ཨ་རིའི་སྲིད་འཛིན་ཐེ་རོན་ཕུ་ཡིས་སྲིད་འཛིན་བཀའ་རྒྱར་མིང་རྟགས་བཀོད་ནས། ཨ་རི་འཛམ་གླིང་འཕྲོད་བསྟེན་རྩ་འཛུགས་ནས་ཕྱིར་འཐེན་བྱ་རྒྱུའི་ཁྱབ་བསྒྲགས་བྱས་པར་དམིགས་ནས། ཚེས་20ཉིན་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་མགྲིན་ཚབ་གཞོན་པ་ཧྥར་ཧན་·ཧ་ཁེ་ཡིས་གསར་འགོད་པའི་དྲི་བ་དང་ལེན་བྱེད་སྐབས། འཛམ་གླིང་འཕྲོད་བསྟེན་རྩ་འཛུགས་ཀྱི་ལས་དོན་ནི་གལ་འགངས་ཤིན་ཏུ་ཆེ་བ་ཞིག་ཡིན་པས་ཁོངས་མིའི་རྒྱལ་ཁབ་ཚང་མས་རྒྱབ་སྐྱོར་བྱེད་འོས་པ་ཞིག་རེད།
ཧ་ཁེས། “སྔོན་དཔག་བྱས་ན་འཛམ་གླིང་འཕྲོད་བསྟེན་རྩ་འཛུགས་ཀྱིས་དེའི་ཐད་སྐད་ཆ་བཤད་རྒྱུ་རེད། འཛམ་གླིང་འཕྲོད་བསྟེན་རྩ་འཛུགས་ཀྱི་ལས་དོན་ནི་གལ་འགངས་ཤིན་ཏུ་ཆེ་བ་ཞིག་ཡིན་པས། ཁོངས་མིའི་རྒྱལ་ཁབ་ཚང་མའི་རྒྱབ་སྐྱོར་ཐོབ་འོས་པ་ང་ཚོར་ཡིད་ཆེས་ཡོད་”ཅེས་བཤད་པ་རེད།
ཉིན་དེར་ཐེ་རོན་ཕུ་ཡིས་སྲིད་འཛིན་བཀའ་རྒྱ་བཏང་ནས། ཨ་རིས་《ཕ་རི་སིའི་གྲོས་ཆོད་》ལས་སླར་ཡང་ཕྱིར་འཐེན་བྱ་རྒྱུ་ཁྱབ་བསྒྲགས་བྱས་པར་དམིགས་ནས། མཉམ་འབྲེལ་རྒྱལ་ཚོགས་ཀྱི་དྲུང་ཆེའི་མགྲིན་ཚབ་པའི་གཞུང་དོན་ཁང་གིས་གསལ་བསྒྲགས་སྤེལ་ནས། 《ཕ་རི་སིའི་གྲོས་ཆོད་》ལ་རྒྱལ་ཁབ་ཁག་གིས་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་“དོན་སྙིང་ལྡན་ཞིང་སྟབས་བསྟུན་གྱི་བྱ་སྤྱོད་སྒྲོམ་གཞི་”མཁོ་འདོན་བྱས་ཡོད་པས། ཐུན་མོང་གི་འབད་བརྩོན་ལ་ཕན་འབྲས་རགས་ཙམ་ཐོན་ཡོད་མོད། འོན་ཀྱང་སྔར་བཞིན་“ཐུན་མོང་ཐོག་སྔར་ལས་ལེགས་པོ་དང་སྔར་ལས་མགྱོགས་པོ་ཡོང་བར་བྱེད་དགོས་”ཞེས་བཤད་པ་རེད།
གསལ་བསྒྲགས་ནང་། 《ཕ་རི་སིའི་གྲོས་ཆོད་》ཐོག་ནུས་རྒྱུ་གསར་བརྗེའི་མཐོ་རླབས་ཤིག་འཕྱུར་ནས་རྒྱལ་ཁབ་ཁག་དང་ཁེ་ལས་ཀྱིས་བསྐྱར་སྐྱེས་ཐུབ་པའི་ནུས་པར་མ་དངུལ་འཇོག་རྒྱུར་འགྲན་ཟླ་བྲལ་བའི་གོ་སྐབས་མཁོ་འདོན་བྱས་པ་དང་ལས་ཞུགས་དང་དར་རྒྱས་ལ་སྒུལ་ཤུགས་མཁོ་འདོན་བྱས་ཡོད། རྒྱལ་ཁབ་ཁག་གིས་ངེས་པར་དུ་གོ་སྐབས་དམ་འཛིན་བྱས་ནས་གནམ་གཤིས་ལ་ཁ་གཏད་འཇལ་བ་དོན་འཁྱོལ་བྱ་དགོས་ལུགས་འཁོད།
