اتا - انامدى ءماز ەتەيىن دەسەڭىز
قۇربانجان توقتى
ءۇيلى–باراندى بولعان ۇل - قىزى اكە - شەشەسىنە امانداسا بارعاندا، كيىم - كەشەك، جەمىس - جيدەك سياقتى نارسەلەرىن اپارىپ، وپالى ۇرپاق ەكەندىگىن بىلدىرگەن بولادى. بۇل جوسىنعا اينالعانىنا دا ءبىراز ۋاقىت بولىپ قالعانداي. الايدا ءبىر ىسكە ءسال قارايمىز، كوبىندە وسىنداي ۇساق - تۇيەك زاتتىق نارسەلەرگە عانا ءمان بەرىپ، اتا - انانىڭ كوڭىلىن اۋلاۋداعى كەيبىر قاراپايىم دا نازىك تۇيىندەرگە ءمان بەرە الماي قالامىز.
شەتەلدە ساۋدامەن شۇعىلدانىپ جۇرگەنىنە بىرنەشە جىل بولعان، نەداۋىر اۋقاتتانىپ كەتكەن ءبىر ساباقتاسىمىز بار ەدى، جۋىقتا اۋىلعا كەلەتىنىن، الدىمەن اكە - شەشەسىنە امانداساتىندىعىن ەستىگەن ءبىرقانشا ساباقتاس وعان كەزىگۋگە ۇلكەن ۇيلەرىنە باردىق. ول ۇيدە كوپ توستىق، ونسىزدا ساعىنىپ وتىرعان ۇلكەن كىسىلەردىڭ دە جولعا جالتاقتاي - جالتاقتاي كوزدەرى تالدى. ءىنى - قارىنداستارى دا ەسىك الدىنا نەشە شىعىپ تۇڭىلە قايتىپ كەلىستى. ءبارىمىز تاقاتسىزدانا سارىلىپ توسىپ وتىرعاندا كەنەت اۆتوكولىكتىڭ سيگنال ءۇنى دە ەستىلدى، كەلىپ قالدى دەپ ەسىك الدىنا جۇگىرىپ شىقتىق. سويتسەك ول تاعى ءبىر ساباقتاسىمىز ەكەن، مىنا دوسىمىزدىڭ ۇلكەن ۇيىندەگىلەرگە دايىنداعان سالەم - ساۋقىتىن الدىن الا جەتكىزىپ قويعالى كەلىپتى. بۇل الىستان كەلگەن ساباقتاسىمىزدىڭ جانە دە ءبىراز جۇمىستارى شىعىپ، بۇگىن كەلە المايتىن بولعانىن ايتىپ، اكە - شەشەسى مەن ءىنى -قارىنداستارىنا ەرتەرەك بەرىپ جىبەرگەنى ەكەنىن بىلدىك. ەستىگەن اتا -اناسى ءسال جابىرقاپ قالعانداي بولدى. نە دەرىمىزدى بىلمەي ءبىز دە ءۇن - ءتۇنسىز جاي - جايىمىزعا كەتتىك. بالكىم، قالتاسىن قالىڭداتىپ العاندار ءۇشىن سالەم - ساۋقىتى ۇلكەن تارتۋ ەسەپتەلۋى مۇمكىن. الايدا ۇلكەندەرگە دەگەن ءىلتيپات، وپالىلىق استە زاتتىق نارسەلەر ۇسىنىپ، كوڭىلىن اۋلاۋدا ەمەس قوي.
ۇلكەندەرگە دەگەن ناعىز ءىلتيپات، وپالىلىق ولاردىڭ ىشكى جان دۇنيەسىن، كوڭىل كۇيىن ءتۇسىنىپ، رۋحاني قاجەتىن قاندىرۋ. اتا - انا ۇرپاعىنىڭ ءار ىسىنە كۇيىنىپ، جاعدايى، ناتيجەسى، كەزىككەن قيىنشىلىقتارىن بىلگىسى كەلىپ، اقىل - كەڭەسىن ايتىپ، جايى كەلسە كومەكتەسىپ، دەمەپ جىبەرگىسى كەلىپ تۇرادى. جالپىسى ولار پەرزەنتتەرىنىڭ بار ىسىنە باس قاتىرىپ، كوڭىل ءبولىپ وتىرادى. سوسىن دا بالالارى دۇنيە بەرگەندى عانا ءبىلىپ، ولاردىڭ كوڭىلدەرىن كوتەرىپ، ءماز ەتۋدى ەسكەرۋسىز قالدىرماۋى كەرەك. ارينە، قولى قىسقا كەزىندە، قۇر قول بارىپ امان - سالەم قىلعاننان ۇيالىپ، ولارمەن سىرلاسىپ، اڭگىمەلەسىپ تۇرۋدان قاشقالاقتاماۋى كەرەك. اتا - انا بىزدەن نەنى كۇتەدى؟ ولاردىڭ كوڭىلىن قانشالىق تۇسىنە الدىق؟ وسىلاردى جاقسى ويلاعانىمىز ابزال.
ءبارىمىزدىڭ ەسىمىزدە بولسىن، اتا-انا ەشقاشان دا سەنىڭ قولىڭا قاراپ وتىرعانى جوق، ولار بالالارىنىڭ ءجيى امانداسىپ كەلىپ، اڭگىمەلەسىپ تۇرۋىن اڭسايدى. ول كىسىلەرگە ءجيى بارىپ قۋانتىپ تۇرساق، قارتايعاندا قۇلازىپ قالماۋىنا ەس قاتا الساق، ولار ءۇشىن بۇل ەڭ ۇلكەن ساۋعا، ەڭ زور باقىت، قۋانىش بولار ەدى.
微信小程序搜索《xalhar翻译》
视频下载APP：mtv.xalhar.net
音乐下载APP：app.xalhar.net
视频下载APP：mtv.xalhar.net
音乐下载APP：app.xalhar.net
