شينحۋا اگەنتتىگىنىڭ 11 - ايدىڭ 8 - كۇنى بەيجيڭنەن بەرگەن حابارى (تىلشىلەر دۇڭ شۋە، فىڭ شينران). 11 - ايدىڭ 8 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن يتاليا زۇڭتۇڭى ماتتارەللامەن كەڭەس وتكىزدى.
شي جينپيڭ بىلاي دەپ اتاپ كورسەتتى: بيىل جۇڭگو مەن يتاليانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعى. ەكى جاق جالپى بەتتىك ستراتەگيالىق سەرىكتەستىك قارىم - قاتىناستى كۇشەيتۋ ارەكەت جوسپارىن جاريالاپ، تاريحى ۇزاق جىبەك جولى رۋحىن ۇستانىپ، ەكى جاقتى قارىم - قاتىناستى دامىتۋدىڭ جاڭا كەزەڭىنە ءوتۋدى ىلگەرىلەتۋگە ءبىر اۋىزدان قوسىلدى. بۇگىنگى تاڭدا دۇنيە ءجۇزى 100 جىلدا بولماعان زور وزگەرىستى باستان كەشىرۋدە، جۇڭگو مەن يتاليا ەكى ءىرى وركەنيەتتى بايىرعى ەل رەتىندە، اشىق، سيىسىمدى بولۋ، ءبارىن تۇگەل قامتۋ ءداستۇرىن اسقاقتاتىپ، حالىقارالىق قوعامنىڭ كەڭەسۋ ارقىلى الاۋىزدىقتاردى شەشىپ، سەلبەستىك ارقىلى قاقتىعىستان اۋلاق بولىپ، قول ۇستاسا جاراسىمدى بىرگە تۇراتىن كوركەم دۇنيە قۇرۋىن ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: ءوزارا قۇرمەت ەتۋ، ءوزارا سەنىم ارتۋ، ءوزارا پايدا جەتكىزىپ تەڭ يگىلىككە كەنەلۋ باستان - اياق جۇڭگو − يتاليا قارىم - قاتىناسىنىڭ ەڭ ايقىن نەگىزىنە اينالۋى كەرەك. ەكى جاق جۇڭگو − يتاليا ۇكىمەت كوميتەتتەرىنىڭ جانە ءار سالاداعى تىلدەسۋ مەحانيزمىنىڭ رولىن تولىق ساۋلەلەندىرىپ، بارىس - كەلىستى كۇشەيتىپ، ءوزارا سەنىمدىلىكتى بەكەمدەپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن ۇزدىكسىز ءتۇسىنىپ جانە قولداپ، ءوزارا قولداۋ كورسەتەتىن ستراتەگيالىق سەرىك بولۋى كەرەك. جۇڭگو مەن يتاليانىڭ مادەنيەت سەلبەستىگى مول تابىستارعا جانە ومىرشەڭ كۇشكە يە، ەكى جاق گۋمانيتارلىق اۋىس - كۇيىستى ۇزدىكسىز جيىلەتىپ، جاڭا كەزەكتى مادەنيەت سەلبەستىگىن اتقارۋ جوسپارىن ويداعىداي تياناقتاندىرىپ، مادەنيەت - كوركەمونەر، مادەني ەسكەرتكىشتەردى قورعاۋ، كلاسسيكالىق شىعارمالاردى ءوزارا اۋدارۋ، ساياحات، وقۋ - اعارتۋ سياقتى سالالارداعى سەلبەستىكتى تەرەڭدەتىپ، مادەنيەت مۇرالارى ورىندارى سەلبەستىگىن جۇڭگو مەن يتاليانىڭ گۋمانيتارلىق اۋىس - كۇيىسىنىڭ جاڭا جارقىن تۇيىنىنە اينالدىرۋى كەرەك. ەكى جاق ءتىل وقىتۋىن جانە جاستار مەن ورەندەردىڭ اۋىس - كۇيىسىن قولداپ، اناعۇرلىم كوپ جاڭا ءداۋىر ماركو پولولارىن بىرگە جەتىلدىرۋى كەرەك. ەكى جاق ءبىرىن - ءبىرى تابىسقا جەتكىزەتىن سەلبەستىك سەرىكتەر بولۋعا تاباندى بولۋى كەرەك. جۇڭگو جاق يتاليانىڭ ساپالى ونىمدەرىن يمپورت ەتۋدى كەڭەيتىپ، ەكى ەل كاسىپورىندارىنىڭ ءوزارا قارجى قوسۋىن قولداپ، عىلىم - تەحنيكا، قورشاعان ورتانى قورعاۋ، تازا ەنەرگيا، عارىش سياقتى سالالارداعى سەلبەستىكتى ۇزدىكسىز ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: بۇگىنگى تاڭدا دۇنيە ءجۇزى تەرەڭ وزگەرىستەردى باستان كەشىرۋدە، جۇڭگو مەن ەۆروپانىڭ ەكى ۇلكەن بەيبىت، سىندارلى كۇش رەتىندە، ستراتەگيالىق بايلانىس، ەسىك اشۋ، سەلبەستىك، اۋىس - كۇيىس جاساۋ، ءوزارا ۇلگى الۋ سىندى دۇرىس بەتالىسقا تاباندى بولۋى ەكى جاققا ءتيىمدى، دۇنيە جۇزىنە ءتيىمدى. جۇڭگو ەۆروپانى جۇڭگو ۇلگىسىندەگى وسىزامانداندىرۋدى جۇزەگە اسىرۋداعى ماڭىزدى سەرىگى ەتەدى، ەكى جاق سەلبەسىپ تەڭ يگىلىككە كەنەلۋگە تاباندى بولىپ، الاۋىزدىقتاردى ۇيلەسىمدى تىزگىندەپ، جۇڭگو − ەۆروپا قارىم - قاتىناسىنىڭ بولۋعا ءتيىستى كەمەلدىلىگى مەن تۇراقتىلىعىن ايگىلەۋى كەرەك. جۇڭگو جاق ەۆروپا جاقپەن سەلبەستىكتى كۇشەيتىپ، الەمدىك سىن - سايىستارعا توتەپ بەرۋدى قالايدى، يتاليا جاقتىڭ وسى جولدا بەلسەندى رول اتقارۋىن ءۇمىت ەتەدى.
