（素食者）དཀར་ཟས་པ་ཞེས་པའི་དཔེ་དེབ་བཀླགས་པའི་མྱོང་ཚོར།

༼དཀར་ཟས་པ༽ ཞེས་པའི་དཔེ་དེབ་འདི་ནི་ཕྱི་ལོ་༢༠༢༤ལོའི་ཆེས་གསར་བའི་ནོ་བྷེལ་རྩོམ་རིག་བྱ་དགའ་ལྷོ་ཁོ་རེ་ཡའི་རྩོམ་པ་པོ་ཧན་ཅང་གི་བརྩམས་ཆོས་ཞིག། དུས་ཡུན་རིང་བོར་གནོན་ཤུགས་ཀྱི་ཁོར་ཡུག་འོག་ཏུ་འཚོ་བའི་སྤྱིར་བཏང་གི་བུད་མེད་ཅིག་བརྗོད་ཡོད་ཅིང་རྨི་ལམ་ངན་པ་རབ་དང་རིམ་པའི་འོག་དཀར་ཟས་རིང་ལུགས་པ་ཞིག་ཏུ་བསྒྱུར་འདོད་མོད འོན་ཀྱང་ཁོ་མོའི་ཁྱིམ་མི་དང་གཏན་ནས་མི་མཐུན་པས་མཇུག་མཐར་ཁྱིམ་མིའི་དྲག་རྩུབ་ཀྱི་མནར་གཅོད་འོག་གསོན་བྲལ་དུ་སོང་བའི་གཏམ་རྒྱུད་ཅིག དབྱིན་ཧུའེ་ནི་སྤྱིར་བཏང་གི་ཁྱིམ་འཛིན་བུད་མེད་ཅིག་སྟེ། མོ་རང་ལ་མི་རིང་ལ་མི་ཐུང་བའི་བོངས་ཚད་ཅིག་ཡོད་པ་དང་རིང་ཐུང་རན་པའི་སྐྲ་ལོ་ཞིག་ཀྱང་ཡོད། རྒྱུན་གྱི་སྤྱོད་པ་ནི་སྟབས་བདེའི་བབ་ཆགས་ཞིག་ཀྱང་ཡིན་པ་རེད། ཁྱོ་ག་སྐུ་ཞབས་ཀྲིན་ལ་མཚོན་ནས་བཤད་ན། དབྱིན་ཧུའེ་ནི་ཁོས་ཞིབ་འདེམས་བྱས་པའི་སྤྱིར་བཏང་གི་ཆུང་མ་ཞིག་སྟེ། རྒྱུ་མཚན་ནི་སྐུ་ཞབས་ཀྲིན་རང་ཉིད་ཀྱང་སྤྱིར་བཏང་བ་ཞིག་ཡིན་པ་རེད།  

     དབྱིན་ཧུའེ་ཡི་མདུན་ནས་སྐུ་ཞབས་ཀྲིན་གྱི་འཚོ་བའི་གནས་སྟངས་ཧ་ཅང་གི་བག་ཡངས་པོ་ཞིག་སྟེ། ཁོས་དབྱིན་ཧེ་ཡི་བརྩེ་བ་ཐོབ་པའི་ཆེད་དུ་ཤེས་ཡོན་མང་པོ་ཡོད་ཁུལ་བྱེད་མི་དགོས་ཤིང་།  སྐུ་ཞབས་ཀྲེང་ལགས་ཀྱི་མིག་ལམ་དུ་དབྱིན་ཧུའེ་ཡིས་བག་ཕེབས་ངང་ཆུང་མ་མཛངས་མའི་འགན་འཁུར་ཐུབ་པ་སྟེ། ཁོ་མོ་ཉིན་ལྟར་ཞོགས་པའི་ཆུ་ཚོད་དྲུག་པར་མལ་ལས་ལངས་ཏེ་སྐུ་ཞབས་ཀྲེང་ལགས་ལ་ཞོགས་ཟས་ཅོག་ཙེ་གང་གྲ་སྒྲིག་བྱས་པ་དང་། ཁོ་མོས་ཀྱང་གཉེན་སྒྲིག་མ་བྱས་གོང་བསགས་པའི་སྒོར་མོ་ཁྱེར་ཡོང་ནས་ཁྱིམ་ཚང་གི་འཚོ་བའི་མཁོ་སྤྲོད་བྱས་ཤིང་། ཁོ་མོས་ཐ་ན་སྐུ་ཞབས་ཀྲེང་ལགས་ལ་རེ་བ་ཙམ་ཡང་བཏོན་པ་ཧ་ཅང་ཉུང་།  སྐུ་ཞབས་ཀྲིན་གྱིས་སྨྲ་བ་ཉུང་བའི་དབྱིན་ཧུའེ་དང་མཉམ་དུ་འཚོ་བ་རོལ་ན་སྤྲོ་སྣང་ཅི་ཡང་མེད་པར་ངོས་འཛིན་བྱས་མོད།   འོན་ཀྱང་ཉིན་རྒྱུན་ཆུང་མས་ཁ་པར་གྱིས་སྐུལ་འདེད་དང་། རྒྱུན་ལྡན་འཁང་ར་མོད་པ།  འཁོན་འཛིང་ཆེ་བའི་བུད་མེད་དེ་དག་དང་བསྡུར་ན།  ཁོས་ཆུང་མ་འདི་འདྲ་ཞིག་ལ་བཀའ་དྲིན་ཚོར་བཞིན་ཡོད།  

     དགའ་ཕྱོགས་བཤད་ན། དབྱིན་ཧུའེ་ཡིས་སྐུ་ཞབས་ཀྲིན་ལགས་ལ་མཚོན་ན་བྲོ་བ་མེད་པའི་དཔེ་ཆ་བལྟ་བར་དགའ་བ་དང་། དཔེ་ཆ་བལྟ་བར་དགའ་བའི་བུད་མེད་ཅིག་མོའི་བསམ་བློའི་འཇིག་རྟེན་ནི་འབྱོར་ཕྱུག་ལྡན་པ་ཞིག་ཡིན་ཡང་ཁྱོ་གས་རྒྱུས་ལོན་བྱེད་མི་འདོད་པ་ཙམ་རེད། རྒྱུ་མཚན་ཁོ་ལ་མཁོ་བ་ནི་རང་ཉིད་ལ་དཀའ་ལས་མི་བཟོ་བའི་བུ་རྫི་ཞིག་རེད། འདི་ལྟར་མཉམ་དུ་ལོ་ལྔ་ལ་འཚོ་བ་རོལ་ཞིང་། མ་གཞིའི་ཡོད་ཚད་ཧ་ཅང་བདེ་བླག་རེད། ཉིན་ཞིག་གི་ཐོ་རེངས་ལ་གཅིན་པ་གཏོང་བར་གསང་སྤྱོད་དུ་འགྲོ་རྩིས་བྱེད་སྐབས་ཁོང་ཐབ་ཚང་བརྒྱུད་དུས་གློ་བུར་དུ་མུན་ནག་ཁྲོད་སྐྲ་ནག་པོ་དང་ལུས་ལ་ཉལ་གོས་དཀར་པོ་གྱོན་པའི་དབྱིན་ཧུའེ་ཡིས་འགུལ་ཙམ་ཡང་མི་བྱེད་པར་འཁྱགས་སྒམ་ལ་ལྟ་བཞིན་ཡོད་པ་མཐོང་། གློ་བུར་དུ་ཅི་ཡིན་འདི་ཡིན་མེད་པའི་འཇིགས་སྐྲག་ཞིག་གིས་སྐུ་ཞབས་ཀྲིན་གཉིད་དང་བཟི་བ་ཅི་ཡང་མེད་པར་གྱུར།  ཁོས“་ཁྱེད་རང་དེ་གར་ལངས་ནས་གང་བྱེད་ཀྱི་ཡོད་དམ་”ཞེས་དྲིས། འོན་ཀྱང་དབྱིན་ཧུའེ་ཡིས་ཁོའི་སྐད་ཆར་ལན་མ་བཏབ།  སྐུ་ཞབས་ཀྲེང་ལགས་དབྱིན་ཧུའེ་ཡི་མདུན་དུ་སླེབས་ནས་ལག་པས་ཁོ་མོའི་ཕྲག་པར་རྡེབ་ཙམ་བྱས་རྗེས་སླར་ཡང་“ཆུང་མ་ཁྱེད་ལ་གང་བྱས་སོང་ངམ”ཞེས་བཀའ་འདྲི་གནང་། འདི་ནི་ཅི་ཞིག་སྒྲུབ་པ་ཡིན་ནམ། ཞེས་བཤད།

