ཟངས་མདོག་རི་བོ་འཕྲེང་བར་བསྒྲིགས་པའི་ཚུལ།།
ཟན་གྱི་གཏོར་མ་སྣ་ཚོགས་བཤམས་པ་འདྲ།།
བཙན་གྱི་དམག་དཔུང་གཡུལ་ལ་ཆས་པར་མཚུངས།།
གནས་ཀྱི་བཀོད་པ་ངོ་མཚར་ཆེ་བ་ལ།།
རྨ་ཀླུང་སྔོན་མོའི་རླབས་འཕྲེང་བག་ལ་ཞ།།
མཛེས་པའི་གཡུ་མདངས་ཉི་མའི་འོད་ཀྱིས་འཁྱུད།།
ལྷ་སྐུ་འབུམ་ཕྲག་བྲག་རིའི་ཕང་པར་འཛུམ།།
བྱིན་རླབས་དྲོད་ཁོལ་དུས་ཀྱི་མཐར་ཡང་རྒྱས།།
ལུང་བའི་ཕུ་མདའ་བྱམས་མགོན་སྐུ་བརྙན་གྱིས།།
ཕྱུར་བར་གཏམས་པའི་དགེ་མཚན་གསལ་བའི་ཕྱིར།།
བྱམས་པ་འབུམ་གྱི་གླིང་ཞེས་ཐོགས་པའི་ཚུལ།།
ཀ༔ཐོག་དགེ་རྩེས་གནས་འདི་མཇལ་སྐབས་གསུངས།།
བྲག་ཕུག་གསུམ་པར་རྒྱལ་དབང་ཀརྨ་པའི།།
སྐུ་བརྙན་ལྡེབས་རིས་ངོས་ན་གསལ་བར་སྣང་།།
ཞྭ་སེར་འཆང་བའི་སྐྱེས་ཆེན་རྣམ་གཉིས་བཞུགས།།
ཡི་དམ་ལྷ་ཡི་སྐུ་བརྙན་སྣ་ཚོགས་མཆིས།།
བརྗིད་ཉམས་ལྡན་པའི་བྱམས་སྐུ་ཆེན་པོ་ཡི།།
དངོས་བྱུང་ལོ་རྒྱུས་རྟོག་བཏགས་སྒྲུང་གིས་བརྒྱན།།
མདུན་དུ་བཞུགས་པའི་སངས་རྒྱས་གློ་ཉལ་ནི།།
འདྲ་བཟོའི་གཏམ་གྱི་སྤྲོས་པ་བྲལ་བར་བཞུགས།།
རྫོགས་སངས་རྒྱས་སྐུ་གནས་འདིར་བཞུགས་པ་དག།
ཕྱི་ལོ་བཞི་བརྒྱ་བཅུ་ཕྲག་གཉིས་ཀྱི་ལོེར།།
ནུབ་ཕྱོགས་ཆེན་གྱི་རྒྱལ་པོས་བཞེངས་པའི་ཚུལ།།
གནའ་བོའི་ཡིག་རྙིང་རྒན་པོས་སྨྲ་བ་མཚར།།
དབྱིབས་ལེགས་མཚོན་མདངས་མཛེས་པའི་ལྡེབས་རིས་ཁྲོད།།
བོད་རྒྱ་གཉིས་ཀའི་ལུགས་སྲོལ་འདྲེས་མར་སྣང་།།
གངས་ལྗོངས་གནའ་བོའི་དུས་ཀྱི་རབ་བྱུང་ཆས།།
རྗེས་དཔག་ཐུབ་པའི་ངོ་མཚར་རི་མོ་མཇལ།།
མངའ་མདག་ཁྲི་རལ་སྐབས་སུ་བཞེངས་པ་ཡི།།
བཤད་གྲྭའི་རྗེས་ཤུལ་མཇལ་འདོད་ཆེ་ན་ཡང་།།
ཁངས་ཆེན་སྐོར་འབབ་བྱེད་པའི་སྔོན་བརྡ་ཡིས།།
དགོན་པ་གོང་མར་བསྐྱོད་པའི་བགྲོད་ལམ་བཅད།།
བྲག་ཕུག་ཆེ་ཆུང་ཉིས་བརྒྱ་བཅུ་དྲུག་དང་།།
ལྷ་སྐུ་ལྡེབས་རིས་བརྒྱ་ཕྲག་བརྒྱད་ལས་བརྒལ།
མཆོད་རྟེན་བཅུ་ཕྲག་ལྔ་ལས་འདས་པ་སྟེ།།
རྫས་སྣ་བཞི་བརྒྱ་ལྷག་གིས་གྲུབ་པར་བཤད།།
དར་གོས་ཚོང་ལམ་ཆེན་མོའི་ཁུག་པ་མཛེས།།
ཐང་བོད་གནའ་ལམ་རྙིང་བའི་རི་མོ་གསལ།།
ཕྱོགས་བྲལ་སྐལ་བཟང་སྐྱེ་བོའི་འདུ་འགོད་ནི།།
རླབས་ཀྱི་གཉེར་མའི་རྗེས་སུ་རྐང་བ་འཇོག།
བོད་བརྒྱུད་ནང་བསྟན་དར་བའི་ལོ་ཚིགས་སྔ།།
མདོ་སྨད་བསྟན་པའི་གནས་གཞི་སྔོན་མར་གཏོགས།།
རིན་ཐང་བྲལ་བའི་འདས་དོན་ལོ་རྒྱུས་མང་།།
སྙན་གྲགས་སྣང་བའི་དཀྱིལ་འཁོར་ཕྱོགས་སུ་འབར།།
གཞན་ཡང་ཟུང་འཇུག་གྲུབ་པའི་དགའ་ཚལ་ཆེ།།
ལོ་ཀྱཱའི་བདེ་མཆོག་འཁོར་ལོར་ཡང་བསྐྱར་མཇལ།།
བྲག་རིའི་ངོས་ཀྱི་དྷི་ཡིག་རང་བྱོན་མཐོང་།།
བཟང་པོ་སྤྱོད་པའི་སྨོན་ལམ་དབྱངས་སུ་བཀུག།
ཅེས་པ་འདི་ཡང་༢༠༢༥ ལོའི་ཟླ ༡ ཚེས ༢༥ ལ་ཤར་དྷི་སྲས་ཀྱིས་བྲིས་པའོ།།
