بيدايىق تەك ءشوپتىڭ اتى ما؟
سوناۋ ءبىر جىلى كوگالداعى حوككەي ساڭلاعىن «بيدايىقتىڭ كول جايقاعان جالعىزىنا» تەڭەيمىز دەپ داۋعا قالعانىمىز بار. داۋ شىعارعان ەلگە اتى تانىمال جۋرناليست اعامىز: «ءبىز دە قالام ۇستاپ ءجۇرمىز، قازاقتىڭ ءسوزىن ءبىر كىسىدەي بىلەمىز. مەن بىلەتىن بيدايىق دەگەن ءشوپ بار. ال، «بيدايىقتىڭ كول جايقاعان جالعىزىنداي» دەگەن سويلەم بولا ما؟ ەگەر بيدايىق ءشوپ بولسا، ول قالاي كول جايقايدى؟ ول قالاي جالعىز بولادى؟» دەپ قيعىلىق سالدى. ۋاجىمىزگە قۇلاق اسپاي قويدى. باقساق، بيدايىق قۇسىن بىلەتىندەر وتە از كورىنەدى. سول سەبەپتى، وقىرمان نازارىنا بيدايىق اتتى قۇسقا قاتىستى دەرەكتەردى ۇسىندىق.
ارينە، بيدايىق اتتى جابايى ءشوپ بارلىق وڭىردە وسەدى. سوندىقتان ونى ءشوپ دەپ قانا ۇعاتىنداردىڭ قاتارى كوپ. ال، بيدايىق قۇسى وتە سيرەك كەزدەسەدى. ءبىراق، حالقىمىزدىڭ بيدايىق اتتى جىرتقىش قۇستى اتام زاماننان بىلەتىنىنە دالەل از ەمەس. مىسالى، اقان سەرىنىڭ: «بيدايىققا ىلايىق قاراعىم - اي، بوكتەرگىگە جەم بولىپ باراسىڭ با» دەگەن ولەڭىن الايىق. مۇنداعى بيدايىق پەن بوكتەرگىنىڭ ەكەۋى دە جىرتقىش قۇستار. تەك بيدايىق لاشىنعا ۇقساس العىر قۇس بولسا، بوكتەرگى دەگەنى كۇيكەنتاي سياقتى جاسىقتاۋ، جۇرەكسىزدەۋ قۇس. سونداي - اق، بيدايىق قۇسىنىڭ شاپشاڭدىعىنا قاتىستى ايتىلعان «بيدايىقتاي قۋىردى» دەگەن ءسوز بار. (كەيبىرەۋلەر مۇنى «بيدايداي قۋىردى» دەپ مۇلدە بۇرا تارتىپ ءجۇر). «جان القىمعا الدى، ەش مۇمكىندىككە مۇرشا بەرمەدى» دەگەن ماعىنانى بىلدىرەدى. مۇنىڭ ءبارى كەزىندە بيدايىق قۇسىن قازاق بالاسىنىڭ اسا جاقسى ايىرا بىلگەنىنە ايعاق.
سوندا بۇل بيدايىق دەگەنىمىز قانداي قۇس؟
زەرتتەۋشىلەر دەرەگىنە سۇيەنسەك سۇڭقار تەكتەس جىرتقىش قۇس. تاۋلى - تاستى جەرلەردى، جارلار مەن قۇزداردى مەكەن ەتەدى. ءشاۋلىسىنىڭ (قورازىنىڭ) قاناتىنىڭ ۇزىندىعى 27-30 سانتيمەتر، سالماعى 330-350 گرام. ۇياباسارى شاۋلىسىنە قاراعاندا ىرىلەۋ. ارقاسى كولدەنەڭ جولاقتى سۇر، ال، باۋىرى كۇرەڭ، قىزعىلت كۇرەڭ ءتۇستى كەلەدى. توسىندە دوڭگەلەك داقتارى بار.
بيدايىقتىڭ لاشىننان ەرەكشەلىگى:
توبەسى جيرەن، كوزىنىڭ استىندا ۇزىنشا كەلگەن قوس قارا «مۇرتشاسىنىڭ» شەتى كۇرەڭ ءتۇستى بولادى. ۇياسىن بيىك، تىك جارتاستارعا سالادى. بيدايىق وڭتۇستىكتە — وتىرىقشى، ال شىعىستا — جىل قۇسى. ولار ءبىر رەت جۇپتاسىپ، ناۋرىزدىڭ ورتاسىندا ءشاۋلىسى مەن ۇياباسارى 1-4 جۇمىرتقانى 30-33 كۇن ارالىعىندا باسادى. بالاپاندارى 1.5 ايدا ۇيادان ۇشادى. نەگىزىنەن قۇستاردى قورەك ەتەدى. جەمتىگىن ۇشىپ ءجۇرىپ ۇستايدى. تىرشىلىگى ءالى تولىق زەرتتەلمەگەن.
微信小程序搜索《xalhar翻译》
视频下载APP：mtv.xalhar.net
音乐下载APP：app.xalhar.net
视频下载APP：mtv.xalhar.net
音乐下载APP：app.xalhar.net