      དབྱིན་ཧུའེ་ཡིས་ཁོ་ལ་ངས་རྨི་ལམ་ཞིག་རྨིས་སོང་ཟེར། འོན་ཀྱང་སྐུ་ཞབས་ཀྲིན་གྱིས་རྨི་ལམ་ཅི་རྨིས་ཡོད་པ་མ་དྲིས་པར་རྨི་ལམ་གྱིས་ཅི་ཞིག་བཤད་བཞིན་ཡོད་ཟེར།  ཁྱོད་ཀྱིས་ལྟོས་དང་ད་ལྟ་དུས་ཚོད་ག་ཚོད་རེད།  དབྱིན་ཧུའེ་ཡིས་ལན་མ་སྤྲད།  ཁོ་མོ་མུན་ནག་ཁྲོད་ནས་ཁ་ཕྱིར་འཁོར་ནས་དལ་མོར་ཉལ་ཁང་གི་ཕྱོགས་སུ་སོང་། སྐུ་ཞབས་ཀྲིན་ཉིན་གཉིས་པར་ཅི་ཡིན་འདི་ཡིན་མེད་པར་ཉལ་ཐུལ་ནང་ནས་སད་དུས་ལས་ཚོགས་ལ་སྔ་མོ་ནས་རྗེས་སུ་ལུས་ཡོད་པ་ཤེས།  ཁོ་བྲེལ་འཚུབ་ངང་ཇ་ཁང་དུ་རྒྱུགས་ནས་འཁྱགས་སྒམ་མདུན་དུ་ལངས་ཡོད་པའི་དབྱིན་ཧུའེ་ལ་གཤེ་གཤེ་གཏོང་འདོད་པའི་སྐབས་སུ་བསམ་ཡུལ་ལས་འདས་པ་ཞིག་ལ་དངོས་པོ་སྙི་མོ་ཞིག་གི་སྟེང་དུ་རྐང་པས་བརྫིས།  མགོ་བོ་སྒུར་ནས་བལྟས་མ་ཐག་སྐུ་ཞབས་ཀྲིན་ཅུང་ཟད་ཧོན་ཐོར་དུ་སོང་།  ས་ཐོག་ཏུ་སྐམ་ཤ་དང་ཤ་སྣ་ལྔ།  ཉ་ཤ་བཅས་མཐོང་།  

    དབྱིན་ཧུའེ་ཡིས་དམར་ཚོད་ཚང་མ་གཅིག་རྗེས་གཉིས་མཐུད་དུ་གད་སྙིགས་ཁུག་མའི་ནང་དུ་བླུགས། སྐུ་ཞབས་ཀྲིན་གྱིས་སྐད་གསེང་མཐོན་པོས་ཁྱོད་སྨྱོས་སོང་བ་ཡིན་ནམ། ཅིའི་ཕྱིར་དངོས་པོ་འདི་དག་གཡུགས་པ་ཡིན་ནམ་ཞེས་དྲིས། འོན་ཀྱང་དབྱིན་ཧུའེ་ཡིས་སྔར་བཞིན་མདང་དགོང་དང་འདྲ་བར་ཁོ་རང་སྣང་མེད་དུ་བཞག་སྐུ་ཞབས་ཀྲིན་མདུན་དུ་སོང་ནས་བཀག་འགོག་བྱས་རྗེས།  མོས་ད་གཟོད་“ངས་རྨི་ལམ་ཞིག་རྨིས་སོང་ཞེས་”ཟེར། སྐབས་འདིར་གོང་རིམ་གྱིས་ཁ་པར་ཐོན་ཏེ།  སྐུ་ཞབས་ཀྲིན་གྱིས་ཁ་པར་ལ་གཏད་ནས་དགོངས་དག་ཞུ་ཞོར་དུ་བྲེལ་འཚུབ་ངང་ལྭ་བ་བརྗེ་ནས་སྒོ་ལས་བུད།  འདི་ནི་གཉེན་སྒྲིག་བྱས་ནས་ལོ་ལྔ་སོང་རིང་ཁོས་བཟའ་ཟླའི་ལྟ་སྐྱོང་དང་སྐྱེལ་མ་མེད་པའི་འོག་ཏུ་ཕྱིར་ལོགས་ལ་ལས་ཀར་སྐྱོད་ཐེངས་དང་པོ་ཡིན་པ་དང་།  གཏིང་ལམ་ཐོག་ལངས་ནས་མུན་ནག་གི་ཤེལ་སྒོར་ལྟ་བཞིན་སྐུ་ཞབས་ཀྲེང་ལགས་ཀྱི་སེམས་ནང་དབྱིན་ཧུའེ་ཡི་སྐྱི་གཡའ་བ་དང་རྣམ་འགྱུར་ཅི་ཡང་མེད་པའི་ངོ་གདོང་དེ་དྲན།   ཡིན་ན་ཡང་སྐབས་འདིའི་ཁོས་ངེས་པར་དུ་སྐར་མ་སུམ་ཅུའི་ནང་དུ་ཇི་ལྟར་སྐུ་མགྲོན་ལ་རྒྱུ་མཚན་གསེད་བཀྲོལ་བྱེད་དགོས་པ་དང་། དེ་རིང་ངོ་སྤྲོད་བྱེད་དགོས་པའི་ཇུས་གཞི་དག་བཅོས་བྱེད་དགོས་པར་བསམ་བློ་གཏོང་དགོས། དེ་བས་ཁོས་ཆུང་མའི་རྒྱུན་ལྡན་མིན་པའི་བྱ་སྤྱོད་ལ་བསམ་བློ་གཏོང་ཁོམ་རྩ་བ་ནས་མེད།

     ཡང་སྙིང་དབྱིན་ཧུའེ་ཡིས་རྨི་ལམ་ཅི་ཞིག་རྨིས་པ་རེད་ཅེ་ན།  ཕྱོགས་བཞིར་མི་མེད་པའི་མུན་ནག་གི་ནགས་ཚལ་ཞིག་ནས་མོས་གློག་བཀར་ཡོད་པའི་མཛོད་ཁང་ཞིག་མཐོང་བ་དང་། ཁྲག་ཐིགས་ཟད་མེད་ཡོད་པའི་ཤ་རྡོག་ཆེན་པོ་དེ་སྨྱུག་མའི་དབྱུག་པ་རིང་བོའི་སྟེང་དུ་དཔྱངས་ཡོད་པ་མཐོང་། མོས་དེའི་ཁྲོད་ཀྱི་ཤ་སྙི་མོ་ཞིག་འཆའ་བ་དང་། ཤ་ཁུ་དང་ཁྲག་ཆུ་མིད་པ་ན།  སྐབས་དེར་མོས་མཛོད་ཁང་གི་ས་ངོས་ཀྱི་ཁྲག་དོང་ནང་དུ་འཕྲོས་པའི་འོད་ལམ་ལམ་བྱེད་པའི་མིག་ཟུང་དེ་མཐོང་ཞིང་། མོས་སོ་ཡིས་ཤ་རློན་པ་འཆའ་སྐབས་ཀྱི་བྲོ་བ་བརྗེད་ཐབས་བྲལ།  ད་དུང་ཁོའི་གདོང་དང་མིག་མདངས་དེ་ནི་མོས་ཐེངས་མང་པོར་མཐོང་མྱོང་བའི་གདོང་ཞིག་གི་ཚོར་སྣང་ཤར།  འོན་ཀྱང་དེ་ནི་ཧ་ཅང་འདྲེས་པའི་ཁོའི་གདོང་མ་ཡིན་པའམ་མོས་སྔོན་ཆད་ངོ་ཤེས་པ་དང་ཡང་ཆ་རྒྱུས་གང་ཡང་མེད་པ་ལྟ་བུའི་ཚོར་སྣང་འདི་གསལ་བཤད་བྱེད་མི་ཐུབ་ལ། གསལ་ཞིང་ཁྱད་མཚར་བ་དང་འཇིགས་སྐྲག་གི་ཚོར་བ་དེ་ཡང་གསལ་བཤད་བྱེད་ཐུབ་ཀྱི་མེད་པ་རེད། 

