ايەلدەردىڭ تۋىستار ارا قاتىناستاعى رولى

احمەتجان الىمبەك ۇلى

 بەرەكە – بىرلىك پەن ىنتىماق دارىپتەلىپ وتىرعان قازىرگى كەزدە وتباسى مۇشەلەرى ارا، كورشىلەر ارا، تۋىستار ارا تاتۋ – ءتاتتى ءوتۋ ءاربىر ازاماتتىڭ وتەۋگە ءتيىستى بۇلتارماس بورىشى. وتباسى مۇشەلەرى مەن تۋىستار اراسىنداعى قاتىناستا ايەلدەردىڭ رولىنا نەمقۇرايدى قاراۋىمىزعا بولمايدى. اتامىز قازاقتا «اعايىن تاتۋ بولسا ات كوپ، ابىسىن تاتۋ بولسا اس كوپ» دەگەن ماقال بار، بۇل تەگىن ايتىلماعان. جاقسى كەلىن الىس تۋىستى جاقىنداتادى، شايپاۋ كەلىن بىرگە تۋعان جاقىن تۋىسىڭدى دا الىستاتاتىندىعى شىندىق.

    ەرلى – زايىپتىلار وتباسى مۇشەلەرى ارا، تۋىستار ارا جانە كورشىلەر ارا قاتىناسقا ەرەكشە ءمان بەرۋى كەرەك. بۇلاردىڭ بىرەۋى ءوز تۋىستارىمەن قويۋ ارالاسىپ، قارسى جاعىنىڭ تۋىستارىمەن ارالاسپاسا نەمەسە ەرى ايەلىنىڭ ايتقان سوزىنە ايرانداي ۇيىپ، ءوز تۋىستارىمەن بولعان قاتىناسقا سەلقوس قاراسا نەمەسە ەرى ايەلىنىڭ تۋىستارىن جات ساناسا مۇنداي تار ءورىستى سىڭار جاقتى كوزقاراس اعايىندار مەن تۋىستار ورتاسىنداعى قاتىناسقا زالال جەتكىزىپ، بەرەكە –بىرلىك پەن ىنتىماقتى بۇلدىرەدى.

    جاقسى كەلىن قازاق كەلىندەرىندە بولاتىن ادەپ - يبانى ساقتاپ، ۇزاتىلىپ بارعان جەرىندە قايىن اتاسى مەن قايىن ەنەسىن تۋعان اكە–شەشەسىندەي قۇرمەتتەيدى. قايىن اعا، قايىن بيكە، ابىسىندارىن وزىمەن بىرگە تۋعان اعا، اپەكە، جەڭگەسىندەي كورەدى. قايىن ىنىلەرى مەن قايىن سىڭىلىلەرىن دە وزىمەن بىرگە تۋعان باۋىر، سىڭىلىسىندەي ايالايدى. كەلىن بولىپ تۇسكەن اۋىلعا سۋداي ءسىڭىپ، بالداي باتادى. وسىنداي كوپشىل، باۋىرمال جاقسى كەلىننىڭ بوساعاسىنان قوناق كەتپەي، كورشىلەر ارا، تۋىستار ارا، جەگجات – جۇراتتار ارا قارىم – قاتىناستى جاقسارتادى. وسىنداي بەرەكە –بىرلىكتى قاستەرلەگەن جاقسى كەلىن تۋىستار ارا، ۇلتتار ارا قاتىناستى نىعايتۋعا سەپتىگىن تيگىزەدى. مىنە بۇدان ايەلدەردىڭ تۋىستار ارا قاتىناستاعى رولىنىڭ زور ەكەندىگىن كورۋگە مولادى.

