بالاڭىزعا ءومىر بويى ەس قاتاتىن 8 اۋىز ءسوز
بالام، ءبىلىمدى ءوزىڭ ءۇشىن الاسىڭ.
ۇنەمى «قۇلىنىم، وقى، ۇيرەن» دەگەننەن باسقانى بىلمەيدى دەپ مەنى جازعىرا كورمە، سەن قانشا زاپى بولساڭدا ايتايىن: مەنىڭ بۇل ايتقاندارىمنىڭ ءبارى ءوزىڭ ءۇشىن! قۇلشىنا ۇيرەنگەنىڭ، العان ءبىلىمىڭ تەك وزىڭە عانا ءتان، مەنىمەن تيتتەي دە قاتىسى جوق.
كىتاپتى كوپ وقىعان سايىن زاتتارعا بولعان كوزقاراسىڭ دا وزگەرەدى. ساعان قاراپايىم تىلمەن بىلايشا تۇسىندىرەيىن: وقىعان، ءبىلىمدى ادام مەن ماعۇلىماتى تومەن، العان ءبىلىمى از ادامعا ءبىر تۇردەگى ەكى ستاكان شايدى ۇسىنار بولساڭ - الدىڭعىسى شايدىڭ حوش يسىنەن، وزگەشە دامىنەن عۇزىرلانىپ، شاي سورتىنىڭ تاماشا ەكەنىن ايتىپ تامسانادى؛ ال سوڭعىسى بولسا، «وحو، ءدامى ءتىل ۇيىرەدى، شايىڭ كەرەمەت ەكەن» دەپ عانا قويادى.
بولاشاقتا باسقالارعا ءىسىڭ ءتۇسىپ، جالىنىپ – جالبارىنباۋىڭ ءۇشىن تىنباي ءبىلىم الۋىڭ كەرەك. تەك وزىڭدە قابىلەت بولعاندا عانا ۇناتقان قىزمەتتى تاڭداۋ، ۇناتقان ءىستى ىستەۋ تولىمدىلىعىڭ بولادى. سول كەزدە عانا تىرشىلىك ءۇشىن ەمەس، قايتا ءوزىڭ ءۇشىن عانا ءومىر سۇرگەن بولاسىڭ.
ءسوزسىز، ۋنيۆەرسيتەتكە ءتۇسۋىڭ كەرەك
بالكىم سەن ۇنەمى ساباقتان قاشۋىڭ، ساباققا دەن قويماي ۇيىقتاپ وتىرۋىڭ، ءتىپتى، ۇيرەنۋ ناتيجەڭ دە تىم شىركىن – اي بولماۋى مۇمكىن. ءبىراق، شىنتۋايتىنا كەلگەندە سەنىڭ بىلەرىڭ ۋنيۆەرسيتەت وقىماعاندارعا قاراعاندا كوپ.
ماعۇلىماتتىڭ جوعارى – تومەندىگى تابىسقا جەتۋ ولشەمىن بەلگىلەمەيتىندىگىن بىلەمىن. الايدا العاش كاسىپتەنگەن كەزىڭدە ماعۇلىماتىڭ ايرىقشا ەس قاتادى، ول سەنىڭ قانداي كولەمدە جانە قانشالىق دارەجەدە قىزمەت ىستەي الاتىنىڭدى بەلگىلەيدى.
ەگەر سەن مەنەن ومىرىڭدەگى ەستەن كەتپەس ەڭ تاماشا شاعىڭ قايسى دەپ سۇرار بولساڭ، مەن ەش ەكىلەنبەستەن «ۋنيۆەرسيتەت قۇشاعىنداعى كەزىم» دەر ەدىم. سەنىڭ دە ۋنيۆەرسيتەت قۇشاعىنان اتتانىپ كوپ وتپەي – اق، ستۋدەنتتىك شاقتارىڭدى ساعىنا ەسكە الاتىنىڭا، ونداعى اعايىن – دوستارىڭدى قيمايتىنىڭا كامىل سەنەمىن!
سوندىقتان دا، ءسوزسىز، ۋنيۆەرسيتەتكە ءتۇسىپ وقۋىڭ كەرەك، ويتكەنى ۋنيۆەرسيتەت سىندى وسى ءبىر تەكشە ارقىلى كوز اياڭدى كەڭەيتىپ، ءبىلىم ورەڭدى جوعارىلاتا الاسىڭ. وي ءورىسىڭ كەڭىگەندە عانا بولاشاعىڭ اناعۇرلىم جارقىن بولادى.