     རྨི་ལམ་འདིའི་རྐྱེན་གྱིས་དབྱིན་ཧུའེ་ཡིས་ད་གཟོད་ཁྱིམ་གྱི་ཤ་དང་འོ་མ་དང་བྱ་སྒོང་དང་བཅས་པ་ཚང་མ་གཡུག་རྒྱུ་ཐག་བཅད་ཅིང་།  མོ་རང་དཀར་ཟས་རིང་ལུགས་པ་རྣལ་མ་ཞིག་བྱེད་པར་སེམས་ཐག་ཆོད།  འོན་ཀྱང་མོ་རང་ཉིད་ཀྱིས་མི་ཟ་ལ་ཁྱིམ་དུ་ཤ་ཡང་འབྱུང་དུ་མི་འཇུག་དེས་སྐུ་ཞབས་ཀྲིན་ལ་བཟོད་བསྲན་བྱེད་མི་ཐུབ་པར་གྱུར།  གལ་ཏེ་དང་ཐོག་ནས་དབྱིན་ཧུའེ་ཤ་ཟ་བར་མི་དགའ་ན་ཁོས་ད་དུང་བསམ་ཤེས་བྱེད་ཆོག་མོད།  འོན་ཀྱང་གཉེན་སྒྲིག་མ་བྱས་པའི་སྔོན་ལ་དབྱིན་ཧུའེ་ཡི་ཟས་ཀྱི་དང་ཁ་ཧ་ཅང་ཡག་ཅིང་ད་ལྟ་རྨི་ལམ་ཡ་མཚན་ཞིག་རྨིས་པ་ཙམ་ཡིན་པས་བཟའ་བཏུང་གི་གོམས་གཤིས་ལ་འགྱུར་ལྡོག་གཏོང་དགོས་པ་མ་ཟད་ཁོ་མོས་ད་དུང་ཁོའི་བཀག་སྡོམ་རྩ་བ་ནས་སྣང་མེད་དུ་བཞག་སྟེ།  ཨུ་ཚུགས་ཆེ་པོས་གནས་ལུགས་ཅི་བཤད་ཀྱང་དང་གོ་བ་ལེན་ཏུ་མི་བཏུབས་ཤིང།  སྐུ་ཞབས་ཀྲེང་ལགས་ཀྱིས་བསམ་གཞིགས་ཡོད་ཚད་ནི་རང་ཉིད་ཀྱི་ཁེ་ཕན་དང་འབྲེལ་བ་དམ་ཟབ་ཡོད་པའི་བྱ་བ་ཤ་སྟག་ཡིན་པས་ན།  དོན་དངོས་སུ་རྒྱུ་རྐྱེན་གང་ཡིན་ཁོས་བསམ་བློ་བཏང་མེད་ལ།  རྨི་ལམ་གང་འདྲ་ཞིག་ཡིན་མིན་ཡང་འདྲི་རྩད་བྱས་མེད། 

     ཡང་ན་བྱ་བ་གང་འདྲ་ཞིག་ཡིན་ན་གཞི་ནས་ཡུན་ཙམ་ནས་མི་ཞིག་གི་བྱ་སྤྱོད་དང་འཚོ་བའི་གོམས་གཤིས་བསྒྱུར་ཐུབ་མིན་ཡང་བསམ་བློ་མ་བཏང་།  དོན་དངོས་སུ་དབྱིན་ཧུའེ་ཡིས་རྨི་ལམ་རྨིས་པའི་ཉིན་སྔོན་མར།  སྐུ་ཞབས་ཀྲིན་ཕྱི་ལ་འགྲོ་བར་བྲེལ་བས་བྲེལ་འཚུབ་ཆེ་བའི་དབྱིན་ཧུའེ་ལ་ཁོང་ཁྲོ་ཆེན་པོ་ལངས། ཁོའི་སྐུལ་འདེད་ཀྱིས་དབྱིན་ཧུའེ་ཚོད་མ་གཏུབ་པའི་སྐབས་སུ་སྟབས་མ་ལེགས་པར་མཛུབ་མོ་གཏུབ་པ་རེད།  འོན་ཀྱང་ཡིད་མི་ཚིམ་པའི་སྐུ་ཞབས་ཀྲིན་གྱིས་མོ་ལ་སེམས་ཁུར་མི་བྱེད་པ་མ་ཟད།  ད་དུང་ཁོང་ཁྲོ་མེ་ལྟར་འབར་ཞིང་། དབྱིན་ཧུའེ་ཡིས་ཧོན་ཐོར་པའི་ངང་ནས་སྐུ་ཞབས་ཀྲིན་ལ་བལྟས་ཏེ་ཅིའི་ཕྱིར་ཡིན་པ་མི་ཤེས་ཤིང་།  མོ་རང་དེ་ལས་ལྡོག་སྟེ་སྔར་ལས་ལྷིང་འཇགས་སུ་གྱུར།   འདི་ནི་དབྱིན་ཧུའེ་ནི་དུས་རྟག་ཏུ་སྐུ་ཞབས་ཀྲིན་ལགས་གྱི་སེམས་མི་སྐྱིད་པ་ཕྱིར་འདོན་གྱི་སྙིགས་སྒམ་ཞིག་ཡིན་པ་ཤེས་ཐུབ།   ཁོ་ནི་དབྱིན་ཧུའེ་ཡིས་རྨི་ལམ་ངན་པ་རྨིས་པའི་དངོས་རྒྱུ་ཡིན་པའི་ངེས་པ་མེད་མོད།  འོན་ཀྱང་གནོན་ཤུགས་རབ་དང་རིམ་པའི་ཤུགས་རྐྱེན་ལས་བྱུང་བ་གཏན་ཁེལ་རེད། 

