(ཐེམ་ཆེན) བོང་སྟག་ལྷག་ག
ལོ་ན་བརྒྱད་ལ་སོན་པའི་ལོ་དེར། ངས་ལམ་ལུང་ཉག་ག་ནས་རྡོ་རིང་མདོ་ལ་འཐེན་པའི་ལམ་ཕྲན་དེ་མིག་གིས་འཚོས་ཤིང་སེམས་ཀྱིས་ཉན་ནས་བསྡད་པ་ཡིན། ཉག་ལམ་དེ་ནས་རྟ་ཞོན་ཞིག་འབུད་པར་རེ་སྒུག་བྱས་པ་ཡིན། སྐྱ་མི་ཁ་ཤས་ཉག་ལམ་དེ་ནས་འབུད་རྒྱུ་བྱུང་ན། དེ་ནི་སློབ་གྲྭར་དབྱར་གནང་བཏང་ནས་ཡུལ་ལ་ལོག་པའི་ཕུ་བོ་དང་ཨ་ཅེ་རྣམས་ཡིན་པ་གདོན་མི་ཟ། མི་འགྱངས་པར་ང་རང་ཡང་ལམ་ཕྲན་དེ་བརྒྱུད་ནས་སློབ་གྲྭ་ཟེར་བ་དེ་ལ་འགྲོ་དགོས། ཉག་ལམ་དེ་ནི་དོན་དུ་ཁེར་ལམ་ཞིག་ཡིན། ལན་རེར་ཆར་ཞོད་ཆེ་དུས་སྐྱ་མི་ཡང་ཉག་ག་དེ་བརྒྱུད་ནས་འགྲོ་མི་ཐུབ་པས་ལུང་མདོ་བསྐོར་ནས་རྫོང་མཁར་ལ་འགྲོ་བཞིན་འདུག ཡིན་ན་ཡང་། ལམ་ཐག་ལྡབ་འགྱུར་གྱིས་རིང་ཟེར། དེ་བས། ངས་ཉིན་རྒྱུན་ཉག་ལམ་དེ་ལ་སོ་བ་བྱས་ནས་འདུག་དགོས། ཉག་ལམ་དེ་ནི་ང་རང་ལྷ་ཡུལ་ལྟ་བུའི་སློབ་གྲྭ་ལ་འགྲོ་བའི་འོད་ཀྱི་འཇའ་སྐས་ཡིན།
ཕྱི་ལོར། ལམ་ལུང་ཉག་ག་ནས་འཁོར་ལོ་སྤྲད་པའི་བྱ་ཞིག་རྡུལ་འཚུབ་གཅིག་གིས་སྡེ་བའི་ནང་དུ་འཕུར་འོང་། བྱིས་པ་རྣམས་མཚར་སྣང་དང་འུར་སྒྲ་ཡིས་ཁེངས་ནས་གཤོག་པ་མེད་པའི་བྱ་དེ་ལ་བལྟ་རུ་སོང་བ་ཡིན། མ་གཞི་དེ་ནི་མའོ་ཐོ(འཕྲུལ་རྟ)ཟེར་བ་དེ་ཡིན་འདུག ཨ་ཁུ་སྨུག་ཐོ་ནི་ངེད་ཀྱི་སྡེ་བའི་མའོ་ཐོ(འཕྲུལ་རྟ)ལོངས་སུ་སྤྱོད་མཁན་ཐོག་མ་དེ་ཡིན་པར་མ་ཟད། འཕྲུལ་རྟ་ལམ་ལུང་ཉག་ག་ནས་འཕུད་མཁན་ཐོག་མ་དེ་ཡང་ཡིན་འདུག སྡེ་མི་རྣམས་ཀྱིས་ཨ་ཁུ་སྨུག་ཐོའི་ལག་རྩལ་ལ་ཡིད་སྨོན་དང་བསྟོད་བསྔགས་རབ་ཏུ་བྱེད་ཀྱིན་འདུག
རུ་བ་སྟོན་སར་སྤོར་ཁར། ཉིན་སྣེར་ཞག་མཐུད་ཀྱིས་ཆར་བ་འབབ་མཚམས་མ་ཆད། ཨ་མས་བདུན་པའི་སྨུག་གེ་ཞག་བདུན་ཞེས་པ་འདིའོ་སྨྲ། བདུན་པའི་སྨུག་གེ་ཞག་བདུན་མ་དེངས་པའི་བར་ལ་ཨ་ཁུ་སྨུག་ཐོ་དང་ཁོའི་མའོ་ཐོ(འཕྲུལ་རྟ)གཤོག་མེད་འཁོར་བྱ་དེ་ལམ་ལུང་ཉག་གའི་གྲོག་ཆེན་དུ་ལྷུང་སོང་ཟེར། སྡེ་དཔོན་གྱིས། བླ་བསང་པོ་དེས་འཕྲུལ་རྟ་བསྐོར་ནས་ལ་གཟར་མོ་གྲོག་ཆེན་དེ་འདྲ་ཞིག་གི་ཁར་འཕུད་དོན་མེད་ཨང་། ད་ནི་ཤུལ་དུ་ལུས་པའི་མ་སྨད་གསུམ་པོ་སྡུག་པ་ལ་ཟེར།
