تۇتاس لەنيا ىركىلىسسىز بولدى

11-ايدىڭ 28-كۇنى التاي — قوم تاس جولىنىڭ باستالۋ ءتۇيىنى مەن سوڭعى تۇيىنىنەن قار تازالاۋعا شىققان ماشينالار K97 (كيلومەتر) جەرىندە ءساتتى تۇيىلىسۋىنە بايلانىستى، التاي — قوم تاس جولى تولىق اشىلىپ، ساياحاتشىلاردىڭ ىركىلىسسىز ءجۇرىس-تۇرىسىن پارمەندى كەپىلدەندىردى.

تاياۋدا، سۋىق اعىستىڭ ىقپالىنان التاي — قوم تاس جولى وڭىرىندە ءۇرتىس قار جاۋدى. التاي — قوم تاس جولى تۇتاس لەنياسىنىڭ ىركىلىسسىزدىگىنە كەپىلدىك ەتۋ ءۇشىن، التاي ايماعى التاي — قوم تاس جولىنىڭ قارىن تازالاۋ، ىركىلىسسىزدىگىنە كەپىلدىك ەتۋ ۋاقىتتىق قولباسشىلىق شتابىن جەدەل قۇرىپ، بىرىككەن كۇش قالىپتاستىرىپ، بايلىقتى ورنالاستىرىپ، توسىلعان جول بولەكتەرىن بار كۇشپەن اشتى.

”ۇزدىكسىز قار تازالاۋ جۇمىسى ارقىلى قازىر التاي — قوم تاس جولىنىڭ تۇتاس لەنياسى ىركىلىسسىزدەندى“،-دەدى التاي — قوم تاس جولىنىڭ قارىن تازالاۋ، ىركىلىسسىزدىگىنە كەپىلدىك ەتۋ ۋاقىتتىق قولباسشىلىق شتابىنىڭ ءبىرىنشى شەپ قولباسشىسى، ايماقتىق قاتىناس-تاسىمال مەكەمەسىنىڭ ورىنباسار باستىعى جيان يۇڭميڭ.

”التاي — قوم تاس جولىنىڭ ىركىلىسسىزدىگى قومعا باراتىن جولدى بارىنشا قىسقارتىپ قالماستان، جول بويىنداعى كوركەم كورىنىستەردى دە تاماشالاي الاتىن بولدىق“،-دەدى 11-ايدىڭ 29-كۇنى التاي — قوم تاس جولىنىڭ باستالۋ تۇيىنىندە جەكە اۆتوكولىگىمەن ساياحاتتاۋشى جۋ شۇي تىلشىگە قۋانا.

سول كۇنى تىلشىلەرىمىز اۆتوكولىكپەن التاي — قوم تاس جولىنىڭ باستالۋ تۇيىنىنەن قومعا قاراي جولعا شىقتى. جول بويىنداعى كوركەم كورىنىستەر ادامدى قايران قالدىرادى. يرەلەڭدەگەن جانە كەڭ كوسىلگەن جول، اق قار جامىلعان اسقار تاۋلار، قار قىمتانعان بايىرعى ورمان مەن قارلى القاپ قىستىڭ كوركەم كورىنىسىن قالىپتاستىرىپ، ادامدى ءتانتى ەتتى.

حىبەيدەن كەلگەن ساياحاتشى يەزى تەبىرەنە بىلاي دەدى: قىستا التاي — قوم تاس جولىندا ءجۇرۋ بەينە تاۋ-وزەن سۋرەتىندە جۇرگەندەي سەزىمدە بولاسىڭ. كۇزدىڭ كوركەم كورىنىسى بولماسا دا قىس ماۋسىمىنداعى التاي — قوم تاس جولىنىڭ مۇز قۇرسانعان، كۇمىستەي جارقىراعان، تازا دا تىنىش كورىنىسى كوز تارتادى ەكەن.

جول بويىنداعى كوركەم كورىنىس ادامدى وزىنە باۋراۋدان سىرت، التاي — قوم تاس جولىنىڭ جول حاۋىپسىزدىگىن قامتاماسىزداندىرۋ شارالارى دا ادامدى ەرەكشە مەيىرگە بولەدى. جالپى ۇزىندىعى 200 كيلومەتردەن استام جولدا قار تازالاپ جاتقان جول قاتىناس قىزمەتكەرلەرى، ”تاۋلى رايونعا كىرگەندە ابايلاپ جۇرىڭىزدەر“ دەپ ەسكەرتىپ تۇرعان قاتىناس ساقشىلارى جانە تەلەگراف لەنياسىن قاربالاس جوندەپ جاتقان قىزمەتكەرلەردى جولىقتىراسىز. ولار ءتۇرلى قىزمەت ورنىندا مىندەت وتەپ جاتقانىمەن، ورتاق نىساناسى ساياحاتشىلارعا حاۋىپسىز، ىركىلىسسىز قاتىناس ورتاسىن جاراتۋ. مىنە، بۇل حالىق ساقشىسى شىناربەك باقىتبەك ۇلى ايتقانداي: ساياحاتشىلاردىڭ حاۋىپسىزدىگى — ءبىزدىڭ بورىشىمىز.