     འདི་ལྟ་བུའི་ཉི་མ་ནི་ལོ་གཉིས་པའི་དཔྱིད་ཀའི་བར་དུ་རྒྱུན་འཁྱོངས་བྱས་པ་རེད། དབྱིན་ཧུའེ་ཡི་བསམ་ཕྱོགས་ལ་འགྱུར་ལྡོག་ཅི་ཡང་མེད་ཅིང་།  འགྱུར་ལྡོག་ཡོད་པ་གཅིག་པུ་ནི་མོའི་ལུས་པོ་ཉིན་རེ་བཞིན་སྐམ་པོར་གྱུར་ཡོད།  ཁོ་མོ་སྐམ་པོར་གྱུར་བའི་རྒྱུ་རྐྱེན་ནི་དཀར་ཟས་བསྟེན་པས་མ་ཡིན་པར་ཁོ་མོས་རྨི་ལམ་རྨིས་པས་རེད། དོན་དངོས་སུ་ཁོ་མོ་རྨི་ལམ་རྨིས་ནས་བཟུང་ཕལ་ཆེར་གཉིད་མེད།  ཡིན་ནའང་སྐུ་ཞབས་ཀྲིན་གྱིས་ཆུང་མའི་གནས་ཚུལ་ཧ་ཅང་མི་བཟང་བ་ཤེས་ཡོད་མོད།  ཁོས་མོ་རང་ཁྲིད་ནས་སེམས་ཁམས་སྨན་པར་སྟོན་དུ་འགྲོ་བའམ་ཡང་ན་སྨན་བཅོས་གང་རུང་དང་ལེན་བྱེད་པར་བསམ་བློ་གཏན་ནས་བཏང་མེད།   དེ་ཙམ་གྱིས་མི་ཚད།  བྱ་བའི་གསོལ་སྟོན་ཞིག་གི་སྟེང་དུ། དབྱིན་ཧུའེ་ཡིས་ཨུ་ཚུགས་ཀྱིས་དཀར་ཟས་ཟ་བ་དང་ཁེར་སྡོད་དང་སྨྲ་བ་ཉུང་བའི་རྣམ་འགྱུར་གྱིས་སྐུ་ཞབས་ཀྲིན་ལ་འགོ་ཁྲིད་ཀྱི་མདུན་ནས་ངོ་གདོང་ཤོར་བའི་ཚོར་བ་སྟེར་ཏེ།  རྒྱུ་མཚན་ནི་བྱ་བ་འདི་ཁོ་ལ་མཚོན་ན་ཧ་ཅང་གལ་ཆེ།  འོན་ཀྱང་སྐབས་འདིར་ཁོའི་ཁོང་ཁྲོ་དང་ཁ་བརྡ་ཅི་ཞིག་གིས་ཀྱང་མོ་རང་ལ་གཡོ་འགུལ་གཏོང་མི་ཐུབ་པས་སྐུ་ཞབས་ཀྲིན་ཅི་བྱ་གཏོལ་མེད་ཀྱི་འོག་ནས་དབྱིན་ཧུའེ་ཡི་ཕ་མ་དང་ཨ་ཅེ་ལ་ཁ་པར་གཏོང་སྟེ།  ཁོས་དབྱིན་ཧུའེ་ཡིས་དཀར་ཟས་བཟས་ན་ཁྱིམ་ཚང་ལ་ཤུགས་རྐྱེན་ཇི་ལྟར་ཐེབས་པ་དང་།  དེ་བཞིན་གཟུགས་པོ་སྐྱོ་བའི་གནད་དོན་སྐོར་བརྗོད་པ་དང་། ཁོང་ཚོར་བརྟེན་ནས་དབྱིན་ཧུའེ་ཡི་མིག་སྔའི་སྨྱོ་བ་ལྟ་བུའི་བྱ་སྤྱོད་ལ་བཀག་འགོག་བྱ་རྒྱུའི་རེ་བ་ཡོད་ཅེས་བཤད། 

    ཁ་པར་ནང་ཁོའི་སྒྱུག་པོ་ཚུད་པའི་ནང་མི་ཚང་མས་སྐུ་ཞབས་ཀྲེང་ལགས་ལ་དགོངས་དག་ཞུ་བཞིན་ཡོད་པ་དང་། སྐུ་ཞབས་ཀྲེང་ལགས་ཀྱིས་གསན་རྗེས་ཧང་སངས་པར་གྱུར།  རྒྱུ་མཚན་ནི་གཉེན་སྒྲིག་བྱས་ནས་ལོ་ལྔ་སོང་རིང་སྐྱེས་པ་ཆེན་པོའི་རིང་ལུགས་ཀྱི་སྒྱུག་པོས་དགོངས་དག་ཞུ་བའི་བཤད་སྟངས་ཐོག་ནས་རང་ཉིད་ལ་སྐད་ཆ་བཤད་མྱོང་མེད་པས་རེད།  ཉིན་དེར་དབྱིན་ཧུའེ་ཨ་མའི་ནང་མི་འདུ་འཛོམས་བྱ་ཡུལ་ནི་གཅེན་མོ་རེན་ཧུའེ་ཡིས་གསར་དུ་མཛེས་བཟོ་བྱས་པའི་ཁྱིམ་དུ་ཡིན་ཞིང་། སྐུ་ཞབས་ཀྲིན་མོའི་ཨ་ཅེའི་མག་པ་ལ་ཧ་ཅང་ཡིད་སྨོན་འཆོར།  ཨ་ཅེའི་མག་པ་མཛེས་རྩལ་སློབ་ཆེན་ནས་མཐར་ཕྱིན་པ་དང་།  རང་རློམ་བྱས་ནས་རི་མོ་བ་ཞིག་ཡིན་ཟེར།  ཁོས་ཁྱིམ་གྱི་འཚོ་བ་ལ་བྱས་རྗེས་ཅི་ཡང་བཞག་མེད་ཅིང་། ད་བར་དུ་ཨ་ནེ་ཆེ་བས་ཕྱི་ནང་གཉིས་ཀར་ལྟ་རྟོག་བྱེད་བཞིན་ཡོད། ཅོག་ཙེ་སྟེང་ནས་ཁྱིམ་མི་གང་བོ་ཡུན་རིང་ལ་མ་ཐུག་པས་སྤྲོ་སྣང་ལྡན་པ་ཞིག་རེད།  

    མི་ཚང་མས་བཤད་ཞོར་དགོད་ཞོར་དུ་ཁ་ལག་བཟའ་བཞིན་འདུག   སྐྱ་མདོག་དང་སྐམ་ཤས་ཆེ་བའི་དབྱིན་ཧུའེ་ཡིས་འགྲམ་ནས་སྐད་ཆ་གཅིག་ཀྱང་མི་བཤད། དེ་རྗེས་སྐུ་ཞབས་ཀྲེང་ལགས་ཀྱི་སྒྱུག་མོས་ཤ་བཙིར་ནས་དབྱིན་ཧུའེ་ཁ་འགྲམ་དུ་ཡང་ནས་ཡང་དུ་བསྐྱལ་བ་དང་།  ཨ་ནེ་ཆེ་བ་དང་ཨ་ཞང་ཆུང་བས་ཀྱང་དབྱིན་ཧུའེ་ལ་ཁ་ཏ་བསླབ་བྱ་བྱེད་རོགས་བྱས་ཀྱང་། དབྱིན་ཧུའེ་ཡིས་མི་བཟའ་ཞིང་།  སྐབས་དེར་སྒྱུག་པོས་མངར་སྐྱུར་ཤ་རྡོག་གཅིག་དབྱིན་ཧུའེ་ཡི་མདུན་དུ་བསྐྱལ་ནས་ཨ་ཕའི་ཁ་ལ་ཉན་ནས་མྱུར་དུ་ཟོ་དང་།  ངས་འདི་ཚང་མ་ཁྱོད་ཀྱི་ཆེད་དུ་ཡིན།  དེ་མིན་ནད་གཞི་ཞིག་བྱུང་ན་ཅི་ལྟར་བྱེད་ཅེས་བཤད། འོན་ཀྱང་དབྱིན་ཧུའེ་ཡིས་སྔར་བཞིན་མི་བཟའ་བར་བསྡད།   སྐབས་དེར་ཁོང་ཁྲོ་ཆེན་པོ་ལངས་པའི་སྒྱུག་པོས་ངར་སྐད་སྒྲོག་པ་དང་ནང་མི་ཚང་མའི་མདུན་དུ་དབྱིན་ཧུའེ་ལ་འགྲམ་ལྕག་ཚ་ནན་ཞིག་གཞུས་པ་མ་ཟད་ད་དུང་མི་མང་པོར་དབྱིན་ཧུའེ་འཛིན་དུ་བཅུག་ནས་མངར་སྐྱུར་ཤ་དེ་དབྱིན་ཧུའེ་ཡི་ཁ་ནང་དུ་ཨུ་ཚུགས་ཀྱིས་བཅུག་པར་བྱས།  ཤ་ཟ་བའི་དབྱིན་ཧུའེ་ཡིས་གློ་བུར་དུ་གཅན་གཟན་ལྟ་བུའི་སྐད་ཅོར་ཞིག་བརྒྱབ་པ་དང་།  ཁོ་མོས་ཁ་ནང་གི་ཤ་སྐྱུག་ནས་མི་མང་པོའི་ལག་པ་ལས་ཐར་ཏེ།  སིལ་ཏོག་གི་གྲི་བཟུང་ནས་འཕྲལ་ཐག་ཆོད་པོས་མཁྲིག་རྩ་གཅོད་པར་བྱས། ཉིན་དགུང་གི་གསོལ་སྟོན་ནས་སྨན་ཁང་བར་མ་གཞི་ཁྱིམ་ཚང་འཆམ་མཐུན་གྱི་རྣམ་པ་དེ་གློ་བུར་དུ་དེ་འདྲ་ཞིག་ཏུ་འགྱུར་བ་སུས་ཀྱང་བསམ་ཡུལ་འདས།   སྨན་ཁང་དུ་སྡོད་རིང་ཁོ་མོའི་སྒྱུག་མོས་ཁོ་མོའི་གཟུགས་པོ་ཐང་པོ་མེད་པར་སྐྲག་ནས་ཀྲུང་ལུགས་སྨན་གྱིས་བསྐོལ་བའི་ར་ནག་ཁུ་བ་འཁྱེར་ནས་སྨན་ཁང་དུ་ཡོང་། མོས་འདི་ནི་ལུས་ཟུངས་གསོ་བྱེད་ཀྱི་རྒྱ་སྨན་ཡིན་ཞེས་རྫུན་བཤད་པ་དང་། དབྱིན་ཧུའེ་ཡིས་ཁམ་གང་འཐུང་བ་མཐོང་རྗེས།  སྒྱུག་མོ་བགད་ནས་ནད་ཁང་ནས་ཕྱིར་བུད་པ་རེད། 