  كەيبىر ايەلدەر ۇيىنە ەرىنىڭ تۋىستارى كەلە قالسا، قاباعىن اشپاي، سالقىن مامىلەدە بولىپ، جاقتىرماعان بەينە بايقاتادى. ەرىنىڭ تۋىسىن جات سانايتىن مۇنداي ايەلدەردىڭ تار ءورىستى كوزقاراسى كۇندەردىڭ بىرىندە تۋىستاردىڭ اراسىنا ىرتكى سالىپ، ىرگەسىن بولۋمەن تىنادى. سوندىقتان ايەل بولعان ادام «قىز جات جۇرتتىق» دەگەن شىندىققا جۇگىنىپ، ەرجەتىپ كەلە جاتقان قىزىن كەلەشەكتە كەلىن بولىپ بارعان جەرىندە قايىن اتا، قايىن ەنەسىن جانە ولاردىڭ تۋىس–تۋعاندارىن قۇرمەتتەيتىن، كورشىلەرمەن تاتۋ – ءتاتتى وتەتىن ادام ەتىپ تاربيەلەۋى كەرەك. 

  ءبىزدىڭ ءبىر اپامىز تۋىستاردى الىس – جاقىن، باي – كەدەي، كاسىپتى –  كاسىپسىز دەپ ايىرماي، ۇيىنە كىم بارسا دا كەڭ داستارقانىن جايىپ، اعىنان اقتارىلا كۇتەدى. قازىر وسى اپامىز ەلدىڭ قۇرمەتىنە بولەنىپ، ءبىر اۋىلدىڭ ءاز اناسىنا اينالدى. وسى اپامىز ءبىزدىڭ اۋىلعا كەلىن بولىپ تۇسكەن 68 جىلدان بەرى وسى اۋىلدىڭ جاقسى كەلىنى بولۋ ءۇشىن ۇلكەندەردى قۇرمەتتەپ، كىشىلەردى ايالاپ، بۇكىل زەيىن – زەردەسىمەن قازاقتىڭ اتى زاتىنا ساي جاقسى كەلىنى بولۋ جولىندا تەر توگىپ، تۋىستار ارا، ابىسىندار ارا، كورشىلەر ارا، ۇلتتار ارا تاتۋ – ءتاتتى ءوتىپ، ەلدىڭ بەرەكە – بىرلىگىن كۇشەيتتى. وسى اپامىزدىڭ ىنتىماق جولىندا توككەن بۇل تەرى تەگىن كەتكەن جوق، قازىر وسى اۋىلداعى بۇكىل كەلىندەرگە، ۇل – قىزدارعا ۇلگى بولىپ، ەل قۇرمەتىنە بولەنىپ وتىر. ءبىز كۇندەلىكتى ورتامىزدان كەيبىر كەلىندەردىڭ ۇلكەندەردى كورگەندە ۇلتىن، رۋىن ايىرماي، ولاردى اتالاپ – اپالاپ، اعالاپ – تاتەلەپ جۇرگەنىن كورەمىز. مەيلى قالادا بولسىن، دالادا بولسىن كەلىن بولىپ تۇسكەن اۋىلدىڭ ۇلكەندەرىنە جولىققاندا ءيىلىپ سالەم بەرىپ، سي – قۇرمەت كورسەتەتىنىن ۇنەمى كەزىكتىرەمىز. قازاقتىڭ ءداستۇرلى سالتىن ساقتاعان وسىنداي كەلىندەردى كورگەن ۇلكەندەر «كوپ جاسا»، «وركەنىڭ ءوسسىن» دەپ ىقىلاستى تۇردە اق تىلەكتەرىن ارناپ جاتادى. عاسىرلار بويى ۇرپاقتان – ۇرپاققا جالعاسقان قازاق كەلىندەرىندەگى مۇنداي اسىل قاسيەت ۇلتىمىزدىڭ ماقتانىشى. بەرەكە – بىرلىك جولىندا قۇلشىنعان، ەلدى ىنتىماققا جەبەگەن كەلىندەر اق بوساعامىزدا كوبەيىپ، ىنتىماقتى، جاراسىمدى وتباسىنىڭ ىرگە تاسى ماڭگى بەرىكتەلە بەرسىن.

微信小程序搜索《xalhar翻译》

视频下载APP：mtv.xalhar.net

音乐下载APP：app.xalhar.net