04/ ꉙꇐꋋꊱꆹ《ꃆꄔꉐꅪ》ꋐꌠꈐꏭ『ꉢꌋꆀꇤꈏ』ꇬꌊꄉꌠ。
ꃅꆳꁏꇁꌦꀐ
ꃅꆳꁏꇁꌦꀐ，
ꄮꈉ，ꑭꇇꀋꅑꑴꇬ，
ꃆꇭꌟꃅꀒꁨꉜꄉꋓꃬꏽꇬꎷ。
ꈍꃅꌭꑌꌭꀋꄿ，
ꉌꂵꀉꄂꄚꈿꐝꍠꀕ，
ꎭꌠ，ꌒꌠꈍꑌꄚꐊꁧ。
ꃅꆳꁏꇀꌦ，
ꄮꈉ，ꉪꇐꀋꑌꑴꇬ，
ꇓꂃꌟꃅꇉꅶꉜꄉꆺꀕꂃꇬꎷ。
ꈍꃅꈹꑌꊂꈹꀋꄐ，
ꉌꃀꀉꄂꄚꄉꂅꑣꀕ，
ꉂꌠ，ꌂꌠꈍꑌꄚꊂꈹꁧ。
ꃅꆳꁏꇁꌦꀐ，
ꆀꂰꋋꉔ，ꈺꌋꀕꃅ
ꃅꆳꍈꁏꇁꀐꄉ。
ꃅꈋꁡꇤꉌꎭꀉꂿ，
ꊷꆣꀕꃅꑓꁴꄩꊰꇁꀑꄉ。
ꃅꆳꁏꇁꌦꀐ，
ꉢꉘꇉꌠꆏꋋꆹ。
ꈭꀋꈪꈜꀋꈪꎂꊒꃅ
ꉢꉚꄉꁎꑟꉂ。ꀊꋩꄹꉈ
ꈍꃀꀈꇭꀉꄂꀉꂿꐊꄉ，
ꄏꇈꊪꃅꁡꇤꄸꉻꑌꇈ。
ꃅꆳꁏꇁꌦꀐ，
ꌙꈈꀕꇗꄃꀕꃅꊖꆈꈽꀀꌠꀉꂿ，
ꉌꐒꇁꎭꌊꀋꌸꅊꇈ。
ꌻ꒧ꆹꉪꇐꈧꌠꃅꇫꀋꑟꑴꌦ，
ꑕꑘꆹꆏꉘꊈꇁꌐꅍꎭꇈꃲꀐ。
2017.5.6
ꊂꃢꊛꄉꅲ |ꀋꅞꉖꀄꂼ
