སྲིད་འཛིན་ཁྲོམ་ཕུའི་བཀའ་རྒྱ་ཁག་ཚ་ཚ་འུར་འུར་གྱིས་ལག་བསྟར་བྱེད་བཞིན་ཡོད་པའི་དམིགས་བསལ་གལ་ཆེན་གསར་འགྱུར།
2025/1/25 གཟའ་སྤེན་པ།
ཨ་རི།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། རྒྱལ་ནང་དུ་འཛུལ་བའི་ཁྲིམས་འགལ་སྐྱབས་བཅོལ་བ་དག་ཕྱིར་ཕུད་རྒྱུའི་ལས་དོན་འགོ་བཙུག ཨ་རིའི་དམག་དཔུང་གི་སྐྱེལ་འདྲེན་གནམ་གྲུ་ C-17 གཉིས་ཀྱིས། བཟུང་ཟིན་པའི་སྐྱབས་བཅོལ་བ་ 80 རེ་འཁྱེར་ནས་ཨ་རི་ནས་གྷ་ཏེ་མ་ལ་རྒྱལ་ཁབ་(Guatemala)ཏུ་ཁ་སང་འཕུར། ཨ་རིའི་དམག་དཔུང་གིས། ཨེལ་ པ་སོ་(El Paso)དང་། ཀྲེག་ས་སི། སན་ སྒྲའེ་ཨེ་གྷོ། ཁཱ་ལི་ཧྥོར་ནེ་ཡ་སོགས་ནས་བཟུང་བའི་སྐྱབས་བཅོལ་བ་ 5,000 ཕྱིར་སྐྱེལ་ཆེད་གནམ་གྲུ་གཏོང་རྒྱུའི་འཆར་གཞིན་ཡོད་པ་བཤད།
སྐྱབས་བཅོལ་བ་འཁྱེར་བའི་གནམ་གྲུ་གསུམ་པ་ཞིག་མེག་སེ་ཁོ་ལ་འཕུར་རྒྱུ་བྱས་པར། མེག་སི་ཁོ་གཞུང་གིས་ཨ་རིའི་གནམ་གྲུ་དེ་ཐང་ལ་འབབ་རྒྱུར་ཆོག་མཆན་མ་སྤྲད་པ། ཨེན་བྷི་སི་གསར་ཁང་གིས་གནས་ཚུལ་བཀོད། མེག་སི་ཁོ་གཞུང་གིས་ཅིའི་ཕྱིར་ཆོག་མཆན་མ་སྤྲད་པའི་རྒྱུ་མཚན་མི་གསལ།
སྒྲོ་ནལ་ཁྲི་རམ་ཕུས། མེག་སི་ཁོའི་མཚོ་རྒྱུད་ལ་ཨ་མེ་རི་ཀའི་མཚོ་རྒྱུད་ཅེས་མིང་གསར་དུ་བཏགས་པ་དང་། མེག་སི་ཁོའི་ཚོང་ཟོག་སྟེང་སྒོ་ཁྲལ་བརྒྱ་ཆ་25%ཡར་སྤར་རྒྱུ་ཡིན་པར་བཤད་པ། རྒྱལ་མཚམས་སུ་དམག་དཔུང་མང་དུ་བཏང་བ། མེག་སི་ཁོ་ནག་ཚོང་སྡེ་ཁག་(Drug Cartels)དག་དྲག་སྤྱོད་པར་ངོས་འཛིན་རྒྱུར་བསྒྲགས་རྗེས། རྒྱལ་ཁབ་གཉིས་ཀྱི་འབྲེལ་བ་སྡུག་ཏུ་ཕྱིན། ཡིན་ན་ཡང་། གནམ་གྲུ་འབབ་ཏུ་མ་བཅུག་པའི་རྒྱུ་མཚན་ནི། གོང་གི་འདི་དག་དང་འབྲེལ་བ་ཡོད་མེད་མི་གསལ།
མེག་སི་ཁོའི་སྲིད་འཛིན་གྱིས་ཅི་ཞིག་གི་ཐད་ཡིན་ནའང་ཨ་རིའི་གཞུང་དང་ལྷན་གྲོས་མོལ་བྱ་ཆོག་པའི་རྣམ་འགྱུར་བསྟན། ཡིན་ན་ཡང་། མོས། ཨ་རིའི་རྒྱལ་ནང་ལ་འཛུལ་བའི་མེག་སི་ཀོའི་མི་ཕོན་ཆེན་ཕྱིར་བསློག་རྒྱུར་འདོད་པ་མེད་། མི་དེ་དག་ནི་ཨ་རིའི་དཔལ་འབྱོར་ལའང་གལ་ཆེན་པོ་རེད་ཅེས་བཤད། ཨ་རིའི་རྒྱལ་ནང་ལ་འཛུལ་བའི་མེག་སི་ཁོའི་མི་ཚང་མ་ཕྱིར་བསློགས་ཚེ། དེས་མེག་སི་ཁོའི་དཔལ་འབྱོར་དང་། གཞུང་ལ་དཀའ་ངལ་ཆེན་པོ་འཕྲད་རྒྱུ་ཡིན་པ་གསལ། རོབ་རྩིས་ལྟར་ན་ཨ་རིའི་རྒྱལ་ནང་དུ་མེག་སི་ཁོའི་མི་ཡིག་ཆ་མེད་པར་སྡོད་མཁན་གྲངས་ས་ཡ་5ཡོད་པ་བཤད།
