阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
作者：胡展奋
沪语改写：周红缨
讲述：刘时医
审阅、推荐：丁迪蒙
编辑：王乙其
身边头好几个朋友年过六十乔迁新居之后，勿是缠绵病榻，就是一病而亡。
比方著名作家C，搬新房子之前还搭我一道吃饭，胖乎乎，笑呵呵个，出了名个乐天派，但是搬到新装修个豪宅以后却一日到夜讲勿出个勿适意，浑身东痒西痒，夜里还做噩梦，问我是哪能桩事体，我叫伊去做个体检，结果居然是白血病！
另外一个作家朋友Z，好好叫勒法国定居，做生意，写书，老开心个，突然之间想叶落归根了，就回来买大房子，装修，住进去只有一年功夫，皮肤就勿断往外渗水，一查，肾癌！
还有一个我夫人个闺蜜，女强人，退休之前买了新个别墅，当然难免要折腾一番，结果居然让我猜到：住进去也是一年，乳房癌。
一开始我当然认为侪是“巧合”而已，并勿是每个搬新房子个老人侪生毛病个呀。搿哪能解释其他老人呒没事体呢。
其实迭个就是个体差异了。所谓“甲之蜜糖，乙之砒霜”——事实浪向，大概率个花甲老人尤其是年过古稀个，身体侪开始走下坡路，年轻辰光能够承受个环境变化，到老了未必来三，比方有害气体甲苯，四十岁辰光个承受力搭六七十岁个哪能有得可比性呢？经常讲个“风水”实质浪向是一种环境科学，伊所追求个理想环境，是指一定小环境内部各种综合环境因素个相互协调。拿“气”来讲，风水当中讲要“气勿外泄，气勿秽戾”，实质浪向就是要勒一个小范围里构建出一个小型生态环境圈，迭个小环境，已经搭侬和平相处几十年了，气场相当协调了，侬现在重起炉灶，体质重构能力强个，可以过关，而体质差个，就要中招，装修材料再“环保”也是含有有害物质个。
明代个高濂写过一本书，叫《遵生八笺》，伊勿提倡豪宅，反对“华堂邃宇”，认为“阴阳适中，明暗相半。屋无高，高则阳盛而明多；屋无卑，卑则阴盛而暗多。故明多则伤魄，暗多则伤魂。”意思是，房屋忒高大，忒敞亮就“伤魄”，而忒幽暗则“伤魂”，过分高敞或者幽暗侪会得让人生毛病个。
本来是追求幸福生活个，结果可能导致意外个勿幸，迭个就是生活个悖论。
根子勒勒阿里呢？勒“欲望忒盛”，也就是时风影响，“拜物拜金忒甚”。懂得满足个人，时时刻刻侪会自足；相反，就时刻勿满足，永远勿会有得幸福感。人个交关疾病是某种生活方式“作”出来个，我搿几个身患不治之症个朋友，本来生活侪已经勿算差个了，但是悲剧也许就勒勒搬进豪宅前个瞬间埋下。
到过故宫个应该侪晓得：皇帝个卧室并勿比平民百姓个大多少，也不过 10 多平方米左右。并且历史浪向，历朝历代个皇帝卧室大多数是20 平方米以下，苏州十大园林搭广州四大名园里个豪族卧室也大多数勒10平方米左右。
搿到底是为啥呢？
民间个讲法是“屋大人少，是凶屋”，“房子忒大吸走人气”，所以皇帝为了保存体能，达到健康长寿个目的，就遏制欲望，居住勒狭小而精致个空间里。就迭个讲法、我问过国医大师裘沛然，伊讲，搿句闲话一点勿假。人体散发出来个能量，就是我伲所谓个“人气”“气场”，是有限个，当一个人日日夜夜个用介许多个能量去充溢一所大房子个空间个辰光，伊对于身体个损耗是可想而知个。身体能量消耗多了，当然体质就变弱了。假使侬正好处于“亚健康”状态，葛末，对勿起，侬就开始为侬个亚健康买单了，倒霉个事体也就接踵而来。
可见，“知足常乐”实在是千古不易之言，本来侬五十岁以后就应该“知天命”了，结果到“六十”了侬还看勿破，还频频折腾，孜孜以求身外之物，想“长生”难道勿是缘木求鱼嘛！
作者：胡展奋
讲述者：刘时医
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：海上梦叠
我知道你在看哟~
