باقىتتى بالا تاربيەلەۋگە 4 كەڭەس
بالانى قالاي باقىتتى ەتىپ وسىرەمىز؟ ونىڭ تابىستى جانە قايىرىمدى بولۋىنا، فيزيكالىق جانە پسيحولوگيالىق تۇرعىدا ساۋ بولۋىنا جانە ومىرگە راقاتتاناتىن قاراپايىم ادام بولۋىنا قالاي اسەر ەتەمىز؟
بالا تاربيەلەۋدە اتا - انا بۇل سۇراقتارعا ويلاناتىنى انىق. كوبىنەسە، بۇل جول «بالانى ويىنشىقتارىن جيناۋعا، ەرەسەكتەردى تىڭداۋعا، ۋاقىتىندا ساباعىن ورىنداۋعا قالاي ۇيرەتەمىن» دەگەن سەكىلدى كۇندەلىكتى سۇراقتاردان باستالادى.
«بالاڭىزدى تاربيەلەمەڭىز، ول ءبارىبىر سىزگە قاراپ وسەدى، ءوزىڭىزدى تاربيەلەڭىز» دەگەندى ءجيى ەستىپ جاتامىز. ءبىز بالالىق شاقتا وزىندىك تارتىپكە ۇيرەنەمىز، ەرەجەلەردى مەڭگەرەمىز جانە اركەز وزىمىزگە ۇناي بەرمەيتىن نارسەگە دەيىن جاساپ ۇيرەنەمىز. الايدا باقىتتى بالانى تاربيەلەۋگە ىقپال ەتەتىن نەمەسە كەيدە كەرىسىنشە، كەدەرگى كەلتىرەتىن تەرەڭ تامىرلار بار.
ەندەشە، بارلىعى نەدەن باستالاتىنىن قاراستىرايىق.
بالانىڭ باقىتى باقىتتى ەرەسەكتەردەن باستالادى. الدىمەن ونىڭ اتا - اناسى، سودان سوڭ ونىڭ اينالاسىنداعىلار، اجەسى، اتاسى، اعالارى، اپەكەلەرى جانە باسقا دا جاقىن تۋىستارىنىڭ ماڭىزى زور. وتباسى – ول ءوز قاعيدالارى مەن زاڭدىلىقتارى بار جۇيە. وتباسىنىڭ ءبىر مۇشەسىندە بولعان وزگەرىستەر ءارقاشان باسقالارىنا اسەر ەتەدى. اسىرەسە، بالا مەن اتا - انا اراسىندا تىعىز ءارى ماڭىزدى بايلانىس بولادى. كىشكەنتاي بالالاردىڭ ءوزى اناسىنىڭ ەموتسيونالدى جاعدايىنا سەزىمتال بولىپ كەلەدى. ەگەر اناسى بىردەڭەگە مازاسىزدانىپ تۇرسا، ول ساناسىز تۇردە بالاعا بەرىلەدى. بالانى تۇسىنىكسىز ۇرەي جاۋلاي باستايدى.
بالا ءۇي ءىشى امان ورتادا جانە اينالاسىن ومىرگە قاناعاتتاناتىن ادامدار قورشاعان جەردە وسسە، ول ونى سەزەدى. سولاي بالانىڭ دا سولار سياقتى باقىتتى بولىپ وسۋىنە دەگەن يكەمى قالىپتاسادى.
1 - كەڭەس: بالانىڭ ەركىن دامۋىنا مۇمكىندىك بەرۋ.
ەركىندىك بارلىعىنا رۇقسات ەتۋ نەمەسە نەمقۇرايلىقپەن قاراۋ دەگەندى بىلدىرمەيدى. ول بالاعا ءوز شاماسىن، ءوز مۇمكىندىگىن ءوزى بىلدىرۋىنە مۇمكىندىك بەرۋ كەرەكتىگىن ايتادى. بالا دامۋىنداعى نەگىزگى وزگەرىس بالالىق شاعىندا بولادى. بالا ءوز كۇشىن سىناپ كورگىسى كەلەدى، مۇمكىندىگىن بىلگىسى كەلەدى، «ەگەر ونى ىستەسە» نە بولاتىندىعىن تۇسىنگىسى كەلەدى. وسىنداي زەرتتەۋلەردىڭ سەبەبىنەن ول داميدى. الايدا اتا - انا بالانى ءجيى شەكتەپ جاتادى. بالا الەمدى تانۋ ماقساتىندا سۇراقتار قويعاندى ۇناتادى. ول كۇندە «نەگە؟ نە ءۇشىن؟» دەگەن سۇراقتاردى قويىپ، مازاڭىزدى الۋى ابدەن مۇمكىن. ءار سۇراعىنا دۇرىس جاۋاپ قايتارۋعا تىرىسىڭىز. ەگەر كەرىسىنشە، ەرەسەك بالاعا «ونى نە ءۇشىن سۇراي بەرەسىڭ؟ ول ۇساق - تۇيەك، ونىڭ ماڭىزى جوق» دەسە، ول بالانىڭ تانۋ قابىلەتىنىڭ ءسونىپ قالۋىنا اكەلەدى.
