སྐྱབས་རྗེ་ངོར་ཀླུ་ལྡིང་མཁན་རིན་པོ་ཆེ་འཇམ་དབྱངས་བསྟན་པའི་ཉི་མ་ལ་གསོལ་བ་འདེབས་པ་དད་པའི་དྲི་བསུང་འཕྲོ་བ་ཞེས་བྱ་བ་བཞུགས་སོ།།
དཀར་མཛེས་ཟླ་བ་བྱེ་བ་གཅིག་གྱུར་པ།།
དཀར་མཛེས་པདྨའི་དཀྱིལ་ནས་ཕྱུང་མ་ཐག།
དཀར་མཛེས་གངས་རིའི་ཕྲག་པར་འཆར་འདྲ་བའི།།
དཀར་མཛེས་འཕགས་མ་སྒྲོལ་མས་དངོས་གྲུབ་སྩོལ།།
རབ་འཇ༵མ་ཐུགས་རྗེ་བལ་གྱིས་འགྲོ་རྡུལ་སྡུད།།
རབ་སྙན་དབྱང༵ས་ཀྱིས་ཕྱིན་དྲུག་ཆོས་སྒྲ་སྒྲོགས།།
རབ་ཟབ་རྒྱལ་བསྟན༵་པདྨོ་རྒྱས་པ༵འི་གཉེན།།
རབ་མཆོག་བསྟན་འགྲོའི་ཉི༵་མ༵ར་གསོལ་བ་འདེབས།།
ཕན་འདོད་བྱམས་པའི་རྩ་བ་རབ་ཏུ་བརྟན།།
སྐྱོབ་འདོད་སྙིང་རྗེ་ལྗོན་པའི་ཡལ་འདབ་རྒྱས།།
བྱང་སེམས་མེ་ཏོག་འབྲས་བུའི་ཁུར་གྱིས་དུད།།
ཐེག་མཆོག་སྨན་གྱི་སྡོང་པོར་གསོལ་བ་འདེབས།།
སྐུ་གསུང་ཐུགས་འཇ༵མ་ཉེས་ལྟུང་རྡུལ་གྱིས་དབེན།།
ལེགས་བཤད་འདུལ་བའི་སྒྲ་དབྱང༵ས་སྙན་པར་སྒྲོགས།།
བསྟན༵་པའི༵་སྙིང་པོ་འདུལ་བ་འཛིན་པའི་རྗེ།།
སྐྱོན་མེད་དགེ་བའི་ཉི༵་མ༵ར་གསོལ་བ་འདེབས།།
དབང་བཞི་མགྱོགས་འགྲོས་ཀུན་གཞིའི་མཁའ་ལ་དྲངས།།
རིམ་གཉིས་འོད་ཀྱིས་མཚན་རྟོག་མུན་པ་འཇོམས།།
བདེ་སྟོང་པདྨོ་རྒྱས་ནས་ཡིད་སྐྱོབ་པའི།།
གསང་སྔགས་ཉིན་བྱེད་བདག་པོར་གསོལ་བ་འདེབས།།
འཇ༵མ་མགོན་མི་ཡི་སྲིད་བཟུང་ས་སྐྱ་པའི།།
ཟབ་ཆོས་གསུང་ངག་ལམ་འབྲས་གདམས་པའི་དབྱང༵ས།།
བསྟན༵་འགྲོ་གླིང་བཞིའི་དཔལ་དུ་རབ་སྟོན་པ༵འི།།
སྙན་བརྒྱུད་ཆོས་ཀྱི་ཉི༵་མ༵ར་གསོལ་བ་འདེབས།།
རབ་ཡངས་ཐུགས་བསྐྱེད་ནམ་མཁའི་གུར་ཁང་དུ།།
རབ་མཛེས་མཁྱེན་བརྩེ་ནུས་པའི་སྤྲིན་དཀྲིགས་ནས།།
རབ་མང་དམ་ཆོས་བདུད་རྩིའི་ཆར་འབེབས་པའི།།
རབ་མཆོག་ཀླུ་ལྡིང་མཁན་ཆེན་གསོལ་བ་འདེབས།།
རྫོགས་སངས་རྒྱས་རྣམས་བྱོན་རུང་མ་བྱོན་རུང་།།
ཆོས་ཉིད་སྤྲོས་དང་བྲལ་བའི་བདེན་པ་དང་།།
བདག་གིས་གུས་པས་གསོལ་བ་བཏབ་པའི་མཐུས།།
དྲང་སྲོང་མཆོག་གི་ཐུགས་དགོངས་རྫོགས་པར་ཤོག།
ཅེས་པ་འདི་ཡང་དཔལ་ལྡན་བླ་མ་དམ་པ་གང་གི་ཞབས་རྡུལ་དུ་སྤྱི་བོས་རེག་པའི་གསེར་མདོག་སྤྲུལ་སྐུ་ནས་སྔར་ཕུལ་བའི་གསོལ་འདེབས་དད་པའི་དྲི་བསུང་ལ་ཅུང་ཟད་ཁ་སྒྱུར་ནས་སླར་ཡང་གསོལ་བ་བཏབ་པས་ཚེ་རབས་ཐམས་ཅད་དུ་དཔལ་ལྡན་བླ་མའི་ཞབས་དྲུང་དུ་འཁོད་ནས་དམ་ཆོས་བདུད་རྩིའི་ཟིལ་མངར་ལ་ལྷུག་པར་ལོངས་སྤྱོད་པར་ཤོག་ཅིག །
