ཉེ་ཆར། “ལྷ་སར་ཆང་བཏུངས་འཁོར་གཏོང་གི་ཞིབ་བཤེར་བྱེད་སྐབས་ཁ་ལོ་བ་ཞིག་གིས་ཨུ་ཚུགས་ཀྱིས་རླངས་འཁོར་བཏང་ནས་བྲོས་པའི”བརྙན་ཐུང་ལ་སྤྱི་ཚོགས་ཐོག་དོ་ཁུར་ཆེན་པོ་བྱུང་ཡོད།
གནས་ཚུལ་ཞིབ་ཕྲ།
2024ལོའི་ཟླ་12ཚེས་8ཉིན་གྱི་ཆུ་ཚོད་7དང་སྐར་མ་26ཙམ་ལ། ཁ་ལོ་བ་ཕུན་ཆེ་གེ་མོས་འཁོར་རྟགས་ཧྲའནUZ***ཡིན་པའི་འཇིབ་ཆུང་ཞིག་བཏང་ནས་འདམ་ར་ལམ་ཟོག་འདྲེན་ལྟེ་གནས་མདུན་གྱི་ལམ་དུམ་ནས་སྐྱོད་སྐབས། གྲོང་ཤར་རུ་ཆེན་གྱི་ཉེན་རྟོག་པས་ཆང་བཏུངས་འཁོར་གཏོང་ལ་ཞིབ་བཤེར་བྱེད་པ་དང་འཕྲད་པས་ཁོ་པས་ལམ་སེང་རླངས་འཁོར་བཏང་ནས་བྲོས་པ་རེད།
གནས་ཚུལ་ཐོན་རྗེས། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་ཚད་མཐོའི་མཐོང་ཆེན་བྱས་པ་དང་། གྲོང་ཤར་རུ་ཆེན་གྱི་མི་དམངས་ཉེན་རྟོག་པས་ལམ་སེང་བརྟག་དཔྱད་བྱས་པ་རེད། གྲལ་བཤེར་མཐིལ་རྟོགས་དང་གློག་མིག་ལ་བལྟས་པ་བརྒྱུད་རླངས་འཁོར་དེ་རྩད་ཆོད་ཅིང་། དེ་ཡང་ཟླ་12ཚེས་11ཉིན། ལྷ་སའི་ཏུང་ཁྲེང་ཀྲེ་ཤིང་ཚོང་ལས་ཐང་ཆེན་གྱི་ས་འོག་གི་རླངས་འཁོར་འཇོག་ས་ནས་འཇིབ་ཆུང་དེ་རྙེད་པ་མ་ཟད། གཙང་རལ་ལམ་ལྷོ་ངོས་ཀྱི་ཁུལ་ཆུང་ཞིག་ནས་ཁ་ལོ་བ་ཕུན་ཆེ་གེ་མོ་བཟུང་ཐུབ་པ་རེད།
བརྟག་དཔྱད་བྱས་པ་བརྒྱུད། ཁ་ལོ་བ་ཕུན་ཆེ་གེ་མོར་ལག་ཁྱེར་མེད་པར་རླངས་འཁོར་བཏང་བའི་དོགས་གཞི་ཡོད་པས།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་ལམ་འགྲིམ་འགྲུལ་བདེ་འཇགས་བཅའ་ཁྲིམས》ཀྱི་དོན་ཚན་99ནང་གི་འབྲེལ་ཡོད་གཏན་འབེབས་ལ་གཞིགས་ན། སྒོར་200ཡན་ནས་2000མན་གྱི་དངུལ་ཆད་གཅོད་ཆོག་པ་མ་ཟད། དེ་དང་ཆབས་ཅིག་ཏུ་ཉིན་15མན་གྱི་བཀག་ཉར་བྱེད་ཆོག་གི་ཡོད་པ་རེད། ཞིབ་བཤེར་བྱེད་སྐབས་བྲོས་འགྲོ་བ་ནི་རྒྱལ་ཁབ་ལས་ཁུངས་ཀྱི་ལས་དོན་མི་སྣས་ཁྲིམས་ལྟར་ལས་འགན་སྒྲུབ་པར་འགོག་རྐྱེན་བཟོ་བའི་ཁྲིམས་འགལ་གྱི་བྱེད་སྤྱོད་ཅིག་ཡིན་པས། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་དོ་དམ་གྱི་ཆད་གཅོད་བཅའ་ཁྲིམས》ཀྱི་དོན་ཚན་50པའི་ནང་གི་འབྲེལ་ཡོད་གཏན་འབེབས་ལ་གཞིགས་ན། ཉིན་5ཡན་ནས་10མན་བཀག་ཉར་བྱེད་ཆོག་པ་མ་ཟད། དེ་དང་ཆབས་ཅིག་ཏུ་སྒོར་500མན་གྱི་དངུལ་ཆད་གཅོད་ཆོག་གི་ཡོད་པ་རེད། དོ་བདག་ཕུན་ཆེ་གེ་མོའི་ཁྲིམས་འགལ་གྱི་བྱེད་སྤྱོད་ལ་དམིགས་ནས། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་དང་ཁྲེང་ཀོན་སྤྱི་བདེ་ཡན་ལག་ཅུས་ཀྱིས་ཁོ་པར་དངུལ་ཆད་སྒོར་1900བཅད་པ་དང་། ཉིན་19བཀག་ཉར་གྱི་སྲིད་འཛིན་ཆད་པ་བཅད་པ་རེད། ཁ་ལོ་བ་ཕུན་ཆེ་གེ་མོས། ངས་རང་ཉིད་ཀྱི་ནོར་འཁྲུལ་ཤེས་སོང་། དེ་མཚུངས་ཀྱི་བཅའ་ཁྲིམས་ཀྱི་འགན་འཁྲི་ཚང་མ་འཁུར་འདོད་ཡོད་ཅེས་བཤད་པ་རེད།
མིག་སྔར་གྱོད་གཞི་དེ་སྒྲུབ་གཉེར་བྱེད་བཞིན་ཡོད་པ་རེད།
