འཛུམ་དཀར་འོ་མའི་མེ་ཏོག
花开茶香飘
ཚིག་རྩོམ་པ་པོ། རྡོ་གྲགས།
དབྱངས་རྩོམ་པ་པོ། རྫོགས་ཆེན་བསྟན་འཛིན།
གཞས་མ། ཚེ་དབང་ལྷ་མོ།
词：多智合
曲：佐庆丹真
原唱：泽旺拉姆
འཛུམ་ཆུང་འོ་མའི་མེ་ཏོག
ཞལ་ལ་བཞད་པའི་མཛེས་སྡུག་དང་པོ་ཡིན་ན།
ཞིམ་མངར་འོ་ཇ་དཀར་པོ།
ཞོགས་ལ་མཆོད་པའི་སྨོན་འདུན་དང་པོ་ཡིན་ཆོག
ཉི་མ་གསར་བ་རེ་ལ།
ཁྱེད་ཀྱི་གདོང་ན་འཛུམ་ཆུང་དྲོན་མོ་རེ་རེ།
ཞོགས་པ་གསར་བ་རེ་ལ།
ང་ཡི་ལག་ན་འོ་ཇ་དཀར་ཡོལ་གང་རེ།
འདི་ནི་ཉིན་དང་ཞག་ལ་བསྙལ་བའི་སྨོན་འདུན་དང་པོ་ཡིན།
འདི་ནི་ལོ་དང་ཟླ་ལ་བརྒྱུས་པའི་རེ་བ་དང་པོ་ཡིན།
བསྭོ་འོ། ནངས་རེ་ཞོགས་རེའི་སྨོན་ལམ་འདི་ལ་འཁོར་ན།
ཉིན་རེ་ཞག་རེའི་བསམ་དོན་འདི་ལས་འགྲུབ་ཡོང་།
འཛུམ་མདངས་འོ་མའི་མེ་ཏོག
ང་ལ་གནང་བའི་སྨོན་འདུན་འགོ་མ་ཡིན་ན།
ཞིམ་མངར་འོ་ཇ་དཀར་པོ།
ཁྱེད་ལ་མཆོད་པའི་རྟེན་འབྲེལ་ཐོག་མ་ཡིན་ཆོག
འཛུམ་མདངས་དྲོན་མོས་བསྐོལ་བའི།
ཞིམ་མངར་འོ་ཇ་དཀར་པོ་ཁ་ལ་ཞིམ་སོང་།
འོ་ཇའི་མདངས་ལས་འཁྲུངས་པའི།
འཛུམ་མདངས་འོ་མའི་མེ་ཏོག་མིག་ལ་མཛེས་སོང་།
འདི་ནི་ཉིན་དང་ཞག་ལ་བསྙལ་བའི་སྨོན་འདུན་དང་པོ་ཡིན།
འདི་ནི་ལོ་དང་ཟླ་ལ་བརྒྱུས་པའི་རེ་བ་དང་པོ་ཡིན།
བསྭོ་འོ། ཟླ་རེ་ལོ་རེའི་ཁ་ལས་འདི་ལ་བཅོལ་ན།
ལོ་དང་ཟླ་བའི་སྨོན་ལམ་འདི་ལས་འགྲུབ་ཡོང་།
