མཚོ་ལྷོ་བོད་རིགས་རང་སྐྱོང་ཁུལ་ཐུན་ཏེ་རྫོང་རྐ་འབའ་སུམ་མདོ་གྲོང་རྡལ་འབའ་ཐང་བྱང་མའི་སྡོད་ཁུལ་ནི་སྤྱི་ལོ2011ལོར་ཐུན་ཏེ་རྫོང་མི་དམངས་སྲིད་གཞུང་གི་མཛུབ་སྟོན་འོག་བཙུགས་པ་དང་། ཐུན་ཏེ་རྫོང་མཁར་ནས་ཤར་ཕྱོགས་སུ་སྤྱི་ལེ་ཉེར་བཞིའི་མཚམས་སུ་ཆགས་ཡོད། སྡོད་ཁུལ་དེ་ནི་རྐ་འབའ་སུམ་མདོ་གྲོང་རྡལ་གྱི་སྡེ་བ་བརྒྱད་ཀྱི་ཁྱིམ་ཚང་དཀའ་ངལ་ཅན་བརྒྱ་ཡིས་གྲུབ་པ་ཞིག་ཡིན་ལ། ཁྱིམ་ཚང་དེ་དག་སྔོན་ཆད་རང་རང་གི་སྡེ་བར་ཡོད་དུས། ཟོག་ལུག་གི་གྲངས་ཀ་ཉུང་ཞིང་ཁྱིམ་ཚང་གི་ཆ་རྐྱེན་དེ་ཁྱིམ་ཚང་གཞན་དག་དང་བསྡུར་ན་ལྟོས་བཅས་ཀྱིས་ཞན་པ་རེད། ལྷག་པར་དུ་ནད་པ་སྨན་པར་སྟོན་དཀའ་བ་དང་བྱིས་པ་སློབ་གྲྭར་བསྐྱལ་བར་སྟབས་མི་བདེ་བ་སོགས་དཀའ་ཁག་ཆེན་པོ་ཡོད་པར་དམིགས་ནས། ཐུན་ཏེ་རྫོང་ཏང་ཨུ་དང་སྲིད་གཞུང་གིས་དྲང་བདེན་གྱི་རྩ་དོན་གཞིར་བཟུང་ནས། རྐ་འབའ་སུམ་མདོ་གྲོང་རྡལ་གྱི་སྡེ་བ་བརྒྱད་ནས་འཚོ་བར་དཀའ་ཁག་ཡོད་པའི་ཁྱིམ་ཚང་བརྒྱ་ཐམ་པ་བདམས་ཏེ་གནས་འདིར་བཀོད་སྒྲིག་བྱས་ནས་ཁོ་ཚོའི་འཚོ་བར་སྟབས་བདེ་གང་ལེགས་བསྐྲུན་པ་རེད། དེའི་སྐོར་ནས་འབའ་ཐང་བྱང་མའི་སྡོད་ཁུལ་གྱི་སྔོན་ཆད་ཀྱི་ཀྲུའུ་རིན་དོན་གྲུབ་ཀྱིས་བཤད་རྒྱུར། སྔོན་ཆད་སྡོད་ཁུལ་འདིའི་ཁྱིམ་ཚང་རེ་རེར་མཚོན་ན་དབྱར་དགུན་སྟོན་དཔྱིད་མེད་པར་རྩྭ་ཆུ་བསྙེགས་ཏེ་ཕྱུགས་ཟོག་གི་རྗེས་སུ་འབྲངས་ནས་རུ་བ་གནས་སྤོར་བྱེད་བཞིན་ཡོད་པ་དང་། དགུན་དཔྱིད་ཀྱི་སྐྱས་ལམ་རིང་མོ་ནས་ཁོ་ཚོས་དཀའ་སྡུག་གི་རྔུལ་ཆུ་མང་པོ་ཞིག་གདོང་ནས་ཟགས་མྱོང་། སྡོད་ཁང་དང་ཆུ་གློག་ལམ་གསུམ་སོགས་རྨང་གཞིའི་སྒྲིག་ཆས་ཅུང་ཆ་ཚང་བའི་སྡོད་ཁུལ་འདིར་གནས་སྤར་བ་དང་བསྟུན་ནས། ཁོ་ཚོར་གཏན་ཆགས་ཀྱི་ཁྱིམ་གཞིས་དྲོན་མོ་ཞིག་ཡོད་པར་གྱུར་བས་འཚོ་བར་སྟབས་བདེ་ཆེན་པོ་བྱུང་ཡོད་པར་མ་ཟད། ཏང་དང་སྲིད་གཞུང་གིས་སྡོད་ཁུལ་འདིའི་རྒན་པ་དང་བྱིས་པ་རྣམས་ལ་ལོ་རེ་བཞིན་འཚོ་བའི་ཁ་གསབ་མི་ཉུང་བ་ཞིག་ཀྱང་སྟེར་བཞིན་ཡོད། ད་ལྟའི་ལོ་གཅིག་གི་འཚོ་བའི་ཁ་གསབ་དེ་ཁོ་ཚོའི་སྔོན་ཆད་ཀྱི་ཁྱིམ་ཚང་གི་ལོ་གཅིག་གི་ཡོང་སྒོ་དང་བསྡུར་ན་ཆེས་ཆེར་བརྒལ་ཡོད་པས། སྡོད་ཁུལ་དེའི་སྡོད་དམངས་རྣམས་ཀྱི་སེམས་སུ་བདེ་སྐྱིད་ཀྱི་སྣང་བས་ཡོངས་སུ་ཁྱབ་འདུག