阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：夜光杯
作者：徐慧芬
改写、讲述：朱友好
文字审核：丁迪蒙
语音审核：陈全娣
编辑：王乙其
先生临终前个眼神灼痛了伊个余生。从查出肝癌到过世只有几个号头。弥留之际，伊个眼神悲伤，无助，像煞有闲话要讲。
伊搭先生是大学同学，婚姻走过三十多年，但是，相互个称呼还是沿用当年。伊叫伊小葛，伊叫伊小金。
丧事之后个一段日脚，有一天，伊辣陌生头想起来，关照儿子再去查查看爷个手机，看看还有阿里眼勿常庄联系个朋友需要通知个。
细心个儿子翻看电话短信，发现就勒父亲生毛病前头呒没多少辰光，父亲搭一个人有过短信联系：“小葛，我关照过侬勿要再寄钞票拨我了，希望迭个是最后一趟，假使再寄过来，我勿会接受个”“小琴，迭辈子我实在是欠侬忒多忒多了呀……”
搿段对话引起了儿子个好奇。伊试了试，打通了对方个电话。听到伊讲了父亲个情况之后，对方呒没声音了，一歇歇功夫，对方一记头邪气悲伤个哭起来了。儿子毫叫来了姆妈听电话。听对方一个多钟头断断续续个讲述，小金也已经哭得稀里哗啦了。伊实在是晓得忒晏了呀！
上世纪六十年代末，68届高中生小葛从上海到江西插队，认得了一个木匠个囡儿小琴，活泼可爱个小琴勒当地林场工作，两个年轻人情投意合，几年之后就开始谈婚论嫁了。木匠只有迭个独生囡儿，晓得当时个口号是知识青年要勒农村扎根一辈子，乃末伊放心了，邪气开心个为两个小囡做结婚家生了。
但是，就勒迭个辰光，有政策可以选拔知青上大学。因为，名额有限，县里陪人到公社了解知青情况进行挑选。当招办人员晓得小葛已经准备勒当地成家，就拿伊排除脱了。小葛得到迭个消息之后就吃闷酒。原来伊是重点中学个高材生，假使勿下乡，老早就是大学生了。小琴急了，要伊个爷帮忙，伊搭爷讲，侬做木匠人头熟，公社书记侬也认得个，一定要帮帮小葛呀！木匠搭囡儿讲，侬哪能介戆个啦，伊读了大学留勒城市里，还会得回到侬身边伐？小琴讲，我勿管，我只要小葛开心！看爷勿肯，小琴开始哭啊闹啊勿吃饭了。爷呒没办法，最后到也办成功了。
小葛要回到上海读大学了。分开个辰光，伊心事重重，伊搭小琴讲，侬就勿担心我勿回来了？小琴红仔眼睛讲，勿担心个呀，假使以后侬寻着别人了，说明迭个人一定比我好，我也放心了。又笑勒海讲，侬勿用担心我个，我介漂亮，以后还怕寻勿着人啊？
分别之后，两个人只靠书信来往。大学毕业以后，小葛留勒上海。呒没多少辰光，伊接到了小琴个来信，讲伊已经结婚了，信里还有张伊搭新郎个照片。小琴讲，侬前途远大，好好叫生活工作，勿要记牢我。我勿会再写信拨侬了，侬也勿要再写信拨我了。
几十年来，两个人侪遵循了迭份约定，勿再联系，一直到分别将近五十年个2018年。伊个一年，一道勒公社插队个一眼插友要重访故地，叫小葛也一道去。搿趟相遇，打破了小葛个心。呒没想到小琴个命运经历了介许多个磨难，第一趟结婚呒没多少辰光，丈夫就过世了，也呒没小囡。第二趟婚姻只维持了几年，因为男人对伊家暴。现在，小琴是孤身一家头过日脚。当伊看到苍老憔悴个小琴辰光，屏勿牢哭起来了。
小金迭个辰光再想起来，自从伊趟丈夫从江西回来之后，常庄像魂灵落脱一样。电话里向，小琴搭小金讲，上趟见面之后，小葛邀请伊到上海来，还讲伊想拿伊拉个过去告诉妻子，但是拨伊劝牢了。现在，伊想到上海来一趟……
“是个，再过两个礼拜小葛要落葬了，侬应该来，阿拉来接侬！”儿子听到姆妈搭爷过去个女朋友迭能讲，吓了一大跳，问，迭能介合适伐？小金坚定个讲，小琴阿姨也是阿拉个亲人，呒没阿姨当年个牺牲搭仔成全，也就呒没阿拉今朝迭个屋里呀。
作者：徐慧芬
讲述：朱友好
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
