བྱིས་པའི་བཀླག་དེབ་ཐ་སྙད་ཚིག་མཛོད་དཔྱད་གླེང་ཚོགས་འདུ་ཐེངས་དྲུག་པ།
2025_1.20-23
ཕྱི་ལོ་༢༠༢༥ལོའི་ཟླ་དང་པོའི་ཚེས༢༠ནས༢༣བར་གྲོང་ཁྱེར་ཁྲུན་ཏུའུ་ནས་མཁན་པོ་ཚུལ་ཁྲིམས་བློ་གྲོས་མཆོག་གིས་བདག་རྐྱེན་སྦྱར་ཏེ་བྱིས་པའི་བཀླག་དེབ་ཐ་སྙད་ཚིག་མཛོད་དཔྱད་གླེང་ཚོགས་འདུ་ཐེངས་དྲུག་པ་བསྡུས་ཤིང་། རྒྱལ་ནང་གི་རིས་སྒྲུང་བཤད་མཁན་དང་རྩོམ་མཁན་གྲགས་ཅན། ཀྲུང་གོའི་ཨེ་རོས་ཁཱ་ཨཱར་རིས་སྒྲུང་བྱ་དགའ་ཐེངས་དང་པོ་ཐོབ་མཁན། དགེ་རྒན་ཆེན་མོ་ཨ་ཅཱ་དང་། ཀྲུང་གོའི་ཁྱིམ་ཚང་སློབ་གསོའི་ཆེད་མཁས་སྡེ་ཁག་གི་འགན་འཛིན། བྱིས་པའི་སེམས་ཁམས་སློབ་གསོ་བ་གྲགས་ཅན་ཧོང་ཕུའུ་ཅོན་བེ། ད་དུང་རིས་སྒྲུང་རྩོམ་པ་པོ་དང་རི་མོ་བ། རྒྱལ་སྤྱིའི་BIBFཕོ་ལོ་ཡོན་རི་མོ་འགྲེམ་སྟོན་གྱི་དཔྱད་འདེམས་པ་ཅིས་ཁྲོ་དཔའ་བཅས་གདན་ཞུས་ཀྱིས་རིས་དེབ་འབྲི་ལུགས་དང་བཤད་ལུགས། ཡིག་སྒྱུར་དང་རི་མོ་འབྲི་སྟངས། ཁྱིམ་ཚང་སློབ་གསོའི་སྐོར་བཅས་ཀྱི་གསབ་སྦྱོང་དང་བགྲོ་གླེང་གནང་བ་དང་། ཐེངས་འདིར་བོད་ཀྱི་ས་གནས་མང་པོ་ནས་ཕེབས་པའི་བྱིས་དེབ་ལ་དོ་སྣང་དང་མོས་པ་ཅན། བྱིས་པའི་དགེ་རྒན་དང་རྩོམ་པ་པོ། རི་མོ་བ་སོགས་ཚོགས་ཞུགས་པ་གསར་རྙིང་ཉི་ཤུ་ལྷག་ཙམ་འདུས་ཡོད་པ་རེད། ཉིན་བཞིའི་རིང་གི་གསབ་སྦྱོང་དང་བགྲོ་གླེང་བརྒྱུད་ཚད་ལྡན་གྱི་བྱིས་དེབ་རྩོམ་འབྲི་དང་རྩོམ་སྒྲིག པར་སྐྲུན་དང་བརྗོད་བྱ་དང་རྗོད་བྱེད། ཐ་སྙད་ཀྱི་མང་ཉུང་དང་སྐད་ཀྱི་འགྲོས་ལུགས། རི་མོའི་འགོད་ལུགས་དང་ཚོན་ཁ་སྡེབ་སྟངས། བྱིས་པའི་སྐད་མཛོད་ཡར་རྒྱས་སོགས་ཀྱི་ཐད་འཆད་ཁྲིད་དང་བགྲོ་གླེང་ལྷུག་པོ་བྱུང་ཡོད་པ་དང་། བགྲོ་གླེང་དང་གསབ་སྦྱོང་ཚོགས་འདུར་ཞུགས་ནས་རིས་དེབ་འབྲི་བའི་ལས་ལ་ཞུགས་མཁན། རྩོམ་པ་པོ་དང་རི་མོ་བ་དུང་དཀར་མཁྱེན་རབ་ལགས་ཀྱིས་བརྩམས་པའི་དཔེ་ཚོགས་བྱིས་པའི་བུ་རམ་ཞེས་པ་མཁན་ཆེན་ཚུལ་ཁྲིམས་བློ་གྲོས་མཆོག་གིས་དབུ་འབྱེད་གནང་ཞིང་། ཚོགས་ཞུགས་པ་ཚང་མས་ཁོང་ལ་རྟེན་འབྲེལ་ཞུས་རྗེས་འདུ་ཚོགས་བཀྲ་ཤིས་བདེ་ལེགས་ངང་མཇུག་བསྡུས།
