གཅིག   རྒྱབ་ལྗོངས་དབྱེ་ཞིབ་དང་འགྲེལ་བཤད། 

    འཕྲིན་ཡིག་འདི་ནི་ཇོ་དཔལ་ལྡན་གྱིས་རང་ཉིད་ཨ་རིའི་སྲིད་འཛིན་ལས་གནས་དང་འབྲལ་བའི་སྐབས་སུ།     ལས་འགན་བཞེས་ལ་ཉེ་བའི་ཐྲི་རམ་ཕོ་ལ་བྲིས་པ་ཡིན་ཞིང་།    འདིས་བྷེ་སྒྲན་ནི་མི་འགྱང་བར་ལས་གནས་དང་འབྲལ་ལ་ཉེ་བའི་སྲིད་འཛིན་ཞིག་ཡིན་པའི་ཆ་ནས་སྲིད་འཛིན་གསར་པར་རྟེན་འབྲེལ་ཞུས་པ་དང་ཡང་ན་སྲིད་འཛིན་གསར་པར་བཅངས་པའི་རེ་བ་མཚོན་པར་བྱས་པ་རེད།      ཐྲི་རམ་ཕོ་ཡིས་སྐབས47པའི་ཨ་རིའི་སྲིད་འཛིན་གྱི་འགན་བཞེས་པའི་དམ་བཅའ་འཇོག་པའི་ཉིན་དེར་ལྗོ་བྷེ་སྒྲན་གྱིས་སྨྱན་སྦྱོར་ལ་འཕྲིན་ཡིག་འདི་ཡོད་པ་བདེན་དཔང་བྱས་མོད་འོན་ཀྱང་བྱེ་བྲག་གི་ནང་དོན་བཤད་མེད།    

   དེའི་རྗེས་ནས་ཨ་རིའི་སྨྱན་སྦྱོར་ཁག་མང་པོ་ཞིག་གིས་འཕྲིན་ཡིག་གི་ནང་དོན་ཆ་ཚང་ཁྱབ་བསྒྲགས་བྱས་ཤིང་།  བྷ་སྒྲན་གྱིས་འཕྲིན་ཡིག་ནང་ཨ་རིའི་མི་དམངས་དང་དེ་བཞིན་འཛམ་གླིང་ས་གནས་ཁག་གི་མི་རྣམས་ཀྱིས་གཡོལ་ཐབས་མེད་པའི་ལོ་རྒྱུས་ཀྱི་འཕོ་འགྱུར་ཆེན་པོའི་ཁྲོད་རྒྱལ་ཚོགས་བརྟན་ལྷིང་ཡོང་བའི་རེ་སྒུག་བྱེད་ཀྱིན་ཡོད་ཅེས་གསུངས་པ་རེད།     སྐད་ཆ་འདིས་བྷེ་སྒྲན་གྱིས་རང་གི་རྒྱལ་ཁབ་ཀྱི་མ་འོངས་པར་ཐུགས་ཁུར་ཟབ་མོ་གནང་བ་མཚོན་ཡོད་ལ།   

   ཁོང་གིས་འགྱུར་ལྡོག་མགྱོགས་པའི་འཛམ་གླིང་ཁྲོད་རྒྱལ་ཁབ་ཀྱི་བརྟན་ལྷིང་དང་འཕེལ་རྒྱས་ནི་གལ་འགངས་ཤིན་ཏུ་ཆེ་བ་ཞིག་ཡིན་པ་གསལ་བོར་ཤེས་ཀྱིན་ཡོད།    དེར་བརྟེན་ཁོང་གིས་སྐབས་གསར་པའི་སྲིད་གཞུང་གིས་མུ་མཐུད་དུ་རྒྱལ་ཁབ་ཀྱི་བརྟན་ལྷིང་སྲུང་སྐྱོང་དང་རྒྱལ་ཁབ་དར་རྒྱས་དང་ཡར་ཐོན་ཡོང་བར་སྐུལ་འདེད་གཏོང་རྒྱུའི་རེ་བ་བྱེད་ཀྱིན་ཡོད་ཅིང་།     འཕྲིན་ཡིག་གི་མཇུག་ཏུ་ལྗོ་བྷ་སྒྲན་གྱིས་གནམ་བདག་ལ་གསོལ་བ་འདེབས་པའི་རྣམ་པས་ཐྲི་རམ་ཕོ་ལ་སྨོན་འདུན་ཞུས་པ་དེས་རྒྱལ་ཁབ་ལ་བཅངས་པའི་བརྩེ་བ་དང་དོ་ཁུར་མཚོན་ཡོད། 