    ཡིན་ན་ཡང་ཁོ་མོ་སོང་མ་ཐག་དབྱིན་ཧུའེ་མྱུར་དུ་སྤྱོད་ཁང་དུ་རྒྱུགས་ནས་སྐྱུག་ཅིང་། དེ་ནས་ར་ནག་ཁུ་བ་བླུགས་ཡོད་པའི་ཁུག་མ་གཡུགས་པ་དང་།   ཡུན་རིང་མ་སོང་བར་སྒྱུག་མོས་ཁུག་མ་འཁྱེར་ནས་ནང་དུ་འཛུལ་ཡོང་སྟེ་ཁྱེད་ཀྱིས་འདི་ལ་དངུལ་ག་ཚོད་ཡིན་པ་ཤེས་སམ།  ཇི་མི་སྙམ་པ་སྐྱུར་ཏེ་འདི་ཚང་མ་ཕ་མའི་རྔུལ་ཆུ་དང་ཁྲག་གི་སྒོར་མོ་རེད།  ཁྱོད་ད་དུང་ངའི་བུ་མོ་ཡིན་ནམ། ཁྱོད་ཀྱི་ཀུན་སྤྱོད་འདི་ལ་ལྟོས་དང་།  “ཁྱོད་ཀྱིས་ད་ལྟ་ཤ་མ་ཟོས་ན་འཛམ་གླིང་ཡོངས་ཀྱི་མིས་ཁྱོད་ཟ་ངེས་ཡིན། ”ཞེས་མེ་ལོང་ནང་དུ་བལྟས་ནས་ཁྱོད་ཀྱི་གདོང་འདི་ཅི་འདྲ་ཞིག་ཏུ་གྱུར་ཡོད་པར་བལྟ་ཞེས་བཤད། སྐུ་ཞབས་ཀྲིན་ལ་མཚོན་ནས་བཤད་ན། འཇིགས་སྐྲག་དང་སོམ་ཉིའི་དྲ་བར་ཚུད་ཅིང་། སྐབས་འདིར་ཁོའི་སེམས་སུ་ཆུང་མར་སྡང་ཞུགས་མ་གཏོགས་མེད་ཅིང་།  ཆུང་མ་སྨན་ཁང་ནས་བུད་རྗེས་སྐུ་ཞབས་ཀྲིན་གྱིས་བློ་ཐག་རྦད་ཆོད་ཀྱིས་མོ་དང་གཉེན་འཐོར་བྱས།   དབྱིན་ཧུའེ་ཡི་ཨ་ཅེའི་མག་པས་རྒྱུན་དུ་སྒྱུ་རྩལ་གྱི་བྱ་བ་གཉེར་བཞིན་ཡོད།  

     ཁོས་ཁྱིམ་ཚང་ལ་ཁ་ཡ་མི་བྱེད་ཅིང་། རི་མོ་བ་ཞིག་ཡིན་ཞེས་རང་རློམ་བྱས་ཏེ།  ཨུ་ཚུགས་ཀྱིས་ཕན་ཚུན་འདྲེས་པའི་མིའི་ལུས་སྟེང་གི་ཚོན་རིས་ལ་ཧ་ཅང་དགའ། ཉེ་བའི་ལོ་ཤས་རིང་ཁོའི་གསར་རྩོམ་དེ་བུམ་འགག་ལྟ་བུའི་འགག་འཕྲང་ལ་ཐུག་ཚེ།  བསམ་ཡུལ་ལས་འདས་པ་ཞིག་ལ་ཨ་ནེ་ཆུང་བའི་རྐུབ་ལ་ལྗང་མདོག་གི་ལོ་མ་དང་འདྲ་བའི་མངལ་རྟགས་ཡོད་པ་ཤེས་སྐབས།  འཕྲལ་མར་ཁོའི་གསར་རྩོམ་ཀྱི་རེ་འདོད་འཕེལ་བར་བྱས།  ཁོའི་བསམ་པར་ལྗང་མདོག་གི་ལོ་མ་དང་འདྲ་བའི་མངལ་རྟགས་དེའི་སྟེང་དུ་ལུས་པོའི་ཚོན་རིས་བསྣན་ན་ཆེས་ཕུན་སུམ་ཚོགས་པའི་བརྩམས་ཆོས་ཤིག་ཡོང་བར་རེ་བ་བྱེད།  ལྷག་པར་དུ་སྨན་ལ་བརྟེན་ནས་འཚོ་དགོས་པའི་གནས་བབ་ལ་ཐུག་པའི་ཨ་ནེ་ཆུང་བ་ནི།  བཟའ་ཚང་ཁ་བྲལ་བ་དང་མོ་རང་གཅིག་པུ་བསྡད་པའི་རྐྱེན་གྱིས་བསམ་ཚུལ་འདི་རིགས་ཕལ་ཆེར་ལག་བསྟར་བྱེད་ཐུབ་པའི་རང་བཞིན་དུ་གནས་ཡོད་སྟབས། དེ་བས་ཁོས་དབྱིན་ཧུའེ་ལ་ཁ་པར་བཏང་ནས་མོ་རང་ལ་མི་གཟུགས་རི་མོའི་མ་དཔེ་བྱེད་པའི་རེ་བ་ཞུས།   ཁོ་མོ་རང་ཉིད་ལ་རེ་བ་ཅི་ཡང་མེད་མོད།  འོན་ཀྱང་སྐབས་འདིར་དབྱིན་ཧུའེ་ནི་ཕྱི་དངོས་ལ་དོ་སྣང་གང་ཡང་མི་བྱེད་ལ།  དང་ལེན་མི་བྱེད་པའི་གདམ་གསེས་ཀྱང་མེད།   དེའི་རྗེས་ནས་ཁོས་སྔོན་ལ་གཅེར་བུར་བུད་པའི་དབྱིན་ཧུའེ་ལུས་སྟེང་དུ།  ཁོ་མོའི་མངལ་རྟགས་བརྒྱུད་ནས་རྩི་ཤིང་གིས་ཁེངས་པའི་རི་མོ་ཞིག་བྲིས་པ་དང་། ཡང་ལས་སྒྲུབ་ཁང་གི་ན་གཞོན་གདན་འདྲེན་ཞུས་ནས་གཅེར་བུར་མེ་ལོང་ལས་མངོན་དུ་བཅུག་པ་དང་།  ཁོས་ཕ་རོལ་པོའི་གཟུགས་པོར་ཡང་རྩི་ཤིང་གི་ཚོན་རིས་བྲིས་རྗེས་བློ་ཡིད་མི་ཚིམ་པར་མི་གཉིས་སྔར་བས་གོམ་གང་མདུན་སྤོས་བྱེད་དེ།  ལུས་ཐོག་གི་ཚོན་རིས་ཕན་ཚུན་འདྲེས་པའི་རྣམ་པ་པར་ལེན་ཐུབ་རྒྱུའི་རེ་བ་བྱེད་ཀྱི་ཡོད།

