دوسىڭىزدىڭ قاي قىلىعى ۇنامايدى؟
ادام ءوز - وزىنە كوپ كوڭىل بولمەيدى. بۇل – ءۇستى - باسىنا كۇتىم جاساۋ دەگەننەن بولەك، تۇلعاسىنا، ويىنا، ءبىلىم كوكجيەگىنە، ادامگەرشىلىگىنە قاتىستى كۇتىم. مىنەزىمەن كۇرەسىپ، ءوزىن - ءوزى جەڭە العان ادام عانا «مەن وزگەردىم» دەپ ايتا الادى. ويتكەنى، ول ءبىز ايتقان قۇندىلىقتارعا كۇتىم جاساپ ءجۇر. ەگەر ءسىز دە رۋحاني قۇندىلىقتارعا ءمان بەرىپ، ءوز - وزىڭىزگە كوڭىل بولگىڭىز كەلسە، مىنا سۇراقتارعا جاۋاپ ىزدەپ كورىڭىز.
1. ءسىز كىمسىز؟
نە دەپ جاۋاپ بەرەرىڭىزدى بىلمەي تۇرسىز با؟ جالپىلاما قويىلعان سۇراققا «مەن – مەحانيكپىن» نەمەسە «مەن – ايەلمىن»، بولماسا «مەن – اداممىن» دەپ جاۋاپ بەرۋىڭىز مۇمكىن. شىندىعىندا ادام ءوز - وزىنە دەگەن انىقتامانى بەرە المايدى. ءوز - ءوزىن تانۋ ءۇشىن ادەتتە پسيحولوگيالىق اينا كومەكتەسەدى. تىنىش جەردە وتىرىپ، ءبىر كەزەك وتكەن ومىرىڭىزگە كوز جۇگىرتىڭىز. قولىڭىزعا پاراق پەن قالام الىپ، ءوزىڭىز تۋرالى جازىپ كورىڭىز. الدىمەن، ءوزىڭىزدىڭ سۋرەتىڭىزدى سالىپ كورىڭىز. ەكىنشى پاراققا ادامي ءجان وزىڭىزگە ۇنامايتىن قاسيەتتەرىڭىزدى ءتىزىپ جازىڭىز. ءۇشىنشى پاراققا وسى ۋاقىتقا دەيىن جاقىندارىڭىز ماقتاناتىنداي نە ىستەپ ۇلگەردىڭىز، سونى جازىڭىز، جانىنا ەل ۇيالاتىنداي وقيعا باسىڭىزدان ءوتتى مە، ونى دا جازىڭىز. ءتورتىنشى بەتكە كەمشىلىكتەرىڭىز بەن قابىلەتتەرىڭىزدى ءتىزىڭىز. قاجەت دەپ تاپساڭىز، جىل وتكەن سايىن تىزىمدەردى تولىقتىرساڭىز بولادى. ءوزىڭىزدى وزىڭىزدەن ارتىق ەشكىم تاني الماسى انىق.
2. ءومىردىڭ ماڭىزى نەدە؟ ماحاببات دەگەن نە؟
ءومىر اركىمدە ءارتۇرلى سۋرەتتەلەدى. ءبىرى – وتباسىمەن باقىتتى بولۋ دەسە، ەندى ءبىرى اقشا جيناۋ دەيدى، ال ەندى ءبىرى رۋحاني باي بولۋدىڭ ءوزىن «ءومىر» دەپ ەسەپتەيدى. ال شىندىعىندا، ادام وتباسىندا، قىزمەتتە، قوعامدا كىم ەكەنىن بىلمەي جاتىپ، بۇل سۇراقتارعا جاۋاپ بەرە الا ما؟ ماحابباتتىڭ ءوزى بىرەۋگە – شاتتىق، بىرەۋگە – مۇڭ. ءسىز وسى ەكى توپتىڭ قايسىسىنداسىز؟
3. بالالىق شاعىڭىزدا قانداي بولدىڭىز؟
ءبىزدىڭ قازىرگى كۇيىمىز – بالا شاقتا جاساپ العان ۇلگى. ياعني، كىشكەنتايىڭىزدا وسىنداي بولعانىڭىزدا قالادىڭىز. بۇل ماتەريالدىق تۇرعىدا ايتىلعان پىكىر ەمەس، بۇل – مىنەز - قۇلىق، قابىلەت - قارىم تۇرعىسىندا ايتىلعان. ادامنىڭ ەرەسەك شاعى كىشكەنتاي كەزىندە قانداي بولعانىنا تۋرا بايلانىستى. ادەتتە، ۇلكەندەر بالانىڭ قاتەلىگىن «كىشكەنتاي عوي ءالى» دەپ جىلى جاۋىپ قويا سالادى. بۇل ادەت – ەرەسەك ادامنىڭ قالىپتاسۋىنداعى ءىرى اپاتپەن تەڭ. بالا كىشكەنتاي كەزىندە قىرسىق، قىڭىر، جالقاۋ، تەنتەك، سوتقار بولىپ وسسە، وسكەندە بىرەۋدىڭ باعىن بايلايدى. مىنە، پەداگوگيكا مەن بالا تاربيەسى – وڭاي شارۋا ەمەس. سۇراققا ورالساق، بالالىق شاعىڭىزدى ەسىڭىزگە ءتۇسىرىڭىز، قازىر قاندايسىز؟ سالىستىرىپ كورىڭىز.