དེའི་སྐོར་ནས་སྡོད་ཁུལ་གྱི་ཏང་ཡོན་རྒན་པ་རིན་ཆེན་འབུམ་གྱིས་བཤད་རྒྱུར། འབའ་ཐང་བྱང་མའི་སྡོད་ཁུལ་ལ་མཚོན་ན། ཆེས་གླེང་རིན་ཡོད་པ་གཞན་ཞིག་ནི་ཁོ་ཚོའི་སྡོད་ཁུལ་དུ་སྨན་ཁང་དང་སློབ་གྲྭ་ཡང་བཙུགས་ཡོད་པས། སྔོན་ཆད་རྒྱང་ཐག་རིང་བའི་རུ་ཐང་ལུང་གསུམ་ནས་བྱིས་པ་སློབ་གྲྭར་འགྲིམ་དཀའ་བ་དང་། ནད་པ་སྨན་པར་སྟོན་རྒྱུ་སྟབས་མི་བདེ་བའི་ལོ་རྒྱུས་དེ་གཞི་ནས་མཇུག་རྫོགས་ཡོད་པ་དེ་རེད། དེའི་སྐོར་ནས་སྡོད་ཁུལ་གྱི་སྡོད་དམངས་ལྷ་འབུམ་ཚེ་རིང་གིས་བཤད་རྒྱུར། སྡོད་ཁུལ་ཞིག་ལ་མཚོན་ན། སྡོད་ཁུལ་དེའི་ཐུན་མོང་དཔལ་འབྱོར་གོང་འཕེལ་དུ་བཏང་སྟེ་སྡོད་དམངས་རྣམས་ཀྱི་ཡོང་འབབ་འཕར་སྣོན་འབྱུང་བར་བྱེད་རྒྱུ་ནི་དོན་དག་གལ་ཆེན་ཞིག་རེད། དེ་བས་སྡེ་བའི་འགོ་ཁྲིད་དང་ཏང་ཡོན་རྒན་པ་རྣམས་ཀྱི་སྣེ་ཁྲིད་འོག གོང་རིམ་སྲིད་གཞུང་ནས་མ་དངུལ་འབོར་ཆེན་བརྩོན་ལེན་བྱས་ཏེ། ད་ལྟ་རྨིད་གྲུ་བཞི་མ་ཆིག་སྟོང་དགུ་བརྒྱ་ཡོད་པའི་ཐོག་སོ་གཉིས་ཅན་གྱི་མཉམ་ལས་ཁང་ཞིག་ལེགས་འགྲུབ་བྱུང་ཡོད་པ་དང་། རྗེས་ཕྱོགས་སུ་མཉམ་ལས་ཁང་དེ་ནི་འབའ་ཐང་བྱང་མའི་སྡོད་ཁུལ་གྱི་ཐུན་མོང་དཔལ་འབྱོར་གོང་འཕེལ་ཏུ་གཏོང་བའི་རྒྱུ་གཙོ་བོ་ཞིག་ཏུ་འགྱུར་བར་ཚང་མ་ཡིད་ཆེས་ཆེན་པོས་ཁེངས་འདུག དེའི་སྐོར་ནས་སྡོད་ཁུལ་གྱི་ཏང་ཀྲི་པུའུ་ཧྲུའུ་ཅི་ཚེ་འབུམ་རྒྱལ་གྱིས་གསར་འགོད་པར་འདི་ལྟར་བཤད། ད་ལྟ་འབའ་ཐང་བྱང་མའི་སྡོད་ཁུལ་གྱི་ཏང་ཀྲི་པུའུ་ཧྲུའུ་ཅི་དང་ཏང་ཡོན་རྣམས་ཀྱིས་བྱེད་ཐབས་རབ་དང་རིམ་པ་སྤྱད་ནས་སྡོད་ཁུལ་འཕེལ་རྒྱས་ཀྱི་རྣམ་པ་གསར་པ་གསར་སྐྲུན་བྱས་ཏེ། བྱ་སྤྱོད་དངོས་ཀྱི་སྟེང་ནས་འཆམ་མཐུན་དང་གསོན་ཤུགས་ལྡན་པའི་སྡོད་ཁུལ་འཛུགས་སྐྲུན་བྱེད་པའི་ཐད་ལ་མུ་མཐུད་དུ་འབད་བརྩོན་བྱེད་བཞིན་འདུག
གསར་འགོད་པ། གཡང་འབུམ་རྒྱལ། ཤ་བོ་གསེར་མཚོ།
རྩོམ་སྒྲིག་འགན་ཁུར་པ། བསོད་ནམས་ཚེ་རིང་། གཡང་འབུམ་རྒྱལ།
དོ་དམ་པ། བསོད་ནམས་དོན་གྲུབ།
ལྟ་སྐུལ་པ། ཕྱུག་ལོ།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