    སྤྱིར་ན་གཞོན་རྣམས་ཀྱང་སྒྱུ་རྩལ་གསར་རྩོམ་བྱེད་མཁན་ཡིན་མོད།  ཁོའི་རེ་བ་འདི་ལ་ཁོང་ཁྲོ་ཆེན་པོ་ལངས་ནས་ཕྱིན།  ཡིན་ནའང་དབྱེན་ཧུའེ་ཨ་ཅེའི་མག་པའི་སེམས་ནང་གི་རེ་བའི་མེ་ལྕེ་ད་དུང་གཟིམ་པ་མེད་ཅིང་།  དབྱིན་ཧུའེ་ཡིས་བཤད་ན་རང་ཉིད་ཀྱི་ལུས་སྟེང་གི་རྩི་ཤིང་ཚོན་རིས་ཀྱི་རི་མོ་དེས་མོ་ལ་སེམས་བདེ་རུ་བཅུག་པ་དང་ཐ་ན་བཀྲུ་ཡང་མི་འདོད་ཅེས་བཤད།  རྒྱུ་མཚན་ནི་རི་མོ་དེས་མོས་རྨི་ལམ་ངན་པ་མི་རྨིས་པར་གྱུར།   ཁོ་མོས་བསམས་ན་མོས་ཤ་མི་ཟ་བའི་དབང་དུ་བཏང་ནའང་།  རྨི་ལམ་ངན་པ་དེ་དག་ད་དུང་འབྱུང་སྲིད་པ་དང་།  འོན་ཀྱང་གལ་ཏེ་རྩི་ཤིང་རྐང་གཅིག་ཏུ་གྱུར་སོང་ན།  ཁོ་མོ་འཇིག་སྐྲག་མི་དགོས་པར་སེམས།   ཨ་ཅེའི་མག་པས་མོས་སྔོན་ཆད་རྨི་ལམ་ཅི་རྨིས་པར་དོ་སྣང་མི་བྱེད་ཅིང་ཁོ་ད་ལྟ་གསར་རྩོམ་གྱི་སྤྲོ་སེམས་མངོན་འགྱུར་བྱེད་པའི་འདོད་པས་ཁེངས་ཡོད་པ་དང་། ཁོས་རང་ཉིད་ཀྱི་གཟུགས་པོར་ཡང་རྩི་ཤིང་གི་ཚོན་རིས་བྲིས་པ་དང་དེ་རྗེས་སུ་པར་ལེན་སྒྲིག་ཆས་འཁྱེར་ནས་དབྱིན་ཧུའེ་ཡི་ཁྱིམ་དུ་ཡོང་། ཉིན་གཉིས་པར་གཉིད་ལས་སད་རྗེས་ཁོའི་ཆུང་མ་སྡུག་བསྔལ་གྱིས་ཅོག་ཙེ་སྟེང་དུ་ལོག་ཡོད་པ་མཐོང་། ཐོག་མཐའ་བར་གསུམ་དུ་ཁོས་ཁྱིམ་ལ་ལྟ་རྟོག་གང་ཡང་མི་བྱེད་ཅིང་།  རེན་ཧུའེ་ཡིས་དེའི་ཐད་ནས་འཁང་ར་གཏན་ནས་བྱེད་མྱོང་མེད་ཀྱང་།  བསམ་ཡུལ་ལས་འདས་པ་ཞིག་ལ་ཁོས་དྲན་པ་མི་གསལ་བའི་གཅུང་མོ་དབྱིན་ཧུའེ་ལ་ལྟ་སྟངས་དེ་འདྲ་འཛིན་གྱི་ཡོད་པ་ཤེས་རྟོགས་བྱུང་བས་རེན་ཧུའེ་ཡིས་བཟོད་ཐབས་བྲལ་བའི་གནས་སུ་གྱུར། རེན་ཧུའེ་ཡིས་ཉེན་རྟོག་པར་གཏུག་རྒྱུ་ཐག་གཅོད་ཅིང་།  ཁོ་ངོ་གནོང་སྟེ་ཐོག་ཁང་ནས་ལྡིང་སྟེ་རང་སྲོག་གཅོད་རྩིས་བྱས་ཀྱང་ཉེན་རྟོག་པ་ཡོང་སྟེ་འཛིན་ཐུབ་པར་བྱུང་།  མཇུག་ཏུ་ཁོ་མོའི་ཁྱོ་ག་བཀག་ཉར་ཁང་དུ་བཅུག་པ་དང་དབྱིན་ཧུའེ་ནི་སྨྱོ་ནད་སྨན་ཁང་དུ་སྨན་བཅོས་བྱེད་པར་བསྐྱལ།   ཡིན་ནའང་དབྱིན་ཧུའེ་ཡི་གནས་ཚུལ་ནི་ཇེ་ཞན་ནས་ཇེ་སྡུག་ཏུ་གྱུར།  མོས་ཤ་མི་ཟ་བ་དེ་ཐ་ན་ཟ་མ་ཡང་གཏན་ནས་མི་བཟའ་བར་གྱུར། མོས་རྒྱུན་དུ་རང་ཉིད་ནི་སྲོག་ཆགས་མིན་པར་རྩི་ཤིང་ཡིན་ཞེས་དང་།   རྩི་ཤིང་ནི་ཁ་ལག་བཟའ་མི་དགོས་ཤིང་ཉི་འོད་དང་ཆུ་གཏོར་ན་ཆོག་ཅེས་སྨྲས།  མོས་ད་དུང་བཤད་རྒྱུར།  དོན་དངོས་སུ་སྡོང་བོ་ཆེན་པོ་དེ་དག་ཚང་མ་མགོ་རྟིང་སློག་ནས་སྐྱེས་ཡོད་ཅིང་།   ས་འོག་གི་རྩ་བ་ནི་ད་གཟོད་ཁོ་ཚོའི་ལག་པ་རེད། དེ་བས་སྨྱོ་ནད་སྨན་ཁང་ནས་མི་རྣམས་ཀྱིས་རྒྱུན་དུ་མགོ་རྟིང་སློག་པའི་དབྱིན་ཧུའེ་མཐོང་ཐུབ། དབྱིན་ཧུའེ་སྨན་ཁང་དུ་བསྡད་རྗེས་ཐོག་མཐའ་བར་གསུམ་དུ་གཅེན་མོ་རེན་ཧུའེ་ཡིས་སྨན་ཁང་དང་འབྲེལ་བ་བྱེད་ཀྱི་ཡོད་པ་ལས་ཕ་མས་ཁོང་གཉིས་དང་འབྲེལ་བ་ཆད་ཡོད། 

