋىن ءارى لايىقتى ۋاقىتتا ەگىس اتىزدارىنىڭ كۇزگى اۋدارۋ، قىسقى سۋىن بەرۋ جۇمىستارىن ىستەۋىن ەسكەرتتى.
