༄༅།དབལ་ཕུར་ནག་པོའི་བཅུད་དྲིལ་བཞུགས།
བསྭོ་ༀཱ་ཧེ་ཏྲགྴ་ཏིབ་ཏ་ཀི་ལིང་ཡཱ། ཙཀྲ་མཱ་ར་ཡ། ཨ་པྲ་ཚིན་དྷ། ཀྲོ་ཏ་ཏིབ་སྟ། བྷིན་དྷ་སྤོ་ཏ་ལྷན། དབལ་ཕུར་ནག་པོ་དགྲ་བགེགས་ཀྱི་སྙིང་ལ་ཁ་ཐམ་རྦད་ཐུམ་སྟ་ནན། བསྭོ་ༀཱ་ཧེ་ཏྲགྴ་ཏིབ་སྟ་ཁྱི་ལིང་ཡཱ། ཙཀྲ་མཱ་ར་ཡཱ། ཨ་པྲ་ཚིན་དྷ་ཁྲོ་ཏ་ཏིབ་སྟ། བྷིན་དྷ་སྤོ་ཏ་ལྷན། དབལ་ཕུར་ནག་པོ་དགྲ་བགེགས་ཀྱི་སྙིང་ལ་ཁ་ཐམ་རྦད། མཾུ་མ་ར་ཡ། ཁ་རག་བུམ་ལིང་ཐུཾ་སྟ་ནན། བསྭོ་ༀཱ་ཧེ་ཏྲགྴ་ཤ་ཏཾྲུ་ཏིབ་ཏ་ཁྲི་ལིང་ཡྭ། ཙཀྲ་མཱ་ར་ཡ། བྷིན་དྷ་པུར་པ་ཏྲ་ཡ། བྷིན་དྷ་སྤོ་སྟ་ལྷན། རྦཱིན་ཟེ་ཡ་མ་འུར་ཆེམ། ཀུ་དུར་པ་ཁུ་ཁུ་ཡ། ནཱ་ག་པྲ་ལ་དུན། མ་མ་རགྴ་ཀི་ལིང་ཕུར་ཧྲིལ། མཾུ་མ་ར་ཡ་ཁ་རག་བུམ་ལིང་ཤ་ཏྲུཾ་མ་ར་ཡ་ཏི་སྟ་ལྷན།
བསྭོ་བསྭོ་དབྱིངས་ན་བཞུགས་པའི་ཁྲོ་བོ་ཕུར་ནག་བསྭོ། །ཕྱོགས་བཅུ་མེ་རི་འབར་བའི་འོད་དཔུང་ནས། །འདུ་འཕྲོ་ཆོ་འཕྲུལ་ཁྲོ་བོ་ཕུར་ནག་སྐུ། དངོས་པོ་མེད་ལས་མཚན་མའི་སྐུར་བསྟན་པ། རྒྱན་དང་ཆ་ལུགས་འཇིགས་པའི་ཁྲོ་རྔམ་ཅན། ཞལ་གསུམ་ཕྱག་དྲུག་སྐུ་སྨད་ཕུར་བའི་དབལ། དབལ་གྱི་ཕུར་ནག་ལྷ་ལ་ཕྱག་འཚལ་བསྟོད། བསྭོ་ཕྱོགས་བཅུ་བདེ་བར་བཤེགས་པའི་ཕོ་བྲང་ནས། །རང་འབྱུང་འཇིགས་བྱེད་ལྷ་གསས་མཐུ་སྟོབས་ཅན། །བསྐྱེད་པའི་རྒྱུ་མེད་བཞུགས་པའི་གནས་མེད་ཀྱང་། །ཐུགས་རྗེས་བསྟན་པ་གཉེན་པོ་བསྲུང་བ་དང་། ལས་ཀྱི་དགྲ་བགེགས་དབང་དུ་སྡུད་པའི་ཕྱིར། །མཁའ་ཀློང་དབྱིངས་ནས་སྤྲུལ་པ་མངོན་ཕྱུང་ལ། །དབལ་གཤེན་བདག་ལ་དབང་བསྐུར་བྱིན་གྱིས་རློབས། །བདག་གི་ལུས་འདི་ཁྲོ་བོའི་སྐུར་གྱུར་ཏེ། ཁྲོ་