4. سۋرەتتە نە بەينەلەنگەن؟
سۋرەتتە كورسەتىلگەن بەينەلەردەن ەڭ العاش نە كوردىڭىز؟ ەگەر جىگىتتى كورسەڭىز، بويىندا كۇش - قۋاتى ارىنداعان، جىگەرى مىقتى، تىڭ يدەياعا باي ادامسىز. ال ەگەر قارتتى كورسەڭىز، سىزگە اتالعان سيپاتتامالارعا قاراما - قارسى بەلگىلەر ءتان.
5. مىنا سويلەمدەردى جالعاستىرىڭىز
جىگىتتەردىڭ ىشكى جان دۇنيەسىندە...
قىزداردى جاقسى تانىساڭىز، ولار...
ويلانباستان جاۋاپ بەرۋ مۇمكىن ەمەس سەكىلدى. ءبىراق، ەڭ ءبىرىنشى ايتقان پىكىرىڭىز ءسىزدىڭ گەندەرلىك كوزقاراسىڭىزدى ايقىنداپ بەرەدى. ال ءبىراز ويلانىپ، جىگىت بولساڭىز، اناڭىزدىڭ مەيىرىمىن، قارىنداسىڭىزدىڭ قىلىقتارىن، سۇيىكتىڭىزدىڭ ەركەلىگىن، دارىگەر اپايدىڭ قاتتىلىعىن، مۇعالىمنىڭ تالاپشىلدىعىن ەسكە الىپ، ءبارىن سارالاي تۇسەرىڭىز انىق. ال نازىك جاندى قاتارىنان بولساڭىز، اكەڭىزدىڭ قۇشاعىن، اعاڭىزدىڭ قامقورلىعىن، عاشىعىڭىزدىڭ ەرلىگىن، ساقشى قىزمەتكەرىنىڭ قاباعىن ەلەستەتىپ كەتەسىز. 1-2 سەكۋندتا ەكىنشى مىسالداعىداي ەتىپ جاۋاپ بەرە الۋىڭىز مۇمكىن بە؟
6. دوسىڭىزدىڭ قاي قىلىعى سىزگە ۇنامايدى؟
وزگەنىڭ كەمشىلىگىن كورۋ بىلگەن دۇرىس، ءبىراق كەمشىلىگى ءۇشىن ونى سوگۋ دۇرىستىققا جاتپايدى. ونىڭ كەم تۇسىن تۇزەتە وتىرىپ، ءسىز دە تۇزەلە باستايسىز. دوستاردى ارتىقشىلىعىنا نە كەمشىلىگىنە قاراي تاڭدايتىن ادامدار وزدەرىن كەمشىلىگى جوق ادامدار قاتارىنا قوسپاعانى ءجون. ءسىز وسى سۇراقتى وقىعاندا دوسىڭىزدىڭ جاعىمسىز قاسيەتتەرىن، كەمشىلىكتەرىن ىزدەي باستادىڭىز با؟ بۇل – كەشىرىلمەس قاتەلىك.
7. جارىڭىزدى نەمەسە سۇيىكتىڭىزدى قانداي قاسيەتتەرسىز ەلەستەتە المايسىز؟
كەي عاشىقتار ءبىر - بىرىنە «سەن بولماساڭ، قايتەر ەم» دەگەندى كوپ ايتادى. نەگەزىندە ادامنىڭ ەمەس، ونىڭ ارتىقشىلىعىنىڭ ارقاسىندا بولعان ناتيجە. سۇيىكتىڭىزدىڭ نەبىر عاجاپ قاسيەتتەردى بويىنا سىڭىرە الۋى – ونىڭ ءبىر ارتىقشىلىعى دەپ ءبىلىڭىز. ءسىز دە سول قاسيەتتى «جۇقتىرۋعا» تىرىسىڭىز. ەسىڭىزدە بولسىن، سۇيىكتىڭىزدىڭ مىنەزى، قاسيەتى، ءجۇرىس - تۇرىسى ءسىز تۋرالى حابار بەرەدى.
