ཀྱེ་བླ་མ་ལགས། ཡོད་ཚད་ཀྱིས་སྒེར་གྱི་ཁ་ཕོར་ལ་གཅེས་སྲུང་བྱེད་དུས། ཁྱེད་ཀྱིས་སྤྱི་པའི་རྩམ་ཁུག་ལ་ཉར་ཚགས་གནང་། དོན་ངོ་མར་བཤད་ན། སྤྱིའི་རྩམ་ཁུག་བོར་རྗེས་སྒེར་གྱི་ཕོར་པ་སྟོང་པར་གྱུར་ཡོང་བའི་གནས་ལུགས་དེ་ཤེས་མཁན་ནི་དེང་སང་བོད་ལ་ཁྱེད་དང་ཁྱེད་ལྟ་བུ་རེ་གཉིས་ལས་མེད་པར་སྣང་། རྩ་བ་བོར་ཡང་ཡལ་ག་ཇེ་རྒྱས་སུ་འདོད་མཁན་གྱི་ལུང་ཁུག་གི་དཔོན་ཆུང་དག་ལ་ནི། འདི་སྐོར་ལ་རྨི་ལམ་ཙམ་ཡང་རྨིས་མ་མྱོང་ངོ་།།
བླ་མ་ལགས། ཁྱེད་ནི་དུས་ཚོད་ཀྱི་འཁོར་ལོ་དང་འདྲ་བར་དབྱར་དགུན་དུས་བཞི་དང་ཉིན་མཚན་དུས་དྲུག་ཏུ་ཐག་ཐག་གིས་འཁོར་གྱིན་འདུག ཁྱེད་ནི་འཕྲུལ་ཆས་ཤིག་དང་འདྲ་བར་ལས་ཁུར་གྱིས་ཇི་ལྟར་བྲེལ་ཡང་རྔུལ་ཆུ་ཞིག་ཀྱང་འཕྱི་མྱོང་མེད། ཁྱེད་ནི་ལྷ་སྐུ་ཞིག་དང་འདྲ་བར་སུ་ཡིས་བསྟོད་སྨད་ཀྱི་ཅ་ཅོ་ཇི་ལྟར་སྒྲོག་ཀྱང་འཛུམ་དང་ཁྲོ་གཉེར་གྱི་རྣམ་འགྱུར་ཅི་ཡང་མངོན་མ་མྱོང་། ཁྱེད་ནི་བྱང་ཐང་གི་འབྲོང་རྒོད་ཅིག་དང་འདྲ་བར་རང་སྣང་རྒྱ་ཡན་གྱི་ཀློང་ནས་ཚམ་ཚོམ་ཅི་ཡང་མེད་པར་རང་ཉིད་བགྲོད་ལམ་དུ་ཤར་སེར་སྐྱོད་པར་བྱེད། བྱམས་བརྩེ་དང་ལྷག་བསམ་ཡོད་ན་ཅི་ཡང་གཏོང་ཕོད། ཨ་མ་ཇི་ལྟར་ཉམ་ཆུང་ཡང་བྱམས་བརྩེ་ཆེ་བས་བུའི་ཆེད་དུ་ཚེ་སྲོག་འདོར་ཐུབ། སྐྱེས་བུ་དམ་པ་རིགས་ལ་ལྷག་བསམ་ཆེ་བས་སྤྱིའི་དོན་དུ་ཡོད་ཚད་བློས་གཏོང་ནུས། ཀྱེ་གྲོགས་པོ་ལགས། སུ་ཡིས་མང་པོ་བཤད་རུང་མ་བཤད་རུང། ཁ་ཡི་འགུལ་སྐྱོད་ལ་མ་བལྟ་ལག་གི་བྱ་བ་ལ་ལྟོས། ད་གཟོད་མིག་འབྲུ་མཁན་དང་ལོང་སྣ་ཁྲིད་མཁན་གཉིས་སོ་སོར་ཤེས་པར་འགྱུར་རོ། །
བཀའ་བརྒྱུད་མཁན་པོ་དཀར་འགྲུབ།
