(རེབ་གོང) ཁ་དྲག
བྲང་ལ་བརྡབ་པའི་འཛེར་མ།
—— ཉམ་ཆུང་བུད་མེད་ཅིག་གི་སྡུག་ཡུས་ཁེར་བརྗོད།
སྙིང་ཉེ། ཁ་པར་ཞིག་བཏང་ཆོག་ན་ཇི་འདྲའི་སྐྱིད་ཨང་།
འཚོ་བ་མུན་པས་བཏུམས་པའི་མོ་སྨན་ང་ལ་མཚོན་ན་འཛུམ་གྱུ་ལེར་འདུ་རར་འགྲོ་བ་ལས། སྡུག་ཀུམ་སེ་རང་ཁྱིམ་དུ་ཁྱེད་ལ་སྒུག་པ་སྐྱིད།
ལས་དབང་གི་སྣེ་མོ་ལན་ཆགས་ལ་བཏགས་པའི་འུ་གཉིས་ནི་འཇིག་རྟེན་འདིའི་ཆེས་ཉམ་ཐག་པའི་ཚེ་སྲོག་ཆུང་ཆུང་གཉིས་ཡིན་པས། རེ་བ་དང་ཡིད་ཆེས། སྤོབས་པ་ཁོ་ནས་ད་གཟོད་ངེད་གཉིས་ལ་འོད་སྣང་རེ་སྦྱིན་པ་ལས་བྱམས་ལྡན་སུས་ཀྱང་གཟིགས་སྐྱོང་ཐོབ་མ་མྱོང……
ཚེ་འདུན་མཉམ་འདུག་ལ་ཕ་མའི་བཀའ་ངག་མ་འཁྲོལ་བར་ལོ་ཟླ་ཕྱིན་ཤུལ་དུ་དགའ་འོས་པའི་བཀྲ་ཤིས་གཉེན་སྒྲིག་གི་ཉིན་མོ་དེའི་མཚན་མོའང་སྡུག་ཧུབ་དཀར་ཡོལ་བཀང་ལ་ལྗིབས་དགོས་བྱུང་།
མི་ཚོས་བཤད་ན་ཁྱེད་རང་བཀག་ཉར་གྱི་ལོ་ཟླ་དེ་རྒྱུན་ལྡན་དང་བསྡུར་ན་ཡང་ཤོས་སུ་གཏོགས་པས། གོང་ནས་ཀྱང་སྐྱོ་བའི་སེམས་རྩ་གཉོམ་པའི་ང་རང་ལ་སྙིང་རྗེ་ཞིག་བསྒོམ་པ་འདྲ་ཡང་། མི་ཁ་དང་ཁེར་རྐྱང་། འཇིགས་སྣང་ཁྲོད་དུ་ལུས་པའི་ཕྲན་ལ་མཚོན་ན་དེ་ཡང་ཚེ་སྟོད་ཅིག་གི་རིང་ཡིན་པ་འདྲ།
ཁྱེད་ལའང་ཅི་ཁག ཕ་མས་གནང་བ་མ་ཐོབ་དེ་ཐོབ་ཀྱིས་མཉམ་འདུག་གི་སྐལ་བ་ཙམ་རེག་པས་དགའ་སྤྲོའི་ཚོད་མ་ཟིན་པར་ཨ་རག་ཅུང་ཙམ་འཐུང་ནས་རླངས་འཁོར་བསྐོར་བས། དེང་སང་གི“ལུག་རྒྱལ་སྐར་མ་སྟོང་ལྡན”དུ་གྲགས་པའི་གཞན་གྱི་མ་ལུག་བཅུ་གཉིས་གསོད་གཅིར་བྱས་རྗེས། གཅིག་ནས་རང་ལ་ཁ་ལོ་བའི་ལག་རྟགས་མེད་པས་འཚབ་སྣང་དང་གཉིས་ནས་ཁྱིམ་གྱི་མགྲོན་གཉེར་ལ་བྲེལ་སྣང་སྐྱེས་པས། བྲོས་བྱོལ་ལྟ་བུ་ཞིག་བྱས་པ་དེས། ཅུང་ཙམ་ནས་རྒྱུ་བདག་གི་སྙིང་རླུང་སྟོད་ལ་འཚངས་ཏེ་གོང་གཏུག་བྱས་པས། ཆག་སྒོ་ཆེན་པོ་ཞིག་དགུན་དར་ཙག་གིས་བཀད་པ་ལྟར་བདག་གི་སྙིང་ཁ་ནས་གས་ཏེ་ཁྱེད་ཀྱི་བྲང་གཞུང་ལ་སླེབས། སྤྱིར་ན་ལུག་འགའ་ཡིན་པས་ཉེས་པ་ཆེ་ཤོས་སུ་མིན་སྣང་འཆར་མོད། ཡིན་ན་ཡང་ཁྲིམས་དང་རྒྱུ་བདག་གི་ངོས་ནས་བཤད་ན་དེ་ཡང་སྤྱི་མཐུན་ལུགས་མཐུན་ཞིག་ཡིན་པས། ཁྱེད་ཀྱིས་ལོ་ཟླ་ཁ་ཤས་མུན་ཁྲོད་དུ་བསྐྱལ་དགོས་བྱུང་།