ماتتارەللا مىنالاردى ءبىلدىردى: مەنىڭ 2017 - جىلى جۇڭگوداعى ساپارىم جانە 2019 - جىلى ءتوراعا شي جينپيڭدى يتالياداعى ساپارىندا كۇتىپ العانىم ءالى ەسىمدە. بيىل ماركو پولونىڭ قايتىس بولعاندىعىنىڭ 700 جىلدىعى، ماركو پولونىڭ جۇڭگومەن بايلانىسى − يتاليا − جۇڭگو دوستىعىنىڭ ارىدان باستاۋ العاندىعىنىڭ، ەكى ۇلكەن وركەنيەتتىڭ ءبىر - بىرىنە ءار بەرگەندىگىنىڭ ىقشام كورىنىسى. بۇگىنگى تاڭدا دۇنيە ءجۇزى تەرەڭ وزگەرىستەردى باستان كەشىرۋدە، ادامزات قوعامى ىنتىماقتى، ءوزارا كومەكتەسۋدى كۇشەيتىپ، جاراسىمدى قاتار ءومىر ءسۇرۋدى جۇزەگە اسىرۋدى قاجەت ەتەدى. يتاليا مەن جۇڭگو مادەنيەت، وقۋ - اعارتۋ، ءتىل وقىتۋى، مۇرا ورىندارىنىڭ دوستاسۋى سياقتى گۋمانيتارلىق سالالارداعى اۋىس - كۇيىستى، سەلبەستىكتى ونان ارى تەرەڭدەتىپ، شىعىس - باتىس وركەنيەتتەرىنىڭ اۋىس - كۇيىسىن، ءوزارا ۇلگى الۋىن ىلگەرىلەتۋگە، ادامزات وركەنيەتىنىڭ العا باسۋىن جەبەۋگە تىڭ ۇلەس قوسۋى كەرەك. يتاليا جاق ءبىر جۇڭگو پرينسيبىنە تاباندىلىقپەن بويسۇنىپ، جۇڭگونى باستان - اياق ماڭىزدى سەلبەستىك سەرىگى ەتەدى، جۇڭگو جاقپەن بىرگە يتاليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعىن قۇتتىقتاۋدى وراي ەتىپ، ەكونوميكا - ساۋدا، عىلىم - تەحنيكا سياقتى سالالارداعى سەلبەستىكتى كۇشەيتىپ، ەكى ەل قارىم - قاتىناسىنىڭ تىڭ دەڭگەيگە كوتەرىلۋىن ىلگەرىلەتۋدى ءۇمىت ەتەدى. يتاليا جاقتىڭ كوپتەگەن كەلەلى ماسەلەدە جۇڭگو جاقپەن تۇرعىسى قارايلاس، ەكەۋى دە قورعامپازدىققا قارسى تۇرادى، ءوزارا ەسىك اشۋدى دارىپتەيدى، سىندارلى بايلانىس پەن ىنتىماقتى، سەلبەستىكتى كۇشەيتىپ، ءتۇرلى سىن - سايىستارعا بىرگە توتەپ بەرۋدى دارىپتەيدى. يتاليا جاق جۇڭگو جاقپەن كوپ جاقتى ىستەستىكتى جيىلەتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە يتاليا − جۇڭگو ەكى ۇلكەن وركەنيەتتىڭ اقىل - پاراساتىن ارناۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى مادەنيەت، عىلىم - تەحنيكا، وقۋ - اعارتۋ، دۇنيە جۇزىلىك مادەني مۇرا ورىندارىنىڭ دوستاسۋى سياقتى سالالارداعى كوپتەگەن ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا ماتتارەللاعا ارناپ قارسى الۋ سالتىن وتكىزدى.
تيان - انمىن الاڭىندا 21 رەت ساليۋت اتىلىپ، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن يتاليا ەكى ەلدىڭ مەملەكەت ءانىن ورىندادى. ماتتارەللا شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
سول كۇنى كەشتە ءتوراعا شي جينپيڭ مەن حانىمى پىڭ لييۋان حالىق سارايىنىڭ جينسى زالىندا ماتتارەللا زۇڭتۇڭ مەن ونىڭ قىزى لاۋرانى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
