جۋىردا، جۇڭگو عىلىم-تەحنيكا داشۋەسىنىڭ زەرتتەرمەنى رىن جيگاڭ ۇسىنىس بويىنشا التايعا استرونوميا سارايىنا كەلىپ، ايماققا توتە قاراستى جالپى حالىقتىڭ عىلىم-تەحنيكا ساپاسىنا قاتىستى ورىنداردىڭ كاسىپتىك قىزمەتكەرلەرى، التاي قالاسىنىڭ قاتىستى ورىندارىنىڭ جاۋاپتىلارى جانە كاسىپتىك قىزمەتكەرلەرى، ايماقتاعى قارت عىلىم-تەحنيكا قىزمەتكەرلەرىنىڭ ۋاكىلدەرى قاتارلىلارعا ”كەڭىستىك كۆانتتىق عىلىم-تەحنيكاسىنىڭ تىڭ ىلگەرىلەۋى“ تاقىرىبىندا لەكسيا جاسادى.
رىن جيگاڭ جۇڭگو عىلىم اكادەمياسى ستراتەگيالىق جەتەكشى عىلىم- تەحنيكا ارناۋلى كۆانتتىق عىلمي تاجىريبە جاساندى سەرىگى نىسانى ”موزى ءنومىرلى“ عىلمي قولدانىلمالى جۇيەسىنىڭ مەڭگەرۋشى جوبالاۋشىسى. 2014-جىلى جۇڭگو عىلىم اكادەمياسىنىڭ جاستار جاڭالىق اشۋىن جەبەۋ قوعامىنا تاڭدالعان، 2017-جىلى جۇڭگو عىلىم-تەحنيكا داشۋەسىنىڭ ۇزدىك زەرتتەۋشى مەكتەپ باستىعى سيلىعىنا يە بولعان. 2018-جىلى ۇيىرمەمەن بىرگە ا ق ش عىلىم-تەحنيكانى جەبەۋ قوعامىنىڭ كيۆەنت سيلىعىنا، 2019-جىلى ۇيىرمەمەن بىرگە جۇڭگو عىلىم اكادەمياسىنىڭ ۇزدىك عىلىم-تەحنيكا جەتىستىكتەرى سيلىعىنا يە بولعان.
تاقىرىپتىق لەكسيادا رىن جيگاڭ كۆانتتىق دەگەن نە، كۆانتتىق قاباتتاسۋ جانە كۆانتتىق تۇيىنشەك، كەڭىستىك كۆانتتىق عىلىم-تەحنيكانىڭ اياق الىسى، جەر مەن كوكتى ءبىر تۇلعالاندىرعان كۆانتتىق حابارلاسۋ تورابى قاتارلى مازمۇنداردى تانىستىردى. ول بىلاي دەدى: كەڭ اۋماقتاعى جوعارى دالدىكتەگى جارىق جيىلىك بەلگىسى (ۋاقىت جيىلىگىن جەتكىزۋ + كەڭىستىك جارىق ساعاتى) بولاشاقتا ورتا جيىلىك بولەگىندەگى تارتىلىس تولقىنىن بارلاۋ، كۇڭگىرت زاتتاردىڭ نەگىزگى تۇراقتى سانعا جاسايتىن ىقپالىن زەرتتەۋ قاتارلى فيزيكالىق نەگىزگى قاعيدالاردى تەكسەرۋگە نەگىز قالايدى، كۆانتتىق ينفورماتسيا تەحنيكاسى مەن استرونوميالىق وپتيكالىق ينتەرفەرەنتسيانىڭ ۇشتاسۋى كەلەسى ۇرپاق استرونوميالىق باقىلاۋدىڭ ماڭىزدى تاسىلىنە اينالۋى مۇمكىن.
ىقپالداستىق بۋىنىندا ماجىلىسكە قاتىناسۋشىلار وزدەرى كوڭىل ءبولىپ وتىرعان ماسەلەلەر جونىندە ارت-ارتىنان سۇراۋ قويعاندا، رىن جيگاڭ ءبىر -بىرلەپ جاۋاپ بەردى.
رىن جيگاڭ بىلاي دەدى: كەڭىستىك كۆانتتىق عىلىم-تەحنيكاسى سىندى وسى سالا سالىستىرمالى تۇردە كاسىپتىك عىلىم سانالادى. قاراپايىم قاعيدا جانە قولدانىلمالى تانىستىرۋ ارقىلى كوپشىلىككە زەرتتەۋىمىزدىڭ ءىس جۇزىندىك پايدالانىلۋىن، حالىقاراداعى ەڭ جاڭا عىلىم-تەحنيكالىق زەرتتەۋدىڭ جەتىستىكتەرىنىڭ ادامزات تۇرمىسىنا قانداي وزگەرىس اكەلەتىنىن ءتۇسىندىرىپ، سونداي-اق اناعۇرلىم كوپ جاستاردى عىلىم-تەحنيكا ىستەرىنە ات سالىسۋعا باۋراۋدى تىلەيمىن.
ۇعىسۋعا قاراعاندا، وسى رەتكى تاقىرىپتىق لەكسيا التايدىڭ جالپى حالىقتىق عىلىم-تەحنيكا قىزمەتكەرلەرىنە عىلمي بىلىمدەردى جالپىلاستىرىپ، عىلمي يدەيانى تاراتىپ، عىلىم-تەحنيكانىڭ تارتىمدىلىعىن ايگىلەۋمەن بىرگە، عىلىم-تەحنيكادا جاڭالىق اشۋ سەنىمىن اناعۇرلىم بەكەمدەپ، عىلمي رۋح پەن عالىمداردىڭ رۋحىن ساۋلەلەندىرىپ، التايدىڭ عىلىم-تەحنيكانى جالپىلاستىرۋىن ىلگەرىلەتۋگە جانە بۇقارانىڭ عىلمي ساپاسىن جاقسارتۋعا بەلسەندى ۇلەس قوسقان.
来源：雪都嘟/阿勒泰地区融媒体中心
记者：董世菊 实习记者：刘欢
编辑：哈尔勒哈西·毛吾列提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