8. بىرەۋ ءسىزدى ماقتاسا، ءوزىڭىزدى قالاي سەزىنەسىز؟
كەي ادامدار ماقتاۋ ەستىسە، بىرەۋدىڭ ۇناتقانىن بىلسە، ءوز - وزىنەن جيرەنىپ، «جوعا، و نە دەگەنىڭىز، اسىرا سىلتەمەڭىز» دەپ، ءوز - وزىنە كوڭىلى تولماۋى مۇمكىن. بۇل وزىنە بەرگەن باعاسىنىڭ وتە تومەن ەكەندىگىن بىلدىرەدى. سىرت كوز سىنشى، ادام وزگەدەن وسىنداي ماقتاۋ ەستىگەندە مۇنىڭ بەكەر ايتىلماعانىن ءتۇسىنۋى كەرەك. ايتىلعان ءار پىكىردى جىلى قابىلداپ، جادىڭىزعا ءتۇيىپ ءجۇرىڭىز.
9. اتا - اناڭىزبەن قارىم - قاتىناستا نە كەدەرگى؟
مىنەز، كوڭىل - كۇي، تانىم. بۇل ۇشتىكتىڭ الدىڭعىسى گەنمەن بەرىلەدى، ەكىنشىسى جاعدايعا بايلانىستى، ال سوڭعىسى ورتاعا بايلانىستى. كۇرمەۋى شەشىلمەيتىن ماسەلە تۋىنداسا، اتا - انامەن سوزگە كەلىپ، كيكىلجىڭ تۋا قالسا، اتالعان ۇشتىكتىڭ بىرەۋىن وزىڭىزدە ۇستاي تۇرعان ءجون. بىرىنشىدەن، مىنەز گەن ارقىلى بەرىلەتىن بولعان سوڭ، اتا - انا مەن بالانىڭ مىنەزى سايكەس كەلۋى مۇمكىن. بۇل جاعدايدا ۇلكەننىڭ الدىن وراماۋ دەگەندى ەستە ۇستاعان دۇرىس. ەكىنشىدەن، كوڭىل - كۇيدى باسقارا الۋ كەرەك، الدىڭىزدا تۇرعان ادام ءسىزدىڭ قاتارلاسىڭىز ەمەس، اتا - اناڭىز، ولارعا اشۋىڭىزدى كورسەتىپ جۇرمەڭىز. ۇشىنشىدەن، ۇلكەننىڭ تانىمى مەن كىشىنىڭ تانىمى ءبىر بولمايدى. وزگەنىڭ تانىمىن سىيلاي ءبىلىڭىز، ءوز ويىڭىزدى دالەلدەيمىن دەپ ءجۇرىپ، قاتتى ءسوز ەستىپ قالماڭىز نەمەسە كەرىسىنشە، ولارعا اۋىر ءسوز ايتىپ قويماڭىز.
10. اتا - اناڭىزدىڭ قارىم - قاتىناسىنان نە ۇيرەندىڭىز؟
«بالاپان ۇيادا نە كورسە، ۇشقاندا سونى ىلەدى». ولاردىڭ اراسىنداعى سەزىم، سەنىم، ماحاببات، رەنىش، مۇڭ – ءبارى - ءبارى ءسىزدىڭ بويىڭىزدان دا كورىنەدى. وزگە جانۇيا مەن ءوز وتباسىن سالىستىرىپ، سىرتتاي باعا بەرە بىلگەن ادام قارىم - قاتىناستاعى قاتەلىكتەردى دە كورە الادى جانە ودان ساباق الادى. ولار جىبەرگەن قاتەلىكتەردى جىبەرمەۋگە كۇش جۇمسايدى. بۇل – ولارعا «بۇلاي سويلەسۋ كەرەك»، «بۇل قىلىعىڭىز دۇرىس ەمەس» دەگەن ءسوز ەمەس. بۇل – ءومىر ساباعى.
11. پاراققا وتباسىڭىزدىڭ سۋرەتىن سالىڭىز
اتا - اناڭىزدىڭ، باۋىرلارىڭىزدىڭ، جارىڭىز بەن بالالارىڭىزدىڭ، ءوزىڭىزدىڭ، ءۇيىڭىزدىڭ، كۇننىڭ جانە اعاشتاردىڭ سۋرەتىن بەينەلەڭىز. بۇل ءسىزدى سىناۋ ءۇشىن بەرىلگەن تاپسىرما ەمەس، ءبىراق ءسىز تۋرالى بەلگىلى ءبىر اقپاراتتار بەرەدى.
– ءوزىڭىزدىڭ جانىڭىزعا كىمنىڭ سۋرەتىن سالدىڭىز؟ مىنە، سول ادام سىزگە شىنىمەن دە وتە جاقىن.
– سىزدەن الىس تۇرعان اداممەن مىنەزدەرىڭىز ۇيلەسە بەرمەيدى.
