རྔ་བ་ཁུལ་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱིས་ཚན་རིག་ཁྱབ་སྤེལ་དང་ཀློག་དེབ་མཚམས་སྦྱོར་ཚོགས་འདུ་ཁྲེང་ཏུའུ་ནས་འཚོགས།
2024ལོའི་ཟླ12ཚེས་18ཉིན་རྔ་བ་ཁུལ་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱིས་སྤྱི་ཚོགས་ཚན་རིག་ཁྱབ་སྤེལ་དང་ཀློག་དེབ་མཚམས་སྦྱོར་ཚོགས་འདུ་དེ་སི་ཁྲོན་ཞིང་ཆེན་སྤྱི་ཚོགས་ཚན་རིག་ཁང་དུ་སྤེལ་བ་རེད།
ཚོགས་འདུའི་ཐོག་རྔ་བ་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཧྲུའུ་ཅི། ཀྲུའུ་ཞི། ཁུལ་སྲིད་ཇུས་ཞིབ་འཇུག་ཚོགས་པའི་ཚོགས་གཙོ་ཁྲེན་ཧྲུན་ཆིང་ལགས་ཀྱིས་རྔ་བ་ཁུལ་ལ་རང་བྱུང་ལས་གྲུབ་པའི་ངོ་མཚར་བའི་ཡུལ་གྱི་བཀོད་པ་དང་མཛེས་ཤིང་ལྟ་ན་སྡུག་པའི་རི་ཆུ་གཙང་གསུམ་ཡོད་པ་མ་ཟད། མི་རིགས་འདྲ་མིན་གྱི་རིག་གནས་འབྲེལ་འདྲེས་བྱུང་བ་ལས་རིག་གནས་ཀྱི་བང་མཛོད་ལྟ་བུ་ཆགས་ཡོད། བོད་རིགས་དང་ཆའང་རིགས།ཧུའེ་རིགས།རྒྱ་རིགས་སོགས་མི་རིགས་ཁག་གི་མི་དམངས་རྣམས་གནས་འདིར་གཞིས་ཆགས་ཤིང་འཚོ་བ་རོལ་བ་དང་། ཁོང་ཚོས་རང་རང་གི་བློ་གྲོས་དང་དཀའ་སྤྱད་འབད་བརྩོན་ལ་བརྟེན་ཏེ་ཐུན་མོང་མ་ཡིན་པའི་འཚོ་བའི་མཛེས་རིས་ཤིག་བསྐྲུན་ནས་བབ་ཆགས་ཤིང་གསོན་ཉམས་ལྡན་པའི་གནའ་བོའི་རིག་གནས་ཀྱི་གཟི་དཔལ་རབ་ཏུ་རྒྱས་པར་བྱས་ཡོད། དེའི་ཕྱིར་ཚན་རིག་ཁྱབ་སྤེལ་གྱི་ཀློག་དེབ་འདི་དག་ནི་རྔ་བ་ཁུལ་གྱི་ཤེས་བྱའི་བང་མཛོད་ཀྱི་སྒོ་ཆེན་འབྱེད་པའི་གསེར་གྱི་ལྡེ་མིག་ལྟ་བུ་ཞིག་ཏུ་ཆགས་ཡོད་ཅེས་བཤད།
རྒྱུས་ལོན་བྱུང་བ་ལྟར་ན། ཀློག་དེབ་འདི་དག་ནང་རྔ་བ་ཁུལ་གྱི་ལོ་རྒྱུས་དང་། རིག་གནས། སྤྱི་ཚོགས་སོགས་ཕྱོགས་མང་པོའི་ཐད་ཀྱི་ཞིབ་འཇུག་གྲུབ་འབྲས་དང་བསམ་བློ་འདུས་ཡོད་པས། རྔ་བ་ཁུལ་གྱི་ལོ་རྒྱུས་རིག་གནས་རྒྱུན་འཛིན་དང་སྤྱི་ཚོགས་འཕེལ་རྒྱས་ཀྱི་འགྲེལ་བཤད་ཅིག་ཡིན་པ་མ་ཟད།ད་དུང་ང་ཚོས་ས་གནས་མི་རིགས་ཀྱི་ལོ་རྒྱུས་རིག་གནས་ལ་རྒྱུས་ལོན་བྱེད་པའི་སྒེའུ་ཁུང་ལྟ་བུ་ཞིག་ཏུ་གྱུར་ཡོད།