ཁྱེད་རང་མེད་ཤུལ་དུ་ང་རང་བསམ་བློ་གཏང་རྒྱུར་གོམས། བག་ཁང་སོ་མའི་ནང་གི་ཉལ་ཁྲི་འཁྱག་པ་འདིའི་སྟེང་ནས་ཞིབ་འདང་ཞིག་རྒྱབ་ན། ང་ཚོས་ནམ་ཡང་བཤད་རྗེས་དང་འོལ་ཚོད་བྱས་ནས་འདུག་མི་རུང་བར་ངེས་པར་བདེན་ཐུབ་དང་ཚད་ལྡན་ཡིན་པའི་འཚོ་བའི་ཁ་ཕྱོགས་འཚོལ་དགོས་སྙམ་ཞིང་། ཁྱེད་ཀྱི་ནོར་འཁྲུལ་ལྟ་བུ་དེ་ཡང་བསྐྱར་མི་འབྱུང་སླད། ཞོགས་པ་ཁ་ཤས་གྲང་ངར་ཁྲོད་བསྐྱལ་ནས་ལག་རྟགས་ལེན་དུ་སོང་ཞིང་། མཚན་མོ་རེ་ཟུང་ལ་ཡིག་ཆུང་ཐུར་འདེད་བྱས་པས། བཤད་རྒྱུན་དུ་ཤིན་ཏུ་དཀའ་བར་གྲགས་པའི་ཁ་ལོ་བའི་ལག་རྟགས་དེ། ཧ་ཅང་ལས་སླ་མོའི་ངང་ནས་བླངས་ཟིན་པས། སྙིང་ཉེ། ཁྱེད་ཀྱིས་ཀྱང་གཞན་གྱི་བཤད་ཡམས་དེར་མི་ཉན་པར། སྔ་མོ་ནས་ལག་རྟགས་བླངས་ཡོད་ན་དོན་དག་འདི་ག་ལ་འབྱུང་སྲིད། རྒྱུ་མཚན་ནི་ཁ་ལོ་བའི་ཡིག་རྒྱུགས་ནང་ན་ཏག་ཏག་ཁྱེད་ཀྱིས་བཟོས་པའི་ནོར་འཁྲུལ་དེ་ཉེས་པ་ཚབས་ཆེན་ཡིན་ཚུལ་གསལ་པོར་བྲིས་ཡོད་པས། གལ་ཏེ་རིག་པའི་མེ་སྟག་མཆེད་པའི་ཁྱེད་ཀྱིས་ཀྱང་འདི་སྦྱངས་ཡོད་ན་ད་རེས་ཀྱི་ལམ་ལྷུང་འདི་གཏན་ནས་ཐེབས་མི་སྲིད།
ཨ་ཤུ་རེ། ད་ལྟ་སྔོན་སོང་ལ་ཕྱིར་ལྟ་བྱས་ནས་མ་འོངས་པར་དྲང་ལམ་འཚོལ་བ་ལས། དུས་ཚོད་ལ་ཕྱིར་བསྣུར་མེད་པ་དེས་ང་ཚོ་ལ་ཀུ་ཡངས་གཏོང་མི་སྲིད།
སྙིང་ཉེ། ད་ནི་སྒུག་ཡུན་རིང་ན་རིང་དུ་ཆུགས། བདག་གི་སེམས་ན་རྒུན་ཆང་ལས་མངར་བའི་རེ་སྨོན་ཡོད་པས། འུ་གཉིས་ཀྱི་བརྩེ་དུང་ལ་མ་ཤི་གསོན་བྲལ་ཙམ་གྱིས་ག་ལ་གནོད་སྲིད།
སྙིང་ཉེ། ཁྱེད་ཀྱི་བདག་གི་ཕྱོགས་ལ་སེམས་ཁུར་མ་གནང་། ང་རང་མྱི་ཁར་མི་སྐྲག གཞན་ལ་མཚོན་ན་མྱི་ཁ་ནི་ཚེར་མའི་རྩུབ་ཡིན་རུང་ང་ལ་མཚོན་ན་བལ་གྱི་འཇམ་ཡིན་པས། བདུད་མོ་དང་སྣ་ནག་མ། འདྲེ་མོ་ཟེར་བ་ཙམ་གྱིས་ངའི་རང་ཚུགས་ལ་ཅི་ཡང་མི་གནོད་པར། བརྩེ་བའི་རྒྱལ་སྲས་ཁྱེད་ཀྱི་སེམས་ན་དོན་གྱི་ལྷ་མོ་ཡིན་པ་དེས་ཆོག་གོ །
སྙིང་ཉེ། ད་ནི་ལྷན་འཛོམས་ལ་ཐག་མི་རིང་། དྲུག་པའི་ལྷ་ཟླ་ཤར་ན། ངས་རང་ལུས་པདྨ་འདྲ་བོ་གོས་ཀྱིས་བཏུམས་ཤིང་འཇེབ་འཁོར་ཆུ་ཤེལ་འདྲ་བོར་འོད་ཀྱིས་སྤྲས་ནས་ཁྱེད་རང་བསུ་རུ་ཡོང་ན། ཁྱེད་ཀྱིས་ཞལ་ངོ་དུང་ཟླ་འདྲ་བོར་འཛུམ་གྱིས་བརྒྱན་ནས་སྐད་ངག་མགུར་མ་འདྲ་བོས་ཚིག་ཅིག་ཤོད་དང་། དྲན་པའི་བྲང་ཁར་བརླན་ནས་སྐེ་འཇུ་ཞིག་དང་གདུང་བའི་མཆུ་འདབ་གཡོ་བཞིན་སྦྲང་རྩི་འཐུངས་རྗེས། ལག་ཟུང་དམ་དུ་སྦྲེལ་ནས་འཚོ་བ་གསར་པའི་ལམ་དུ་བསྐྱོད་ཆོག དེ་དུས་ཁྱེད་ནི་འཚོ་བའི་ཁ་ལོ་བ་དང་ང་ནི་རླངས་འཁོར་ཁ་ལོ་བ་བྱས་ཆོག
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