གཉིས།   འཕྲིན་ཡིག་རྒྱབ་ཀྱི་ཆབ་སྲིད་ཁོར་ཡུག   

    འཕྲིན་ཡིག་འདི་འདྲ་སྤྱི་བསྒྲགས་བྱེད་པ་ནི་མི་སྒེར་བར་གྱི་སྟབས་བདེའི་འབྲེལ་མཐུད་བྱེད་སྟངས་ཤིག་ཡིན་པར་མ་ཟད།    ཆབ་སྲིད་སྟེང་གི་འབྲེལ་འདྲིས་གལ་ཆེན་ཞིག་ཀྱང་ཡིན་པ་སྟེ།    ཐྲི་རམ་ཕོ་ཡང་བསྐྱར་སྲིད་འཛིན་ལ་བདམས་ཐོན་བྱུང་བའི་རྒྱབ་ལྗོངས་འོག་ཨ་རིའི་ཆབ་སྲིད་ཁོར་ཡུག་ལ་ཛ་དྲག་དང་ངེས་གཏན་མེད་པའི་རང་བཞིན་གྱིས་ཁེངས་ཡོད་པ་གདོན་མི་ཟ་ཞིང་།    སྐབས་དེ་འདྲར་བྷེ་སྒྲན་གྱི་འཕྲིན་ཡིག་འདི་ནི་ཆབ་སྲིད་ཐོག་གི“འཁྱགས་རོམ་གཏོར་བའི”（破冰）སྟོབས་ཤུགས་ཤིག་ཏུ་བརྩི་ཆོག་ཅིང་།    དེའི་དམིགས་ཡུལ་ནི་ཛ་དྲག་ཆེ་བའི་གནས་ཚུལ་ཞི་ལྷོད་དུ་བཏང་ནས་སྲིད་གཞུང་གསར་པ་བདེ་བླག་ངང་རྐང་ཚུགས་རྒྱུར་མཐུན་རྐྱེན་བསྐྲུན་པ་རེད།    

    དུས་མཚུངས་སུ་འཕྲིན་ཡིག་འདིས་ཀྱང་ཨ་རིའི་ཆབ་སྲིད་རིག་གནས་ཁྲོད་ཀྱི་སྲོལ་རྒྱུན་ཞིག་མཚོན་ཡོད་ལ།    ཨ་རིའི་ལོ་རྒྱུས་ཐོག་སྲིད་ཏང་མི་འདྲ་བ་དང་ཕྱོགས་ཁག་མི་འདྲ་བའི་བར་གྱི་ཆབ་སྲིད་འཐབ་རྩོད་ཛ་དྲག་ཆེ་མོད་འོན་ཀྱང་གནད་འགག་གི་སྐབས་སུ་ཆབ་སྲིད་པ་རྣམས་ཀྱིས་ཁྱོན་ཡོངས་ཀྱི་ལྟ་བ་དང་འགན་འཁྲིའི་འདུ་ཤེས་མངོན་ཐུབ་ཀྱིན་ཡོད་ལ།   ཁོ་ཚོས་རྒྱལ་ཁབ་ཀྱི་ཁེ་ཕན་གཙོ་བོར་བཟུང་ནས་ཐུན་མོང་ཐོག་རྒྱལ་ཁབ་ཀྱི་བརྟན་ལྷིང་དང་འཕེལ་རྒྱས་སྲུང་སྐྱོང་བྱེད་ཀྱིན་ཡོད་པ་རེད།    བྷེ་སྒྲན་གྱི་འཕྲིན་ཡིག་འདི་ཡང་སྲོལ་རྒྱུན་གྱི་རྣམ་པ་དེའི་རིགས་ཀྱི་མངོན་ཚུལ་ཞིག་ཡིན་པ་རེད།    