ཐེངས་འདིའི་ཚོགས་འདུའི་ཐོག་ད་དུང་ཞིང་ཆེན་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་འགོ་འཛིན་གཙོས་རྩོམ་པ་པོའི་འཐུས་ཚབ་དང་འབྲེལ་ཡོད་མི་སྣས་རྔ་ཁུལ་གྱི་ཐུན་མོང་མ་ཡིན་པའི་བོད་ཆའང་མི་རིགས་གཙོས་པའི་མི་རིགས་ཁག་གི་ལོ་རྒྱུས་རིག་གནས་དང་། ཡུལ་སྲོལ་གོམས་གཤིས། སྤྱི་ཚོགས་གྲུབ་ཚུལ། ལྷག་པར་དུ་རྔ་བ་ཁུལ་གྱི་སྤྱི་ཚོགས་ཚན་རིག་གི་འཕེལ་རྒྱས་དང་གནས་བབ་བཅས་ཀྱི་ཐད་ནས་གསུང་བཤད་ཟབ་རྒྱས་གནང་བར་མ་ཟད། ཚང་མས་རྔ་བ་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱིས་ལོ་ངོ་དུ་མའི་རིང་བརྩོན་པ་ལྷུར་ལེན་ཀྱིས་བསྒྲུབས་པའི་སྤྱི་ཚོགས་ཚན་རིག་གི་ལས་ཀ་ལ་གདེང་འཇོག་མཐོན་པོ་གནང་ཞིང་། མ་འོངས་པར་ཁུལ་སྤྱི་ཚོགས་ཚན་རིག་གི་བྱ་གཞག་དང་འཕེལ་རྒྱས་ཀྱི་མདུན་ལྗོངས་ཡངས་ཤིང་རྒྱ་ཆེ་བའི་འདོད་ཚུལ་བསྟན་པ་རེད།
དེ་མིན་ཚོགས་འདུའི་ཐོག་རྒན་ཡུས་རུའེ་ཀྲའོ་ཡིས་བརྩམས་པའི་༼མཛེ་ནད་གྲོང་ཚོའི་ལོ་རྒྱུས་དངོས༽་དང་། རྒན་ཀྲེང་ཀང་གིས་བརྩམས་པའི་༼ཆུ་ཆེན་ཡུལ་སྐད་ལོ་རྒྱུས།༽ རྒན་དབྱི་ཆིང་གིས་བརྩམས་པའི་༼ པར་རིས་ལམ་ནས་འགྲེལ་བའི་རྔ་བའི་ཏཱ་ཡུས་ཀྱི་རྗེས་ཤུལ།༽རྒན་སྒྲོལ་དཀར་སྐྱིད་ཀྱིས་བརྩམས་པའི་༼མདོ་གླིང་རྒྱལ་པོ་མཐའ་མའི་ངག་རྒྱུན་དང་བརྙན་པར་ལོ་རྒྱུས།༽ རྒན་ཏཱ་རེ་སྐྱིད་ཀྱིས་བསྒྱུར་བའི༼ལོ་བརྒྱའི་སྔོན་ཕྱི་གླིང་བ་རྔ་བར་བསྐྱོད་པའི་ཡུལ་སྐོར་ཟིན་བྲིས་༽སོགས་ཀློག་དེབ་སྣ་ཚོགས་མཚམས་སྦྱོར་བྱས་པ་རེད།
རྩོམ་སྒྲིག་པ། མཚོ་ལྷ།
ཞུ་ཆེན། པ་སངས་རྡོ་རྗེ།
གཙོ་སྒྲིག་པ། མཁའ་འགྲོ་ཚེ་རིང་།
ལྟ་སྐུལ་པ། འཆི་མེད་དབང་མོ།
གོང་གི་ཚད་གཉིས་ཨང་གྲངས་བཤེར་འབེབས་བྱས་ན་
ཁམས་པའི་བརྙན་འཕྲིན་གྱི་ལེ་ཚན་ཆ་ཚང་གཟིགས་ཐུབ།
关注我们
微信号 ：weikangba
新浪微博 ：康巴藏语卫视
ཤམ་བྷ་ལ་ཆ་འཕྲིན་ཕབ་ལེན་བྱས་ན་བོད་ཁུལ་གྱི་ཆ་འཕྲིན་གསར་པ་གང་མང་གཟིགས་ཐུབ་པར་མ་ཟད། གླུ་གར་དང་བོད་སྐད་བརྙན་འཕྲིན་ཟློས་གར། གློག་བརྙན། འཆད་ཁྲིད། རོལ་དབྱངས་སོགས་ཆབ་དཔལ་རིག་གསུམ་གང་ཡིན་ཡང་རང་ཉིད་ཀྱི་འདོད་མོས་ལྟར་གཟིགས་ཆོག
