ཉེ་ཆར། ཡུས་ཧྲུའུ་བོད་རིགས་རང་སྐྱོང་ཁུལ་ནང་ཆེན་རྫོང་སྤྱི་བདེ་ཅུའུ་ནགས་ཚལ་ཉེན་རྟོག་རུ་ཆེན་གྱིས་རྩ་ཆེ་ཞིང་སྟོངས་ལ་ཉེ་བའི་རི་སྐྱེས་སྲོག་ཆགས་ལ་གནོད་འཚེ་བཏང་བའི་གྱོད་དོན་ཞིག་བདེ་བླག་ངང་རྩད་ཆོད་དེ། དོགས་ཡོད་ཉེས་ཅན4འཛིན་བཟུང་བྱས་པར་མ་ཟད། གྱོད་དོན་བཟོ་བའི་ཡོ་བྱད་དེ་ལྕགས་སྐུད་དང་གྲི་ཆས། རླངས་འཁོར་བཅས་ཀྱང་རྩད་གཅོད་བྱས།
ཟླ10པའི་ཚེས19ཉིན། ནང་ཆེན་རྫོང་སྤྱི་བདེ་ཅུའུ་ནགས་ཚལ་ཉེན་རྟོག་རུ་ཆེན་གྱི་མི་དམངས་ཉེན་རྟོག་པ་དང་ཉེན་རྟོག་ལས་རོགས་པས་སྤྲེལ་ཚྭ་ཤང་མངའ་ཁོངས་སུ་སྐོར་ཞིབ་བྱེད་སྐབས། སྤྲེལ་ཚྭ་ཤང་སྤྱི་ཐག་སྡེ་བའི་དགུན་སའི་རི་ཁྲོད་དུ་རི་སྐྱེས་སྲོག་ཆགས་རྔོན་པའི་ལྕགས་སྐུད་འབོར་ཆེན་ཡོད་པ་ཤེས་རྟོགས་བྱུང་། དེ་མ་ཉིད་དུ་རྫོང་སྤྱི་བདེ་ཅུའུ་ཏང་ཨུ་ལ་སྙན་སེང་ཞུས་ཤིང་། ཅུའུ་ཏང་ཨུ་ཡིས་ཚད་མཐོའི་མཐོང་ཆེན་བྱས་ཏེ་མྱུར་དུ་ཉེན་རྟོག་པ་ཉམས་མྱོང་ཅན་སྐོང་འཐེན་བྱས་པ་དང་། ནགས་ལས་སྡེ་ཁག་དང་མཉམ་འབྲེལ་འོག ཡུལ་དངོས་སུ་བརྟག་དཔྱད་དང་འདྲི་རྩད་བྱས་པ་བརྒྱུད། ཉིན་དེར་དོགས་ཡོད་ཉེས་ཅན་ཐལ་ཆེ་གེ་མོ་འཛིན་བཟུང་བྱས། དེའི་རྗེས་གཅིག་རྗེས་གཉིས་མཐུད་ངང་དོགས་ཡོད་ཉེས་ཅན་བསོད་ཆེ་གེ་མོ་དང་བུ་ཆེ་གེ་མོ། འཇམ་ཆེ་གེ་མོ་བཅས་འཛིན་བཟུང་བྱས་ཏེ་ཁྲིམས་ལ་སྦྱར། ཞིབ་བཤེར་བྱས་པ་བརྒྱུད། དོགས་ཡོད་ཉེས་ཅན་ཐལ་ཆེ་གེ་མོ་དང་བསོད་ཆེ་གེ་མོ། བུ་ཆེ་གེ་མོས་ཟླ10པར་གྲོས་མོལ་བྱས་ནས་མཉམ་དུ་ནང་ཆེན་རྫོང་སྤྲེལ་ཚྭ་ཤང་སྤྱི་ཐག་སྡེ་བའི་དགུན་སར་རྔོན་རྒྱག་ཡོ་བྱད་འཇོག་པ་དང་སྔ་རྗེས་སུ་ས་གནས་དེ་གར་སྲོག་ཆགས་འཛིན་བཟུང་བྱས་ཡོད་མེད་ལ་ལྟ་ཞིབ་བྱེད་པར་ཐེངས་མང་པོར་བསྐྱོད་ཅིང་། བདེན་དཔང་ཁུངས་བཙན་གྱི་མདུན་དུ་དོགས་ཡོད་ཉེས་ཅན་ཐལ་ཆེ་གེ་མོ་དང་བསོད་ཆེ་གེ་མོ། བུ་ཆེ་གེ་མོ། འཇམ་ཆེ་གེ་མོ་བཅས་ཀྱིས་ཉེས་གསོག་གི་དོན་དངོས་སྦ་གསང་མེད་པར་ཁས་ལེན་བྱས།
ཡོང་ཁུངས། མཚོ་སྔོན་བོད་ཡིག་ཁྲིམས་སྐྱོང་ཚགས་པར།
རྩོམ་སྒྲིག་འགན་ཁུར་བ། ཀླུ་མགོན་རྒྱལ།
ལྟ་སྐུལ་བ། གཡང་འབུམ་ཚེ་རིང་།
责编/冷公加
监制/杨本才让
投稿邮箱/3068276991@qq.com
བརྩམས་དབང་རྩོམ་མཁན་ལ་དབང་། དབང་གནོད་ཡོད་ཚེ་འཕྲལ་མར་ང་ཚོར་འབྲེལ་བ་གནང་རོགས།
版权归原作者所有，如有侵权请立即与我们联系