    གཅུང་མོའི་ཚུགས་ཀ་མཐོང་དུས་རེན་ཧུའེ་ཧ་ཅང་སེམས་མི་བདེ་བར་གྱུར། མོས་རྒྱུན་དུ་འདི་ཡོད་ཚད་ཇི་ལྟར་མགོ་བརྩམས་པར་བསམ་བློ་གཏོང་བཞིན་ཡོད། དབྱིན་ཧུའེ་མོ་རང་ལས་ལོ་བཞི་ཡིས་ཆུང་ཞིང་།  ཆུང་དུས་སུ་ལྕམ་སྲིང་གཉིས་ལ་རྒྱུན་དུ་གཤིས་ཀ་རྩུབ་པའི་ཨ་ཕས་འགྲམ་ལྕག་གཞུས་ཀྱི་ཡོད་པ་དང་།  འོན་ཏེ་ཁོ་མོ་བུ་མོ་ཆེ་བ་ཞིག་ཡིན་པའི་ཆ་ནས་རྒྱུན་དུ་ཨ་ཕ་ལ་ཆང་གི་ཁུ་བ་བསྐོལ་བས་ཨ་ཕས་མོ་ལ་བརྡུང་བ་ཅུང་ཙམ་ཉུང་།   གཤིས་འཇམ་དང་ཨུ་ཚུགས་ཆེ་བའི་དབྱིན་ཧུའེ་ཡིས་ཅི་ཡང་མི་བཤད་པར་འདི་ཡོད་ཚད་དང་ལེན་བྱེད་དགོས་ཐུག  གཅུང་མོ་སྨྲ་བ་ཉུང་བར་མཐོང་སྐབས།   རེན་ཧེའུ་དུས་དེ་ནས་བཟུང་བྱམས་བརྩེ་ལྡན་པའི་ཨ་མའི་བརྩེ་བ་དང་འདྲ་བའི་འགན་འཁྲིའི་འདུ་ཤེས་སླེབས།  ཡིན་ནའང་དབྱིན་ཧུའེ་ལོ་དགུ་ལ་སླེབས་སྐབས་ལོ་དེར་ཁྱིམ་གྱི་ཁྱིས་རྨུགས་ནས་རྨས་པ་དང་།  ཁོ་མོས་ཨ་ཕས་ཁྱི་འཕྲུལ་རྟ་རྒྱབ་ཏུ་བསྡམས་ནས་དེ་དྲུད་དེ་སྐོར་བ་ཡང་ཡང་བརྒྱབ་པ་དངོས་སུ་མཐོང་མྱོང་བ་དང་།   ཉིན་དེའི་དགོང་མོར་ཁོང་ཚོའི་ཁྱིམ་དུ་གསོལ་སྟོན་གཟབ་རྒྱས་ཤིག་འཚོགས་པ་དང་ཁོང་ཚོས་ཁྱི་ཤ་བཟས་ན་ཁྱིས་རྨུགས་པ་བཅོས་ཐུབ་ཅེས་བཤད། ད་ལྟའི་བར་དུ་ཁོ་མོས་སྔར་བཞིན་ཁྱི་ཤའི་ཁུ་བ་དཀར་ཡོལ་གང་བོ་དེ་ཡིད་ལ་བཟུང་ཡོད་པ་དང་།  ཁ་ནས་ཝུ་བ་སྐྱུག་པའི་ཁྱི་དེས་རང་ཉིད་ལ་བལྟས་པའི་མིག་མདངས་དེ་བརྗེད་མེད་ཡིན་པ་རེད།  རེན་ཧུའེ་ཡིས་དབྱིན་ཧུའེ་ཡི་སེམས་ཁམས་མི་ཤེས་མོད།  འོན་ཀྱང་མོས་རྒྱུན་དུ་ནུ་མོའི་ལུས་སྟེང་གི་སུ་ལའང་ཆ་རྒྱུས་མེད་པའི་ཚོར་སྣང་དེ་མཐོང་ཐུབ་ཅིང་།  ཆ་རྒྱུས་མེད་པའི་ཚོར་བ་དེ་ནི་མོའི་ཁྱོ་གའི་འཛིན་སྟངས་དང་འདྲ།   དང་ཐོག་ཁོ་མོའི་ཁྱོ་གའི་གདོང་ཡོངས་སུ་ཉམས་རྒུད་དུ་གྱུར་ནས་ཁོ་མོའི་ཚོང་ཁང་དུ་ཡོང་བ་དང་། ཁོ་གཉིས་ངོ་ཤེས་པའི་ཉིན་དེ་ནས་བཟུང་ཁོ་མོས་རང་ཉིད་ཀྱི་འབད་བརྩོན་ལ་བརྟེན་ནས་ཁོ་ལ་ངལ་གསོ་བྱེད་དུ་འཇུག་འདོད་མོད།  ཡིན་ནའང་རྗེས་ནས་ཁོ་མོས་འབད་པ་ཅི་ཙམ་བྱས་རུང་།  གཉེན་སྒྲིག་རྗེས་ཀྱི་ཁོ་མོ་སྔར་བཞིན་ཐང་ཆད་ནས་ཡོད་ཅིང་།   ཡུན་རིང་མ་སོང་བར་ཁོ་མོ་གོ་རྟོགས་སད་དེ།  རང་ཉིད་ངལ་དུབ་ཀྱིས་མནར་བའི་ཁྱོ་གའི་ལུས་ཐོག་ནས་ལོ་བཅུ་དགུ་ལ་སླེབས་སྐབས་ཕ་ཡུལ་དང་ཁ་བྲལ་བ་དང་མི་སུ་ཞིག་གི་རོགས་རམ་མེད་པའི་འོག་རང་ཉིད་གཅིག་པུ་ཧྲོའུ་ཨེར་དུ་འཁྱམ་ཉུལ་བྱས་ནས་འཚོ་བ་སྐྱེལ་མཁན་རང་ཉིད་མཐོང་།  

    ཆུང་དུས་ནས་མོ་ལ་ལག་སྟོང་ཁྱིམ་འཛུགས་ཀྱི་མི་ལ་འཛོམས་པའི་གཤིས་རྒྱུད་དང་།  བུ་མོ་དང་། ཨ་ཅེ།  ཆུང་མ།  ཨ་མ།  ཚོང་ཁང་གཉེར་སྐྱོང་བྱེད་མཁན་གྱི་ཚོང་བ་བཅས་མོས་འབད་པ་བྱས་ནས་རང་ཉིད་ཀྱི་མི་ཚེའི་བརྒྱུད་རིམ་ཁྲོད་ཀྱི་འཁྲབ་བྱའི་མི་སྣ་རྣམས་ལེགས་པར་འཁྲབ་ཡོད་ཅིང་།   ནུས་ཤུགས་ཅི་ཡོད་བཏོན་ནས་གཞན་ལ་བཟང་སྐྱོང་བྱེད།  འོན་ཀྱང་མོས་ནམ་ཡང་རང་ཉིད་དྲན་མ་མྱོང་།  མོའི་མི་ཚེ་ནི་མོ་རང་ཉིད་ལ་མི་དབང་བ་དང་འདྲ་ལ།  ཡིན་ནའང་དབྱིན་ཧུའེ་ནི་ད་ལྟ་ཚང་མ་གནམ་ཁབ་ལ་བརྟེན་ཏེ་ད་གཟོད་འཚོ་གནས་ཀྱི་རྒྱུན་འཁྱོངས་བྱེད་ཐུབ། ཁོ་མོའི་རེ་བར་དབྱིན་ཧུའེ་ཡིས་ཟ་མ་ཅུང་ཙམ་ཟ་ཐུབ་ན་འདོད།  འོན་ཀྱང་དབྱིན་ཧུའེ་ཡིས་ང་ལ་རྒྱུས་ལོན་བྱེད་ཐུབ་མཁན་མེད།  སྨན་པ་དང་ནད་གཡོག་སུ་ཡིན་ཡང་ང་ལ་རྒྱུས་ལོན་བྱེད་མཁན་མེད།  ཁྱོད་ཀྱང་ཁོ་ཚོ་དང་འདྲ་བ་རེད། ཅེས་བཤད། རེན་ཧུའེ་ཡིས་ང་ཁྱོད་ཤི་འགྲོ་བར་སྐྲག་པ་མ་ཡིན་ནམ་ཞེས་བཤད་། འོན་ཀྱང་དབྱིན་ཧུའེ་ཁ་ཕྱིར་འཁོར་ནས་མི་ཆ་མེད་དང་འདྲ་བར་མོ་ལ་བལྟས་ནས་ང་ཅིའི་ཕྱིར་འཆི་མི་ཆོག་པ་རེད་ཅེས་བཤད།  རེད་ཡ།   ད་ལྟའི་བར་དུ་མོ་རང་གསོན་པ་ནི་རང་དབང་གཏན་ནས་མེད་པ་ཞིག་སྟེ།    ནར་སོན་པ་དང་གཉེན་སྒྲིག་ཐ་ན་ཅི་ཞིག་ཟ་རུང་རང་གིས་འདེམ་གསེས་བྱེད་དབང་མེད། 