ཚོགས་ཐུགས་རྗེ་གཉིས་མེད་དམ་དུ་བསྲེ། །བསྭོ་དྲག་པོ་ལྷ་གསས་རང་འབྱུང་ལྷ། །དུག་ལྔའི་གཉེན་པོ་ཕུར་བའི་སྐུ། །ཡེ་ཤེས་དབལ་གྱི་ཁྲོ་བོ་ནི། ཁྲ་གསས་མེ་གསས་དབལ་གསས་དང་། །གློག་གསས་མཁའ་འགྱིང་བདུད་ནག་འབར། །གནམ་དྲག་ངར་ཆེན་སྡོམ་ཆེན་འཁྱིལ། །འབྲུག་གསས་སྟག་ལ་མཁའ་འགྱིང་ཁྲོ། །གཉིས་མེད་དབྱིངས་ཀྱི་ཁྲོ་མོ་ནི། །སྟོང་ཁྱབ་མ་དང་ཁ་འབར་མ། །ཛ་ལ་མ་དང་འོད་འཕྲོ་མ། མེ་འགྱུ་མ་དང་གཏུམ་ཀློང་མ། །རྦ་ཀློང་མ་དང་སྒྲ་འབྱིན་མ། །རལ་ཁ་མ་དང་དབང་སྡུད་མ། །བྱིན་རླབས་ཡུམ་ཆེན་ཐུགས་རྗེ་བྱམས། །ཡབ་ཡུམ་སྤྲུལ་པའི་ཆོ་འཕྲུལ་དུ། །ཁྲ་ཐབས་གཟེ་མ་ཉི་ཤུ་གཉིས། །སྒོ་བཞི་སྒོ་བ་ཡབ་ཡུམ་བརྒྱད། །འཇིགས་པ་བཞི་ཡི་སྒོ་གཅོད་ཡབ། །ཐར་པ་བརྒྱད་ཀྱི་སྒོ་འབྱེད་ཡུམ། །ཕོ་ཉ་སྤྲུལ་པ་འཁོར་དང་བཅས། །དྲག་པོ་ཞེ་སྡང་ཕུར་བའི་ལྷ། །ལས་དང་ཉོན་མོང་གདུག་སེམས་འཇོམས། །དྲག་པོ་དབལ་ཕུར་ལྷ་རུ་བདར། །ནམ་མཁའ་བར་སྣང་ས་གཞི་དང་། །ཕྱོགས་འཚམས་ཀུན་ནས་ལས་བྱེད་པའི། །གསང་ཁྲ་ཡབ་ཡུམ་སྤྲུལ་པ་ལས། །འཇིགས་པའི་ཁྲ་ལྔ་སྤྲུལ་པར་བཅས། །ཟ་བྱེད་ཁྲ་སྤྱང་དམར་ནག་དང་། །གཏིང་ཁམས་ས་བདག་བུད་མེད་ཚོགས། །དབལ་ཕུར་ལས་མཁན་བརྒྱ་རྩ་བརྒྱད། །སྔོན་ཚེ་དབལ་གཤེན་ཇི་བཞིན་དུ། །དྲག་པོ་ཕུར་བའི་ཕྲིན་ལས་སྒྲུབས། །ལས་ངན་དགྲ་ལ་ཕུར་བ་ཐོབས། །གང་ལྟར་བཅོལ་བའི་ཕྲིན་ལས་མཛོད། །བསྭོ་དུག་ལྔའི་བདུད་འདུལ་དྲག་པོ་ཕུར་བའི་ལྷ༑ ༑གཙོ་འཁོར་སྤྲུལ་པར་བཅས་པའི་ཁྲོ་ཚོགས་རྣམས། །དངོས་བཤམས་ཡིད་སྤྲུལ་མཆོད་པ་འདི་བཞེས་ལ། །དབལ་བོན་བདག་ལ་བྱིན་ཕོབས་དབང་བསྐུར་ཅིག །ལྷ་མཆོག་ཁྱེད་དང་གཉིས་སུ་མེད་པ་རུ། །ཁྲོ་ཚོགས་ཡེ་ཤེས་བདག་ལ་མངོན་དུ་སྩོལ། །སྣང་སྲིད་ཁྲོས་པ་ཁྲོ་བོ་ཕུར་བའི་སྐུ། །གཡོ་བ་མེད་ལ་གཡོ་བའི་ཆོ་འཕྲུལ་དུ། །ལོག་འདྲེན་དགྲ་དགེགས་འདུལ་བའི་འཇིགས་ཚོགས་ཅན། །དྲག་པོ་དབལ་ཕུར་ཕྲིན་ལས་མངོན་སྤྱོད་དབལ། །མཁའ་ཀློང་དབྱིངས་ནས་རང་འབྱུང་ཤར་བའི་གསས། །ཕྲིན་ལས་དྲག་པོ་མྱུར་བསྒྲུབས་དབལ་ལ་བསྟོད། །བསྭོ་ༀཱ་ཧེ་ཏྲགྴ་ཏིབ་ཏ་ཤ་ཏྲུཾ་མ་ར་ཡ་ཏི་སྟ་ལྷན། ཞེ་སྡང་དབལ་ཕུར་གཞུང་ལས་བཅུད་དུ་དྲིལ་བ་ཨུ་ཡ། རྨ་པོམ་རའི་ཐུགས་ཀ་ནས། སྟག་ལའི་ཐུགས་སྤྲུལ་ཁོ་བོ་དབྲ་སྟོན་དབལ་འབར་སྟག་སླག་ཅན་བདག་གིས་རྫུ་འཕྲུལ་གཏེར་ལས་ཐོན་པའོ། །དབྲ་བཙུན་ཚུལ་ཁྲིམས་དཔལ་བཟང་གསུང་གིས་བསྐུལ་ངོར། ཁྱུང་ནག་རྫོང་དུ་གཏན་ལ་ཕབ་པ་མུ་ཙུག་སྨར་རོ།།
ན་མོ་ཕྱོགས་བཅུའི་དུས་གསུམ་སངས་རྒྱས་རྣམས་ཀྱི་བཀའ་བདེན་པ་དང༌། བཀའ་མདོ་རྒྱུད་ལུང་མན་ངག་རྣམས་ཀྱི་བཀའ་བདེན་པ་དང༌། གཤེན་རབ་གཡུང་དྲུང་སེམས་དཔའ་རྣམས་ཀྱི་བཀའ་བདེན་པ་དང༌། རྒྱུད་གསུམ་འཛིན་པའི་བླ་མ་རྣམས་ཀྱི་བཀའ་བདེན་པ་དང༌། བདེན་པ་དེ་དག་གི་མཐུ་དང་ནུས་པ་ལ་བརྟེན་ནས། བདག་ཅག་སྒྲུབ་གཤེན་ཡོན་མཆོད་མི་ནོར་འཁོར་དང་བཅས་པ་རྣམས་ལ་ཡས་ཀྱི་བདུད་གཡོས་པ་བཟློག་ཅིག མས་ཀྱི་སྲི་ལང་བ་བཟློག་ཅིག བྱེའོ་བཙན་འདྲོལ་བ་བཟློག་ཅིག མཐོན་པོའི་དམུ་བརྩོད་པ་བཟློག་ཅིག རྒྱལ་པོའི་སྨྱོ་འབོག་གཏོང་བ་བཟློག་ཅིག གཤིན་རྗེའི་འཁོར་ལོ་བསྐོར་བ་བཟློག་ཅིག ས་བདག་ཀླུ་གཉན་གྱི་གཏད་དུ་བཅུག་པ་བཟློག་ཅིག སྲིན་པོའི་ཙ་ཀྲ་བསྐོར་བ་བཟློག་ཅིག