بارلىق ادامعا ۇناۋىڭ مۇمكىن ەمەس
مىنەزى مەن اۋەسى ۇقسامايتىن سان – قيلى ادامعا جولىعاسىڭ. بالكىم سەن ناتيجەسى ناشار اداممەن دوس بولعىڭ كەلمەيتىن شىعار، وندا باسقالار سەنى تاكاپپار دەپ ۇناتپاۋى مۇمكىن. الايدا، وندا تۇرعان نە بار؟ ەگەر سەن ءوزىڭ ۇناتپايتىن اداممەن شاماڭنىڭ كەلگەنىنشە ەتەنە وتەيىن دەپ ويلاعانىڭمەن، قارسى جاق سەنى كولگىر دەپ سوگۋى مۇمكىن.
قانشا كومەك قولىڭدى سوزىپ، جاقسىلىق جاساساڭ دا سەنى بويىنا توعىتپايتىن جاندار بولادى. مۇنىڭ كەرىسىنشە، قىزمەتتە نەمەسە ۇيرەنۋدە بولسىن بەرىلە ۇيرەنىپ، ەلەۋلى ناتيجە جاراتساڭ ءارى بۇل جەتىستىگىڭە استە داندايسىماساڭ، باسقالاردىڭ قۇرمەتىنە تابيعي تۇردە قول جەتكىزەسىڭ.
مەيلى سەن قالاي ىستەسەڭ دە سىرتقى دۇنيەنىڭ ساعان بەرەر باعاسى ەكى جاقتى بولماق، بۇل تەڭ جارىمىنا دەيىن عانا سۋ قۇيىلعان قۇمىراعا ۇقسايدى، جارىمى بوس، جارىمى سۋعا تولى. سوندىقتان، بارلىق ادامعا جاعۋدى مىندەت ساناما، ويتكەنى بۇل مۇمكىن ەمەس ءارى ونىڭ قاجەتى دە شامالى.
ماحاببات _ بۇكىل تۇرمىسىڭنىڭ كەپىلى ەمەس
سىنىپتاس بوگدە جىنىستى ساباقتاسىڭدى ۇناتىپ قالعان كۇننەن باستاپ، ايناعا قاراعىشتاپ، وزىڭشە جاسانا باستايسىڭ. ونى كورگەن كەزدەگى قالىپسىز جۇرەك قاعىسىن بالكىم سەن «ماحابباتىمدى» تاپقان ەكەنمىن دەپ تۇسپالداپ، بار ىنتا – پەيىلىڭمەن «ماحاببات» مايدانىنا سۇڭگىپ، وزىڭە ەڭ كەرەكتى نارسەلەردى ءبىر شەتكە سىرىپ قوياسىڭ.
ماحابباتتاسۋ _ قاتەلىك ەمەس، الايدا وزىڭە ۇيلەسىمسىز ۋاقىتتا ماحابباتتاسۋىڭ قاتەلىك. 10 نەشە جاستاعى سەن ەشبىر جاۋاپكەرلىكتى دە ارقالاي المايسىڭ ءارى سول اياۋلىڭدى دا باقىتقا جارىتىپ قارىق قىلمايسىڭ. نە ۇيرەنۋدەن ناتيجە جاراتا الماعان، نە تۇرمىستىق جاقتان ەش ءبىر كەپىلى جوق، باسىنىڭ دىمى كەپپەگەن بالادا بىرەۋدى باقىتقا كەنەلتەرلىك قايداعى قاۋقار؟
سالاماتتىعىڭ بارىنەن ماڭىزدى
اقشا _ تىم قۇدىرەتتى نارسە ەمەس، ال اقشاڭ بولماسا دا بولمايدى. اقشا _ ارينە وتە ماڭىزدى، اقشاڭ بولماسا ىشەر اس، كيەر كيىم سىندى ەڭ نەگىزگى تۇرمىستى دا قامداي المايسىڭ، ءتىپتى، سالاۋات پەن مارتەبەدەن اۋىز اشپاي – اق قويالىق ...