      ད་ལྟ་ཁོ་མོ་ཤི་བའི་དབང་ཆ་ཡང་མེད་དམ།  སྨྱོན་བ་ལྟ་བུའིདབྱིན་ཧུའེ་བལྟས་ནས་རིན་ཧུའེ་ཡིས་གློ་བུར་དུ་མོ་ལ་རྒྱུས་ལོན་ཅུང་ཙམ་བྱས་སོང་།  མིག་སྔར་རང་ཉིད་ཀྱིས་བརྒྱུད་མྱོང་བའི་སྡུག་བསྔལ་དང་གཉིད་མི་ཁུག་པ་ནི་དབྱིན་ཧུའེ་ཡིས་སྔ་མོ་ནས་བརྒྱུད་མྱོང་བའི་དུས་རིམ་ཞིག་ཡིན་པར་ཤེས། དབྱིན་ཧུའེ་ཡི་མི་ཚེའི་དཀྱོགས་མཚམས་ཆེས་ཐ་མར་ཐོན་པ་ཡིན་ནམ།  དེའི་ཕྱིར་མོས་ཡུན་ཙམ་ཞིག་ལ་འཚོ་གནས་ཀྱི་སྙིང་སྟོབས་རྩ་བ་ནས་དོར་བ་ཡིན་ནམ། མི་འགོར་བར་དབྱིན་ཧུའེ་ཡིས་སྔར་བཞིན་ཟས་བཟའ་རྒྱུ་དང་ལེན་མ་བྱས་པས་ཕོ་བར་ཁྲག་བཞུར་བས་ཧྲོ་ཨར་གྱི་སྨན་ཁང་ཆེན་མོར་འགྲོ་དགོས་ཐུག་ཅིང་སྨན་པས་ཁོ་ཚོར་སྨན་ཁང་བརྗེ་བའི་བརྡ་ཐོ་ཡང་བཏང་།  འགྲོ་སྐྱོད་བྱེད་བཞིན་པའི་མྱུར་སྐྱོབ་རླངས་འཁོར་ཐོག  རེན་ཧུའེ་ཡིས་གཅུང་མོར་དེ་དག་ཚང་མ་རྨི་ལམ་ཞིག་ཡིན་པའི་ངེས་པ་མེད་ལ།  རྨི་ལམ་ནང་ང་ཚོས་དེ་ནི་ཡོད་ཚད་ཡིན་སྙམ་རུང་།  ཁྱེད་ཀྱིས་ཤེས་གསལ་ལྟར་གཉིད་ལས་སད་རྗེས་གཞི་ནས་དེ་ནི་ཡོད་ཚད་མིན་པ་ཤེས་ཐུབ།  དེར་བརྟེན་ཉིན་ཞིག་ང་ཚོ་གཉིད་ལས་སད་སྐབས་གཏམ་རྒྱུད་མཇུག་འགྲིལ་ངེས་ཞེས་བཤད།

      ༼དཔེ་དེབ་ཧྲིལ་བོའི་ནང་དུ་མགོ་ནས་མཇུག་བར་དབྱིན་ཧུའེ་ཡིས་རྨི་ལམ་ཅི་འདྲ་ཞིག་རྨིས་པར་སེམས་ཁུར་བྱེད་མཁན་མེད་པ་དང་།  འོན་ཀྱང་རྗེས་ཀྱི་ཞིབ་བརྗོད་ཁྲོད་ནས་མཐོང་དཀའ་བ་ཞིག་མ་རེད།  དབྱིན་ཧུའེ་ལ་ཆུང་དུས་ནས་ཁྱིམ་གྱི་གཏུམ་སྤྱོད་ཀྱི་དཀའ་ངལ་མྱོང་བ་དང་།  སྔོན་ཆད་ཨ་ཕས་ཁྱི་ལ་མནར་གཅོད་གཏོང་བའི་རྣམ་པ་ཞིག་མཐོང་མྱོང་བ་དེའི་ཁར་གཉེན་སྒྲིག་རྗེས་ཀྱི་ཁྱོ་གས་སྣང་མེད་བཏང་བའི་ཚོར་སྣང་སོགས་ཉམས་མྱོང་འདི་དག་གིས་དབྱིན་ཧུའེ་ལ་དྲག་སྤྱོད་ཀྱི་འཇིག་རྟེན་འདི་ལ་ཞེན་པ་ལོག་པ་དེ་ཤ་རིགས་ལ་ཞེན་པ་ལོག་པར་བསྒྱུར་བ་དང་།  ཐ་ན་མཇུག་མཐར་ཁོ་མོ་ཉི་འོད་དང་མཁའ་དབུགས་ལ་བརྟེན་ནས་སྐྱེས་པའི་སྡོང་བོ་ཞིག་ཏུ་འགྱུར་འདོད་ཅིང་།   རྒྱུ་མཚན་ནི་སྡོང་བོས་ཚེ་སྲོག་གཞན་པ་ཁྱུར་མིད་གཏོང་བར་བརྟེན་ནས་འཚོ་གནས་བྱེད་མི་དགོས་པས་རེད།

     ཤིང་སྡོང་ཆེན་པོས་འཇིག་རྟེན་འདིའི་ཁྲག་དྲི་བྲོ་བ་དང་རྩུབ་སྤྱོད་བསྒྱུར་མི་ཐུབ་མོད།  འོན་ཀྱང་རང་ཉིད་ཀྱི་ཉི་འོད་རྒྱུན་འཁྱོངས་བྱེད་ཐུབ། དུས་མཚུངས་སུ་དབྱིན་ཧུའེ་ཡིས་སྟོབས་ཤུགས་ཆེར་བསྐྱེད་ཀྱིས་ངོ་རྒོལ་བྱེད་པ་ནི་དྲག་སྤྱོད་ཅེས་པའི་བྱ་སྤྱོད་སྟབས་བདེ་འདི་ཁོ་ན་མ་ཡིན་པར།  ད་དུང་གང་སར་ཁྱབ་ཡོད་པའི་སྙིང་རྗེ་མེད་པར་མི་སྒེར་གྱི་རང་ཚུགས་རང་བཞིན་ལ་བསླད་སྐྱོན་གཏོང་བའི་ཕྱོགས་ཞེན་དང་མཐོང་ཆུང་བྱེད་པའི་ལྕགས་སྒྲོག་དེ་དག་ཀྱང་ཡོད། དབྱིན་ཧུའེ་ཡི་ཨ་མས་བཤད་པ་ལྟར།  “ཁྱོད་ཀྱིས་ད་ལྟ་ཤ་མ་ཟོས་ན་འཛམ་གླིང་ཡོངས་ཀྱི་མིས་ཁྱོད་ཟ་གི་རེད་”ཅེས་བཤད་པ་ནང་བཞིན་རེད། མི་གཞན་དང་མི་འདྲ་བའི་གདམ་གསེས་བྱས་པ་ཙམ་གྱིས་དབྱིན་ཧུའེ་ལ་དོགས་འདྲི་དང་ཁས་མི་ལེན་པ་དང་མི་འགྲིག་པའི་བསླབ་བྱ་མང་ལ།  བསམ་པའི་འཇིག་རྟེན་དང་ལུས་པོ་ཚང་མར་མནར་གཅོད་ཚད་མེད་མྱོང་ཡོད།  རྩོམ་པ་པོ་ཧན་ཅང་གིས་བརྩེ་དུང་མཚོན་ཞིང་ཡང་ཕྱོགས་གཞན་ནས་ཆག་གྲུམ་ཤོར་བའི་ཉམས་འགྱུར་ཞིག་གིས་བརྩེ་བ་དང་འཇིགས་སྐྲག་གཉིས་འདུས་ཀྱི་རང་བཞིན་བརྩམ་ཆོས་དེར་ནོ་བྷེལ་རྩོམ་རིག་བྱ་དགའ་ཐོབ་པ་ཡིན་འདུག་ཨང་།  

    སྒྱུར་སྒྲིག་པ། ཀོང་སད།