2 - كەڭەس: ەكى ءتۇرلى ۇستانىمنان قۇتىلۋ.
ەكى ءتۇرلى ۇستانىم دەگەنىمىز – وتباسىدا بالانى تاربيەلەۋدە ءبىر جۇيەنىڭ بولماۋى. بۇگىن ونى ىستەۋگە بولادى، ال ەرتەڭ بولمايدى. اناسى ءبىر نارسەنى ايتسا، اجەسى باسقاشا دەيدى. ۇلكەن ادام ءوز ارەكەتىمەن ۇلگى كورسەتكەنى ماڭىزدى. مىسالى، ەگەر ءوزىڭىز ارتىڭىزدان جيناپ جۇرمەسەڭىز، بالاعا ويىنشىقتارىن جينامايتىندىعىن ايتىپ ۇرسۋدىڭ قاجەتى جوق. بالا سوزگە ەمەس، ارەكەتكە ءمان بەرەدى. ەكى ءتۇرلى ۇستانىم بالا پسيحيكاسىنا كەرى اسەرىن بەرەدى. ول نەنىڭ دۇرىس، نەنىڭ بۇرىس ەكەنىن تۇسىنە المايدى. قاۋىپسىزدىك سەزىمى بولمايدى، سەبەبى ونىڭ ارەكەتىنە اناسى بۇگىن قالاي اسەر بەرەتىنىن بىلمەيدى. سوندىقتان ەرەجەلەر بارلىق وتباسى مۇشەلەرىنە بىردەي بولۋى ءتيىس.
3 - كەڭەس: قاتەلەسۋگە مۇمكىندىك بەرۋ.
ەگەر جاعداي توتەنشە بولماسا جانە قاۋىپسىزدىككە اسەر ەتپەسە، بالانىڭ قاتەلەسۋىنە مۇمكىندىك بەرىڭىز. مىسالى، بالا ويناپ ءجۇرىپ، ازداپ قيىندىققا تاپ بولسا، اتا - اناسى بىردەن كومەككە جۇگىرەدى. سول ارەكەتىمەن ولار بالانىڭ ءوز ارەكەتىنە اناليز جاساۋىن، قاتەلىك جىبەرىپ، اقىرىن دۇرىس شەشىم قابىلداپ ۇيرەنۋىن جانە باستىسى، ءوز جەڭىسىنە قۋانۋ مۇمكىندىگىن تارتىپ الادى. ەگەر بالا بىردەڭەمەن الاڭداپ وتىرسا، ارالاسپاڭىز. ماسەلەنى ونىڭ ورنىنا شەشىپ بەرمەڭىز.
4 - كەڭەس: بالا قاجەتتىلىگىن ءتۇسىنىپ، ونى ەسەپكە الۋ.
تەك بازالىق قاجەتتىلىكتەر ەمەس، سونىمەن قاتار بالانىڭ قالاۋى، قابىلەتى مەن بەيىمى تۋرالى ويلانىڭىز. قاجەتتىلىكتەر بالانىڭ وسۋىمەن بىرگە وزگەرەدى. ەگەر ەرەسەك ادام ونى بالا كەزدەن باستاپ تىڭداي بىلسە، ەكەۋىنىڭ اراسىندا سەنىمدى قاتىناس پايدا بولادى. بالادان نە نارسەگە قىزىعاتىنىن، نەمەن اۋەستەنەتىنىن جانە ونىڭ قۇرداستارىنا قازىر نە ماڭىزدى ەكەندىگىن سۇراڭىز.
باقىتتى بالا ءوسىرۋ – قيىن بولعانىمەن، شەشىمى بار تاپسىرما. ءوزىڭىز تۋرالى ۇمىتپاڭىز. بالاعا اتا - انانىڭ ۇلگى - نۇسقاسىن كورۋ ماڭىزدى. باقىتتى بالا تاربيەلەگىڭىز كەلسە، وزىڭىزدەن باستاڭىز.
微信小程序搜索《xalhar翻译》
视频下载APP：mtv.xalhar.net
音乐下载APP：app.xalhar.net
视频下载APP：mtv.xalhar.net
音乐下载APP：app.xalhar.net