– ەگەر ءوزىڭىزدىڭ سۋرەتىڭىزدى بيىك نە الاسا ەتىپ سالساڭىز، بۇل ءسىزدىڭ وزىڭىزگە دەگەن باعاڭىزدان حابار بەرەدى.
– ءۇي دە ءوزىڭىز تۋرالى اقپارات بەرەدى. ىشكى «مەنىڭىز» قانداي ەكەن؟
– ءۇيدىڭ تەرەزەلەرى كوپ نە ۇلكەن بولسا، ءسىزدىڭ قارىم - قاتىناسقا اشىق ەكەندىگىڭىزدى بىلدىرەدى.
– ءۇيىڭىزدىڭ ەسىگى بار ما؟ ءوز كەڭىستىگىڭىزگە وزگەلەردى كىرگىزەسىز بە؟
12. ادامزات بالاسى مەن جەر عالامشارىنىڭ بولاشاعى تۋرالى قانداي ويداسىز؟
ەگەر الەم بۇگىنگىسىنەن الدەقايدا ادەمىرەك بولادى، بەيبىت زامان ءالى الدا دەپ ويلاساڭىز، بولاشاعىڭىزعا سەنەسىز دەگەن ءسوز. ال ەگەر وزگەعالامشارلىقتار كەلىپ جەردى باسىپ الادى، الەم بولىپ جاتقان جاڭجال – تەك باستاما دەسەڭىز، كەرىسىنشە. كەرەناۋ ويلاردان ادا بولعان ءجون.
13. وتكەن ءتۇنى قالاي ۇيىقتادىڭىز؟
الدىڭعى سۇراق پەن مىنا سۇراقتىڭ بىرگە بەرىلگەنى قىزىق كورىنەتىن بولار. ءبىراق بۇل ەكەۋىنىڭ اراسىندا بايلانىس بار. الدىڭعى سۇراقتان گورى وسى سۇراققا جاۋاپ بەرگەن وڭاي بولسا، بۇل ءسىزدىڭ بالالىق ويدان ءالى ارىلماعاندىعىڭىزدى بىلدىرەدى. «كەشەگى كەشكى اس ءدامسىز بولدى، وتكەن ءتۇنى ۇيىقتاي المادىم» دەگەن سوزدەر سانالى ادامعا ءتان ەمەس.
14. اتا - اناڭىزدى نە ءۇشىن كىنالايسىز؟
قالاي ويلايسىز، اتا - اناڭىز جاس كەزىندە ءدال وسىنداي بولدى ما ەكەن؟ ولار قانداي قيىندىق كوردى؟ ولار تۋرالى جاقىن دوستارى نە ايتا الادى؟ اڭگىمە ولاردىڭ تانىمى، ويى، كوزقاراسى تۋرالى بولماق. ارينە، كەي اتا - انالار بالالارىنىڭ ساتسىزدىكتەرى مەن كەمشىلىكتەرى ءۇشىن وزدەرىن سوگىپ جاتادى. ال ءسىز ءوز - ءوزىڭىزدى جازالايسىز، كەيدە شىنىمەن اتا - اناڭىزعا ناليسىز. ولار دا ءبىر كەزدەرى جەتە الماعان جەتىستىگى ءۇشىن اتا - اناسىنا رەنجىگەن بولار. ءومىر ساباقتاستىعى دەگەن وسى، ءسىز دە ەرتەڭ بالاڭىزعا بارلىق جاعدايدى جاساپ بەرە الاتىندىعىڭىزعا سەنىمدىسىز بە؟
15. ماحابباتىڭىز قانداي؟
كەي ادامدار سۇيىكتىسىن ءوز قىزىعۋشىلىقتارىنا سايكەس تاڭدايدى. ماحابباتتا دا سونداي بولۋى مۇمكىن. مىسالى، «مەنىڭ قالىڭدىعىم مەن سەكىلدى فۋتبول جانكۇيەرى بولۋى كەرەك» دەپ ويلايتىندار – تىلەك - نيەتتىڭ ءبىر بولعانىن قالايتىندار، «اققۋ، شورتان ءھام شاياننىڭ» كۇيىن كەشكىسى كەلمەيتىندەر. تاعى ءبىر تيپ شارۋاسىنا سۇيىكتىسىنىڭ ارالاسپاعانىن قالايدى، «اركىم ءوز بەتىمەن» دەگەن قاعيدانى ۇستانادى، دەمەك جارىن كەڭىستىگىنە كىرگىزە بەرمەيدى.
ءسىز قاي تيپتەسىز؟
微信小程序搜索《xalhar翻译》
视频下载APP：mtv.xalhar.net
音乐下载APP：app.xalhar.net
视频下载APP：mtv.xalhar.net
音乐下载APP：app.xalhar.net