ءبىراق، سول اقشانى تابامىن دەپ ءوز دەنساۋلىعىڭدى كۇتپەسەڭ، جاسىڭ ەگدە تارتقاندا قولىڭداعى اقشاڭ ءدارى - دارمەككە، ءۇيىڭ شيپاحاناعا اينالادى، بۇل قانداي قورقىنىشتى ەدى! سوندىقتان، ەڭ الدىمەن ءوز دەنىڭنىڭ ساۋلىعىن ويلاسۋىڭ كەرەك، سوندا عانا تاپقان اقشاڭنىڭ ءمانى بولماق.
تۇرمىس كەيدە تىم ادىلەتسىز
سەن كورشىنىڭ بالاسىنىڭ ادەمى اياق كيىمىنە قىزىعىپ، تامسانىپ جۇرگەنىڭدە، سەنىڭ سول ءبىر ساۋ - سالاماتتى ءبىر جۇپ اياعىڭا قىزىعاتىن بالانىڭ دا بار ەكەنىن ەسىڭنەن شىعارما.
كەي جان قالتالى وتباسىندا دۇنيەگە كەلەدى، كەي جان تۋمىسىنان سۇڭعىلا بولىپ تۋىلادى؛ كەي جان بار تۋمىسىنان تاقىر كەدەي، كەي جان بار تۋادا توپاس. سوندىقتان دا ساعان تۇرمىس ادىلەتسىز سەزىلەدى، ويتكەنى ەلدە بار نارسە سەندە جوق. الايدا ءار ادامنىڭ تاعدىرى ءار قالاي بولماق.
اشۋلانۋ، رەنجۋ، قىزعانۋ، بايبالام سالۋ سياقتىلارمەن ماسەلەنى شەشە المايسىڭ. سۇرىنسەڭ قايتا ورنىڭنان تۇر؛ ەگەر دوستارىڭ سەنىمەن ويناعىسى كەلمەسە، ءوز الدىڭا ويناي ءبىل ءارى ويناعان ويىنىڭا باسقالار تامساناتىنداي بولسىن. سوندا عانا الىستاعىسى كەلگەن دوسىڭ سەنى قايتا اينالىپ تاپپاسىنا كىم كەپىل، مىنە، بۇل تابىس.
ءارقانداي ىستە وزىڭە سۇيەن
اكە – شەشەڭ كارتەيەدى، سەنىمەن ءبىر ءومىر بىرگە بولا المايدى؛ اعا – باۋىر، اپەكە – سىڭىلىلەرىڭىزدىڭ دە ءوز وتباسى بولادى، ولار دا ساعان ءومىر بويى كومەكتەسە المايدى؛ سۇيگەن جارىڭ دا جول ورتادا سەنەن ايىرىلۋى مۇمكىن؛ بالالار ەسەيسە، سەنەن تابيعي تۇردە الىستاپ، ءوز – ءوز وتباسىنىڭ قامىن جەيدى... سوندىقتان وزىڭە عانا سەن، سوندا عانا جالعىزسىرامايسىڭ، قۇلازىمايسىڭ.
«راقىمەتسىز» جۇرمە
باسقالار ساعان كومەكتەسسە، تاماشا پوزيتسيادا بولسا، ول - سول جانداردىڭ كىسىلىگى؛ ال ساعان كومەكتەسۋدەن باس تارتسا، ول دا سول جاننىڭ سىباعاسى. ومىرىڭدە كەزدەسكەن ءار ءبىر ادام، ءتىپتى، اتا – اناڭ دا ساعان كومەكتەسۋگە مىندەتتى ەمەس. سوندىقتان، الدا – جالدا بىرەۋ – مىرەۋ قول ۇشىن سوزىپ، كومەكتەسسە «راقىمەت» ايتۋدى، استە، ەسىڭنەن شىعارما. ال باسقالار ساعان كومەكتەسۋدەن باس تارتسا، استە، جازعىرۋشى بولما، ءوز جولىڭمەن، ءوز باعىتىڭمەن جۇرە بەر.
العىستى جۇرەگىڭ بولعاندا عانا تۇرمىستىڭ ءلاززاتىن سەزىنەسىڭ!
حانزۋشادان اۋدارعان: ءلاززات اقان قىزى
微信小程序搜索《xalhar翻译》
视频下载APP：mtv.xalhar.net
音乐下载APP：app.xalhar.net
视频下载APP：mtv.xalhar.net
音乐下载APP：app.xalhar.net
