ཚེས་24ཉིན། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱིས་ཁྲུང་ཆིང་དང་། ཧུའུ་པེའི་ཝུའུ་ཧན། བོད་ལྗོངས་ཀྱི་ལྷ་ས། ཅང་སུའུ་ཡི་ཝུའུ་ཤི་བཅས་སུ་2025ལོའི་དཔྱིད་གསར་དུས་ཆེན་གྱི་མཉམ་སྤྲོའི་དགོང་ཚོགས་ཀྱི་ཡན་ལག་ཚོགས་ར་འཛུགས་རྒྱུའི་ཁྱབ་བསྒྲགས་བྱས་པ་རེད།
དཔྱིད་གསར་དུས་ཆེན་འཛམ་གླིང་མངོན་མིན་རིག་གནས་ཤུལ་བཞག་ནང་ཚུད་རྗེས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱིས་གཉེར་བའི་དཔྱིད་གསར་དུས་ཆེན་གྱི་མཉམ་སྤྲོའི་དགོང་ཚོགས་ཐེངས་དང་པོ་ཡིན་པའི་ངོས་ནས། “སྒོ་ཕྱེ་ནས་དཔྱིད་གསར་དུས་ཆེན་གྱི་མཉམ་སྤྲོའི་དགོང་ཚོགས་གཉེར་བ”མུ་མཐུད་རྒྱུན་འཁྱོངས་བྱས་ཏེ། བཀྲ་ཤིས་དགའ་སྤྲོའི་རྣམ་པས་ཁེངས་པའི“མི་དམངས་ཀྱི་དཔྱིད་གསར་དུས་ཆེན”ཞིག་གཏོང་རྒྱུ་ཡིན་ཞིང་། གནམ་གང་དགོང་མོར་ས་གནས་བཞིའི་ཡན་ལག་ཚོགས་རས་པེ་ཅིང་གི་ཚོགས་ར་གཙོ་བོ་དང་ལྷན་དུ་གོ་ལ་ཧྲིལ་པོའི་ལྟད་མོ་ལྟ་མཁན་ཚོར་བརྩེ་སེམས་ཀྱིས་ཕྱུག་པ་དང་སྤྲོ་སྣང་གིས་ཁེངས་པའི་རིག་གནས་ཀྱི་སྟོན་མོ་གཟབ་རྒྱས་ཤིག་བཤམ་རྒྱུ་རེད་འདུག