བན་བོན་གྱི་བྱད་ཁ་གཏོང་བ་བཟློག་ཅིག ཕྲ་མེན་གྱི་ངན་སྔགས་བསྐོར་བ་བཟློག་ཅིག བགེགས་རིགས་སྟོང་ཕྲག་བརྒྱད་ཅུ་བཟློག་ཅིག གློ་བུར་ཡེ་འབྲོག་སུམ་བརྒྱ་དྲུག་ཅུ་བཟློག་ཅིག ནད་རིགས་བཞི་བརྒྱ་རྩ་བཞི་བཟློག་ཅིག གདོན་རིགས་སྟོང་ཕྲག་བརྒྱད་ཅུ་བཟློག་ཅིག ལྟས་ངན་བརྒྱད་ཅུ་རྩ་གཅིག་བཟློག་ཅིག ཕོ་བརྒྱའི་མདའ་བདར་བ་བཟློག་ཅིག མོ་བརྒྱའི་དུག་གཡོས་པ་བཟློབ་ཅིག ཀིང་ཀང་དང་བཞི་གཤེད་བཟློག་ཅིག ལོ་ངན་དང་ཟླ་ཟུར་བཟློག་ཅིག ལྟས་ངན་དང་དགྲ་ཐན་བཟློག་ཅིག མོ་ངན་དང་རྨི་ངན་བཟློག་ཅིག བོན་ཟོར་དང་ཆོས་ཟོར་བཟློག་ཅིག ཕུར་བུའི་དབལ་སོ་བཟློག་ཅིག དྲང་སྲོང་གིས་དམོད་པ་གཏོང་བ་བཟློག་ཅིག མུ་སྟེགས་ཀྱི་ངན་སྔགས་བཟློག་ཅིག བདུད་ཀྱི་ཆོ་འཕྲུལ་ངན་པ་བཟློག་ཅིག མི་མཐུན་པའི་འགལ་རྐྱེན་བར་ཆད་ཐམས་ཅད་གཉིས་མེད་མཉམ་པ་ཆེན་པོའི་དབྱིངས་སུ་ཞི་བར་གྱུར་ཅིག། །།
རྒྱ་ཀོང་ཙེ་འཕྲུལ་རྒྱལ་གྱིས་ལྷ་སྲིན་ཕམ་རྒྱལ་རྩོད་དུས་གསུངས་པ་ནི། ཞི་བར་གྱུར་ཅིག་བདུད་ཀྱི་སྡེ། །སྟོང་པར་གྱུར་ཅིག་ངན་སོང་གསུམ། །དར་ཞིང་རྒྱས་གྱུར་གཡུང་དྲུང་བོན། །དེ་བཞིན་ཡོངས་ཁྱབ་སེམས་ཅན་རྣམས། །བྱང་བར་གྱུར་ཅིག་སྡིག་དང་སྒྲིབ། །འཕེལ་བར་གྱུར་ཅིག་དགེ་བའི་ཚོགས། །བཀྲ་ཤིས་ཐོབ་ཅིག་ཡོན་གྱི་བདག །ཐོས་པར་གྱུར་ཅིག་སྟོན་པའི་བཀའ། །བཙན་པར་གྱུར་ཅིག་སྨོན་ལམ་མཐའ། །ཕྱོགས་བཅུའི་དུས་གསུམ་བདེ་བར་གཤེགས། །བདག་དང་མཐའ་ཡས་སེམས་ཅན་རྣམས། །གཉིས་མེད་ངང་ལ་མཉམ་གྱུར་ཅིག །སྟོན་པའི་ཐུགས་རྗེ་ཆེ་བར་ཤོག ལྷ་ཡི་སྨོན་ལམ་བཙན་པར་ཤོག །བོན་གྱི་བསྟན་པ་དར་བར་ཤོག །སེམས་ཅན་བདེ་སྐྱིད་འཛོམས་པར་ཤོག །མུ་དགེ་སྡིག་ཚོགས་ནུབ་པར་ཤོག །སྲིན་གྱི་དམོད་པ་རྒུད་པར་ཤོག །འཁོར་བ་སེམས་ཅན་ཐམས་ཅད་ཀྱང༌། །སྡུག་བསྔལ་མྱ་ངན་རྒྱུན་ཆད་ནས། །བཀྲ་ཤིས་དམ་པ་ཐོབ་པར་ཤོག ། ཅེས་མདོ་གཟེར་མིག་ལས་བྱུང་བའོ། །བདེར་གཤེགས་སྤྱན་དྲངས་ཕྱག་འཚལ་མཆོད་པ་ཕུལ་བ་དང༌། །བཤགས་དང་སྡོམ་དང་གསོལ་བ་བཏབ་པ་དང༌། །སྨོན་ལམ་བཏབ་པའི་དགེ་བ་ཅི་བསགས་པ། །འགྲོ་བ་རྣམས་དང་ཐུན་མོང་སྤྱིར་བྱས་ཏེ། །ཀུན་ཀྱང་བླ་མེད་འབྲས་བུ་འཐོབ་བྱའི་ཕྱིར། །བདག་གཞན་དོན་དུ་བྱང་ཆུབ་ས་ལ་བསྔོ། །སྔ་རབས་འདས་པའི་གཤེན་རབ་ཐམས་ཅད་ཀྱིས། །དམིགས་པ་མེད་པར་བསྔོས་པ་ཇི་བཞིན་དུ། །བདག་གཞན་དགེ་རྩ་བསོད་ནམས་ཅི་བསགས་པ། །བདག་ཀྱང་དེ་བཞིན་དུ་དམིགས་པ་མེད་པར་ཡོངས་སུ་བསྔོ་བར་བགྱིའོ། ྋ །རྗེ་རྒྱལ་བ་འདུས་པའི་ངོ་བོ་ཉིད། །བླ་མ་རྣམས་ཀྱི་བྱིན་རླབས་ཀྱིས། །འཇིག་རྟེན་གྱི་སྣང་བ་ལ་མི་ཆགས་པར། །ཆགས་མེད་ཀྱི་རང་གྲོལ་ལ་སྤྱོད་པར་ཤོག །སྒྱུ་ལུས་ལ་ཞེན་པ་མི་ཆགས་པར། །སྒྱུ་མ་ཡི་མཚན་ཉིད་འཛིན་པར་ཤོག །འདོད་ཡོན་ལ་ཞེན་པ་མི་ཆགས་པར། །ཆོག་ཤེས་ཀྱི་གཏེར་ལ་སྤྱོད་པར་ཤོག །བར་ཆད་ཀྱི་རྐྱེན་ཁར་མི་འཆོར་བར། །རང་སེམས་ལ་ངེས་ཤེས་འཁྲུངས་པར་ཤོག །ཐ་སྙད་ཀྱི་ཚིག་ཕྱིར་མི་འབྲང་བར། །དོན་ཟབ་ཀྱི་རོ་མཆོག་མྱོང་བར་ཤོག །ཀུན་རྫོབ་ཀྱི་སྣང་བ་ལ་མི་འགག་པར། །དོན་དམ་གྱི་ཞེན་ཡུལ་གྲོལ་བར་ཤོག །ཐབས་ཀྱི་ལམ་མཆོག་རྙེད་པ་དང༌། །ཤེས་རབ་ཀྱི་ས་གནས་བགྲོད་པར་ཤོག །སྟོང་གསལ་དུ་སྣང་བ་ལྷན་ཅིག་ཏུ། །སྣང་སྟོང་དུ་རང་ངོ་འཕྲད་པར་ཤོག །རྣམ་སྨིན་གྱི་ལུས་རྒྱ་ཞིག་པའི་དུས། །འོད་གསལ་དུ་མ་བུ་འཕྲད་པར་ཤོག །མཁྱེན་པའི་ཉི་མ་ཤར་བ་དང༌། །བརྩེ་བའི་འགྲོ་ལ་ཕན་པར་ཤོག །སྒོ་གསུམ་གྱི་རྣམ་སྨིན་ཀུན་བྱང་ནས། །སྐུ་གསུམ་གྱི་འབྲས་བུ་སྨིན་པར་ཤོག །བསམ་སྦྱོར་དག་པའི་སྨོན་ལམ་འདི། །སྨོན་པ་བཞིན་དུ་འགྲུབ་པར་ཤོག ྋ །སྨོན་ལམ་འདི་བཏབ་དགེ་བའི་མཐུ་དཔལ་གྱིས། །ནད་མུག་མཚོན་གྱི་བསྐལ་པ་ཞི་བ་དང༌། །དཔལ་འབྱོར་བསོད་ནམས་ཕུན་སུམ་ཚོགས་པ་ཡིས། །སངས་རྒྱས་བསྟན་པ་དར་ཞིང་རྒྱས་པར་ཤོག །སངས་རྒྱས་བསྟན་པ་རབ་དར་ནས། །སེམས་ཅན་དཔལ་འབྱོར་ཕུན་སུམ་ཚོགས། །ཡིད་བཞིན་ནོར་བུའི་རྒྱ་མཚོ་ལྟར། །དུས་ནམ་རྟག་ཏུ་བཀྲ་ཤིས་ཤོག ། ཅེས་བདབ་བོ། །གཤེན་རབ་རྣམ་པར་རྒྱལ་བ་ཡིད་བཞིན་གྱི་ནོར་བུ་རིན་པོ་ཆེའི་སྐུ་ལ་ཕྱག་འཚལ་ལོ། ། བསྭོ་མུ་ཡེ་སྤྲོས་ཁྱུང་ཡེ་ལམ་ཀྲི་ཁྲི་ཏར་དར་གསལ་འབར་འོད་དཔག་རམ་སྭཱཧཱ། བསྭོ་དམུ་ར་ཏ་ཧན་ཝེར་ནི་བྲུཾ་ཧྲུན། མུ་ཏྲེ་མུ་ཏྲེ་མུ་ར་མུ་ཏྲེ། མུ་ཡེ་མུ་ཡེ་ཧ་ར་མུ་ཡེ། མུ་སྤྲོས་མུ་སྤྲོས་ཝེར་རོ་མུ་སྤྲོས། མུ་ནི་གྱེར་ཏོ་ཡེ་ཁྱབ་ཁར་རོ། སྤྲོས་བདལ་ཧྲི་ཧྲོ། ཝེར་ནི་ཝེར་རོ། ཤུད་ལ་ཝེར་རོ་ན་ཧུ་ཏ་ཀ ཤུད་དྷོ་ཤུད་དྷོ་དུ་ཤུད་དྷོ་ཡ། ས་ལེ་ས་ལེ་ཏྲི་ས་ལེ་ཡ། སང་ངེ་སང་ངེ་སུ་སང་ངེ་ཡ། དམུ་ར་ཏ་ཧན་ཁྲི་ཙེ་དྲུང་མུ། ཧ་ཧ་བྲུཾ་བྲུཾ། ཧོ་ཧོ་ལམ་ལམ། ཧཱུྃ་ཧཱུྃ་ཕཊཿཕཊཿ སྒོ་གསུམ་དག་པའི་དགེ་བ་གང་བགྱིས་པ། ཁམས་གསུམ་སེམས་ཅན་རྣམས་ཀྱི་དོན་དུ་བསྔོ། །དུས་གསུམ་བསགས་པའི་ལས་སྒྲིབ་ཀུན་བྱང་ནས། །སྐུ་གསུམ་རྫོགས་པའི་སངས་རྒྱས་མྱུར་ཐོབ་ཤོག། །།