‍

”ادامزاتتىڭ قار شاڭعى مەكەنى“، ”جۇڭگوداعى قارلى مەكەن“ بولعان التاي ايماعى بيىل التاي — قوم تاس جولىندا تۇتاس جىلدا اۆتوكولىك قاتىناۋعا شىنايى كەپىلدىك ەتىپ، التاي قالاسى، قاناس، قوممەن ءبىر تۇلعالانعان كورىنىس ءوڭىرىن قالىپتاستىرىپ، التايدىڭ قار-مۇز ساياحاتىنىڭ قارىشتاپ دامۋىن ىلگەرىلەتەدى. سوندىقتان، التاي ايماعى شۇعىل جاعدايعا توتەپ بەرۋ زاتتىق ماتەريالىن ازىرلەۋ جانە قار تازالاۋ قىزمەتىن ويداعىداي ورىنداپ، ءارقايسى اۋدانداعى (قالاداعى) تاس جول اسىراۋ، اۋا رايى، قاتىناس ساقشى تاراۋلارى تىعىز بىرلەسىپ، ءاربىرى ءوز مىندەتىن اتقارىپ، ءتارتىپتى جۇمىس ءبولىسىن جۇرگىزىپ، نەگىزگى جولداردا قار-مۇزدى تازالاۋدى ۇدايىلاندىرۋ، قار اپاتى، قار كوشكىنىنەن ساقتانۋ، اۋا رايىنان الدىن الا مالىمەت بەرۋ سياقتى ارناۋلى ارەكەتتى ۇزدىكسىز ورىستەتىپ، تاس جولدىڭ حاۋىپسىز، ىركىلىسسىز بولۋىن قامتاماسىزداندىرادى.

‍

”اۋا رايى جاعدايىنا ۇزدىكسىز نازار اۋدارىپ، اقپارات قۇرالدارىنىڭ الەۋمەتتىك ءنومىرى ارقىلى اۋا رايىنان الدىن الا مالىمەت، اۋا رايى اپاتىنان ساقتاندىرۋ سيگنالىن جانە جولدىڭ ىركىلىسسىزدىك جاعدايىن دەركەزىندە جاريالاپ، ساياحاتشىلارعا اۆتوكولىكپەن جۇرۋدە حاۋىپسىزدىككە كوڭىل ءبولۋدى ەسكەرتىپ وتىرامىز. قالىڭ ساياحاتشىلاردىڭ التايعا ساياحاتتاي كەلۋىن شىن جۇرەكتەن قارسى الامىز، التايدىڭ كوركەم قىسقى كورىنىسى مەن التاي-قوم تاس جولىنىڭ قىسقى كەلبەتىن تاماشالاۋىنا بار كۇشپەن شارت-جاعداي جاراتامىز“،-دەدى جيان يۇڭميڭ.

ءتىلشىنىڭ ۇعىسۋىنشا، ساياحاتشىلاردىڭ حاۋىپسىز قاتىناۋىنا كەپىلدىك ەتۋ ءۇشىن، التاي قالاسىنان قومعا دەيىنگى ارالىقتا ءبىر باعىتتا قاتىناۋ جانە ۋاقىتقا، بولەككە ءبولىپ قاتىناتۋ ۇلگىسىن قولدانعان. جىڭىشكە قىران تەكسەرۋ پۋنكتىنەن تۇستەن بۇرىن ساعات 11 دەن باستاپ قاتىناسا، قومعا قاراي باراتىن ساياحاتشىلار ساعات 13 تەن كەيىن قاتىناۋىنا بولمايدى، ەكاشا دالالىق قار شاڭعى باقشاسىنا دەيىن باراتىن ساياحاتشىلار ساعات 18 دەن كەيىن قاتىناۋىنا بولمايدى؛ ەكاشادان قوم ارالىعىنا ساعات 15 تەن كەيىن قاتىناۋىنا بولمايدى ەكەن.