གསུམ།   འཕྲིན་ཡིག་གི་དོན་སྙིང་དང་ཤུགས་རྐྱེན། 

    འཕྲིན་ཡིག་འདི་ཡོངས་བསྒྲགས་བྱས་ན་ཆབ་སྲིད་སྟེང་གི་འདུམ་འགྲིག་དང་བཟོད་སྒོམ་ལ་སྐུལ་འདེད་གཏོང་བར་ཕན་པ་ཡོད་ཅིང་།    ཛ་དྲག་ཆེ་བའི་ཆབ་སྲིད་ཀྱི་ཁོར་ཡུག་ནང་ཚིག་སྦྱོར་འདི་ལྟ་བུས་ཛ་དྲག་གི་རྣམ་པ་ཞི་ལྷོད་དུ་བཏང་ནས་སྐབས་གསར་པའི་སྲིད་གཞུང་ལ་བལྟོས་བཅས་ཀྱི་ཞི་མཐུན་གྱི་ལམ་བུ་ཞིག་གཏོད་ཐུབ་པ་རེད།   དེ་བས་ན་བྷེ་སྒྲན་གྱིས་གཅིག་ནས་དྲང་ནུས་བརྒྱུད་སྤྲོད་བྱས་པ་སྟེ་འཕྲིན་ཡིག་ནང་རྒྱལ་ཁབ་ཀྱི་འབྱུང་འགྱུར་ལ་རེ་སྒུག་དང་གནམ་བདག་ལ་གསོལ་བ་བཏབ་པའི་ཐོག་ནས་དྲང་ནུས་དེ་དག་བརྒྱུད་སྤྲོད་བྱས་པས་མི་རྣམས་ཀྱི་ཡིད་ཆེས་དང་རེ་བ་འཕེལ་རྒྱུར་ཕན་ཐོགས་ཡོད་པ་དང་རྒྱལ་ཁབ་དར་རྒྱས་དང་ཡར་ཐོན་ཡོང་བར་སྒུལ་ཤུགས་སྣོན་ཐུབ་པ་དང་།    

   གཉིས་ནས་བྷེ་སྒྲན་གྱི་འཕྲིན་ཡིག་འདིས་རང་གི་ཆབ་སྲིད་ཀྱི་བློ་གྲོས་མངོན་པར་བྱས་པ་སྟེ།    ཁོང་གིས་རྙོག་འཛིང་ཆེ་བའི་ཆབ་སྲིད་ཀྱི་ཁོར་ཡུག་ནང་ཇི་ལྟར་བྱས་ཏེ་འོས་ཤིང་འཚམ་པའི་བྱེད་ཐབས་ལ་བརྟེན་ནས་རང་ཉིད་ཀྱི་ལྟ་བ་དང་རྣམ་འགྱུར་མཚོན་པ་དང་རྒྱལ་ཁབ་ཀྱི་བརྟན་ལྷིང་དང་འཕེལ་རྒྱས་སྲུང་སྐྱོང་བྱེད་པའི་འགན་འཁྲིའི་འདུ་ཤེས་མཚོན་པར་བྱས་ཡོད།    གོང་དུ་བཤད་པ་དག་མདོར་བསྡུས་ན་ལྗོ་བྷེ་སྒྲན་གྱིས་ཐྲི་རམ་ཕོ་ལ་བཞག་པའི་གསང་འཕྲིན་ནི་ཐུང་ཐུང་ཞིག་ཡིན་མོད།    འོན་ཀྱང་དེའི་རྒྱབ་ཕྱོགས་སུ་ཆབ་སྲིད་ཀྱི་དོན་སྙིང་དང་རིག་གནས་ཀྱི་ནང་དོན་ཟབ་མོ་འདུས་ཡོད་ལ།   

      དེས་བྷེ་སྒྲན་གྱིས་སྲིད་འཛིན་གསར་པར་སྨོན་འདུན་དང་རེ་བ་བཅངས་པ་མཚོན་པར་མ་ཟད་ཨ་རིའི་ཆབ་སྲིད་རིག་གནས་ཁྲོད་ཀྱི་སྲོལ་རྒྱུན་དང་བློ་གྲོས་ཤིག་ཀྱང་མཚོན་ཡོད།     ཛ་དྲག་ཆེ་བའི་ཆབ་སྲིད་ཁོར་ཡུག་ཁྲོད་འདི་ལྟ་བུའི་ཚིག་སྦྱོར་ལ་བརྟེན་ནས་ཆབ་སྲིད་འདུམ་འགྲིག་ལ་སྐུལ་འདེད་དང་དྲང་ནུས་བརྒྱུད་སྤྲོད་བྱེད་པ་ནི་བླ་ན་མེད་པའི་ཆབ་སྲིད་ཀྱི་བློ་གྲོས་ཤིག་གི་མངོན་ཚུལ་ཡིན་པ་རེད།