11-ايدىڭ 20-كۇنى ايماقتىق جۇڭگوشا ەمشىلىگى شيپاحاناسىنىڭ (قازاق ەمشىلىگى شيپاحاناسى) ”وكپەڭىزدىڭ قىزمەتىنەن حاباردار بولىڭىز“ اتىنداعى دۇنيە جۇزىلىك سوزىلمالى توسىلۋ سيپاتتى وكپە اۋرۋ كۇنى اقىسىز دياگنوز قويۋ قيمىلىن وتكىزىپ، قالىڭ بۇقارانىڭ سوزىلمالى توسىلۋ سيپاتتى وكپە اۋرۋىنان ساقتانۋ جانە ونى ەمدەۋ تانىمىن ونان ارى كۇشەيتىپ، ناۋقاستاردىڭ ەمدەلۋ ىرىقتىلىعى مەن بەلسەندىلىگىن قوزعادى.
ۇعىسۋعا قاراعاندا، ءار جىلى 11-اي ”بۇكىل دۇنيە جۇزىلىك وكپە راگىنا نازار اۋدارۋ ايى“ ەكەن. بيىل 11-ايدىڭ 20-كۇنى 23-رەتكى ”سوزىلمالى توسىلۋ سيپاتتى وكپە اۋرۋ كۇنى“ بولىپ، قيمىلدىڭ نەگىزگى تاقىرىبى: وكپەڭىزدىڭ قىزمەتىنەن حاباردار بولىڭىز.
سول كۇنى ءۇرىمجى قالالىق جۇڭگوشا ەمشىلىگى شيپاحاناسى تىنىس جانە قاتەرلى، سالماقتى اۋرۋلار مەديتسينا ءبولىمىنىڭ اعا شيپاگەرى، ماگيستر جەتەكشىسى جاڭ شياۋ-ي جانە ونىڭ ساپارلاستارى اقىل-كەڭەس سۇراۋعا كەلگەن بۇقارا مەن ناۋقاستارعا كاسىپتىك دياگنوز قويۋ جانە اۋرۋ جاعدايىن باعالاۋ جاعىنان قىزمەت وتەدى ءارى بۇقارانىڭ وكپە قىزمەتىن تەگىن تەكسەرىپ، ناقتى جاعدايعا قاراتا ەگجەي-تەگجەيلى تۇسىنىك جاساپ، ۇعىسقان ءتۇرلى ماسەلەسىنە سابىرلىلىقپەن جاۋاپ بەردى.
ماماندار 40 جاستان اسقاندار، ۇزاق ۋاقىت تەمەكى شەككەندەر، كاسىپ نەمەسە قونىستانۋ ورتاسى سەبەبىنەن ۋلى، زياندى گاز بەن تۇيىرشىكتەردى ۇزاق ۋاقىت سىمىرگەندەر، تىنىس جولى قايتا-قايتا قابىناتىن ادامدار توبىنىڭ بارلىعى سوزىلمالى توسىلۋ سيپاتتى وكپە اۋرۋىنا شالدىعاتىن جوعارى حاۋىپ-قاتەرلى ادامدار ەكەندىگىن ەسكەرتتى. قىس ماۋسىمىندا سۋىقتان قورعانىپ، جىلى كيىنۋگە ەرەكشە كوڭىل ءبولىپ، تۇماۋ مەن جۇقپالى تۇماۋدان ساقتانۋدى، جوتەلۋ، قاقىرىق ءتۇسۋ، تىنىسى تارىلۋ قاتارلى اۋرۋ بەلگىلەرى بايقالسا، دەر كەزىندە ەمدەلۋ كەرەكتىگىن ايتتى.
اقىسىز دياگنوز قويۋ بارىسىندا، ماماندار بۇقارانىڭ ءدارى ىستەتۋدە جولىققان ماسەلەسىنە ەگجەي-تەگجەيلى جاۋاپ بەرىپ، ناۋقاستىڭ ءدارى ءىشۋدى ارناعا تۇسىرۋىنە كەپىلدىك ەتتى. سونىمەن بىرگە، ناق مايداندا تىنىس الۋ ادىستەرىن كورسەتۋ ارقىلى ناۋقاستىڭ ۇيلەسىمدى ارەكەت جاساۋىنا جەتەكشىلىك ەتىپ، ولاردىڭ تۇرمىس ساپاسىن جاقسارتۋىنا كومەكتەسىپ، اۋرۋ جاعدايىن ءونىمدى تۇردە باسەڭدەتتى.
ايماقتىق جۇڭگوشا ەمشىلىگى شيپاحاناسى (قازاق ەمشىلىگى شيپاحاناسى) تىنىس جولى جانە قاتەرلى سالماقتى اۋرۋلار ءبولىمىنىڭ مەڭگەرۋشىسى چىن لين بىلاي دەدى: ءبىز بۇقارانىڭ سوزىلمالى توسىلۋ سيپاتتى وكپە اۋرۋى جونىندەگى تانىمىن تەرەڭدەتۋگە ۇزدىكسىز كۇش سالىپ، سالاماتتىق لەكسياسى، اقىسىز دياگنوز قويۋ قيمىلى قاتارلى فورمالار ارقىلى قالىڭ بۇقاراعا سالاماتتىق جاعىنان اناعۇرلىم جان- جاقتىلى قىزمەت وتەيمىز جانە كومەكتەسەمىز.
来源：雪都嘟/阿勒泰地区融媒体中心
记者：古扎丽·阿布都热西提
编辑：哈尔勒哈西·毛吾列提
一审：米拉木古丽·穆斯那提
二审：铁木尔哈孜·木坦
终审：吐尔德别克·哈力别克
