ཕྱི་ལོ་༢༠༢༥ཟླ་བ་༡ཚེས་༥དང་། བོད་ཟླ་༡༡ ཚེས་༥ཉིན། ཁམས་གསུམ་འགྲོའི་རྩ་ལག་སྐྱབས་གསུམ་གཅིག་བསྡུས་ཀྱི་ངོ་བོ། འདྲེན་མཆོག་བཀའ་དྲིན་མཚུངས་མེད། ༸སྐྱབས་མཆོག་བདེ་བར་གཤེགས་པ་༸ཀླུ་ལྡིང་མཁན་ཆེན་རྡོ་རྗེ་འཆང་གི་དགོངས་རྫོགས་འདས་མཆོད་དུས་དྲན་ཡིན།
རྗེ་བཙུན་བླ་མ་བདེ་བར་གཤེགས་པ་ཀླུ་ལྡིང་༸མཁན་ཆེན་ཆོས་ཀྱི་རྒྱལ་པོར་གསོལ་བ་འདེབས་པ་བྱིན་རླབས་ཆར་འབེབས་མ་ཞེས་བྱ་བ་བཞུགས་སོ།།
2025/01/04 大恩上师 哦•禄顶堪千仁波切示寂纪念日
༸ཤར་ཆེན་༸ཀླུ་ལྡིང་མཁན་ཆེན་རྡོ་རྗེ་འཆང་གི་གསོལ་འདེབས་དྲང་སྲོང་བདེན་སྨོན།
འཇམ་དཔལ་དཔའ་བོའི་སྤོབས་པའི་གཏེར་ཆེན་ཚོགས།།
དབྱངས་ཅན་དགའ་མས་ཅིག་ཏུ་སྤུངས་པའི་དཔྱིད།།
བསྟན་པའི་སྤྱི་ནོར་སྲིད་མུན་དྲུང་འབྱིན་པའི།།
ཐེག་ཆེན་ཆོས་ཀྱི་ཉི་མར་གསོལ་བ་འདེབས།།
བྱམས་པའི་དཔལ་གོས་བརྩེ་བའི་གེ་སར་ཅན།།
དམིགས་མེད་སྙིང་རྗེ་ཡལ་འདབ་འབོལ་བའི་ཁྲོད།།
ཟབ་དགུའི་མཁྱེན་རྟོགས་འདབ་སྟོང་དགོད་པའི་ཕུལ།།
རྣམ་འདྲེན་བྱེ་བའི་གཙུག་རྒྱན་གསོལ་བ་འདེབས།།
ཆོས་ཅན་ཀུན་བརྟག་སྣང་ཆ་ཇི་སྙེད་ཚོགས།།
གཞན་དབང་གདན་གསུམ་དཀྱིལ་འཁོར་རོལ་མོར་འཆར།།
ཆོས་ཉིད་ཡོངས་གྲུབ་བདེ་ཆེན་ཡེ་ཤེས་ཀྱི།།
དོན་སྟོན་གསུང་གསང་འཛིན་པར་གསོལ་བ་འདེབས།།
ཚོགས་གཉིས་ནོར་འཛིན་མ་མས་བསྐྱེད་བསྲིངས་པའི།།
རྣམ་གསུམ་ཁྲིམས་ཀྱི་ནོར་བུའི་རྐང་འཐུང་མཆོག།
དོན་གཉིས་འབྲས་བུའི་ཁུར་ལྡན་གཡུར་ཟ་བ།།
སྐུ་གསུམ་མངོན་དུ་མཛད་ལ་གསོལ་བ་འདེབས།།
རྩེ་གཅིག་གསོལ་བའི་མ་ལ་ཡ་རླུང་གིས།།
རྗེས་བརྩེའི་སྤྲིན་སྔོན་ཕུང་པོ་གཡོ་བ་ལས།།
གྲུབ་གཉིས་བདུད་རྩིའི་ཐིག་ཕྲེང་ཕེབས་པ་དང་།།
སྐུ་བཞིའི་འབྲས་བཟང་མཆོག་གི་སྨོན་པ་སྩོལ།།
སྐྱེ་བ་ཀུན་ཏུ་ཡང་དག་བླ་མ་དང་།།
འབྲལ་མེད་ཆོས་ཀྱི་དཔལ་ལ་ལོངས་སྤྱོད་དེ།།
ས་དང་ལམ་གྱི་ཡོན་ཏན་རབ་རྫོགས་ནས།།
རྡོ་རྗེ་འཆང་གི་གོ་འཕང་མྱུར་ཐོབ་ཤོག།
