شەبەرلەردى تاربيەلەدى

اۆتونوميالى رايوندىق اۆتوكولىك جوندەۋ شەبەرلىگى جارىسى تاياپ قالدى، 11-ايدىڭ 19-كۇنى التاي مال شارۋاشىلىق-مال شيپاگەرلىك كاسىپتىك مەكتەبىنىڭ (بۋرىلتوعاي اۋداندىق تەحنيك جۇمىسشىلار مەكتەبى) دايىندىق قىزمەتى دابىرالى ىستەلدى.

اۆتوكولىك رەمونتتاۋ اۋماعىندا وقۋشىلار ءبىر اۆتوكولىكتىڭ توڭىرەگىنە جينالىپ، اۆتوكولىكتەن پايدالانۋ جانە رەمونتتاۋ كاسىبىنەن شينجياڭعا كومەككە كەلگەن وقىتۋشى جيا يانجىنىڭ موتوردىڭ كىنارات بەلگىسى جونىندەگى ەگجەي-تەگجەيلى تۇسىندىرمەسىن دەن قويا تىڭدادى. جيا يانجى ءبىر جاعىنان ءتۇسىندىرىپ، ەندى ءبىر جاعىنان ءاربىر ۇساق بولشەكتەردى شەشۋ جانە تەكسەرۋ بارىسىن كورسەتتى، وقۋشىلار مۇقيات باقىلاپ، مۇقيات ەستەلىككە الدى. نازاريا مەن امالياتتى ۇشتاستىرعان مۇنداي وقىتۋ ءتاسىلى وقۋشىلاردىڭ ۇيرەنۋ ونىمدىلىگىن ارتتىرىپ، تەحنيكالىق ورەسىن بارىنشا جوعارىلاتتى.

اۆتوكولىك تۇلعاسىن قالپىنا كەلتىرۋ تەحنيكالىق كۋرسىندا دا امالياتقا باسا ءمان بەرىلدى. وقۋشىلار رەمونتتاۋ ورنىندا مەتال تاقتانى رەمونتتاۋ جانە سىر بۇركۋ تەحنولوگياسىن ۇيرەندى. اۆتوكولىكتىڭ قابىسقان جەرىن قالپىنا كەلتىرۋدەن سىردى مايدالاۋعا، بۇركۋگە دەيىن ءاربىر باسقىشتا قاتاڭ كاسىپتىك ولشەم بويىنشا اتقارۋ تالاپ ەتىلەدى.

اۆتوكولىك رەمونتتاۋ كاسىبىنەن سىرت، بۇل مەكتەپ باسقا كاسىپتەردەن شينجياڭعا كومەككە كەلگەن وقىتۋشىلاردىڭ رولىن ساۋلەلەندىرىپ، وقىتۋ ساپاسىن جاپپاي جاقسارتتى.

كومپيۋتەر عىلىمى جانە تەحنيكاسى كاسىبىندە شينجياڭعا كومەككە كەلگەن وقىتۋشى جاڭ چىڭجياڭ نازاريالىق بىلىمدەردى ۇيرەتۋمەن بىرگە، امالياتتىق جاتتىعۋعا دا ءمان بەردى. ول وقىتۋ پروگرامماسى مەن دارىندىلاردى تاربيەلەۋ جوباسىن ىرىقتىلىقپەن ساپالىلاندىردى ءارى ساباقتان سىرتقى ۋاقىتتارىنان پايدالانىپ مەكتەپتىڭ كومپيۋتەر ۇيىندەگى 200 دەن استام جابدىقتىڭ دارەجەسىن جوعارىلاتىپ، وقۋشىلاردىڭ قازىرگى بايلىقتان تولىق پايدالانىپ، ۇيرەنۋىنە جانە امالياتتان وتكىزۋىنە كەپىلدىك ەتتى. جاڭ چىڭجياڭ بىلاي دەدى: ءوزىم يگەرگەن بارلىق بىلىمدەردى ولارعا ۇيرەتىپ، ولاردىڭ ءبىر ونەر يگەرۋىنە مۇمكىندىك جاسايمىن.

ەلەكتروندىق ساۋدا كاسىبىندە شينجياڭعا كومەككە كەلگەن وقىتۋشى چىڭ كۇن وقۋشىلارعا تىكە تاراتۋدا زات ساتۋدى ۇيرەتتى؛ جۇڭگوشا تاعامداردى ازىرلەۋ اسپازدىق كاسىبىندە شينجياڭعا كومەككە كەلگەن وقىتۋشى شۇي چۇن-ياڭ وقۋشىلاردىڭ جۇڭگوشا تاعام ازىرلەۋىنە جەتەكشىلىك ەتتى؛ حاتكەرلىك ساباقحاناسىندا شينجياڭعا كومەككە كەلگەن وقىتۋشى جاۋ فۋحاي وقۋشىلارعا حاتكەرلىك ونەرىن ۇيرەتتى... ءارقايسى كاسىپتە ءاربىر وقىتۋشى وقۋشىلاردىڭ كاسىپتىك ونەرىن ۇشتاۋ، جالپىلىق ساپاسىن جاقسارتۋ جولىندا قاجىماي-تالماي قۇلشىندى.

التاي مال شارۋاشىلىق-مال شيپاگەرلىك كاسىپتىك مەكتەبىنىڭ (بۋرىلتوعاي اۋداندىق تەحنيك جۇمىسشىلار مەكتەبى) وزەكتى كاسىپتەرىنىڭ ءبىرى مال تۇلىگى، ءۇي قۇستارى ءوندىرىس تەحنيكا كاسىبىنە شينجياڭعا كومەككە كەلگەن وقىتۋشى ليۋ بين، ۋاڭ يۇڭ، دۇڭ گۇيحۇڭدار كەلىپ ساباق ءوتتى. ولار ”ميكروسكوپپەن پارىقتاۋ“، ”سيىردىڭ سىرتقى ءپىشىنىن ساراپتاۋ جانە ولشەۋ“ سياقتى ساباقتاردى اشۋ ارقىلى وقۋشىلاردىڭ اماليات بارىسىندا مال تۇلىگى مەن ءۇي قۇستارىنىڭ فيزيولوگيالىق قۇرىلىمى مەن ءوسىپ-جەتىلۋ زاڭدىلىعىن ۇيرەنۋىنە جانە يگەرۋىنە مۇمكىندىك جاساپ، ولاردىڭ بولاشاقتا مال شارۋاشىلىق-مال شيپاگەرلىك قىزمەتىمەن شۇعىلدانۋىنا بەرىك نەگىز قالادى.

جيليننىڭ كاسىپتىك وقۋ-اعارتۋ ارقىلى شينجياڭعا كومەكتەسۋ قىزمەتىنىڭ ۇزدىكسىز تەرەڭدەۋىنە ىلەسە التاي مال شارۋاشىلىق-مال شيپاگەرلىك كاسىپتىك مەكتەبى (بۋرىلتوعاي اۋداندىق تەحنيك جۇمىسشىلار مەكتەبى) ايماقتىڭ كاسىپتىك وقۋ-اعارتۋ سالاسىندا اناعۇرلىم شۇعىلا شاشىپ، اناعۇرلىم كوپ جوعارى ساپالى تەحنيكالىق دارىندىلاردى جەتىلدىرەتىن بولادى.