11-ايدىڭ 19-كۇنىنەن 20-كۇنىنە دەيىن ”داپ شالىنىپ، ءان شىرقالدى“ تۇڭعىش كەزەكتى جۇڭگو شينجياڭ حالىقتىق كوركەمونەر ماۋسىمىنىڭ 3-كەزەكتى سارالاۋ قيمىلى (حالىقتىق مۋزيكا ءتۇرى) التاي قارلى مەكەن تەاترحاناسىندا قويىلدى.
وسى رەتكى قيمىلعا بۇكىل شينجياڭنىڭ ايماق، وبلىس، قالالارىنان جانە شينجياڭ ءوندىرىس-قۇرىلىس بيڭتۋانىنان كەلگەن حالىقتىق مۋزيكا تۇرىندەگى 40 ءنومىر قاتىناستىرىلىپ، فورماسى الۋان ءتۇرلى، مازمۇنى باي بولدى. «قارا جورعا»، «ارمان»، «اسپانىڭ اشىق بولسىن»، «مۇقام كوكتەمى»، «ءماستۇرحان»، «لوپنۇرعا كەلىڭىز» قاتارلى مۋزيكالار الما-كەزەك قويىلدى. مۇندا، وركەستر، جەكە ءان ايتۋ قاتارلى ويىن نومىرلەرى تارتىمدى بولىپ، شينجياڭداعى حالىقتىق كوركەمونەردىڭ وزگەشە تارتىمدىلىعى مەن ءار ۇلت بۇقاراسىنىڭ اسقاق رۋحىن ايگىلەدى.
”بۇگىنگى كونسەرت وتە تارتىمدى بولىپ، مۋزيكالار كوڭىلىمىزدى تەربەدى. اسىرەسە، سوقپالى مۋزيكا اسپاپتارى مەن باسقا مۋزيكا اسپاپتار وركەسترى ورىنداعان مۋزيكالار مەنى ايرىقشا ءتانتى ەتتى“،-دەدى التاي قالاسىنىڭ تۇرعىنى ما شۋەمەي.
”التايداعى بۇقارالىق مادەنيەتتىڭ قاتپارى قالىڭ، جەر-جەردەگى حالىق ونەرپازدارىمەن ۇيرەنۋ، اۋىس-كۇيىس جاساۋ ارقىلى حالىق اراسىنداعى كوركەمونەردى اناعۇرلىم ويداعىداي اشۋعا جانە جالعاستىرۋعا بولادى“،-دەدى ايماقتىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى پارتگرۋپپاسىنىڭ ورىنباسار شۋجيى، مەكەمە باستىعى ءدىلدا ءنابي قىزى.
ورتالىق ۇلتتىق مۋزيكا ۇيىرمەسىنىڭ ورىنباسار باستىعى، 1-دارەجەلى ورىنداۋشى تاڭ فىڭ وسى رەتكى قيمىلعا جوعارى باعا بەردى. ول بىلاي دەدى: تۇڭعىش كەزەكتى شينجياڭ حالىقتىق كوركەمونەر ماۋسىمى شينجياڭنىڭ حالىقتىق مۋزيكالارىنىڭ، ءان-بيلەرىنىڭ شوعىرلى كورسەتىلۋى ءارى شينجياڭداعى از ۇلتتاردىڭ كوپ نەگىزدى مادەنيەتىنىڭ ايگىلەنۋى. مۇندا، ەڭكەيگەن قارتتان، ەڭبەكتەگەن بالاعا دەيىن ونەر كورسەتىپ، قاتىناسقان ادام سانى كوپ، جاس پارقى زور بولىپ، جالپى حالىق شاتتىققا شومىپ، حالىقتىڭ مادەنيەت سەنىمىن ايگىلەدى.
ۇعىسۋعا قاراعاندا، 3-كەزەكتى سارالاۋ بارىسىندا مامان باعالاۋشىلار ورىندالعان ويىن نومىرلەرىنىڭ يدەياسىنا، بۇقارالىق سيپاتىنا، كوركەمونەرلىك ورەسىنە قاراي ءنومىر قويىپ، ەڭ سوڭىندا، 12 تاڭداۋلى حالىقتىق مۋزيكا ءنومىردى باعالاعان. وسى ويىن نومىرلەر جابىلۋ سالتىنا جانە شينجياڭنىڭ تاڭداۋلى حالىقتىق نومىرلەرىن ارالاپ قويۋعا قاتىناسادى ەكەن.
来源：雪都嘟/阿勒泰地区融媒体中心
记者：董世菊 实习记者 刘欢
编辑：哈尔勒哈西·毛吾列提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