ལོ་དེ་ནས་བཟུང་། ལམ་ལུང་ཉག་ག་ནས་ཕར་ཚུར་ལ་འགྲོ་བའི་སྐྱ་མི་ཇེ་ཉུང་དང་འཕྲུལ་རྟ་ཇེ་མང་རེད། མཚམས་ཤིག་ནས་སྔོན་གྱི་ཁེར་ལམ་དེ་ཟེགས་ལམ་དུ་བསྒྱུར་ཞིང་དེ་ནས་རྡོ་ལམ་དུ་བསྒྱུར། ད་ལྟ་སྣུམ་ལམ་དུ་བསྒྱུར་འདུག དེ་བཞིན་འཕྲུལ་རྟ་ཡང་སྣ་ཚོགས་དར་ཞིང་རིམ་བཞིན་རླངས་འཁོར་མང་པོ་དར་ནས། ད་ལྟ་སྡེ་བའི་ནང་དུ་ཁྱིམ་ཚང་རེ་ལ། མི་གྲངས་དུ་ཡོད་ན་རླངས་འཁོར་དང་འཕྲུལ་རྟ་ཡང་དེ་དང་གྲངས་མཚུངས་པའི་ཚོད་དུ་འདུག
དེ་སྔོན། ལམ་ལུང་ཉག་ག་བརྒྱུད་ནས་འགྲོ་དུས་ངས་ལམ་ཟུར་དུ་སྦྱར་བྱང་མང་པོ་བསླངས་ཡོད་པ་མཐོང་བྱུང་། “ལ་ཐུར་གཟར་བས་དལ་མོ་གྱིས”“ཐུར་ལམ་གུག་དཀྱོགས་མང་བས་གཟབ་གཟབ་བྱོས”“ཆར་བ་འབབ་ཉིན་སྨུག་གློག་བཀར་དགོས”“རླངས་འཁོར་བར་ཐག་གོམ་པ200ཕྱེས་ཤིག”“ཆང་འཐུངས་ནས་རླངས་འཁོར་བསྐོར་མི་ཆོག”སོགས་བསྟུར་མར་མཐོང་།
དེ་ཡང་ལོས་ཡིན། ཨ་ཁུ་སྨུག་ཐོ་བླ་བསང་པོར་འགྲིམ་འགྲུལ་དོན་རྐྱེན་བྱུང་བ་ནས་བཟུང་མི་ལོ་ཉི་ཤུའི་ནང་། ལམ་ལུང་ཉག་ག་ནས་ལོ་རེར་མི་རེ་བརླགས་སོང་ཞེས་སྔོན་ནས་གོ་ཐོས་ཡོད། ཁ་རྒས་དག་གིས་ལམ་ལུང་ཉག་ག་འདི་ས་མི་གཙང་ས་ཞིག་རེད་ཅེས་རྨུ་ཐག་དང་དར་ལྕོག་འཐེན་པ་སོགས་ཀྱི་སྲོལ་བཙུགས། འོན་ཏེ། རྟོག་དཔྱོད་བྱས་པའི་འབྲས་བུར་ལམ་ལུང་ཉག་གའི་འགྲིམ་འགྲུལ་དོན་རྐྱེན་དག་ནི་ཆང་འཐུངས་ནས་རླངས་འཁོར་བསྐོར་བ་དང་། མྱུར་ཚད་མགྱོགས་པས་ཁ་ཤུགས་ལ་མ་འདངས་པ། དུང་བརྡ་མ་བརྒྱབ་པས་མདུན་ངོས་ཀྱི་རླངས་འཁོར་ལ་གདོང་ཐུག་བྱུང་བ་གསུམ་ནི་གཙོ་བོ་རེད་ཟེར།
དུས་རབས་ཀྱི་འགྲོས་མགྱོགས་པོ་འདི་ལ་མི་རྣམས་ཀྱི་འཚོ་བ་དང་འགྲུལ་བཞུད་ཀྱི་འགྲོས་ཀྱང་ཇི་འདྲའི་མགྱོགས་པ་ལ། དེ་བཞིན་ང་ཚོའི་ཚེ་སྲོག་དང་བདེ་སྐྱིད་ཀྱི་འགྲོས་ཀྱང་ཇི་འདྲའི་མགྱོགས་པ་ལ། དེ་བས། ང་རང་མི་ལོ་ཉི་ཤུའི་ཡར་སྔོན་ལ་སླེབས་ན། ངས་སྔར་བཞིན་ལམ་ལུང་ཉག་ག་ནས་འགྲོས་དལ་བའི་སྐྱ་མི་ཞིག་ཨེ་འབུད་ལ་རེ་སྒུག་བྱེད་ངེས་ཡིན།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
